انســــان
عدد الضغطات : 18,536
الجمعية الخيرية لتحفيظ القرآن الكريم
عدد الضغطات : 13,036(انسان) الجمعية الخيرية لرعاية الايتام
عدد الضغطات : 18,649استمع إلى القرآن الكريم
عدد الضغطات : 9,850

   
العودة   شبكة القناص - الموقع الرسمي للاعب ياسر القحطاني > المنتديات العامة > صـدى المشـاعر > صدى المشاعر ( النظم ) > دواووين شعراء النظم
   

إضافة رد
 
LinkBack أدوات الموضوع انواع عرض الموضوع
قديم 19-12-2011, 10:57 PM   #16
اليوزر الاداري لقسم صدى المشاعر ( النظم )
 
افتراضي الشاعِـر : سليمان الشدوي

( ولد الشهيد )

ما انت بــ(يتيم) بوطننا ياوليد الشهيد=الناس تحسبك اغلى واجمل عيالها
ابوك في( جنة الرحمن) عمره مديد=باذن الذي شكل الاشكال باشكالها
دام ان روحه ذخرها عند ربه رصيد=الناس تجزى نهار الحشر بافعالها
دون الوطن يلبس النشمي دروع الحديد=وعصابة الشر فال الله ولافالها
ونادي الهلال بشموخه كل يوم يزيد=والناس في (طيب فعله) تضرب امثالها
عن الشرف والمبادي والوفا مايحيد=مواقف الخير يوفي كيل مكيالها
وله اداره له فعلً وقولً سديد=وتبرهن اقوالها من صادق افعالها
هبت وقامت بواجبها لابن الفقيد=وبينت للخلايق معدن هلالها
والفعل فعل الهلالي شي ماهو جديد=مخبور (والاولويه )تعرف رجالها
وهذي تحيه لبو فيصل واخوه العضيد=وجمهور الازرق قبل لا اقول قد قالها

صـدى النظم غير متواجد حالياً   رد مع اقتباس
قديم 19-12-2011, 11:00 PM   #17
اليوزر الاداري لقسم صدى المشاعر ( النظم )
 
افتراضي الشاعِـر : سليمان الشدوي

( طير شلوى )

يعني رجعت !! وجابك الله على خير=يعني انتهى الايقاف؟؟ ياطير شلوى
يعني نشوفك بعد يومين ياطير=وانته على متن السحابه ترقوى ا
يعني عشانك تستفيق العصافير=باكر وتشدو لك على الدرب شدوا
بُعدك ترى اتعب قلوب الجماهير=وصارت تمنى رجعتك وتترجوى
من بعد ماشافو عن البعد تقرير=ماعاد ذاقو باول العيد حلوى
العب وبدع واجبر الكسر تجبير=وقلوب مشتاقه من الفن تروى
لوثمنوها بالذهب والدنانير=لحظه معك.. كل الملايين تسوى
مثلك حضوره غير واطلالته غير=وشرواك ( صقرالجو) لاقيل شروا
في غيبتك تموت احلى التعابير=وفي طلتك فرحه وبهجه وسلوى
ياكم تحديت الهبوب المعاصير=وياكم من الابداع لطفت الاجوا
من طيب عودك فاح طيب الازاهير=ومن دلتك (فنجال كيف) نتقهوى
وناسً يدقون الذهب بالمسامير=اعجبهم الايقاف !! مير الله اقوى
ياطارق امتعنا فدتك المشاوير=وفدا هقاوي ترفعك كل هقوى
العب وادارتنا تحل التقارير=لو يرفعوا ..واحد وتسعين شكوى
والحمد لله بعد جتنا التباشير=وباكر على الميعاد...ياطير شلوى

صـدى النظم غير متواجد حالياً   رد مع اقتباس
قديم 19-12-2011, 11:02 PM   #18
اليوزر الاداري لقسم صدى المشاعر ( النظم )
 
افتراضي الشاعِـر : سليمان الشدوي

( سعد بن مشعل الحارثي .. سلامات .. )

