ماعد لهم بعد الخساره من يسار ومن يمين=الا يحطون اللحاف / على الفراش/ ويحلمون
ثالث هزيمه في سنه / والله يعين الحارسين=اللي ليا شافوا الحقيقه / يمسكون / ويفلتون
والرابعه عيسى المحياني تركهم / حايرين=رفض لجاجتهم /وقال العقل خير من الجنون
صاروا مثل من يمشي الظلما بدرب التايهين=يصدم حجر/ يصدم شجر/ولايرى كُبر الحصون
هذي مأثرهم تورّث / من سنينّ/ في سنين=جملة صور تحمل /صفات الحقد الأسود/ والظنون
شفهم لزلات الزعيم / وغلطته مترصدين=ماعندهم غيره شغل في عصف / والا في سكون
هم يحسبوا نوماسهم/ والمجد/ والعلم السمين=لامن تسابق ركبهم / على الهلالي / يكذبون
عشرة سنين بالتمام / وحالهم/ حالً حزين=لامجد يفرحهم / ولامنجز/ ولاهم يحزنون
ياصبر الارض وناسها / على العباد المفترين=اللي على كل /الوجيه الطيّــبه/ يتطاولون
الله يالأزرق / يجنّبك الحسد والحاسدين=ويكفيك من شر الحســوديه / وشر الحاقدون
باقي معي كلمه/ وبرسلها/لبعض الفاشلين=اقولها! ماقولها !! اقولها !!والا بدون !!

ماكل جاهل جاز له بدع الامثال=وين انت رايح ياسعود الصرامي
تهبد على كيفك في القيل والقال=مثل البعير اللي يسير متعامي
ماكن لك مبدا ومرجع ومنوال=وماكن لك نورً يشق الظلامي
وماكن لك بين الرجاجيل مدهال=يرفع مقامك بين كل الانامي
احيان اقول الله يشافيك بالحال=جرحك كبير ولانوى بالتئامي
ويش فيك باخر عمرك اصبحت تمثال=لحمك تقطع مابقى الا العظامي
موال تغدي به وترجع بموال=لاجبت لك معنى ولا( علم سامي)
ماطلت يوم الجابر بهمته طال=واصبح في الصف البعيد الامامي
عشرين عام وسامي بصف الابطال=وانته تخربش بالورق والاقلامي
لكن بعيده عن شواربك تغتال=اسمً تعلى فوق راس السنامي
يوم ان مجدك يصنعه عشرة اطفال=مجده غدي حول النجوم مترامي
عشرين عامً وانت بقفاي واقبال=وطيف سامي يزعجك بالمنامي
فتى الدشوش اللي تقوله ترى شال=اسم (السعوديه ) بكل اهتمامي
انصفه سلطان( الرياضه والافعال)=وترى العظائم مالها الا العظامي
وانصفه نواف بن فيصل بالاقوال=وانته تدور عيب مثل الحرامي
سامي زبون المجد ماضي ولازال=عضو اتحاد بلادنا بالنظامي
حاولت ثم حاولت. ومحال. ومحال=تنال من سامي (رفيع المقامي )
عشرين عامً وانت واشباه الاطفال=وسامي يحرككم قعود..و..قيامي
وصحافةً قامو لها شلة عيال=ماهي كفو للقدر والاحترامي
العز له مبدا وميراد ورجال=والا اللئامه طبع ناسً لئامي
وحنا نعز ابطالنا بكل الاحوال=محيسن وماجد ويوسف وسامي
وبعض الرجال ثياب وشماغ وعقال=وتحت الهدوم اوراق فكرً هلامي
ولكل (عقدة حبل )عاقد وحلال=الا الحماقه وقعها وقع دامي
هذي قصايدنا فريدات وجزال=توصل الى المدعو (سعود الصرامي )
والله ماينقص من المجد مثقال=لو تحترق سبابتك والابهامي
وان كان لك حيله مع الناس فاحتال=والا الخطيه ماعليها وسامي
ترى الخواتم خير من كل الاعمال=يالله في الخيره وحسن الختامي
وعداد مايهمل من الغيم همال=على النبي افضل صلاة وسلامي

