[ ~ .. الا يادنيا " الاختبارات " متى تقضين .. ~ ] - شبكة القناص

**زيـآد** · 02-02-2008, 09:18 PM

..

مساءكم وصباحكم
اختبارات

عندمـا تشاهد طالباً .. يحاتسي نفسهُ ،
فأعلم ياصاحبي بأنه عايش جو " الاختبارات " !!

عندمـا تشاهد طالباً .. وهو يسولف معك ، يقول " امس طلعت مع اخوياي محمد و (س) و خالد و ( ص ) "
فأعلم بأن الرياضيات لها تأثير عام عليه !

اذا كلنـا نرفـع رايـه [ لا للاختبارات ] .. [ نعم للدرجات ] !

* ملحوظه : لحد يقولي وشلون تاخذ درجات بدون اختبارات .. لاني مدري وش قاعد اقول اساساً !؟

أعلم يارفيق دربي .. بأن مادة الرياضيات
هي اسوء ماده عرفها تاريخ الدوله العربيه السعوديه

خصوصاً لما يكون المدرس " مصري " !!
وايضاً خصوصاً لما تكون الرياضيات بالحصه الاولى !! ..

عندما يارفيقي تكون توك قايم من النوم .. مال اهل امك داعي بالحياه
ويجيك الاستاذ .. افتح كتابك منك ليه .. الصفحه تمنيه واربعين

* الرياضيات ، أكرهتس !!

( أتحداك ) .. تلقى نفر يذاكر رياضيات ، وهو مبتسم !!
لا وبعد الرياضيات لها جو خاص

يتكون من : -

1- اهم ماده " الشاهي "
2- الماده المقابله لها .. " الفصفص "
3- قلم ازرق ابو ريال
4- اوراق منثره في كل زاويه
5- جوال مرمي على جنب
6- شعرك شوشه من كثر ماتحكه
7- آله حاسبه
8- قلم عريض مدري وش اسمه حق التخطيط

8 ادوات اساسيه .. لمذاكرة الرياضيات ..

* الرياضيات .. تباً لتس !!

* ملاحظه : لحد يقولي وش تخربط .. ترا مازلت منب فاهم شيء

<-- ليش كاتب موضوع انت

[ عبارات منزليه ]

عزيزي الطالب .. لم تمل من عبارات منزليه مثل " رح ذاكر ياولد ، كتابك ازين لك ، اترك الكمبيوتر وقابل كتابك "
اذاً طالب معي .. بجهاز ريموت كنترول .. يجعل من على يمينك وشمالك لايتكلمون بتاتاً البته

<-- قم قم ذاكر

الم يحن الوقت للمطالبه بالتساهل ياحقارير
تجيبون اختبارات الواحد يشيب راسه ولا يعرف يحلها

وتقولون لازم تنجحون !

طيب نبي ننجح .. بس ساعدنا ياخي

اراهن .. على ان كل استاذ في الماضي

كان يتوهق بالاختبارات .. ودايم يسب
طيب دامك كنت مثلنا .. وكنت تبي الاساتذه يرفعون درجاتك

لعنبو بليسك ارفع درجاتنا طيب

برب اصيح شوي

باك .. خلصت دموعي

" غشّ " .. ( ومن غش فليس منا )

اساليب الغش .. " وللأسف " .. هالايام وصلت للتقنيه ووصلت للالكترونيات
وكثرت بطريقه غريبـه جداً !

يمكن انا احياناً اقز كلمه منا ولا منا بالغلط ..
لكن ماعمري فكرت احط معي شيء

من اساليب الغش الي شفناها ..
سماعات بلوتوث تتركب بالاذن ويتلطم الطالب
ويكلم خويه الي موجود برا ومعه الكتاب .. وينقله كلش بالتفصيل
* س / كيف ينقل السؤال لخويه ؟!
ج / يسأل الاستاذ عن السؤال .. وينقل السؤال للاستاذ .. ومنها يسمعه خويه الي موجود برا

الكتابه على المناديل ، يكتب على المنديل الاشياء الصعبه
وفي وسط الاختبار يطلع المنديل .. ويقرا الاجوبه ويرجع المنديل !
والاستاذ ماهوب داري عن اهله

الكتابه على الفنيله ، وفي وسط الاختبار
يفتح زرار من ثوبه وبشرط تكون الكتابه في مكان يقدر يقراه وهو جالس
فيفتح الزر ويقرا الكلام على راحته !!

الكتابه على " باطن " الرجلين ( الله يكرمكم )
وفي وسط الاختبار يميل رجله شوي
ويقرا كل الحتسي

اشياء واساليب كثيره جداً جداً

* س / موقف حصل في الغش وشفته ، اذكره لنا ..

[ غلط المذاكره ]

هاذي تحصل لما يكون الجدول ضايع
والطالب مستعجل
ويذاكر ماده .. وتطلع عنده ماده ثانيه

هالشيء سيء سيء للغايه

صدقوني

وحصلت مره لواحد من اخوياي في الابتدائي
بدون ذكر اسماء احسن

يمكن يكون معانا واتوهق

اذكر كان علينا وقتها علوم .. في صف خامس اعتقد او سادس
وجاء وهو مذاكر جغرافيا

وماسك كتاب الجغرافيا ويقرا قبل الاختبار

واحنا نطالعه وكذا وجيهنا

سأله واحد قال وش تذاكر
قاله اذاكر جغرافيا

قال بس احنا عندنا علوم
الطالب انقلب وجهه وبغا يطيح

راح لم المدير وكلمه ، المدير كلم الاستاذ
وعطوه 3 ساعات يروح البيت يذاكر ويرجع يختبر

جاب درجه مثل وجهه .. بس الاستاذ ماقصر وزاده كم درجه

* س / حصل لك هالموقف ؟ او حصل لغيرك ؟ اذكر لنا ياخي

فيه فقرات كثيره .. لكن الوقت وعندي اختبار بعد .. مايسمحون لي
بس نقول " اسئله عامه " .. للنقاش

* في جوّ الاختبارات .. وش هي اكثر ماده كنت تكره تذاكرهـا ..
* سؤال موجه لكل الطرفين بس خصوصاً للشباب

/ اي معجنات تروح بعد الاختبار

.. وللبنات / هل كنتي ترسلين السواق ؟

ولا ترجعين البيت علطول

* مادة كنت تعشقها لما تذاكرهـا ..
* مساحـه مفتوحـه لشخصك الكريم

* قفله /

الا يادنيا الاختبارات متى تقضين
والا ليت الليالي كلها ربوعي

كتبـْه /

..

The Princess · 02-02-2008, 09:46 PM

..

مساءكم وصباحكم
اختبارات

مساء النور

..
و التوزيع الالكتروني و الكيمياء ..

أعلم يارفيق دربي .. بأن مادة الرياضيات
هي اسوء ماده عرفها تاريخ الدوله العربيه السعوديه

صدقت ..

* الرياضيات ، أكرهتس !!
Me Toooo

* الرياضيات .. تباً لتس !!

كان يتوهق بالاختبارات .. ودايم يسب
طيب دامك كنت مثلنا .. وكنت تبي الاساتذه يرفعون درجاتك

في هذي أبصم بالعشره

* س / موقف حصل في الغش وشفته ، اذكره لنا ..

كثيـر عد و الغلط ..

آخرهـا اليوم في الفيزياء وحده وراي أسمعهـا تتكلم معي بس طنشتهـا ..

<< دافوورهـ

.. أنـأ أغش يمكن بس ما أغشش أحد دايم أسحب عليـهم << نذله ..

* س / حصل لك هالموقف ؟ او حصل لغيرك ؟ اذكر لنا ياخي

لا ما قد صارت ,, الحمد لله ,,

فيه فقرات كثيره .. لكن الوقت وعندي اختبار بعد .. مايسمحون لي
بالتوفيق ..

..
بس نقول " اسئله عامه " .. للنقاش

* في جوّ الاختبارات .. وش هي اكثر ماده كنت تكره تذاكرهـا ..
أكرههم كلهم ..

خاصه الرياضيات .. و الأدب ..

* سؤال موجه لكل الطرفين بس خصوصاً للشباب

/ اي معجنات تروح بعد الاختبار

.. وللبنات / هل كنتي ترسلين السواق ؟

ولا ترجعين البيت علطول

أرجع على طوول ..

* مادة كنت تعشقها لما تذاكرهـا ..
الانقلش ..

لأني أخلص بسرعه

* مساحـه مفتوحـه لشخصك الكريم

آآهـ بس متى يجي يوم الأربعاء و افتك من ذا القرف

..

..
زيآد

موضوع حللو ..

عوآفي ,,

مدمن · 02-02-2008, 09:54 PM

*

هلا والله الطالب الكسلان زياد
اجل احد يمل من المذاكره
اه بس يالمذاكره الا ليت الزمن يرجع واداعب الفرجار
وارسم زوايا منفرجه وغير منفرجه

أقتباس* س / موقف حصل في الغش وشفته ، اذكره لنا ..

كان عندنا اعتقد اختبار انقليزي وكان طالب معنا معه براشيم
المهم ان المدرس صاده كان المدرس مصري ولابس غتره بيضاء

كان الطالب حاط البرشام تحت الورقه مر المصري وشافه المهم خذ البرشام
وورقة الاختبار وقاله ادا بتغش ياحمار بصوت عالي

انهبل الطالب ويسكت المدرس والمصري خذ الورقه وراح والولد يلحقه ويسحب الغتره
ويقوله تكفى اسكت هات الورقه الله يرحم اابوك وعيا المصري واسمع الطالب يقوله عطني يلعن ابوك

أقتباس* في جوّ الاختبارات .. وش هي اكثر ماده كنت تكره تذاكرهـا ..