يردد لك الجمهور ..واول كلامه=سلامات ياسعد ابن مشعل سلامات
عوافي ..عوافي ..تحتويك السلامه=ويكفيك ربك من جميع الاصابات
ويانجم ياللي مرتفع في مقامه=شعاعك رسم فوق النوايف علامات
ولابه عليك من الملامه ملامه=ومثلك يسير ولاعليه الملامات
مع منتخبنا تزرع الابتسامه=وتعطي وتنجز في جميع المهمات
فنونك وابداعك عليها علامه=وتاريخك مجمَل.... بليا زيادات
عساها تزول ولاتجيك الندامه=ونلمحك ترقى بالجبال الطويلات
نحبك (اخو) فيه الوفا والشهامه=ونحبك( نجم) خط بيمينه حكايات
وجمهور الازرق ينعرف باحترامه=وذوقه.. ولاله في المبادي حسابات
يقدم لك احساسه ويهدي وسامه=وسام الرياضه والعلوم الجميلات
ومن منتدى نادي الوفا والزعامه=سلامات ياسعد بن مشعل سلامات

صـدى النظم غير متواجد حالياً   رد مع اقتباس
قديم 19-12-2011, 11:05 PM   #19
اليوزر الاداري لقسم صدى المشاعر ( النظم )
 
افتراضي الشاعِـر : سليمان الشدوي

( ياسر سلامات )

جعلك بخير وتحتويك السلامات=من منتهى اقدامك ...الى عالي الراس
تكبر امانينا وتعبر محيطات=ونقولها من صادق شعور واحساس
دعواتنا لك يابيض الوجه بالذات=ياللي غلاتك عندنا مالها قياس
والله يجيرك من جميع المصيبات=ويحفظّك من كل وسواس خنّاس
ويكفيك من شر البلا والاصابات=والله كريم وقادرً يرفع الباس
ياللي عسفت على الدروب المطيّات=واشعلت في ليل المحبين نبراس
شفتك مسافر وارتجل فكري ابيات=وانا محبً لك ومن ضمن هالناس
يالمانيا عندك زبون البطولات=حني عليه بكل تقدير واحساس
ضميه وليالي المسافر طويلات=لايلحقه من طاري البعد هوجاس
وتسلم لنا يانور كل المنصات=ياغلى من الياقوت والدر والماس
لانك صقر له بالشواهيق حومات=طول المدى ماقرنسه كل قرناس
حزه وجيت بثـامن المستحيلات=من بعد ضاقت بالرجاجيل الانفاس
ياسر فرحنا صار له معك ميقات=ياسر !!يجي الدوري ويرقص مع الكاس
ياسر وتهتز الجبال المنيفات=ويتغير المقياس !! مافيه مقياس
ياسر! بعد ماضاعت الضايعه جات=ماكنّها الامعك باوراق كراس
جعلك بخير !!وتحتريك السلامات=جعلك بخير والف لاباس لاباس

صـدى النظم غير متواجد حالياً   رد مع اقتباس
قديم 19-12-2011, 11:10 PM   #20
اليوزر الاداري لقسم صدى المشاعر ( النظم )
 
افتراضي الشاعِـر : سليمان الشدوي

( لحن الوفاء .. )


سر ياقلم واحتفل واكتب على الاوراق مجد السنين=من عام الف .. وثلاثمئه.. وسبعً.. فوق سبعينها
زمان يوم البيوت صغار تبنى من حجاره وطين=والمملكه دوبها تختال.. بالنخله وسيفينها
جا بن سعيد البطل واسس لنا صرح الهلال المتين=ولسان حاله يقول/ المجد جمله حان تكوينها
اعطاه من جهده/ وماله /ومن عمره/ كأنه ضنين=يوم البشر تطرد الاموال بارجلها/ وبيدينها
كله شهامه/ وجود/ وحلم/ واسمه ( طيب الطيبين)=وشخصيًته بين كل الناس/ ياما اكثر محبينها
ياسيرةً طيبه/ من سيرة الابطال/ والغانمين=سيره تهز الضمير/ ويفخر الراوي بتدوينها
تمر كل السنين ولامعانا الاحساب السنين=والا انت رمز /ومثل /تزهى به الايام/ وسنينها
ياشيخ والمشيخه عود ثمنها درهم او درهمين !!=يوم انت شيختك بافعالك وماجا في مضامينها
افخر وهذا هلالك /صار مصدرفخر للعاشقين=افراح /وامجاد /وبطولات /وانجازات/ يازينها
دانت له الأرض والانجاز ياتي من يسار ويمين=وحقق بطولات شتى من يسار الارض ويمينها
يابن سعيد الوفا طبع الرجال الشمّخ الوافيين=ودينك في رقابنا يبقى لو العالم قضت دينها
صبرت واعطيت والله يكرم اهل الجود والصابرين=وثقافة المجد للازرق بفكرك اصل تخمينها
مكانتك (ياحبيب الكل) تسكن كل قلبً/ وعين=ومحبتك في قلوب اهل الوفا ترجح موازينها
اليا قرينا من التاريخ تاريخك غمرنا الحنين=واليا ذكرنا/ تذكرنا فعولك في عناوينها
حاولت اعدد مأثرك الكبار وكل فعلً سمين=حاولت لكن من يقدر يعد الصين في صينها
افعالك افعال منقوشه على الواقع بحبر اليقين=برهانها نور/ يوم الناس ماتلقى براهينها
تكرم وتحشم/ وترفع/ لحيًتك عن منطق الحاقدين=وقلوب ماتعشق اهل العز/ والامجاد/ ياشينها
انت الذي يستحق الجايزه/ لو ينصف المنصفين=رمز الرياضه/ وتشهد لك على فعلك ميادينها
نهديك من حبنا باقه من الريحان والياسمين=وكلمة وفا / ناصعه/ ماتقدر الايام تلوينها