شامخً في مكانك / يافريق الزعيم=ياجبل ماتهزك / عاتيات الرياح
فـ/الزمان الموالي /والزمان القديم=رمزللمقدريه/ والعطا /والنجاح
ابيضك/من بياض النور/ بعد السديم=وازرقك/صار للعالم عشانك وشاح
في حضورك/ حضور البرق مع كل غيم=وفي سماك النجوم / ان كان به نجم طاح
فيك صبر الحليم / وفيك جود الكريم=وفيك معنى الرياضه/ والوفا / والسماح
لك رجالك / هل الفزعات / في كل ضيم=ولك مباديك / عنها يابطل ماتزاح
ولك جماهيرك اللي / في شعارك تهيم=في محبتك/ تجتاح الدروب اجتياح
ماعشقناك حقد/ولاحملناك ضيم=ولا اهتويناك / من باب الهزل والمزاح
والله انا نحبك / من صميم الصميم=ولا لمحناك/ تاتي / نشوة الارتياح
كم نثرنا بدربك/ حب/ صادق / عظيم=وكم نظمنا/ على حسّك/ قصيدٍ قراح
مايضرك لئيم/ ولايردك غشيم=ياخذ الرد/منّك /مثل/ زرق الرماح
انت تاريخ مايقبل/ جدال اللئيم=لونشر/ حجته فوق الثريا/ وصاااح
اشتغل / ..بالتأمر/ في سواد العتيم=والكذب / والتجني / كل شيً مباح!!
حظك المجد كنّه لك/ صديقً حميم=والبطوله تجي / بالمرجله / والكفاح
اترك اللي يشب النار وسط الهشيم=يبطي / ولايشاهد /بيرق العز/ لاح
دام مافيه برطم/ كيف ينفخ شريم=مامعه /غير يحلم / بالمساء والصباح
حلم / بالانجليزيه/ يساوي/DREaM.=خلهم / يحلمون / وكل حلمٍ / متاح
يالهلال / انت موطــن / كل حرٌََعديم=تمضي / اجيال / لكن / مايغيب النجاح
طير والجو / جوّك يافريق الزعيم=مثل صقرً يزفه/للمعالي جناح

صاحبي /وش يكون المستحيل؟=من يجينــي/بعلمـــه /وخبره
هو صدى من (صدى صوت )القتيل؟=بعد ماحل/ جوف المقبره
او هو الشمس /في وقت الأصيل؟=لونها البرتقالي / تعصره
او هو الحلم /والبال الطويل ؟=في زمان/ الشغب / والشوشره
او هو مصافحة/ خشم الفتيل؟=لاغدى الزند/في عصمة مره
او هو الخافق / اللي مايميل ؟=للغنوج / اللعوب / المُُبهره
اوهو ابيات / من شعرٍ جزيل ؟=في كتا ب / العبث / والثرثره
صاحبي / صاحبك / تايه دليل=بعثرتني / النوايا / بعثره
اطرد احلام / ترمح رمح خيل=كنّها /شارده / من قسوره
مره/ اطلب من الحظ القليل=ومره اطلب من الحظ اكثره
جاك قلبي/ من اعماقي يسيل=بعد شحّت عليه المعذره
لو تكيل المدامع/ ماتكيل=حجة/ اهل الغرام /مزوّره
والبشر بين عدل/ وبين ميل=اقلقوني / بشغل السمسره
من نظم له من اجروحي اكليل=قلت لأبوك/ لأبو المسخره
ومن عطى صورتي وجهً بديل=غير وجهي / حرام اتشكره
مايحوز النذل/ قدر النبيل=لويقيس البحر بالمسطره
ولاعلى الارض من شيئّ ثقيل=اثقل / من انفسً/ متكبره
اجمل الجود جود/ ابن البخيل=واعظم العفو /عند المقدره
وابلغ الشعر/ ذاك اللي يخيل=بين حد الغضب والمغفره
اِن رقى/ فوق هامات النخيل=يدفن الجذع / والا/ يكسره
واِن توسّـدَ تراب الأرخبيل=ماشكى العود /جمر المجمره
صاحبي ليل/ يمضي بعد/ليل=وتذكره/ من بعدها / تذكره
لو يناير / بدا عامه طويل=كل عامــً/ وله/ ديسمبره
بين صمت الليالي / والرحيل=وش بقي يازمن / ماتظهره
عُمر/ في سيرته/ كنه دخيل=اوله / استبدّ / بأخره
صاحبي/ صاحبي / صبرجميل=لين يثمر/ سؤالي/ بثمره
من كثر /ماطلبت /المستحيل=صار صوتي / وانا له حنجره

