أنا جاني عنقز !!

بكل اسى وبكل حزن اقولكم انه جاني العنقز اللي يمشي وينقز .. وطبعاً اللي معديني بدون أدنى شك هو اخوي سعيدان !! وبعد اصابتي بالمرض العنيف اكتشف ماي فاذر اكتشافاً عجيباً وهو ان اخوي سعد مقرود بمعنى الكلمة .. وانه نادراً ما يجيب خير ..
وحتى انه قبل فترة ليست بالبعيدة شرى له ابوي جيب لكزس ار اكس وقعد معه فترة قصيرة وصدم فيه وكلف 30 ألف ريال وبعد حب الخشوم مع وكالة عبداللطيف اللي مهيب جميلة خفضوا لنا الى 28 الف ريال << يقالهم خفضوا الحين !!
وقبل يومين جاب لي العنقز .. طبعاً الحادثتين هذي من أبرز مشاكله ولا هو مشاكله واجد جعله الصلاح.. ما علينا..
انا اوخيكم الحبيب واللطيف جداً جاني عنقز ولعب في ظهري.. وابشركم ما دريت عنه الا امس العصر.. كانت فيه حبة ورا اذني وقعدت اقشّع فيها واقلقتني .. المهم مريت من جنب الوالدة الله يطول بعمرها .. وكانت فارشة زولية في الحوش وقاعدة تقرا.. قلت يا ماما << ايه هيّن .. قلت: يمه .. فيذا حبة قالقتني ومدري وش فيها ؟؟ كل ما حكيتها تكبر.. قالت: هَوْ.. عسى مهوب عنقز اخوك سعيدان!!؟ قلت والله مدري!.. قالت ورني ظهرك .. قلت: وشو.. ؟؟ عدلي بدلي!! لإن زوجة اخوي كانت عندها متغطية بجلالها<< والله لو أنها قايلة افصخ سروالك << عيب يا ولد
المهم قالت: اشوه ظهرك خلني اشوفه.. المهم رديت وجه من عندها وعطيتها ظهري ووريتها اياه .. قالت : ابشر بها .. قلت : العروس .. قالت: انطم انت ووجهك.. وش عروسه يالشين .ابشر بالعنقز.. وقامت تعد .. وحده ثنتين ثلاث لين وصلت ثمانية.. قلت افا افا افا.. قالت يالله انقلع تروّش وحط ذاك الدوا حق اخوك !! قلت ما فيه أمل << أمل ولا منال كركركر .. بروح للدكتور وبخليه يكشف علي.. لإنه يمكن ما يصير عنقز .. لإن الوالدة قايلة لي ان العنقز جاك وانت صغينوووط..فقلت مستحيل يجي مرتين.. المهم رحت للدكتور الساعة وحده .. لإني انشغلت في هالفترة .. ويوم رحنا للمستوصف اللي حول بيتنا وطلبنا دكتور جلدية قال الموظف : ما فيه الا طبيب عام .. تبيه ولا أقلب وجهك <<< يلعن ابليسه اخلاقه قافلة ..وشكل وده يروح للإستراحة مع العيال<< انت تعرفه هق هق هق.. قلت يالله عطنا طبيب عام وكثّر كاتشب << يقالي اتميلح معه.. قال تنكت انت ووجهك!!!!!!!.. قلت لا يارجال اكلم اخوي.. قلت طيب متى بندخل على الدكتور .. ؟ قال دقيقة خلني اشوف. يوم دق على مكتبه ما احد رد..! ودق على بيته اللي بنفس المستوصف ردت بنيّه صغيرونه وقاله وين بابا؟؟ قالت رايح للسوبر ماركت!صك السماعه وقال الدكتور طالع يتقضّى .. وبيرجع بعد شوي.. بتنتظر ولا لا؟؟ <<< يلعن شيطان هالمستوصف البايخ.. بس قالوها(( وش اللي حدك على المر .. قال ما من برطم )).. المهم قالي الموظف عطني جوالك ! قلت خير ان شاء الله .. والله تمون!!!؟قال انت ما تبي تتعالج؟؟ قلت: إلا.. قال طيب عطني جوالك اكلم الدكتور .. قلت: ايه .. اشوا.. المهم اتصل على الدكتور من جوالي <<< تحسون اني مخفّة .. كركركركر..وقال نوصي ساعة وحاكون موقـود يا باشا..قلت يالله وش ورانا .. نحتريه ..

والله وقعدنا حول ثلث ساعة ويجي الدكتور ومعه كيستين فيها خبز وجبن ومقاضي البيت.. عاد من طفاقة اخوي قال للدكتور: ما خلصت النص ساعة بقي عشر دقايق بدون وقت بدل ضايع .. ثم صكيته بذاك الطراق اللي على علباه!!قلت: تنكت انت ووجهك.. وعلى فكرة .. هذي أول مرة أمد يدي على سعيدان منذ 3 سنين.. هو صحيح اصغر مني بسنتين بس انه اجلف مني الماخوذ.. يعني انافخ عليه بس.. وبعض الاحيان يقولي : انطم لأدفنك في الارض<< اكيد في الارض اجل في الملعب
عاد يوم دخلنا على الدكتور.. ويأشر لي على السرير !! قلت: يعني انبطح .. قال ايوه.. قلت زين ما بدهاش.. والله وانبطحت وانا مستحي وسعد يضحك علي..المهم قال يا ابني انتا عندك عنقز.. قلت: قل قسم .. اجل وش اللي جابنا عندك قال بس الحمدلله ده عنقز خفيف.. وانا حعطيك حبوب ومرهم.. وتحطها على العنقوزات اللي فيك وكل شي حيكون تمام بإزن الله..وتمر علي يوم السبت ان شاء الله..قلت: زين الله يعافيك يا دكتور..

وانا الحين اكتبلكم هالكلام وانا ملطخ بالمرهم في كل ناحية من جسدي ولله الحمد ..

الفوائد:
انّه جاني عنقز

أتمنى حصلتوا ولو فائدة صغينوطة..

ولا تنسوني من دعائكم ..