صـدى النظم غير متواجد حالياً   رد مع اقتباس
قديم 19-12-2011, 11:14 PM   #21
اليوزر الاداري لقسم صدى المشاعر ( النظم )
 
افتراضي الشاعِـر : سليمان الشدوي

( فالك الجائزه يَ ماجد المرشدي )


فالك الجائزه / ياماجد المرشدي=ياجبل ماتهزك / عاتيات الرياح
وقفتك // والشموخ/ وفزعة الاجودي=وعزمك/ اللي يرد عن الصدور الرماح
همتك / والشجاعه / وانت تعدي عدي=تبعث في الضمائر/ نشوة الارتياح
في حضورك يغني كل حرف ابجدي=وفي وجودك يشع النور (نور الصباح )
هامتك ترتفع حتى توازي الجدي=بالصبر/والرجوله / والعطا / والكفاح
خابرك وانت بالازرق نجم مبتدي=وسرت واثق /على درب السعد والفلاح
من بداية سنينك / تطلب السؤددِ=واول الغيث قطره / وابشري يالبراح
ليث مغوار/ والفرسان بك تقتدي=العزيمه سلاحك/ والصبر لك وشاح
جعل تفداك/ ياماجد عيون الردي =وجعل مستقبلك رفعه /ومجد/ونجاح

صـدى النظم غير متواجد حالياً   رد مع اقتباس
قديم 19-12-2011, 11:16 PM   #22
اليوزر الاداري لقسم صدى المشاعر ( النظم )
 
افتراضي الشاعِـر : سليمان الشدوي

( شرفت شرفت يَ عيسى المحياني )

في نادي العز/والرفعه/ والامجادي=شرفت ...شرفت ...ياعيسى المحياني
يامرحبا والوفا /والحب/ يزدادِ=البيت لاول / ولاهو بيتك الثاني
اخترت الاحسن /بتوفيق الله الهادي=والخيره الطيبه /من حظ الانسانِ
وصلتنا يابطل / واستبشر النادي=والله يحييك من قاصي /ومن داني
تاريخك اكبر من المعروف / والعادي=واخلاقك مميزه / في كل ميداني
من قبلنا سيرتك في روس الاشهادي=نجمك سطع في جميع ارجاء الاوطاني
واليوم شرفتنا في الازرق النادي=..فارس مخضرم/ ولاتحتاج برهاني
مجدك يبي يندمج / بارقام/ واعدادِ=في مجد/ ياسر/ وسامي /والثنياني
وباكر يصفق لك الجمهور وينادي=جيب الكره قول /ياعيسى المحياني

صـدى النظم غير متواجد حالياً   رد مع اقتباس
قديم 19-12-2011, 11:21 PM   #23
اليوزر الاداري لقسم صدى المشاعر ( النظم )
 
افتراضي الشاعِـر : سليمان الشدوي

( الامير _ عبدالرحمن بن مساعد _ والكاذب الكبير .. )