مسكين / ياموتر / يسابق / أير باص =لو زودو/ سرعته/ يختل /ويحوص
ومعذور / ياجمهور / للهم مصاص=من كثر لسعات / ابن قحطان / مقروص
في كل حزه/ مالكم منه مخلاص=يعطيكم / المعلوم / مافيه منقوص
دفاعكم لامن لمح هدته / حاص=واحد يفحط شرق/ والثاني يعوص
ياسر / سفير الرقم عشرين قناص=ولشباككم / وياه / ميعاد/ مخصوص
يلعب / لنا / بابداع / واحساس واخلاص=وجمهوركم / يرجع/ مشتت/ ومخبوص
لوغاب / يعطيكم / هدفكم / على الخاص=ولالكم فكه / ولامنه مرخوص
وياللي غدى لاعراض الاجواد قصّاص=بكره/يدور الامر/وتصير مقصوص
خلك في الميدان/ واللعب / والباص=والبحر / لاهل البحر / والصيد / والغوص
وماتسبق الايرباص /ياراعي الشاص=يوم ان / ابن قحطان/ غواص / ويغوص

ياخاطري لاتضيق /ولايجيك احتباس=مادام فوق الثرى/ ما يستحق التعب
ارسم سحابة امل /فوق الديار اليباس=لعها تطلع النخله /بزاهي الرطب
الوقت خام الاماني/ والليالي قياس=والصبر زاد السنين /وغيثها المنسكب
وانا عيوني ترفّ/ ولايجيها نعاس=اليا تذكرت / ديوان العرب / والعرب
اتذكر البحتري / واتذكر ابو نواس=واشوف كل العجب / في مخرجات الكتب
ماتفرق السرقه العظمى /عن الاختلاس=الا كما الفرق مابين الحطب /والحطب
بعض الاماني ذهب /والا بعضها نحاس=وبعضها في ضمايرنا/ تشب اللهب
ياكم شجيعـٍ /يقال انه شديد المراس=تصيبه ام الركب/ لاقالو ام الركب
والا ليا صار في شرع الغيور التباس=يموت عرق الحياه /ولايموت الغضب
لاقام حظ الذي /يبني على غير ساس=ولاعاش من يفرق السومه /بسوق الذهب
ارزاقنا كثرها/من قلها/ مايقاس=الا بعمق الرضا/ في مكربات الكُـرب
واقدارنا/ لو ترد بكثرة الاحتراس=مامات من قبلنا فرعون / وابولهب
لكنها سيرةً تمضي /على كل راس=وياحظ راسً تعلق/ سيرته بالشهب
وياخاطري لاتضيق / ولايجيك احتباس=مادام فوق الثرى/ ما يستحق التعب