التاريخ

أقتباس* سؤال موجه لكل الطرفين بس خصوصاً للشباب

/ اي معجنات تروح بعد الاختبار

ماروح لمعجنات

ادور الفراش عقب الاختبار

أقتباس
* مادة كنت تعشقها لما تذاكرهـا ..

الادب

أقتباس* مساحـه مفتوحـه لشخصك الكريم

كان الله في عون الطلاب والطالبات وان شاءالله كلكم تنجحون

عوافي زياد

.. فوق هام السحب.. · 02-02-2008, 10:30 PM

*
زياد مدري ليه كنت احس انك كسلان قبل ماتقول

حرام عليك لاتحطمني اكثرمما انا محطمه

الرياضيات تراها تخصصي بالعكس ترا حلوه وسهله< تبي تقهرك

بصراحه انا افهم الرياضيات سهله مره بس ما احبها

لو تبي مدرس خصوصي بدل المصري الخايس حقكم انا جاهزه

يوووه ذكرني مصريكم بمصريتنا الخايسه

يا اني اكرهها

الموهم

* س / موقف حصل في الغش وشفته ، اذكره لنا ..

انا ما اغش ولله الحمد ولا اذكر موقف غشاشين

* في جوّ الاختبارات .. وش هي اكثر ماده كنت تكره تذاكرهـا ..

انا اكره اذاكر مواد الفظ اللي هالسنه كانت ماده الثقافه الاسلاميه

والمعجنات يوووه هو ويا المطاعم ماربحهم الا احنا في وقت الاختبار

لا والله اخوي الله يعافيه يرحمنا ويجيب

* مادة كنت تعشقها لما تذاكرهـا ..

الاحياء سابقا والتفاضل حاليا

* مساحـه مفتوحـه لشخصك الكريم

الله يوفقك يا زياد وان شاء الله تنجح وتجيب اعلى نسبه بالعالم وتحب الرياضيات

مملكة عمري · 02-02-2008, 11:02 PM

* س / موقف حصل في الغش وشفته ، اذكره لنا ..

صارت لوحده من صديقاتي كانت القاعه صف اولى صف ثاني وهكذا<< ياهوه يالفصحى
يوم جلست صديقتي قالت لها اللي في اولى صباح الخير <<< متى المعرفه
قالت صباح النور قالت لصديقتي لو سمحتي ممكن تنقلين الاجابات من اللي على يسارك وتعلميني<<< ماشاء الله شي حلو

تقول صديقتي ماقلت آسفه او شي قلت ابشري اي وحده بس تبين<<< تستهبل عليها

اجل تقعد تغششها وماتحل تضحي عشانها ولا ماتعرفها بعد
في الكليه تشووووف اساليب وانواع للغش مو طبيعيه

انامكاني ورى عالجدار والقاعه طويله وزحمة
الثنتين اللي جنبي على اليمين في رابع فالينهااااا
اجل تدف يدها عشان تشوف اللي قدمها ياسلاااام مابقى الا تسحب شعرها

واللي على يساري اولى ومااعرفها مره تخيلوااا بس وانا احل جت هي متاخره وجلست وتاشر لي بيدها التفت
قالت حلو شعري<<< بدون مقدمات
انا
قلت ايييه اجاوبها بدون شعور قالت لا لا من ورى احسه مو مرتب اصلا ما وراها الا جدار الله يخلف بس

* س / حصل لك هالموقف ؟ او حصل لغيرك ؟ اذكر لنا ياخي
زياد هد رلاكس
انا ماعندي موقف بس من الخوف اقتبست السؤال

* في جوّ الاختبارات .. وش هي اكثر ماده كنت تكره تذاكرهـا ؟

في المدرسه مكتبه
في الكليه ثقافه اسلاميه

* سؤال موجه لكل الطرفين بس خصوصاً للشباب / اي معجنات تروح بعد الاختبار

يا ماما نوره
ياتوست وجبن

مادة كنت تعشقها لما تذاكرهـا

ولا مادة وصلت لحد العشق

* مساحـه مفتوحـه لشخصك الكريم
الله يسلمك

احب اشكرك على اتاحة الفرصه لنا
واتمنى لك ولجميع الاخوه بالتوفيق والنجاح
واحتمال نتيجتي بكره يارب سترك

الا يادنيا الاختبارات متى تقضين
والا ليت الليالي كلها ربوعي

ربوعي

ســلام

**ملك روحي** · 02-02-2008, 11:19 PM

مساء الورد
زياد وسع صدرك ماباقي شي
كلها يومين

زياد
أنا أحب الرياضيات
لما دخلت الجامعه كنت بتخصص رياضيات
ترى مو صعبه
بس أخذه هالسمعه كذااا
يعني السالفه كلها قانون وأنت تطبقه على المسائل وأنتهينا

/

* س / موقف حصل في الغش وشفته ، اذكره لنا ..

/ما أذكر البنات مايغشون

س / حصل لك هالموقف ؟ او حصل لغيرك ؟ اذكر لنا ياخي

بالثانوي صار لوحده من البنات

ذاكرت شوي ودخلت الامتحان

في جوّ الاختبارات .. وش هي اكثر ماده كنت تكره تذاكرهـا ..

بالمدرسه ...فيزياء
بالجامعه..فونتكس

* مادة كنت تعشقها لما تذاكرهـا ..

الأدب.. رياضيات..
بالجامعه..الماده السهله

* مساحـه مفتوحـه لشخصك الكريم

بالتوفيق للجميع
وو
أنا معطله من أسبوعين

//
عوافي زياد

لكـ

**][الفجـــر البعيـــد][** · 02-02-2008, 11:45 PM

..

أقتباس

يتكون من : -

1- اهم ماده " الشاهي "
2- الماده المقابله لها .. " الفصفص "
3- قلم ازرق ابو ريال
4- اوراق منثره في كل زاويه
5- جوال مرمي على جنب
6- شعرك شوشه من كثر ماتحكه
7- آله حاسبه
8- قلم عريض مدري وش اسمه حق التخطيط

8 ادوات اساسيه .. لمذاكرة الرياضيات ..

* الرياضيات .. تباً لتس !!

بوفيه مفتوح

أقتباس

برب اصيح شوي

تعال أبكي على صدري يا مهموم

<- - فاهم خطأ

أقتباس

باك .. خلصت دموعي

رجع الفاين اللي خذته

أقتباس

* س / موقف حصل في الغش وشفته ، اذكره لنا ..

أذكر كنت بـ ( ثالث ثانوي ) .. طبعاُ بمدرسه ( أهليه )
يعني أنواع( الدلع والغش )

لكن اللي ما تتوقعونه .. ان الأستاذ
اذا شاف الطالب معاه ( برشومه )
يجي طاير ويأخذها منه ويعطيها الطالب

اللي ما معاه

أقتباس

* س / حصل لك هالموقف ؟ او حصل لغيرك ؟ اذكر لنا ياخي

اي وربي حصل لي ) الصيف الماضي (
مو مثله بالضبط لكن ألعن منه

طبعاُ انا ادرس ( شبكات ) في أحد المعاهد العالميه
بمديتني المؤقره ( الرياض ) حبيبتي <- - أزعجتنا

المهم يا طويل العمر اهلي كانوا بالطايف ..

وأنا كنت اعمل في احد القطاعات الخاصه
ومنثبر بالبيت .. وكان عندي أختبار ثلاث مواد ..
موزعه على أيام الأسبوع ..

طبعاُ احد المواد كان يوم الثلاثاء
والأربعاء OF نخلص بعدها .. !!

أخوك بالله سحب على يوم الثلاثاء

ويوم الأربعاء سحب على الدوام وجهز
نفسه للأختبار يفكره الأربعاء .. ويوم وصلت عندهم ..
قالوا : خذ فوق تحت

ورح كمل نومتك وراجعنا بالترم القادم

وووبس

فيه فقرات كثيره .. لكن الوقت وعندي اختبار بعد .. مايسمحون لي
بس نقول " اسئله عامه " .. للنقاش

أقتباس* في جوّ الاختبارات .. وش هي اكثر ماده كنت تكره تذاكرهـا ..

الأدب لأني أحب الشعر واحفظه

* مادة كنت تعشقها لما تذاكرهـا ..
المحفوظات والأناشيد
<- - يقاله غير الأسم خخخخ

* مساحـه مفتوحـه لشخصك الكريم

ابد ادعو لك بالتوفيق وتراي احبك حب عظيم

* قفله /

يا زيـآد مو باقين الا يومين ..
وتنسى هم الأختبارات
تصبر لين يوم الأثنين ..
وسنتر بعدها قدام المباريات ..

شكراُ شكراُ زيـآدوه

Tito's · 03-02-2008, 12:57 AM

يتكون من : -

1- اهم ماده " الشاهي "
2- الماده المقابله لها .. " الفصفص "
3- قلم ازرق ابو ريال
4- اوراق منثره في كل زاويه
5- جوال مرمي على جنب
6- شعرك شوشه من كثر ماتحكه
7- آله حاسبه
8- قلم عريض مدري وش اسمه حق التخطيط

8 ادوات اساسيه .. لمذاكرة الرياضيات ..

* الرياضيات .. تباً لتس !!

ااه ذكرتني ايام ثالث ثانوي والله نفس الشكل بالضبط

س / موقف حصل في الغش وشفته ، اذكره لنا ..

طبعا الكل يعرف ان العام اسئلة الوزارة كانت نااار

فأنتشرت في المدرسة موضة اللي هي تصغير الشفافيات(للي ما يعرف الشفافية هي ورقة
بلاستيكية شفافة)

يعني ابرشم على ورقة واروح
لمركز خدمات الطالب واخليه يصغرها بس على شفافية واذا جيت تغش منها حطها على الطاولة ومافيه امل يقزها المراقب <<ياخي والله الطلاب اذكياء بس يبون فرصة

في جوّ الاختبارات .. وش هي اكثر ماده كنت تكره تذاكرهـا ..