مانزكي لا فقير /ولا وزير=لكن العالم /على العالم / شهود
يــ..امير البر/ والخير الكثير=ياحفيــدٍ للامام /ابن سعود
انت صادق /والحقيقه يالامير=ان هرج الناس/ صار بلا قيود
يهرجون/ ويهرفون/ بما يثير=يهمزون/ ويلمزون/ بلا حدود
خلها تنساق /دعوه للكبير=دعــــــوة المظلوم/ ماعنها ردود
والذي يكذب على الرب القدير=يـمحقه رب / العواصف /والرعود
ويش يفيد الفوز/لامات الضمير=ومن يقيم البيت/ لاطاح العمود
مايهزك /من مقامك لو يطير=الحقود / اللي تعلًم/ من حقود
انت روضة خير/ واحساسك سفير=تستطيبه نجد/ واطراف النفود
فيك عزم /وفيك طيب/ وفيك خير=وفيك زود الحلم/او حلمً يزود
لو يبيح الما /من البحر الغزير=في سموك/ مايبيحًن السدود
لا ابد ما انته/ بكاذب يالامير=لكن الشرهه/ على الوجه النكود
والرجال اللي / من الزله تغير=والله ان احساسها /ماله حدود
في طريقك / تستستشير/ وتستخير=وانت رايك نور لكبار الوفود
والذي يلبس على جسمه حرير=كيف يفرح فيه ؟ والنيات سود
خلّهم يهذون /والساير يسير=وانت ترقى من /سنودً في سنود
هد روحك / طال عمرك يالامير=وزين الله كل دربك بالورود
فالك التوفيق /والحظ الوفير=رغم عن انف المكابر والحسود

صـدى النظم غير متواجد حالياً   رد مع اقتباس
قديم 19-12-2011, 11:24 PM   #24
اليوزر الاداري لقسم صدى المشاعر ( النظم )
 
افتراضي الشاعِـر : سليمان الشدوي

( الاول .. الاكبر .. الامثل .. الافضل .. الارقى )

لأ نك اكبر/ من هقاويهم/ ومما يحلمون=لأنك اوضح /من سنا شمس الضحى /بنهارها
لأنك الاعلى/ والاغلى/ والبقيه يتبعون=لانك الاقدر/ يجيك من القسوم/ خيارها
لأن الامثل/ والاجمل/ والخلايق يشهدون=قامت قيامتهم /وبان من العقول غبارها
هذي سحايبهم/ تمرعلى الديار/ بلا مزون=وهذي سوالفهم/ غدى التظليل /رمز شعارها
وهذا الحزن /يرسم ملامحهم ألم /لويضحكون=وهذا الندم /يحكي قصص تاريخهم واخبارها
وصلًتهم ياهلال / ياقاسي الى حد الجنون=وخليتهم/ مثل الطيور النايمه باوكارها
تهون روس اهل الردى /والا الهلالي مايهون=مادام ابوفيصل/ يقود الخيل في مضمارها
الله لو ان الخلق يا الازرق/ بحقك ينصفون=ماكانت قامت قايمه / لصغارها واشرارها
اسمك يوقفنا طرب / واسمك يوقفهم شجون=احلامنا ترقى سما / واحلامهم باعثارها
من دون تتدحدر ركايبهم حدر/ في دون دون=ولاهمهم غيرالغصون /المثمره واشجارها
واللي لهم عشرين عامً/ بالبطوله يسمعون=جاهم مجال /يلملمون احقادهم/ واظها ها
يبطون عظم وفي مأ ربهم / ابد مايقدرون=الموج الازرق/ ماتهزه صفقه وسمسارها
وين الرياضه عن مباديهم وعن مايضمرون=وش حدهم على دروبً /ماتنير انوارها
لأ نك اكبر/ من هقاويهم/ ومما يحلمون=ولأنك غلى يالهلال من/ الدرر ببحارها
قاموا على مجدك جماعه يكتبون ويحسبون=وقلوبهم من حقدها قامت تبيح اسرارها

صـدى النظم غير متواجد حالياً   رد مع اقتباس
قديم 19-12-2011, 11:31 PM   #25
اليوزر الاداري لقسم صدى المشاعر ( النظم )
 
افتراضي الشاعِـر : سليمان الشدوي

( اخوان يوسف )