مايقدر التاريخ /يرجع بروحه=تاريخنا / الأبطال / هم من يعيده
هلال مثل النور/ باوضح وضوحه=المجد مجده/ والشدايد تزيده
واللي انجرح/ لو مايداوي جروحه=ياخذ من العالم/ جروحـً عديده
هبو /جماهير الزعيم/ الطموحه=وردو/ على/ اهل الحقد/ واهل المكيده
الامر مايحتاج / منا شروحه=الحلم غالي // والاماني بعيده
نبي مداحمة/ الخيول الجموحه=عند المداخل / والعزايم اكيده
نبي نشوف /بملعب اللعب /لوحه=لوحة جماهير/ الهلال الفريده
نبي زئير الليث/ باول جروحه=اللي ليا منه زأر/ طاح صيده
فارس عوض/ ملحوق /شدوه/ وبوحه=وعيسى ولد حربين/ نقدر نعيده
لكن هلال المجد / يبقى بروحه !!=هذي مصيبه // يالعقول الرشيده
تكفون / والايمان/ ماهي شحوحه=تكفون/ والوقفات /ماهي جديده
ولالكم منها /اعتذار/ وسموحه=هلالكم / منكم / وفيكم / نشيده
نجومكم/ للمجد/ تبني صروحه=وانتم لهم مثل/ الحبال الجويده
هلال مثل النور/ باوضح وضوحه=المجد مجده/ والشدايد تزيده
الله معه /في كل دربً يروحه=وحنا معه / في كل خطوه جديده

ماتهيت / ياجماهير الهلال=قدر الله/ وماشاء/ فعل
مو غريب /ان البطوله ماتُنال=ولاغرابه/ لو سقط /مره بطل
والعوض فيها / بوقفات الرجال=الرجال اللي /على قول / وفعل
هم يشيلون الثقال / من الثقال=هم في الشده / يعيدون الامل
فوز / مطلق / مستمر / هذا محال!=لكن العبره / على / طيب العمل
التنافس/ في ملاعبنا/ سجال=ومجد الازرق متصل / ماينفصل
غيرنا لابد /ياخذ له مجال=ومجدنا يمشي / ولافيها جدال
والفريق الاتحادي لاجدال=بارك الله له / ويستاهل / وصل
يالهلالي / بسالك هذ ا السؤال ؟=درع / ماجبناه / يعني وش حصل؟
بكره يتعوض / باذن رب الجلال=وفالنا التتويج / في ابهى الحلل
وانت يانادي الزعامه والجمال=جرح بالشوكه/ ولاطاح الجمل
المكاسب/ من يمينك /والشمال=والفشل ! /يامبعده عنك/ الفشل
كم سوال يموت بحلوق الرجال=لاعتلى الأزرق /على راس/ الجبل
الاجابه تنتظر /ود السوال=والهلال/ من الاجابه /مايمل
والعوض / ياهلال منّك / ياهلال=اسيـويــه/ عالميــه / يابطل

لا والله الا طاح/ حظ المساكين=وراحت عليهم/ من يمين وشمالي
مسكين ياللي تعشق النصر مسكين=بصيرتك ضاعت / من اول وتالي
ياصاحبي بالهرج/ رايح على وين=الحكم ماهو ياولد/ لك ولا لي
الحكم للملعب/ وكل البراهين=تشهد على كلمة / كبار الرجالي
شوف الذهب /عيار واحد وعشرين=في كل عامً من نصيب الهلالي
خمسين عامً /والبطولات خمسين=صار التتابع /والتسابق/توالي
عاشو الهلاليين/ مثل السلاطين=............ والله يوفقهم / على كل حالي
والمجد لاهل المجد/ ماهو بتخمين=ولاهو شتيمة منتدى/ او مقالي
وانتم بطولتكم/ بيان/ وبيانين=وتصريح يطعن / في ظهور الرجالي
عبر القضاء جمهوركم له لسانين=وينسحب وقت/ اللقا /والنزالي
اقوالكم مثل / الرعد والبراكين=وافعالكم / ماترتف/ع للعلالي
قلتوا الحكم قلنا/ ترى مستعدين=ايطالي /او بلجيكي /او برتغالي
ياما تعذرتوا من يسار ويمين=اعذاركم عداد/ ذر الرمالي
فريقكم شعرٍ/ بليا موازين=وشِعركم كنّه /فريق ارتجالي
يمكن يحقق له/ بطوله / وثنتين=لو لونه الأصفر/ غدى برتقالي!!!
بمدرجات الهم/ ذقتوا الأمرين=ودموعكم /عنوان كل الليالي
يوم الهلال /يزين /ويزين/ ويزين=ويبان مجده /فوق روس الطوالي
النصر كالطاير كسير الجناحين=لاهو يطير/ ولايصل للمعالي
بعيد عنه الكاس / وابعد من الصين=والدوري ابعد من/ طيوف الخيالي
اخر هزيمه جاتكم قبل يومين=ياسر عطاكم كاش / والسعر غالي
ياصاحبي والدين مايقضي الدين=ولا تقارن بالنحاس/ اللأ لي
شوف التطور واللعب كان لك عين=وشوف الرسوم الرائعه/ والجمالي
لملم جروحك بعد هذي المبارتين=واالثالثه جايه على كل حالي
عن سلّم الامجاد ما انتم بدارين=هوسُلـُمًـ للمشي /او سُلــّــم الي
والتذكره لابد تعرض بسعرين=وتباع للاصفر/ بعشرة ريالي
حرااااااام نحسبها عليهم بعشرين=وجمهورهم شوط/ ويشد الرحالي
وانا هلالي /نجم كل الميادين=امشي مع الانجاز/ والراس عالي
هذي حقايق واشهدو ياموامين=ارقام مافيها /كلام/ وجدالي
والا الكلام الشين من/ منطق الشين=اللي بميثاق الشرف/ مايبالي
ياهلال عشقك في قلوب الملايين=حبك سحابة عشق تمطر زلالي
يموت منطق في/ حلوق البزارين=ويعيش جمهور الهلال المثالي

