.. الـبداية ..
عـذوب إي بالله انها عذوب ..
تملك القلب وبين يدينها أذوب ..
( الــجزء الأول )
هم من أرقى العوائل .. تميزوا بالرفاهيه والغنى والجاهـ والنسب العريق ..!
أختهم الكبرى كانت نوره تزوجت بإبن عمها علي وكان لهم من الأبناء
سلمّان 28. وائل25 .. ملاك 22..هديل 18
أما أختهم عزيزه فتزوجت بـ صالح رجل ميسور الحال لا يقل مكانه عن أهلها وكان لهم من الأبناء
بدر 25. أمجاد23.. وجدان19
أما جواهر فهي الوحيده التي خالفت نهج النسب المميت وتزوجت برجل كان أقل بكثير عن عائلتهم برغم رفض أقاربها إلا أنها أصرت على الزواج وكان لها ابنة وحيده وهي الجازي 23
وآخيراً منيره التي تزوجت بإبن خالها وكان لها من الأبناء
عبدالمجيد 24.. عذوب20
أما حمد فهو لم يتزوج بعد ومازال يسكن مع أمه ان صح التعبير أم عبدالمجيد ..
×
دخل حمد البيت وبيده أغراض للبيت وصت عليها أم عبدالمجيد ..
حمد بصوت عالي : عذوب عذيبه
عذوب بالصاله: لبيه عيون عذوب انت ..
حمد: تعالي تعالي شيلي الأغراض شوفيها بالسيارة ..
عذوب: طيب خلها أنادي الخدامه تشيلها ..
حمد: وأنتي متى بتخلين الدلع عنك ..؟
عذوب: ليش ما تبيني اتدلع وأنا دلوعتك ..
حمد: أي ايه ابتدأ شغل المصريين .. رفع لي وأرفع لك ..
عذوب: هههههههههههههههههههههههه خلاس بشيل الأغراض بس بشرط ..!
حمد: ما انتي بسهله لازم كل شئ عندك له مقابل .. بس آمري ..؟
عذوب : تطلعني أنا والبنات طلعه محترمه ..
حمد: أها قولي كذا متفقين علي أنتي والشله حقتك ..؟
عذوب: أحلى مافيك ياحميد انك ذكي تفهمها وهي طايرهـ ..
حمد: طيب شيلي الأغراض يالله وكلمي شلة الجاليات وخليهم يجهزون أعمارهم بعد صلاة المغرب نطلع ..
حضنت عذوب خالها وباسته على خدهـ: يالبيه على هـ الحمد الله لا يحرمني منه ..
ابتسم حمد وهو يشوف دلعها ورقتها ..كل يوم تزيد غلاتها بقلبه .. برغم دلعها الزايد الا انه يشوفها محليها ..
عذوب بعد ماشالت الأغراض طلعت بسرعه لغرفتها حتى تكلم شلة الجاليات على قولة خالهم حمد ..
عذوب : وجدانوهـ
وجدان: بسم الله فجرتي اذني .. شوي شوي
عذوب: وش عندها الدلوعه .. المهم ترا كلمت حمد ووافق ..
وجدان: والله .. واااااو وناسه
عذوب: مرهـ وناسه من زمان ما طلعنا مع بعض..
وجدان: طيب انقلعي خليني أروح أقول لأمجاد .. وبعد استأذن أمي
عذوب: طيب حتى أنا بكلم ملوكه وهديل ..
وجدان: تعالي الحين بس بنروح مع خالو حمد ..؟
عذوب الي فهمت قصدها : ههههههههههه ليش تبين واحد ثاني غيره ..
وجدان: انقلعي بس محد يسألك انتي ..
عذوب: ترا أنا ما قلت شئ ..
وجدان: ايه باين عليك يالله بس باي ..
قفلتها من عذوب وهي تشد اصابع يدينها .. بكل مره عذوب تذكرها باللي تحاول تنساهـ .. !!
راحت تحت عند أمها وأمجاد الي كانوا يشربون القهوة ..
وجدان: ترا قبل شوي عذوب اتصلت تقول خالو حمد بيأخذ فينا فره بشوراع لندن السعوديه ..
أم بدر : عن الطنازه بس احمدي ربك انك بالرياض ..
أمجاد: والله ان وجدان صادقه شفيها الرياض نتمشى فيها ..
أم بدر ترفع جوالها: هاه يعني أقول لحمد خلاص لا تمر عليهم ..؟
وجدان وأمجاد بصوت واحد: لا لا لا ما صدقنا ان هـ الطلعه تجي ..؟
أم بدر: ايه خلو عنكم التمرد الزايد ..
وجدان: طيب يمه ودي اليوم لين رجعنا أنوم عند عذوب ..
أم بدر: كيفك اذا البنات بينامون ..
أمجاد: لا يمه أنا برجع أكمل شغلي .. ملكتي مابقى شئ عليها وأبي أجهز كل شئ ..
أم بدر: تونا باقي شهر .. بعدين الضيافه قلت لك خليها علي ..
أمجاد: تعرفين يمه يبي لي اهتمام في بشرتي وغيرهـ ..
وجدان: الله يعين سامي عليك .. هـ الولد اذا فلس بيفلس على حساب كريماتك ..
أم بدر: على الأقل بنت تهتم في بشرتها مهب مثلك شوفي كيف شكلك كني جايبه ولد لك الحمد والشكر ..