يالله عليك /المغفره/ والمثوبه=والعفو/ والاحسان/ والبر/والخير
يامهونً جور الزمان /وكروبه=يامقدر الارزاق/ للخلق تقدير
الارض ماتطوى/ بليا ركوبه=وانا زهابي/ في ظهور المغاتير
ارحل واحل /وخاطري مايشوبه=الا الغراب اللي تفرعن على الطير
ينقع سواده في محابر ذنوبه=ويكمم افواه /الصغار العصافير
زانت له الدنيا /وخليّت دروبه=والحُر الاشقر /قرنسوه الصقاقير
حالً يذكرني بحال العروبه=اللي اختلف فيها جميع المعايير
راحت مراجلها القديمه/ لعوبه=الطار /والمزمار/ والعود/ والزير
مقدامهم ماعاد يذكر حروبه=اصبح على غير الهدى/ يعكس السير
اعمى /ويتعثر على حرف طوبه=ولاعاد يقدر/للرهاف البواتير
البارحه والشعر /هبت هبوبه=عجت وثارت لين صارت معاصير
اقبلت بالاحساس /والفكر صوبه=وشديت له صوتي/ بليا مزامير
عانقت وجه الشمس/ لحظة غروبه=ولونت من لونه/ شفاه النوافير
نسجت من واقع خياله عذوبه=والغول./. والعنقا./.مجرد اساطير
واستوحشت روحي الزمان وعيوبه=وغنيت/ ياقلب المعنى/ مقادير
وريد قلبي/ مابقي به رطوبه=وانفاس صدري / قطعتها المشاوير
من يوصل العليا بليا صعوبه=مايرتفع لو صار ضمن المشاهير
تعاف نفس الحُر/ميلة جنوبه=وتمل من بعض الثياب الأزارير
لولا فضاءات/ الاماني الرحوبه=صاح الخشب / من جور دق المسامير
من حكمة الوقت القديم/ وضروبه=ياكم قرينا في/ صحيح التفاسير
اخوان يوسف /من جفاهم نووا به=واطيبهم اللي قال !! حطوه بالبير
ويعقوب جاه النور مع ريح ثوبه=هات البشاير/ يازبون التباشير
العمر فاني ./.والسنين محسوبه=واقدارنا / ماتنثني / للمحاذير
والادمي مابين زله /وتوبه=يقضي زمانه/ والليالي مغاوير
احيان يسبقه المطرفي دروبه=واحيان دلو البير/ مايوصل البير
والله لو ان الموت/ اقسى عقوبه=ماطالت الطرقه/ براعي المسايير
وانا ضميري/ لو يحسب ذنوبه=لقيت غير الدمع / للحال تعبير
لكن طموحي بالرضا والمثوبه=من ربي اللي صور الخلق تصوير
ويالله ياللي نرفع الكف صوبه=تحسن خواتمنا بحسن التدابير

صـدى النظم غير متواجد حالياً   رد مع اقتباس
قديم 19-12-2011, 11:34 PM   #26
اليوزر الاداري لقسم صدى المشاعر ( النظم )
 
افتراضي الشاعِـر : سليمان الشدوي

( نديم الريح )

سافر مع الريح /لاتبطي ولاتنتظر=وارفع جناحيك /وافرد كل طياتها
دور من الأرض/ لمزونك/ اراضي بكر=ماتشبه المزهريه /مزهرياتها
فيها تهيم الروابي/ بالطيور الخضر=وتشد منها/ عقاربها وحياتها
يكمل احساسها بالحب /شمس العصر=على السواحل/ تشكل مغربياتها
وافخر بشايب/ يصلي تحت نور القمر=وخل القبايل /تزور عنترياتها
صبرت عمرك /وطال الصبر/ يامنتظر=والناس حولك / تسوق مسرحياتها
بذرت روحك /ذنوب ولانبت لك عذرر=وملت الروح /من تكرار سياتها
قصيدتك/ تقضح اسرار البشر/ للبشر=تزهر معانيك/ في حقل ابجدياتها
لوشافها المنتحر/ من قبل لاينتحر=رجع يشيل اللحون/ وسامرياتها
ون قلتها للحجر / ينساب دمع الحجر=من لهفته/ بالاماني/ في ثنياتها
تمر مثل السحب / وتهل مثل المطر=لو حررت/ خزنة افكارك/ بنياتها
اكبر مطامحك /تحويشة (قصيد وعطر)=تبلّغ السامعين ازكى تحياتها
سافر مع الريح /لاتبطي /ولاتنتظر=وارفع جناحيك/ وافرد كل طياتها
وان صيحو /وانت مقفي/ لاتلد النظر=عذرك /بان الاوادم /حسب نياتها