الاحلام ثكلى/ والاماني جفوله=وقلبي بهمه/ من عنا الوقت مثقول
تمشيت /واتعبني/ القدم في نقوله=وانا ادوّر/ المجهول في كل مجهول
تصارعني /امواج المشاعر مهوله=وهذا الجفا/ ياسيدي /غير معقول
امرّك على الميعاد /حزة حصوله=وفي دفتري/ تضحك عصافير لـحقول
معك عذر/ لايمكن لقلبي قبوله=ومعي قلب/ من كثر المعاذير معلول
ويتعذرك قلبي /ويرسل رسوله=وقل الصبر /خلاه مخذول ..مخذول
يعوّد بحزنه/ كالمطر في هطوله=يغطي شغاف الارض/ بالعرض والطول
اسايرك/ واسايره /واجمع فلوله=وفي كل شهر/ارسل ثلاثين/ مرسول
يقولون (حرب الثار )جوله /وصوله=ولايشرب المقتول ./. من دم مقتول
احد مات/ من قبل الرضا لاينوله=وغيره على (جهد المطاليق) متكول
وابو زيد/ لو يخسر/ من الحرب جوله=يرد الهزيمه/ بعد ساعه/ على طول
لأنه يخاف/ على وسام الرجوله=وهو شايله/ باحساس ..وايدين ..وارجول
وانا اخاف من هجرك/ ونفسي ملوله=بعد ماتبين/ للوفا وجه مغسول
حبيبي غلاي/ اكبر من اللي تقوله=لو انك تقول الشعر صافي/ ومجزول
يمل البطل /من لعب دور البطوله=اذا صار كل الشعر بالحبر منقول
طربت لغنا طرفه/ على اطلال خوله=وغنيت للحرمان/ ياحول ..ياحول
امر القرى /والعيد باول حلوله=واسوّر على الجدران ..باحجار من لول
واسطر/ اساطير /الزمان المهوله=اساطير للعنقا./.واساطير للغول
كتبتك /ولحظاات الزمان العجوله=تقدم خريف العمر /من غير محصول
وقلبي بقي لك..والمعاليق حوله=وعن كل مايجتاحك /القلب مسئول
وبقي للمحبه /منك ذكرى خجوله=لها الود /والتقدير /والشكر/ موصول