في الثانوي كانت الرياضيات والفيزياء
اما الحين في الكلية فهي مادة عال(حاسب الي)

<<مستغربين والله ياعندنا دكتور تحبه قلوبكم مدري وشلون صار دكتور هو من الناس اللي تنطبق عليه ان الدال اللي قبل اسمه تعني دلخ

* مادة كنت تعشقها لما تذاكرهـا ..

الكيمياء والانجليزي.........

مساحـه مفتوحـه لشخصك الكريم

ابد مافيه شيء بس اقول الله يوفقكم

مشكووور زيآدCC

ĵйσσй · 03-02-2008, 01:01 AM

الحمــــدلله ماعنــدي رياضيات
الله لايعيده ..

أمــا اساليب الغش ماعمــري شفت طرق كذا

.

أقتباس

* س / موقف حصل في الغش وشفته ، اذكره لنا ..

أذكـــر بنت عمــــي بالثانوي كانت تكتب على مريولها
تعبير انقليزي وجاهــا اللي كتبته

ومــرهـ كان علــى حديث وكانت وراي وحــدهـ
وقالت لي وخري شوي عشان اشوف الاجوبــه

قلت أوكي ولما وزعو الاوراق صارت تطق الكرســي

بأقوى ماعندهــا وأنــا بعد ماحليــت

وأتنافض لاتشوفيني اللي تراقب
وهــي من أول مابدينــا لحد مانتهينــا
قاعدهـ ترفس بالكرســـي
أنـــا مسكــت معــي عنـــاد والله ماتنقــل منــي ولا كلمـــه

..

أقتباس

* س / حصل لك هالموقف ؟ او حصل لغيرك ؟ اذكر لنا ياخي

ايـــه حصــل لاختـــي يوم كانت بالثانوي
بس صار لخبطه بين الفتره الاولى والثانيه
وهي مابعد ذاكرت الماده
كلــه من بنت الجيران الله يصلحها نقلتها
الجدول بالمقلوب

..

أقتباس* في جوّ الاختبارات .. وش هي اكثر ماده كنت تكره تذاكرهـا ..

أكـــرهـ النظــم الاسلاميــه
بس الحمــدلله نجحت فيــها بس غثيثه بقوووهـ

أقتباس

.. وللبنات / هل كنتي ترسلين السواق ؟

ولا ترجعين البيت علطول

ماعندنـا سواق أرجـــع على طووول

أقتباس* مادة كنت تعشقها لما تذاكرهـا ..

بالثانوي أعشق الجغرافيـــا

واللحيـــن ولا مــادهـ بس فقـــه أرحــم شي

أقتباس* مساحـه مفتوحـه لشخصك الكريم

الله يعينك زياد ويعين اللي ماخلصو
انــا مخلصـــه لــي أسبوع الحمدلله ،.

زيــــــاد لكـ

وذاكـــر زين

صعنطوطه · 03-02-2008, 02:35 AM

..,..

طيب يومـ قضيت كاتبن موضوعك ومتشكي ..عسآك فهمت انك كنت تكتب ..؟

زيآد ..\

موضـوعك كندر.. (يعني حلو

)

بس بآين بقوه ان (الرياضيات)لاعبن في مريرك..وإنت ماقصرت لعنت جدفه..

وتدخلو الشبآب ..وفكوكم بوب صح..؟

<- - تركّدي بس
..
وتبي الصرآحه عآد ..انا كنت بدخل العلمي يومني منول..بس عشآن هالماده تركتـه

يآخي من حين حيني ماطيقـه..,يآلبى الادبي بس

آخر سنتين.."أدبي" (تحس ببلادهـ فكريـهـ) لأنك معد تعد على اصابعك..

ولاعاد تدور بالفرجآر..(ياكرهني للفرجآر..ياكنت اتشقلب عشان اسوي دويره

)

,
طلعت مع اخوياي محمد و (س) و خالد و ( ص ) "
فأعلم بأن الرياضيات لها تأثير عام عليه !
,
سعد - صالح ..صح..ولا لا ..

كنت حآسه ان لي مستقبل بالرياضيات بس يالله راحت علينا

<-- طلعوهآ برا..يرحم والديكم
.,\

عشان مااطول ..بخش سيدهـ عالأسعلـه..
..
* س / موقف حصل في الغش وشفته ، اذكره لنا ..

..,
شف عشآن أكون صريـحه..وماأتسذب..انا كنت اسوي هالعمله السودهـ..

كنت ابرشم..(قطعه الانقليزي)

يآناس ماعرف احفظ القطعهـ..

فكنت ابرشمها على ورقه عاديه..وأكتبها بقلم ازرق واحط نقط بالبرتقالي..بين كل كلمه وكلمه

عشان اعرف ان الجمله خلصت..

<- انقليزي فاشل,

وأمسك الورقـه وأدبسها بالدباسـه على آخر القميص من جوا..وبشكل مقلوب

..عشآن لما اجي انقش..
اقلب القميص ..فتكون الورقـه معتدله..((فهمتو الخطه..؟))

بس ماتصلح الا اللي مريولهم تنوره وقميص

المهم دخلت القآعه..ومن غبائي قلت بخلي القطعه آخر شي.. ولما حليت كل الورقه ومابقى الاالقطعه
رفعت رآسي لقيت القآعه فاضيه..

ياليل الليل وشلون ابنقشهآ الحين

؟

والمراقبه اللي عندنا كآنت وآقفه عند الباب وتناظر برا ..يعني وش تبي تراقب ومافي احد بالقاعه

فحطيت يدي(اليسار) على جبهتي عشان انزل عيوني..وصفطت القميص وعدلت وضعي.. وخليت يدي اليمين
على الورقه..بدون ماشوف الورقه

يعني اقرا واكتب من غير مآشوف..
((وســر يآقلم..وعيوني تنقش البرشام

))
قامت يدي ترتجف وإحترتيت..وحالتي حآله مع انه موسم شتا

,
المهم اني حسيت انها حست..فقلت بالطقاق
بسوي نفسي كني ماحسيت..وبكمل..

.
.كملت ..ورفعت رآسي وناظرتها وعيوني كلها دموع من قوه التدقيق

وقسم بالله يوم رجعت البيت ابي اقرا البرشامه ماعرفت

سلمتها الورقـه وكنت حآسه انها بتذب علي ..خشت في عيني..
قآلت : ماشاء الله عرفتي تحلينها

قلت: ايه الحمد لله..
قآلت: وليش تأخرتي وآجـد..؟

..قلت: اتذكرهـا

قآلت: آها.. طيب يالله انزلي..

ونزلت وانا فاقـهـ كشرتي..

صدق يمديها تروح تعلم..بس يمكن رحمتني

=======

وأيام اولى ثنوي وكان اختبار (فيزياء)

دخلت للمدرسه فاجئوني البنآت بأن ذي المسأله هي اللي بتجي اكيد..
انا ماعندي وقت احفظها او حتى افهمها..والمسأله مؤكدهـ..فكتبتها على يدي وخلاص
ولما دخلت القاعه..وكنت بردانه وقاعده لحد يحاكيني ولا بعصب ..

ويوم جت الاسئله ..وقبل لايوزعونها..دخلت المديره وطلبت من المراقبه تفتش على البنآت
يآربيـــــه ..

ياسخفتس يالمديره لين هايطتي

المهم ااني استسلمت للأمر الوآقع

.. وقالتلنا إفتحو يديكم..و(ذرعآنكم)..
فتشت معهم

وشافت المراقبه الحفله اللي بيدي..قالت: الله يهديك يالله قدآمي غسلي يدك ..

قلت :لا وين برد

..تكفى والله مااغش ..ومنيب فاتحه يدي..

وأبت الا ان اغسلها..
يوم نزلت الا وراي خمسه لاحقيني ..بيغسلون

..
(قلت: وتحيّا الدفآره يامدرستنا المخيسه

)
,..,
\

[ غلط المذاكره ]
* س / حصل لك هالموقف ؟ او حصل لغيرك ؟ اذكر لنا ياخي

,
وع ياشينها..ماقد صارتلي بس صارت لبنت في ثآني ثنوي..وعلى مرأى من الجميع

كنا متأخرين الصباح كالعاده..وموقفتنا المديره برا الين تنتهي الحصه الاولى ..يقالك عقاب

ماتدري اننا ننبسط

,المهم موسم اختبارات شهريه..وكلن خآش جوّه يذآكر..
جو بنتين..وحدهت منهم مآسكه كتآب(توحيد) وتذآكر ومتحمسه

سألت خويآتها اللي (موقفين معنا)
يآبنات والله صعب.. ماعرفت احفظ..

رفعو روسهم ونآظرو كتابها..

هيه..وش تذاكرين ياخبله..؟
البنت.. يآعمري انلخمّت

..
وقعدنا كلنا نضحك يوم فهمنا سآلفتها..وضحكنا زود يوم التفتت على بنت عما وقعدت تصارخ..
: يآحيوانه اذا قلتلك بغيب..لاتحايليني اجي

..وذيك مثلها مذآكره نفس المآدهـ

يآخي اشك في مدرستنا..كل اللي فيها فآهين

=====
,
* في جوّ الاختبارات .. وش هي اكثر ماده كنت تكره تذاكرهـا ..
النحو مآحبه هالانسآن..

على ان مدرسته من الطف الكآئنات

<-

,
* سؤال موجه لكل الطرفين بس خصوصاً للشباب

/ اي معجنات تروح بعد الاختبار

..
وللبنات / هل كنتي ترسلين السواق ؟

ولا ترجعين البيت علطول

في البيت..