صـدى النظم غير متواجد حالياً   رد مع اقتباس
قديم 19-12-2011, 11:37 PM   #27
اليوزر الاداري لقسم صدى المشاعر ( النظم )
 
افتراضي الشاعِـر : سليمان الشدوي

( جاهل وحاقد ومسترزق وكلٍ له وسيله )

بين شيماتً كبار /وبين وققاتً ثقيله=وبين تقوى الطيبين /ومن على روس المعالي
عاش ابو فيصل( قوي الباس ) كسّاب الجميله=راعي المبدأ /وريث المجد / مقدام الرجالي
لو نصوغ (اسطورة الأبداع) في حقه قليله ..=ولو كتبنا بالذهب اسمه / يظل الأسم غالي
اصدق من السيف/ لا قالوا البوتير الصقيله=واطيب من الطِيب / يوم ان الردي ماله مجالي
واكرم من االغيم /لامنه ترادم بالمخيله=هرجهَ اغلى من كنوز البحر/ واصناف اللألي
في ضمايرنا تمكّن / بالتسامح والفضيله=مايشوّه صورته / شحاذ قرشين وريالي
جاهل / وحاقد/ ومسترزق / وكلٍ له وسيله=وتابع /ومتبوع/والحُر النداوي / مايبالي
مالهم غير الكَذِب والا البطل / مافيه حيله=في معاريضٍ عراض / ومسرحياتً طوالي
ياطويل العمر/ وعزومك على العليا طويله=يدفعك حب النجاح/ ويدفعك حب الهلالي
من سموك/يبطي الحاسد / ولايشفي غليله=لو طلع له قرن في راسه / يحك به الجبالي
والله انه مايضيع الخير في يومــٍ وليله=ومايصح الا الحقيقه/ للبعيد وللموالي
كل حملٍ جايرٍ /لو يتركه غيرك تشيله=ماعليك من الخفاف / وماعليك من الثقالي
مايهم ان طقوا ظِلالك / وحيلتهم قليله=عذرهم انك كبير / وصاحب امجاد ومعالي

صـدى النظم غير متواجد حالياً   رد مع اقتباس
قديم 19-12-2011, 11:41 PM   #28
اليوزر الاداري لقسم صدى المشاعر ( النظم )
 
افتراضي الشاعِـر : سليمان الشدوي

( عروق الطلح )

صحيح الليل ليلي/ طال ليله /والظلام ازداد=نثرت الدمع في وجه الظلام/ ولا استفاق الصبح
عجزت اضبط عقارب ساعتي/ في لحظة الميعاد=وعجزت القي لكفي في صميم (ام المعارك ) رمح
اقود بمفردي احلام/ والاحلام ماتنقاد=تفك قيادها/ واشوفها بالجو/ تجمح جمح
يذيرها الهوا العالي /ويرجاها شجر وعباد=ولايقدر يروضها سوى الصبر بــ..عروق الطلح
يجافيني الزمان /ويستلذ بسرقة الاعياد=ولاهي كل زله يازماني/ تستحق الدمح
مسافر/ والرحيل اللي تغشاني وطن وبلاد=خيوله في عيوني/ لابغيت النوم ترمح رمح
وقفت على اليباس الجرد/ يوم ان السنين شداد=ومن دمعي/ تزاحم في زواياها /سنابل قمح
نهضت استجمع عزوم العمر /وافكك الاصفاد=ولمحت الموت ياشر لي بيديه /ولاقويت اللمح
انا الطفل الغريب / اللي مشى في موكب الرواد=نسي في قريته مرسم /ودراجه /ووجهً سمح
وانا الوجه الشحوب/ الممتلي هم والم وسهاد=حداه القيظ/ لين انه تظلل في سحابة ملح
امانه دون اسمي ياوطن/ في سيرة الأولاد=وامانه لوني صبرك بدمعي / ياعروق الطلح

صـدى النظم غير متواجد حالياً   رد مع اقتباس
قديم 19-12-2011, 11:44 PM   #29
اليوزر الاداري لقسم صدى المشاعر ( النظم )
 
افتراضي الشاعِـر : سليمان الشدوي

( هذي البطوله واهتفو يَ جماهير )