ان كان ماباقي الا النصر يهزمنا=سلم على الملعب .وسلم على الكوره
اخوان واصحاب لاهانو ولاهنّا=لكن في اللعب كلاً حسب مقدوره
ازرق وابيض بالوانه تلوننا=واوصاف الابداع في طرياه ماثوره
فريقنا بالذهب والفوز يسعدنا=بمدجات الملاعب بان جمهوره
في داخل الملعب بلعبه يجملنا=ويثبت بانه في التاريخ اسطوره
والنصر حاضر مع العالم يشاركنا=حاضر ولكن غيابه يشبه حضوره
هلل يامنبع الابداع والفنا=ياصورةً مبدعه مابعدها صوره
معك على الحب يالازرق تضامننا=والله يوفقك.... والرايات منصوره
وان كان ماباقي الا النصر يهزمنا=سلم على الملعب .....وسلم على الكوره

ياللي / سالتم ياسر اليوم وينه ؟=اجيبكم / واقول : وين البطل/ وين؟
ياسر هنا / عند العقول الرزينه=ولا يحسّب/ للخبول المجانين
ياسر مع الامجاد يقضي سنينه=ياسر هناك / يطوف كل الميادين
ياسر / يثمن /بالكنوز الثمينه=معدن ذهب عيار واحد وعشرين
عند الذي هم بالوفا منصفينه=ياسر مكانه / داخل القلب والعين
ابن الوطن / وان صار للجد حينه=يهدي البشاير للوطن / والملايين
موجود ياسر فوق ظهر السفينه=ربان يحكمها / من يسار ويمين
في الكاس كاس العالم / وخابرينه=وفي اسيا حيّر جميع العناوين
هذا الفتى المغوار / تسلم يمينه=لبس لباس الفخر : حٌله وتاجين
لو ترفعون الصوت ياظالمينه=وتتوحدوا في صف /ماهو بصفين
لكم هدف لكن / ماتوصلونه=مادام حجتكم / بليا براهين
غنوا / وحنا كل شي حاسبينه=ونعم بياسر ثم ونعم / ونعمين
وشبا ككم صارت لرجله رهينه=يعتادها / في كل / شهرً وشهرين
احلامكم من بعد ياسر سجينه=وافراحكم / ابعد من الهند والصين
من جهلكم / واحقادكم / والضغينه=قامت / تلاعبكم / قرون الشياطين
كلامكم / ياكم لنا سامعينه=لكن صعبه / توصل العرض والدين
والكذب / صورتوه / ومصدقيه=مابه ضحيّه / لاتحدوا السكاكين
انتم ضحيه للفقر الغبينه=والله يستر حالكم / يامساكين
واللي يوجهكم / عسى الله يعينه=لابد ياتي يوم/ يقضي به الدين
لو الامانه / في ايادي امينه=ماحلت البومه / بوكر الشياهين
والخاتمه / ياهل العقول الذهينه=لاتظلمون الصقر راعي الجناحين
خلونظركم / في مدى لمح عينه=وخلو/ الشتايم / في حلوق البزارين
والا الكلام / يمر / شينه / وزينه=ويبقى الكلام الزين / ويغادر الشين
ويبقى على مر الزمان وسنينه=ياسر : قصيده في قلوب المحبين

سولفوا دام السواليف ماتسوى ريال=واهرجوا الين تنبت جماجمكم قرون
النتائج كاسحه مالكم / فيها مجال=والهزايم اربعً/ والخلايق يشهدون
الهزيمه الاوله/ درس /باطوال الجبال=الجبال اطوال وانتم تحتها تركضون
والهزيمه الثانيه /درس / بعزوم الرجال=للرجال عزوم / وقلوب/ وعقول / ومتون
والهزيمه الثالثه / درس/ في مجد الهلال=مجد تذكره الليالي / وتشربه العيون
والهزيمه الرابعه /سيبوا احلام الخيال=العرب راحوا بالانجاز // وانتم تحلمون
صوتكم عالي وياكثركم عند الجدال=هرجكم زايد/ ووقت اللقاء ماتحضرون
اول الاخبار صوت و تحدي وارتجال=واخرتها / ربعكم بينهم / يتضاربون !!
الرياضه عندنا احساس واخلاق وجمال=ورسم ميداني / وتشكيل / وابداع وفنون
والرياضه عندكم صابها الداء العضال=من تعصبكم / ولله في خلقه شئون
والبطولا ت اصبحت شي من ضمن المحال=مالكم قدره عليها /ولاهم يحزنون
شمسكم تظهر دقيقه ويتلاها الظلال=وشمس الازرق مشرقه / ماتغيّبها الظنون
عاش الازرق والجماهير من شرق وشمال=ومن جنوب/ وغرب / باسمه ومجده يهتفون
سولفوا دام السواليف ماتسوى ريال=واهرجوا الين تنبت جماجمكم قرون
لو رفعتم صوتكم/ من على روس الجبال=مايهون الموج الازرق وربي مايهون