وأحيانا نصير مروقين وحآلين زين..وبكره المآده سهله..
نخلي السوآق يوصل الفطور للمدرسه..

,
* مادة كنت تعشقها لما تذاكرهـا ..
موآد الدين..وعلم النفس والاجتمآع

كنت اقراها كأني اقرا كتآب..

..,\\

* مساحـه مفتوحـه لشخصك الكريم

اسفه على كثر البربرهـ..

..بس ذكرتني باللذي قد مضى..

الله يذكرك بالخير..يامدرستنا الوعـه..

والله اني الله لايعاقبني غشيت وآجد..وهبلت بمدرسآت وآجد..بس كآنو متسآمحين معنا..
وأحيآنا هم اللي يفتحون لنا المجآل..

يعني اذا شافو الوحدهـ تغش ضحكو..
وش تبوني اسوي..

<--- اختمي الرد وظفي وجهس

الله يسهلك زيآد..والجميع ان شاء الله..
وبالتوفيق..
سلآم
.
.

The Fahad · 03-02-2008, 02:39 AM

أقتباسو التوزيع الالكتروني و الكيمياء ..

لآلآ .. لآااااااااااء حتى في النت لاحقني هذآ ..

آي شي عن الدِراسه من جنبها انا :(

توتة · 03-02-2008, 03:33 AM

هلا هلا زياد ..
يالله حيه .. الحين انت في ثالث وكاتب موضوع ياكبرها <- بعقدك زيادهـ ..

تصدق عاد اني اتمنى ارجع لمدرستي .. واتمنى ارجع للاختبارات والقلق ..

وبتذكر كلامي اذا دخلت الجامعه المخيسه ..

يعني استمتع بالمدرسه باقي الايام والفصل الجاي ..

.
.

نخش في الاسئــله ..

أقتباس* س / موقف حصل في الغش وشفته ، اذكره لنا ..

اول انا كنت ما اعرف اغش واخاف ربي ووشسمه وما احب اغش ابد
بس يوم جينا لثالث ثانوي .. فصلنا كله خرب

المهم اقول لك موقف لي انا وصديقتي جنب بعض ..
عندنا مدرسه الله يذكرها بالخير حبيبه على سبهه على نياااتها ..

المهم اناظر صديقتي واقول لها السؤال اللي ماعرفته ..
تجيب قرطاسه حقت العلك وتكتب فيها وتعطينيها من تحت .. ياجرئها ذيك البنت ..
انا كنت اتنافض بس وشسمه الحاجه وماتسوي

..

انا ما احب التاريخ ... وقسم ما احبه ابد

ومره ماحفظت تواريخ المعارك ومتى ذا انولد ومتى ما انولد ومتى تولى الحكم ..
عاد انتم تعرفون التاريخ الوع

المهم اخذت الكتاب وكتبت كل التواريخ على الطاوله .. وتتسلط علينا ذاك اليوم
المدرسه وتدور على الطاولات وانا اللي يتغير وجهي
وذيك الاستاذه شديده اشدد شي ..

وما احبها ابد

وتقول انتي انتي تتغشين .. ماهقيتها منتس ..
المهم الاختبار ذاك عادته لي خمس مرات وفي الاخير جبت العشره مابغيت

..

أقتباس

* س / حصل لك هالموقف ؟ او حصل لغيرك ؟ اذكر لنا ياخي

صديقتي مره في قاعة الامتحان جالسه وخايفه مره من الاختبار
المهم تجي اللي وراها تسأل ..
كان عليهم ادب .. وتسأل سؤال في الحديث
واختبصت المعلومات عندها .. قالت لها وش تبين انتي
مير صديقتي تموت ضحك قالت اليوم علينا فقه ..

ماصدقت وتسأل كل البنات و القاعه كلها ضحك ..
عاد مدري وش صار لها

أقتباس* في جوّ الاختبارات .. وش هي اكثر ماده كنت تكره تذاكرهـا ..

تاريخ ياقلب العنــا ..
تاريخ وش ذنبي انا ..

ومكتـــبه ..

أقتباس* سؤال موجه لكل الطرفين بس خصوصاً للشباب

/ اي معجنات تروح بعد الاختبار

.. وللبنات / هل كنتي ترسلين السواق ؟

ولا ترجعين البيت علطول

اي معجنات اي بصل .. اروح اخم اقرب مخده

أقتباس* مادة كنت تعشقها لما تذاكرهـا ..

حديث + فقــه ..

أقتباس* مساحـه مفتوحـه لشخصك الكريم

موضوعك طويل تعبت وانا ارد

ابد بس كنت بقول ان المدرسه حلوه ولو فيها تعب راح تشتاق لها .. وللمــدرسات
والهبال والرجــه

والله يوفقكم ياحقين ثالث وتجيبون نسبــه حلوهـ ..
ويعدي الاختبارات على خيــر ..

.
.

بالتوفيق زيــاد ../

T.UPDATE · 03-02-2008, 04:01 AM

..

مساءكم وصباحكم
اختبارات

صباح النور

عندمـا تشاهد طالباً .. يحاتسي نفسهُ ،
فأعلم ياصاحبي بأنه عايش جو " الاختبارات " !!

أعلم يارفيق دربي .. بأن مادة الرياضيات
هي اسوء ماده عرفها تاريخ الدوله العربيه السعوديه

ياعيني عليك خطير تصدق عاد حتى دكتورتنا بتاعة الريض تقوووول ليه انتم عندكم ان الرياضيات شبح ذا >>حاقه هايفه<<عاد البنات يردن استاذه احنا من يوم كنا صغار نسميه شيخ القبيله هههه

خصوصاً لما يكون المدرس " مصري " !!
وايضاً خصوصاً لما تكون الرياضيات بالحصه الاولى !! ..

عندما يارفيقي تكون توك قايم من النوم .. مال اهل امك داعي بالحياه
ويجيك الاستاذ .. افتح كتابك منك ليه .. الصفحه تمنيه واربعين

* الرياضيات ، أكرهتس !!
ههههه الله يرجك رجا مبرحا تكره لا هد اعصابك لسا ماشفت شي تجييك الجامعه وتوريك وتقوووول يالبى قلبك يالرياضيات اعزك اموووت فيك ولا بعد ترفع معدلك<<كل ذا لاحظ<<بس ماني مخوفتك لان البرمجه طيرت عقلي>>

( أتحداك ) .. تلقى نفر يذاكر رياضيات ، وهو مبتسم !!
لا وبعد الرياضيات لها جو خاص

الا انا استمتع فيه كله قوانين وشوية تفكير وطبق

يتكون من : -

1- اهم ماده " الشاهي "
2- الماده المقابله لها .. " الفصفص "
3- قلم ازرق ابو ريال
4- اوراق منثره في كل زاويه
5- جوال مرمي على جنب
6- شعرك شوشه من كثر ماتحكه
7- آله حاسبه
8- قلم عريض مدري وش اسمه حق التخطيط

8 ادوات اساسيه .. لمذاكرة الرياضيات ..

* الرياضيات .. تباً لتس !!

ههههههههههه الفصفص ذا مسوي لي ازمه <<فصفص باجه نقظة ضعفي << عز الله مادرست

<-- قم قم ذاكر

الم يحن الوقت للمطالبه بالتساهل ياحقارير
تجيبون اختبارات الواحد يشيب راسه ولا يعرف يحلها

وتقولون لازم تنجحون !

باك .. خلصت دموعي

ياحرام مابقيت شي لفرحة النجاح

* س / موقف حصل في الغش وشفته ، اذكره لنا ..

مره بحياتي وبعد وعقبها تبت يجيني تأنيب ضمير موصاحي
كنت بمستوى اول وكان عندي 101عرب تحسين امتحان عارفه الاجابه بس شاكه سمعتها لقطتها والاستاذ عرف عموما انه فيه غش بس مو مرتاحه اقسم قسم اتصلت على استاذي الفاضل <<مساعد الغفيلي >> وصارحته وشكرني وبعد اضاف لي كم درجه على صراحتي .........الخ

* س / حصل لك هالموقف ؟ او حصل لغيرك ؟ اذكر لنا ياخي

لا ياخوي

فيه فقرات كثيره .. لكن الوقت وعندي اختبار بعد .. مايسمحون لي
بس نقول " اسئله عامه " .. للنقاش

الله يعينك ويوفقك

* في جوّ الاختبارات .. وش هي اكثر ماده كنت تكره تذاكرهـا ..
بالمدرسه ادب تاريخ مكتبه
* وللبنات / هل كنتي ترسلين السواق ؟

ولا ترجعين البيت علطول

لا ماعندي سواق وارجع البيت عالطول واتقهوى واقرب خداديه من الدوخ مافيني حيل اروح لغرفتي
* مادة كنت تعشقها لما تذاكرهـا ..
يووووووووووه ذا سؤال شي احب مادة النحو والانقليزي اعتبرها مواد ممتعه جدا
زي اي مباراة الهلال فيها فايز وخصوصا علة النصر
* مساحـه مفتوحـه لشخصك الكريم

مشكووووور ياخوي على الموضوع الحلو والله يوفقك وتجيب النسبه الحلوه وانا وكل قناصه وقناص نجيب المعدل اللي يبيِض الوجه

* قفله /

الا يادنيا الاختبارات متى تقضين
والا ليت الليالي كلها ربوعي

صح لسانك على القفله الحلوه

..

[/quote]

**TAMeeM** · 03-02-2008, 04:07 AM

زياد تعرفني ماحب الردود الطويله ..
كل الي اقوله ..
شد حيلك يا بعدي ..
هانت ..
راح الكثير وبقى القليل ..
ولا يشغلك النت ياخوي .. تراها اختبارات نهائية ..
اضغط على نفسك بهالـ 3 ايام .. منــتب ميت ..