الأزرق اللي /عالياَ في مقامه=جاب البطوله /وافرحو ياجماهير
نادي البطوله/ والشرف/ والزعامه=والعز/ والامجاد/ نادي الاساطير
شيلوا البيارق وارفعو كل هامه=واستبشروا هذا لكم اول الخير
من كف رجل ٍ/صادقٍ/ في كلامه=ابن مساعد/ كل وجهه تباشير
زيزوم /حاشاه/ العتب والملامه=ونايبه نواف /له كل تقدير
ونجومنا كلٍ /يسد بمقامه=صاروا مع الازرق / كبار// ومشاهير
ياروضة الورد /اهتفي بابتسامه=واصدح بلحن الفوز/ ياطير /ياطير
العيد له / من قبل وقته/ علامه=..... وتبان لا هل العيد/ من حزة عصّير
و الازرق الغالي/ تحقق مرامه=وكأس ابو خالد/ تحقق بتدبير
من اسمه الغالي/ تفوح الزعامه=ومن لونه الازرق / تهاب الطوابير
تاج الفخر والفوز/ هذا وسامه=واضح ولا في (منهج العز) تغيير
والحمد لله/ الكاس /جا بالسلامه=شيلوا البيارق / وافرحوا ياجماهير

صـدى النظم غير متواجد حالياً   رد مع اقتباس
قديم 19-12-2011, 11:48 PM   #30
اليوزر الاداري لقسم صدى المشاعر ( النظم )
 
افتراضي الشاعِـر : سليمان الشدوي

( لو مايدربنا يكون الفريّـان .. نكسب بطوله واهجدو يَ مساكين )


دام الرجال /افعال/ في كل ميدان=يجي بدل كوزميين / عشرين كوزمين
الامر هيّن / كان لو كان/ ماكان=وطويق راسي / في مكانه من اسنين
لكن مايحتد /في قلب الانسان=الادمي لاصار وجهه بوجهين
لاهان ابو متعب / ولاهان سلطان=ولاهانت/ وجوه الرجال/ العزيزين
حكامنا ا/هل العز /في كل الازمان=اهل الوفا والطيب //بالعسر واللين
وراعي الرياضه /من طولين الايمان=لاجا بكلمة حق / قلنا على العين
لكن يطلع من( ثرى الارض )جرذان=لها عيون اشكال /ولسان/ واِ يدين
تعبث وتتلاعب/ بزودً ونقصان=وتتجاوز اعراف/ البشر والقوانين
تغرب من المغرب / بزورً وبهتان=وتشرق من المشرق/ بكذبه من الصين
احقاد صاغتهم /على شكل بركان=يثور لكن / مايهيب السلاطين
هذي رياضه /ياقليلين الاحسان=ماهي بفتنه تشتعل / بين حزبين
هلالنا يامفخرة كل الاوطان=يامُلهم الاغراب / قبل القريبين
فرسان يخلفهم/ على المجد/ فرسان=وابطال تذكرهم جميع الميادين
تكفى يابو فيصل/وتكفى لها شان=تكفى / وتكفى تستفز المحبين
تكفى نبيك بصفحة المجد عنوان=عنوان ماهو مثل كل العناوين
عطاك ربي صدق/ واخلاص /وايمان=وصرت وجهه /للرجال الموامين
انسان لاقالوا / على الارض انسان=وامير من اسمك/ تميل الموازين
حبك /ولايحتاج للحب /برهان=واحساسك اكبر/ من جميع الدواوين
انت الأهم / ولافي الغير نقصان=فلة حجاجك عندنا /تملي العين
انت المحب / وراعي الحب ولهان=وصدق المحبّه/ مايقسّم على اثنين
هذي مزونك /واول الغيث هتان=وبكره تزيد /ونكسر الرقم (خمسين)
ولايشيل الحمله //الا بليهان=ولا يطـيحالا...(ضعوف البعارين
وحنا (هلال المجد) بعيوننا زان=والزين لاهل الزين/ والشين للشين
ان راح منا كاس فـــ(الدرج)مليان=وانا غاب فارس /يوقفون الشجيعين
لومايدربنا /يكون الفريّـــــان=نكسب بطوله/ واهجدوا يامساكين

صـدى النظم غير متواجد حالياً   رد مع اقتباس
إضافة رد

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة



الساعة الآن 04:07 PM.

Designed by: BAA
Powered by vBulletin® Version 3.8.7
Copyright ©2000 - 2024, vBulletin Solutions, Inc.
SEO by vBSEO 3.6.0
Ads Management Version 3.0.1 by Saeed Al-Atwi