حزين من التعب / والا حزين من القهر يامير =حزين من العنا / والا طرا لك / يالغلا طاري
علامك ؟.. للحزن في وجهك /وفي منطقك تعبير=وذا كاس الذهب / يختال في حضرتك ويماري
لمحتك / وانكسرمن مفرق احزانك شعاع عصير=قريتك / وانت تكتب للحياه / ونهرها الجاري
سألتك/ والسؤال اللي ابد مايحتمل تأخير=من اللي يحمل/ احساس البحر/ واحلام الاسفارِ
معك تبرير / لو تبغى تبررها / معك تبرير=لكنّ العذر مايرضي / مراجل كل مغوارِ
دخيلك / ترفع حجاجك سما / واللي يصير يصير=تبسم : يبتهج رمل الطريق / ويفرح الساري
تعيش احلامك / وتكبر / ولا/ لاهل الردى تاثير=لأنك اكبر من / السوق / والبياع / والشاري
يشعشع نورك الصادق / بدرب الزيف والتزوير=ويبقى للأمل في / حضرتك / قيمه ومقدارٍ
لك الله / ماحملنا لك سوى الاعجاب والتقدي=وحبٌ للشواطي يشتعل في قلب بحارٍ
شبيه الريح / والدنيا تنادي / ياشبيه الخير=معك فوق الاماني / والرجاوي /قدرة الباري

ارفع الصوت/ يالروقي فهد=خلهم يسمعون / الفاشلين
ارفع الصوت / ماعندك احد=غير صوت/ الشكاوي / والأنين
في زمان/ التعاسه/ والنكد=اصبحوا /مقبلين/ ومدبرين
كل من يزرع /بأرضه حصد=شوف من زرعهم/ وش يحصدون
فاظت قلوبهم / غيظ وكمد=واصبحوا/ في عداد الشامتين
واحدً/ للشماته/ مستعد=ينتظر فرصته/ حتى تحين
وواحدً /طول عمره/ ماركد =ينضرب/ باليسار /وباليمين
وواحدً /لو تطاول /وانتقد=كرم الله /جميــع/ السامعين
والذي حل / في عينه رمد=كيف يمشي طريق المهتدين ؟
المؤسس/ تطوع/ واجتهد=في زمانٍ / تشح به اليدين
وصار رمزً / من رموز البلد=سيرته مشرقه/ في كل حين
سخّر لديرته/ وقت /وجهّد=وسطر اسمه /بصفحات السنين
للرياضه غدى / برق ورعد=وانحسب / في عداد المخلصين
كم ليالي تعدت / مارقد=اهـ / لو ينصفون المنصفين
حلم /واخلاق / واخلاص وجلّد=وصبر / والله يعين الصابرين
شيخنا /الشهم / ياوجه السعد=عشت يافخر/ كل الغانمين
رايتك عاليه / فوق العمَد=ووجهك ابيض / وتاريخك ثمين
سر ومعك الاماني / تحتشد=وحُب كل /الرجال الطيبين
مايصغرك/جاحد/لوجحد=ولاتهزك رياح /المرجفين
نطلب / الواحد /الفرد /الصمد=يجزيّك خير/ عن كل السنين
ويافهد /والأكيـد/ انك فهد=تردع الكذب / بالعزم المتين
اشهد ان امكم / جابت ولد=مايحسّب /لــ(لوم اللايمين)
صحّ فكرك/ مداد بلاعدد=وطال عمرك / على تقوى ودين