الله يوفقك ..
وان جبت اقل من 98 بفقع وجهك ..

( على الطاير )

أقتباس* في جوّ الاختبارات .. وش هي اكثر ماده كنت تكره تذاكرهـا ..

الكيمياء

أقتباس* سؤال موجه لكل الطرفين بس خصوصاً للشباب

/ اي معجنات تروح بعد الاختبار

..

الشلال ههههههههههه

أقتباس* مادة كنت تعشقها لما تذاكرهـا ..

النصوص .. لاني مجنون حفظ

-
-

سلام

مـلاك الـهـلال · 03-02-2008, 05:15 AM

ღيسعد صباحك ღ

ღصراحة موضوعك ع الوتر .. كأنك توصف ربع من حالتي
اللي انا الحين بـ فترة استشفاء منها ..ღ

ღالاختبارات ذي ما أعرف شلون جايه خير جد مالها داعي
اموت وأعرف مين اللي فكر بـ هالشي يعني اللي أخترع
هـ الفكرة اختبارات وما اختبارات ..ღ
ღو تهون لو في مناهج مثل العالم والاودام بس مافي مناهج
ومافي دكتورين ومافي جامعات وكل شي كل شي مو حلو
يعني لا تدرسون وارتاحوا .. بس احنا شعب مكافح من الطبقة
الاولى لازم ندرس وندرس مابيسير نكون اقل من غيرنا مو ..؟؟ღ

أقتباسعندمـا تشاهد طالباً .. يحاتسي نفسهُ ،
فأعلم ياصاحبي بأنه عايش جو " الاختبارات " !!

ღالحالة ذي تنطبق علي مره
ولو ما اكلم نفسي أفكر كثير ღ
ღبس ماعندي وسط يعني أهتم واصلح حالة استنفار
ولا تجيني حالة تبلد فظيعة وبـ هالحالة اقول يا ملاك
لا يكلف الله نفساً الا وسعها وأقفل الكتاب وبسღ

أقتباس( أتحداك ) .. تلقى نفر يذاكر رياضيات ، وهو مبتسم !!
لا وبعد الرياضيات لها جو خاص

ღأنا أحب الرياضيات أستمتع وأنا أدرس رياضيات
وأحلا شي إختبار الرياضياتღ

أقتباس2- الماده المقابله لها .. " الفصفص "

ღديني ودين الفصفص .. ما أحب ابد الحمدلله ღ

أقتباس5- جوال مرمي على جنب

ღمو مرمي لا بيدي كل ابو دايم ما أنزله أبي اي أحد
يتصل وينقذني من المذاكرة
جوالي ما اعرفة إلا أيام الاختبارات ღ

أقتباس8- قلم عريض مدري وش اسمه حق التخطيط

ღاذا تقصد قلم التوضيح ما أحبه أحسه يعور بـ العيون مره ღ

أقتباس[ عبارات منزليه ]

ღالحمدلله أنا ما أسمعها يمكن بـ اليوم مره بس يقولون
انتي كبيرة وتعرفين مصلحة نفسكღ

ღبس اللي ما أحبه لما أرجع تسألني ماما تقول كيف
الاختبار المشكلة ما أقدر أكذب اقول ان شاءالله حلو
وأغير الموضوعღ

أقتباسيمكن انا احياناً اقز كلمه منا ولا منا بالغلط ..
لكن ماعمري فكرت احط معي شيء

ღزياد عيني بـ عينك ღ.. ღايه صح مانحب الغش ღ

أقتباس* س / موقف حصل في الغش وشفته ، اذكره لنا ..

ღمو اني شفت أحد يغش لا أنا موقفي غير شكل ..
اتخيل انه بنت جالسة وراي تقول يا قمر ياقمر << يقالها ترفع لي
علشان اغششها بس .. لما قلت هلا .. قالت تكفين غششيني ..
انصدمت من طلبها ماقدرت اقول لا .. قلت أخاف اغششك خطأ
ماقدرت اقول حرام الغش .. قالت عادي اهم شي احل دايماً اشوفك
تحلين وانا ما احل قلت يمه بسم الله علي .. ღ

أقتباس[ غلط المذاكره ]

ღالحمدلله ماسارت ليღ

أقتباس* في جوّ الاختبارات .. وش هي اكثر ماده كنت تكره تذاكرهـا ..

ღالتاريخ ما أحبه وما أحبه مره مايدخل عقليღ

أقتباسوللبنات / هل كنتي ترسلين السواق ؟

ولا ترجعين البيت علطول

ღوأنا راجعة البيت اقول لـ السواق يشتري لي .. بس مره انقهرت
من أخواني ليش كل أبو دايم يفطرون برا وأنا بـ البيت ..
اتفقت أنا وصديقتي نفطر بـ مطعم طبعاً من دون ما أحد يعرف
وخلاص حطيت الفكرة بـ راسي بس هي ما كان وقتها مناسب
بس وربي الفكرة بـ راسي وناوية اصلحها واللي يسير يسير
احب المغامرات ღ

أقتباس* مادة كنت تعشقها لما تذاكرهـا ..

ღرياضيات .. انجليزي .. نحو بـ الذات الإعراب أحبه حييييل
في مواد بس ذي أكثر شي ..ღ

*

أقتباس مساحـه مفتوحـه لشخصك الكريم

ღأشكرك ع هـ الموضوع الحلو ღ

ღالله يوفقك بـ إختباراتك وتجيب أحلا شي
الله يوفقنا كلنا وينجحنا ومايضيع تعبنا

يا حق ياكريم ღ

ღيعطيك العافيةღ

ミღ彡مــلاك الـهـلالܓミ

02-02-2008, 09:18 PM	#1
زيـآد قلم المجلس الذهبي	[ ~ .. الا يادنيا " الاختبارات " متى تقضين .. ~ ] .. مساءكم وصباحكم اختبارات عندمـا تشاهد طالباً .. يحاتسي نفسهُ ، فأعلم ياصاحبي بأنه عايش جو " الاختبارات " !! عندمـا تشاهد طالباً .. وهو يسولف معك ، يقول " امس طلعت مع اخوياي محمد و (س) و خالد و ( ص ) " فأعلم بأن الرياضيات لها تأثير عام عليه ! اذا كلنـا نرفـع رايـه [ لا للاختبارات ] .. [ نعم للدرجات ] ! * ملحوظه : لحد يقولي وشلون تاخذ درجات بدون اختبارات .. لاني مدري وش قاعد اقول اساساً !؟ أعلم يارفيق دربي .. بأن مادة الرياضيات هي اسوء ماده عرفها تاريخ الدوله العربيه السعوديه خصوصاً لما يكون المدرس " مصري " !! وايضاً خصوصاً لما تكون الرياضيات بالحصه الاولى !! .. عندما يارفيقي تكون توك قايم من النوم .. مال اهل امك داعي بالحياه ويجيك الاستاذ .. افتح كتابك منك ليه .. الصفحه تمنيه واربعين * الرياضيات ، أكرهتس !! ( أتحداك ) .. تلقى نفر يذاكر رياضيات ، وهو مبتسم !! لا وبعد الرياضيات لها جو خاص يتكون من : - 1- اهم ماده " الشاهي " 2- الماده المقابله لها .. " الفصفص " 3- قلم ازرق ابو ريال 4- اوراق منثره في كل زاويه 5- جوال مرمي على جنب 6- شعرك شوشه من كثر ماتحكه 7- آله حاسبه 8- قلم عريض مدري وش اسمه حق التخطيط 8 ادوات اساسيه .. لمذاكرة الرياضيات .. * الرياضيات .. تباً لتس !! * ملاحظه : لحد يقولي وش تخربط .. ترا مازلت منب فاهم شيء <-- ليش كاتب موضوع انت [ عبارات منزليه ] عزيزي الطالب .. لم تمل من عبارات منزليه مثل " رح ذاكر ياولد ، كتابك ازين لك ، اترك الكمبيوتر وقابل كتابك " اذاً طالب معي .. بجهاز ريموت كنترول .. يجعل من على يمينك وشمالك لايتكلمون بتاتاً البته <-- قم قم ذاكر الم يحن الوقت للمطالبه بالتساهل ياحقارير تجيبون اختبارات الواحد يشيب راسه ولا يعرف يحلها وتقولون لازم تنجحون ! طيب نبي ننجح .. بس ساعدنا ياخي اراهن .. على ان كل استاذ في الماضي كان يتوهق بالاختبارات .. ودايم يسب طيب دامك كنت مثلنا .. وكنت تبي الاساتذه يرفعون درجاتك لعنبو بليسك ارفع درجاتنا طيب برب اصيح شوي باك .. خلصت دموعي " غشّ " .. ( ومن غش فليس منا ) اساليب الغش .. " وللأسف " .. هالايام وصلت للتقنيه ووصلت للالكترونيات وكثرت بطريقه غريبـه جداً ! يمكن انا احياناً اقز كلمه منا ولا منا بالغلط .. لكن ماعمري فكرت احط معي شيء من اساليب الغش الي شفناها .. سماعات بلوتوث تتركب بالاذن ويتلطم الطالب ويكلم خويه الي موجود برا ومعه الكتاب .. وينقله كلش بالتفصيل * س / كيف ينقل السؤال لخويه ؟! ج / يسأل الاستاذ عن السؤال .. وينقل السؤال للاستاذ .. ومنها يسمعه خويه الي موجود برا الكتابه على المناديل ، يكتب على المنديل الاشياء الصعبه وفي وسط الاختبار يطلع المنديل .. ويقرا الاجوبه ويرجع المنديل ! والاستاذ ماهوب داري عن اهله الكتابه على الفنيله ، وفي وسط الاختبار يفتح زرار من ثوبه وبشرط تكون الكتابه في مكان يقدر يقراه وهو جالس فيفتح الزر ويقرا الكلام على راحته !! الكتابه على " باطن " الرجلين ( الله يكرمكم ) وفي وسط الاختبار يميل رجله شوي ويقرا كل الحتسي اشياء واساليب كثيره جداً جداً * س / موقف حصل في الغش وشفته ، اذكره لنا .. [ غلط المذاكره ] هاذي تحصل لما يكون الجدول ضايع والطالب مستعجل ويذاكر ماده .. وتطلع عنده ماده ثانيه هالشيء سيء سيء للغايه صدقوني وحصلت مره لواحد من اخوياي في الابتدائي بدون ذكر اسماء احسن يمكن يكون معانا واتوهق اذكر كان علينا وقتها علوم .. في صف خامس اعتقد او سادس وجاء وهو مذاكر جغرافيا وماسك كتاب الجغرافيا ويقرا قبل الاختبار واحنا نطالعه وكذا وجيهنا سأله واحد قال وش تذاكر قاله اذاكر جغرافيا قال بس احنا عندنا علوم الطالب انقلب وجهه وبغا يطيح راح لم المدير وكلمه ، المدير كلم الاستاذ وعطوه 3 ساعات يروح البيت يذاكر ويرجع يختبر جاب درجه مثل وجهه .. بس الاستاذ ماقصر وزاده كم درجه * س / حصل لك هالموقف ؟ او حصل لغيرك ؟ اذكر لنا ياخي فيه فقرات كثيره .. لكن الوقت وعندي اختبار بعد .. مايسمحون لي بس نقول " اسئله عامه " .. للنقاش * في جوّ الاختبارات .. وش هي اكثر ماده كنت تكره تذاكرهـا .. * سؤال موجه لكل الطرفين بس خصوصاً للشباب / اي معجنات تروح بعد الاختبار .. وللبنات / هل كنتي ترسلين السواق ؟ ولا ترجعين البيت علطول * مادة كنت تعشقها لما تذاكرهـا .. * مساحـه مفتوحـه لشخصك الكريم * قفله / الا يادنيا الاختبارات متى تقضين والا ليت الليالي كلها ربوعي كتبـْه / .. التوقيع: - مَ عاد بـ حياتنا مدرسة , خلاص يَ عمي صرنا جامعيين Sayat.me - Flickr - Ask.fm - Twitter................... -