( وجدان كانت شبابيه وتكره حركات البنات .. شعرها بوي وتحب حركات العيال أكثر من البنات .. برغم انها مقربه كثير لعذوب الدلوعه ..)
وجدان: بس مرتاحه ما أكلف عليكم بالكريمات ..
أم بدر: طيب قوموا جهزوا انفسكم لا يجي خالكم وتعطلونه ..
×
عذوب كلمت على ملاك حتى تبلغها ..
ملاك: هلا هلا بالمزعجه ..
عذوب: قولي آسفه بسرعه لا أحرمك من الطلعه ..
ملاك: وافق حميد ..
عذوب: أشوفك مسويه تمونين على حمودي ..
ملاك: ليش خالك لحالك ..؟!
عذوب: ايه حميد حقوق الطبع محفوظه ..
ملاك: طيب اخلصي متى بنطلع ..
عذوب: يقول بعد المغرب على طول ..!
ملاك: حلو يمديني أخذ شور وأجهز نفسي ..
هديل الي كانت جنبها .. ترا بنطلع نفرفر بالشوارع مو رايحين لزواج..!
عذوب: بالله سكتي الجاليه الي جنبك .. وقولي لها لا تماشي وجدانوهـ كثير ..
خذت الجوال هديل بعد ما سمعت عذوب: كلي تبن يا الشينه بس .. ملاكوهـ ووجدانوه تكلميهم وأنا ساحبه علي ..
عذوب بدلع : ههههههههههه لبى عمرك وربي مو ساحبه بس مقدره انك ثالث ثانوي وما ابي اشغلك ..
هديل: على جنب بس .. ما يضرني خمس دقايق بريك ..
عذوب: هديل لا عاد تجلسين مع وجدان كثير .. أحس انك تتآثرين بقوة ..
هديل: والله ما تطولون همجيتنا خلي عنك بس ..
عذوب: طيب انقلعي بروح أجلس مع ماما قبل نطلع ..
هديل: هذا كبرك وتقولين ماما .. متى بتخلين الدلع عنك انتي ..
عذوب: غيرانه مني هاه ..؟
هديل: يالله لك الحمد بس .. وش فيك اغار عليك ..
ابتسمت عذوب لأنها عارفه ان كلامها مو من قلبها : طييب يالله باي ولا تتآخرون ..
فرحتهم بالطلعه هذي لأنها جت بعد فتره انقطاعهم عن بعض عشان المدارس وأشغالها .. ولأن حمد صار له زمن ما طلعهم .. الي كانت للطلعه معه طعم ثاني خصوصاً انه كان يعطيهم راحتهم وما يبخل عليهم بشئ ..!
×
وفي مكان غير المكان .. وبعالم يختلف عن عالم الرفاهيه .. بحي متواضع أو إن صح التعبير أقل بكثير من مستوى التواضع .. كان هناك مسكن أهل صديق حمد المقرب لقلبه أو الوحيد .. بـندر ..
والي كانت عائلته ..
ابراهيم الأب .. مزنه الأم ..
ولهم من الأولاد .. بندر 29.. حنان 25.. عمر 24.. بدور 22 .. أحلام 17
كانو يعانون من قلة الدخل المادي .. نظراً لأن أبو بندر مريض كلى وطريح الفراش .. وأم بندر ربة منزل ما تملك لا وظيفه ولا شهادهـ ..!!
أما بندر فترك الجامعه حتى يقدر يصرف على أهله واشتغل بنقل مدرسات لمدينه خارج الرياض .. والي كانت تساعده حنان الي تنتظر التعيين بتخصصها العربي .. أما عمر كان يسكن بالشرقيه في مكان عمله الي كان راتبه يروح أكثره للسكن والمعيشه .. أما بدور وأحلام فمازلوا يدرسون ..
حالتهم صعبه كثير حتى مع محاولات بندر انه يلقى شغل ثاني يساعده بالدخل ..!!
أم بندر: وأنا أمك لا تنسى اليوم موعد غسيل الكلى لأبوك ..
بندر بنظرات شفقه لأمه : أبشري يمه عندي كم شغله بس أخلصهم وأجي أوديه ..
حنان: وش صار على المجمع الي قدمت أوراقك فيه ..
بندر: والله يقولون انهم بحاجة لحراس أمن .. وهذا أنتظرهم ..
أم بندر: ليت والله حمد يتوسط لك بشركة زوج أخته ..
بندر: لمح لي بس أنا ما أبي أحرجه يمه أنا ماعندي غير الثانويه .. وشركتهم رايقه كثير ..
حنان: الله يوفقك ..
بندر وهو يقوم: آمين وياك .. يالله تبون شئ أجيبه ..
أم بندر : لا سلامتك وأنا أمك ..
طلع بهم يكبر يوم عن يوم .. وبمسؤليه كبيرهـ على عاتقه تزداد مع ازدياد حاجتهم .. كان يعطي للي يشوفه هيبه .. طويل بلون حنطي ومفتوله عضلاته وعيون حادة النظرات .. الي يشوفه لأول مره يعتقد انه ولد عز من ثقله واتزانه .. طلع وشغل سيارته بآلم وهو يفكر بحالتهم .. !!
×
هـنا أنهي الجزء الأول .. الي حبيت يكون تعريف بس للشخصيات المهمه بالروايه .. حماسكم لي هو المصدر الوحيد لإ‘كمال الأجزاء الجايه ..
×