02-02-2008, 09:46 PM	#2
The Princess قنــاص فعــال	رد: [ ~ .. الا يادنيا " الاختبارات " متى تقضين .. ~ ] .. مساءكم وصباحكم اختبارات مساء النور .. و التوزيع الالكتروني و الكيمياء .. أعلم يارفيق دربي .. بأن مادة الرياضيات هي اسوء ماده عرفها تاريخ الدوله العربيه السعوديه صدقت .. * الرياضيات ، أكرهتس !! Me Toooo * الرياضيات .. تباً لتس !! كان يتوهق بالاختبارات .. ودايم يسب طيب دامك كنت مثلنا .. وكنت تبي الاساتذه يرفعون درجاتك في هذي أبصم بالعشره * س / موقف حصل في الغش وشفته ، اذكره لنا .. كثيـر عد و الغلط .. آخرهـا اليوم في الفيزياء وحده وراي أسمعهـا تتكلم معي بس طنشتهـا .. << دافوورهـ .. أنـأ أغش يمكن بس ما أغشش أحد دايم أسحب عليـهم << نذله .. * س / حصل لك هالموقف ؟ او حصل لغيرك ؟ اذكر لنا ياخي لا ما قد صارت ,, الحمد لله ,, فيه فقرات كثيره .. لكن الوقت وعندي اختبار بعد .. مايسمحون لي بالتوفيق .. .. بس نقول " اسئله عامه " .. للنقاش * في جوّ الاختبارات .. وش هي اكثر ماده كنت تكره تذاكرهـا .. أكرههم كلهم .. خاصه الرياضيات .. و الأدب .. * سؤال موجه لكل الطرفين بس خصوصاً للشباب / اي معجنات تروح بعد الاختبار .. وللبنات / هل كنتي ترسلين السواق ؟ ولا ترجعين البيت علطول أرجع على طوول .. * مادة كنت تعشقها لما تذاكرهـا .. الانقلش .. لأني أخلص بسرعه * مساحـه مفتوحـه لشخصك الكريم آآهـ بس متى يجي يوم الأربعاء و افتك من ذا القرف .. .. زيآد موضوع حللو .. عوآفي ,,

02-02-2008, 09:54 PM	#3
مدمن قناص مميــز	رد: [ ~ .. الا يادنيا " الاختبارات " متى تقضين .. ~ ] * هلا والله الطالب الكسلان زياد اجل احد يمل من المذاكره اه بس يالمذاكره الا ليت الزمن يرجع واداعب الفرجار وارسم زوايا منفرجه وغير منفرجه أقتباس* س / موقف حصل في الغش وشفته ، اذكره لنا .. كان عندنا اعتقد اختبار انقليزي وكان طالب معنا معه براشيم المهم ان المدرس صاده كان المدرس مصري ولابس غتره بيضاء كان الطالب حاط البرشام تحت الورقه مر المصري وشافه المهم خذ البرشام وورقة الاختبار وقاله ادا بتغش ياحمار بصوت عالي انهبل الطالب ويسكت المدرس والمصري خذ الورقه وراح والولد يلحقه ويسحب الغتره ويقوله تكفى اسكت هات الورقه الله يرحم اابوك وعيا المصري واسمع الطالب يقوله عطني يلعن ابوك أقتباس* في جوّ الاختبارات .. وش هي اكثر ماده كنت تكره تذاكرهـا .. التاريخ أقتباس* سؤال موجه لكل الطرفين بس خصوصاً للشباب / اي معجنات تروح بعد الاختبار ماروح لمعجنات ادور الفراش عقب الاختبار أقتباس * مادة كنت تعشقها لما تذاكرهـا .. الادب أقتباس* مساحـه مفتوحـه لشخصك الكريم كان الله في عون الطلاب والطالبات وان شاءالله كلكم تنجحون عوافي زياد التوقيع:

02-02-2008, 10:30 PM	#4
.. فوق هام السحب.. قناص مميــز	رد: [ ~ .. الا يادنيا " الاختبارات " متى تقضين .. ~ ] * زياد مدري ليه كنت احس انك كسلان قبل ماتقول حرام عليك لاتحطمني اكثرمما انا محطمه الرياضيات تراها تخصصي بالعكس ترا حلوه وسهله< تبي تقهرك بصراحه انا افهم الرياضيات سهله مره بس ما احبها لو تبي مدرس خصوصي بدل المصري الخايس حقكم انا جاهزه يوووه ذكرني مصريكم بمصريتنا الخايسه يا اني اكرهها الموهم * س / موقف حصل في الغش وشفته ، اذكره لنا .. انا ما اغش ولله الحمد ولا اذكر موقف غشاشين * في جوّ الاختبارات .. وش هي اكثر ماده كنت تكره تذاكرهـا .. انا اكره اذاكر مواد الفظ اللي هالسنه كانت ماده الثقافه الاسلاميه والمعجنات يوووه هو ويا المطاعم ماربحهم الا احنا في وقت الاختبار لا والله اخوي الله يعافيه يرحمنا ويجيب * مادة كنت تعشقها لما تذاكرهـا .. الاحياء سابقا والتفاضل حاليا * مساحـه مفتوحـه لشخصك الكريم الله يوفقك يا زياد وان شاء الله تنجح وتجيب اعلى نسبه بالعالم وتحب الرياضيات التوقيع: إنا لله وإنا إليه راجعون

02-02-2008, 11:02 PM	#5
مملكة عمري قناص مميــز	رد: [ ~ .. الا يادنيا " الاختبارات " متى تقضين .. ~ ] * س / موقف حصل في الغش وشفته ، اذكره لنا .. صارت لوحده من صديقاتي كانت القاعه صف اولى صف ثاني وهكذا<< ياهوه يالفصحى يوم جلست صديقتي قالت لها اللي في اولى صباح الخير <<< متى المعرفه قالت صباح النور قالت لصديقتي لو سمحتي ممكن تنقلين الاجابات من اللي على يسارك وتعلميني<<< ماشاء الله شي حلو تقول صديقتي ماقلت آسفه او شي قلت ابشري اي وحده بس تبين<<< تستهبل عليها اجل تقعد تغششها وماتحل تضحي عشانها ولا ماتعرفها بعد في الكليه تشووووف اساليب وانواع للغش مو طبيعيه انامكاني ورى عالجدار والقاعه طويله وزحمة الثنتين اللي جنبي على اليمين في رابع فالينهااااا اجل تدف يدها عشان تشوف اللي قدمها ياسلاااام مابقى الا تسحب شعرها واللي على يساري اولى ومااعرفها مره تخيلوااا بس وانا احل جت هي متاخره وجلست وتاشر لي بيدها التفت قالت حلو شعري<<< بدون مقدمات انا قلت ايييه اجاوبها بدون شعور قالت لا لا من ورى احسه مو مرتب اصلا ما وراها الا جدار الله يخلف بس * س / حصل لك هالموقف ؟ او حصل لغيرك ؟ اذكر لنا ياخي زياد هد رلاكس انا ماعندي موقف بس من الخوف اقتبست السؤال * في جوّ الاختبارات .. وش هي اكثر ماده كنت تكره تذاكرهـا ؟ في المدرسه مكتبه في الكليه ثقافه اسلاميه * سؤال موجه لكل الطرفين بس خصوصاً للشباب / اي معجنات تروح بعد الاختبار يا ماما نوره ياتوست وجبن مادة كنت تعشقها لما تذاكرهـا ولا مادة وصلت لحد العشق * مساحـه مفتوحـه لشخصك الكريم الله يسلمك احب اشكرك على اتاحة الفرصه لنا واتمنى لك ولجميع الاخوه بالتوفيق والنجاح واحتمال نتيجتي بكره يارب سترك الا يادنيا الاختبارات متى تقضين والا ليت الليالي كلها ربوعي ربوعي ســلام التعديل الأخير تم بواسطة مملكة عمري ; 02-02-2008 الساعة 11:10 PM سبب آخر: طار الرد قبل لا اخلص

02-02-2008, 11:19 PM	#6
ملك روحي . . : زعيم القناصين : . .	رد: [ ~ .. الا يادنيا " الاختبارات " متى تقضين .. ~ ] مساء الورد زياد وسع صدرك ماباقي شي كلها يومين زياد أنا أحب الرياضيات لما دخلت الجامعه كنت بتخصص رياضيات ترى مو صعبه بس أخذه هالسمعه كذااا يعني السالفه كلها قانون وأنت تطبقه على المسائل وأنتهينا / * س / موقف حصل في الغش وشفته ، اذكره لنا .. /ما أذكر البنات مايغشون س / حصل لك هالموقف ؟ او حصل لغيرك ؟ اذكر لنا ياخي بالثانوي صار لوحده من البنات ذاكرت شوي ودخلت الامتحان في جوّ الاختبارات .. وش هي اكثر ماده كنت تكره تذاكرهـا .. بالمدرسه ...فيزياء بالجامعه..فونتكس * مادة كنت تعشقها لما تذاكرهـا .. الأدب.. رياضيات.. بالجامعه..الماده السهله * مساحـه مفتوحـه لشخصك الكريم بالتوفيق للجميع وو أنا معطله من أسبوعين // عوافي زياد لكـ

02-02-2008, 11:45 PM	#7
][الفجـــر البعيـــد][ . . : زعيم القناصين : . .	رد: [ ~ .. الا يادنيا " الاختبارات " متى تقضين .. ~ ] .. أقتباس يتكون من : - 1- اهم ماده " الشاهي " 2- الماده المقابله لها .. " الفصفص " 3- قلم ازرق ابو ريال 4- اوراق منثره في كل زاويه 5- جوال مرمي على جنب 6- شعرك شوشه من كثر ماتحكه 7- آله حاسبه 8- قلم عريض مدري وش اسمه حق التخطيط 8 ادوات اساسيه .. لمذاكرة الرياضيات .. * الرياضيات .. تباً لتس !! بوفيه مفتوح أقتباس برب اصيح شوي تعال أبكي على صدري يا مهموم <- - فاهم خطأ أقتباس باك .. خلصت دموعي رجع الفاين اللي خذته أقتباس * س / موقف حصل في الغش وشفته ، اذكره لنا .. أذكر كنت بـ ( ثالث ثانوي ) .. طبعاُ بمدرسه ( أهليه ) يعني أنواع( الدلع والغش ) لكن اللي ما تتوقعونه .. ان الأستاذ اذا شاف الطالب معاه ( برشومه ) يجي طاير ويأخذها منه ويعطيها الطالب اللي ما معاه أقتباس * س / حصل لك هالموقف ؟ او حصل لغيرك ؟ اذكر لنا ياخي اي وربي حصل لي ) الصيف الماضي ( مو مثله بالضبط لكن ألعن منه طبعاُ انا ادرس ( شبكات ) في أحد المعاهد العالميه بمديتني المؤقره ( الرياض ) حبيبتي <- - أزعجتنا المهم يا طويل العمر اهلي كانوا بالطايف .. وأنا كنت اعمل في احد القطاعات الخاصه ومنثبر بالبيت .. وكان عندي أختبار ثلاث مواد .. موزعه على أيام الأسبوع .. طبعاُ احد المواد كان يوم الثلاثاء والأربعاء OF نخلص بعدها .. !! أخوك بالله سحب على يوم الثلاثاء ويوم الأربعاء سحب على الدوام وجهز نفسه للأختبار يفكره الأربعاء .. ويوم وصلت عندهم .. قالوا : خذ فوق تحت ورح كمل نومتك وراجعنا بالترم القادم وووبس فيه فقرات كثيره .. لكن الوقت وعندي اختبار بعد .. مايسمحون لي بس نقول " اسئله عامه " .. للنقاش أقتباس* في جوّ الاختبارات .. وش هي اكثر ماده كنت تكره تذاكرهـا .. الأدب لأني أحب الشعر واحفظه * مادة كنت تعشقها لما تذاكرهـا .. المحفوظات والأناشيد <- - يقاله غير الأسم خخخخ * مساحـه مفتوحـه لشخصك الكريم ابد ادعو لك بالتوفيق وتراي احبك حب عظيم * قفله / يا زيـآد مو باقين الا يومين .. وتنسى هم الأختبارات تصبر لين يوم الأثنين .. وسنتر بعدها قدام المباريات .. شكراُ شكراُ زيـآدوه التوقيع: سبحان الله و الحمد لله ولا إله الا الله والله اكبر التعديل الأخير تم بواسطة ][الفجـــر البعيـــد][ ; 02-02-2008 الساعة 11:47 PM

03-02-2008, 12:57 AM	#8
Tito's قنــاص مبــدع	رد: [ ~ .. الا يادنيا " الاختبارات " متى تقضين .. ~ ] يتكون من : - 1- اهم ماده " الشاهي " 2- الماده المقابله لها .. " الفصفص " 3- قلم ازرق ابو ريال 4- اوراق منثره في كل زاويه 5- جوال مرمي على جنب 6- شعرك شوشه من كثر ماتحكه 7- آله حاسبه 8- قلم عريض مدري وش اسمه حق التخطيط 8 ادوات اساسيه .. لمذاكرة الرياضيات .. * الرياضيات .. تباً لتس !! ااه ذكرتني ايام ثالث ثانوي والله نفس الشكل بالضبط س / موقف حصل في الغش وشفته ، اذكره لنا .. طبعا الكل يعرف ان العام اسئلة الوزارة كانت نااار فأنتشرت في المدرسة موضة اللي هي تصغير الشفافيات(للي ما يعرف الشفافية هي ورقة بلاستيكية شفافة) يعني ابرشم على ورقة واروح لمركز خدمات الطالب واخليه يصغرها بس على شفافية واذا جيت تغش منها حطها على الطاولة ومافيه امل يقزها المراقب <<ياخي والله الطلاب اذكياء بس يبون فرصة في جوّ الاختبارات .. وش هي اكثر ماده كنت تكره تذاكرهـا .. في الثانوي كانت الرياضيات والفيزياء اما الحين في الكلية فهي مادة عال(حاسب الي) <<مستغربين والله ياعندنا دكتور تحبه قلوبكم مدري وشلون صار دكتور هو من الناس اللي تنطبق عليه ان الدال اللي قبل اسمه تعني دلخ * مادة كنت تعشقها لما تذاكرهـا .. الكيمياء والانجليزي......... مساحـه مفتوحـه لشخصك الكريم ابد مافيه شيء بس اقول الله يوفقكم مشكووور زيآدCC التوقيع: تبي تشوف الذل في صورته صح شف دمعة الفرقا على خد رجال

03-02-2008, 01:01 AM	#9
ĵйσσй قناص مميــز	رد: [ ~ .. الا يادنيا " الاختبارات " متى تقضين .. ~ ] الحمــــدلله ماعنــدي رياضيات الله لايعيده .. أمــا اساليب الغش ماعمــري شفت طرق كذا . أقتباس * س / موقف حصل في الغش وشفته ، اذكره لنا .. أذكـــر بنت عمــــي بالثانوي كانت تكتب على مريولها تعبير انقليزي وجاهــا اللي كتبته ومــرهـ كان علــى حديث وكانت وراي وحــدهـ وقالت لي وخري شوي عشان اشوف الاجوبــه قلت أوكي ولما وزعو الاوراق صارت تطق الكرســي بأقوى ماعندهــا وأنــا بعد ماحليــت وأتنافض لاتشوفيني اللي تراقب وهــي من أول مابدينــا لحد مانتهينــا قاعدهـ ترفس بالكرســـي أنـــا مسكــت معــي عنـــاد والله ماتنقــل منــي ولا كلمـــه .. أقتباس * س / حصل لك هالموقف ؟ او حصل لغيرك ؟ اذكر لنا ياخي ايـــه حصــل لاختـــي يوم كانت بالثانوي بس صار لخبطه بين الفتره الاولى والثانيه وهي مابعد ذاكرت الماده كلــه من بنت الجيران الله يصلحها نقلتها الجدول بالمقلوب .. أقتباس* في جوّ الاختبارات .. وش هي اكثر ماده كنت تكره تذاكرهـا .. أكـــرهـ النظــم الاسلاميــه بس الحمــدلله نجحت فيــها بس غثيثه بقوووهـ أقتباس .. وللبنات / هل كنتي ترسلين السواق ؟ ولا ترجعين البيت علطول ماعندنـا سواق أرجـــع على طووول أقتباس* مادة كنت تعشقها لما تذاكرهـا .. بالثانوي أعشق الجغرافيـــا واللحيـــن ولا مــادهـ بس فقـــه أرحــم شي أقتباس* مساحـه مفتوحـه لشخصك الكريم الله يعينك زياد ويعين اللي ماخلصو انــا مخلصـــه لــي أسبوع الحمدلله ،. زيــــــاد لكـ وذاكـــر زين التوقيع: سآإمـح ترآ من سآإمح و قـآل :- يـــــآرب يفتح له اللَّـہ في سمـآ رحمتـہ بـآب ~

03-02-2008, 02:35 AM	#10
صعنطوطه قنــاص مبــدع	رد: [ ~ .. الا يادنيا " الاختبارات " متى تقضين .. ~ ] ..,.. طيب يومـ قضيت كاتبن موضوعك ومتشكي ..عسآك فهمت انك كنت تكتب ..؟ زيآد ..\ موضـوعك كندر.. (يعني حلو ) بس بآين بقوه ان (الرياضيات)لاعبن في مريرك..وإنت ماقصرت لعنت جدفه.. وتدخلو الشبآب ..وفكوكم بوب صح..؟ <- - تركّدي بس .. وتبي الصرآحه عآد ..انا كنت بدخل العلمي يومني منول..بس عشآن هالماده تركتـه يآخي من حين حيني ماطيقـه..,يآلبى الادبي بس آخر سنتين.."أدبي" (تحس ببلادهـ فكريـهـ) لأنك معد تعد على اصابعك.. ولاعاد تدور بالفرجآر..(ياكرهني للفرجآر..ياكنت اتشقلب عشان اسوي دويره ) , طلعت مع اخوياي محمد و (س) و خالد و ( ص ) " فأعلم بأن الرياضيات لها تأثير عام عليه ! , سعد - صالح ..صح..ولا لا .. كنت حآسه ان لي مستقبل بالرياضيات بس يالله راحت علينا <-- طلعوهآ برا..يرحم والديكم .,\ عشان مااطول ..بخش سيدهـ عالأسعلـه.. .. * س / موقف حصل في الغش وشفته ، اذكره لنا .. .., شف عشآن أكون صريـحه..وماأتسذب..انا كنت اسوي هالعمله السودهـ.. كنت ابرشم..(قطعه الانقليزي) يآناس ماعرف احفظ القطعهـ.. فكنت ابرشمها على ورقه عاديه..وأكتبها بقلم ازرق واحط نقط بالبرتقالي..بين كل كلمه وكلمه عشان اعرف ان الجمله خلصت.. <- انقليزي فاشل, وأمسك الورقـه وأدبسها بالدباسـه على آخر القميص من جوا..وبشكل مقلوب ..عشآن لما اجي انقش.. اقلب القميص ..فتكون الورقـه معتدله..((فهمتو الخطه..؟)) بس ماتصلح الا اللي مريولهم تنوره وقميص المهم دخلت القآعه..ومن غبائي قلت بخلي القطعه آخر شي.. ولما حليت كل الورقه ومابقى الاالقطعه رفعت رآسي لقيت القآعه فاضيه.. ياليل الليل وشلون ابنقشهآ الحين ؟ والمراقبه اللي عندنا كآنت وآقفه عند الباب وتناظر برا ..يعني وش تبي تراقب ومافي احد بالقاعه فحطيت يدي(اليسار) على جبهتي عشان انزل عيوني..وصفطت القميص وعدلت وضعي.. وخليت يدي اليمين على الورقه..بدون ماشوف الورقه يعني اقرا واكتب من غير مآشوف.. ((وســر يآقلم..وعيوني تنقش البرشام )) قامت يدي ترتجف وإحترتيت..وحالتي حآله مع انه موسم شتا , المهم اني حسيت انها حست..فقلت بالطقاق بسوي نفسي كني ماحسيت..وبكمل.. . .كملت ..ورفعت رآسي وناظرتها وعيوني كلها دموع من قوه التدقيق وقسم بالله يوم رجعت البيت ابي اقرا البرشامه ماعرفت سلمتها الورقـه وكنت حآسه انها بتذب علي ..خشت في عيني.. قآلت : ماشاء الله عرفتي تحلينها قلت: ايه الحمد لله.. قآلت: وليش تأخرتي وآجـد..؟ ..قلت: اتذكرهـا قآلت: آها.. طيب يالله انزلي.. ونزلت وانا فاقـهـ كشرتي.. صدق يمديها تروح تعلم..بس يمكن رحمتني ======= وأيام اولى ثنوي وكان اختبار (فيزياء) دخلت للمدرسه فاجئوني البنآت بأن ذي المسأله هي اللي بتجي اكيد.. انا ماعندي وقت احفظها او حتى افهمها..والمسأله مؤكدهـ..فكتبتها على يدي وخلاص ولما دخلت القاعه..وكنت بردانه وقاعده لحد يحاكيني ولا بعصب .. ويوم جت الاسئله ..وقبل لايوزعونها..دخلت المديره وطلبت من المراقبه تفتش على البنآت يآربيـــــه .. ياسخفتس يالمديره لين هايطتي المهم ااني استسلمت للأمر الوآقع .. وقالتلنا إفتحو يديكم..و(ذرعآنكم).. فتشت معهم وشافت المراقبه الحفله اللي بيدي..قالت: الله يهديك يالله قدآمي غسلي يدك .. قلت :لا وين برد ..تكفى والله مااغش ..ومنيب فاتحه يدي.. وأبت الا ان اغسلها.. يوم نزلت الا وراي خمسه لاحقيني ..بيغسلون .. (قلت: وتحيّا الدفآره يامدرستنا المخيسه ) ,.., \ [ غلط المذاكره ] * س / حصل لك هالموقف ؟ او حصل لغيرك ؟ اذكر لنا ياخي , وع ياشينها..ماقد صارتلي بس صارت لبنت في ثآني ثنوي..وعلى مرأى من الجميع كنا متأخرين الصباح كالعاده..وموقفتنا المديره برا الين تنتهي الحصه الاولى ..يقالك عقاب ماتدري اننا ننبسط ,المهم موسم اختبارات شهريه..وكلن خآش جوّه يذآكر.. جو بنتين..وحدهت منهم مآسكه كتآب(توحيد) وتذآكر ومتحمسه سألت خويآتها اللي (موقفين معنا) يآبنات والله صعب.. ماعرفت احفظ.. رفعو روسهم ونآظرو كتابها.. هيه..وش تذاكرين ياخبله..؟ البنت.. يآعمري انلخمّت.. وقعدنا كلنا نضحك يوم فهمنا سآلفتها..وضحكنا زود يوم التفتت على بنت عما وقعدت تصارخ.. : يآحيوانه اذا قلتلك بغيب..لاتحايليني اجي ..وذيك مثلها مذآكره نفس المآدهـ يآخي اشك في مدرستنا..كل اللي فيها فآهين ===== , * في جوّ الاختبارات .. وش هي اكثر ماده كنت تكره تذاكرهـا .. النحو مآحبه هالانسآن.. على ان مدرسته من الطف الكآئنات <- , * سؤال موجه لكل الطرفين بس خصوصاً للشباب / اي معجنات تروح بعد الاختبار .. وللبنات / هل كنتي ترسلين السواق ؟ ولا ترجعين البيت علطول في البيت.. وأحيانا نصير مروقين وحآلين زين..وبكره المآده سهله.. نخلي السوآق يوصل الفطور للمدرسه.. , * مادة كنت تعشقها لما تذاكرهـا .. موآد الدين..وعلم النفس والاجتمآع كنت اقراها كأني اقرا كتآب.. ..,\\ * مساحـه مفتوحـه لشخصك الكريم اسفه على كثر البربرهـ.. ..بس ذكرتني باللذي قد مضى.. الله يذكرك بالخير..يامدرستنا الوعـه.. والله اني الله لايعاقبني غشيت وآجد..وهبلت بمدرسآت وآجد..بس كآنو متسآمحين معنا.. وأحيآنا هم اللي يفتحون لنا المجآل.. يعني اذا شافو الوحدهـ تغش ضحكو.. وش تبوني اسوي.. <--- اختمي الرد وظفي وجهس الله يسهلك زيآد..والجميع ان شاء الله.. وبالتوفيق.. سلآم . . التوقيع:

03-02-2008, 02:39 AM	#11
The Fahad قناص كمبيوتر مميز	رد: [ ~ .. الا يادنيا " الاختبارات " متى تقضين .. ~ ] أقتباسو التوزيع الالكتروني و الكيمياء .. لآلآ .. لآااااااااااء حتى في النت لاحقني هذآ .. آي شي عن الدِراسه من جنبها انا :( التوقيع: ’ إن خلطتي الماي في " سكَّر نبات " .. وقلتي : " فهد" إفرِزَه !! راح أفرِزَه ...!! My New BBM PIN : 28CBCACF

03-02-2008, 03:33 AM	#12
توتة قناص مميــز	هلا هلا زياد .. يالله حيه .. الحين انت في ثالث وكاتب موضوع ياكبرها <- بعقدك زيادهـ .. تصدق عاد اني اتمنى ارجع لمدرستي .. واتمنى ارجع للاختبارات والقلق .. وبتذكر كلامي اذا دخلت الجامعه المخيسه .. يعني استمتع بالمدرسه باقي الايام والفصل الجاي .. . . نخش في الاسئــله .. أقتباس* س / موقف حصل في الغش وشفته ، اذكره لنا .. اول انا كنت ما اعرف اغش واخاف ربي ووشسمه وما احب اغش ابد بس يوم جينا لثالث ثانوي .. فصلنا كله خرب المهم اقول لك موقف لي انا وصديقتي جنب بعض .. عندنا مدرسه الله يذكرها بالخير حبيبه على سبهه على نياااتها .. المهم اناظر صديقتي واقول لها السؤال اللي ماعرفته .. تجيب قرطاسه حقت العلك وتكتب فيها وتعطينيها من تحت .. ياجرئها ذيك البنت .. انا كنت اتنافض بس وشسمه الحاجه وماتسوي .. انا ما احب التاريخ ... وقسم ما احبه ابد ومره ماحفظت تواريخ المعارك ومتى ذا انولد ومتى ما انولد ومتى تولى الحكم .. عاد انتم تعرفون التاريخ الوع المهم اخذت الكتاب وكتبت كل التواريخ على الطاوله .. وتتسلط علينا ذاك اليوم المدرسه وتدور على الطاولات وانا اللي يتغير وجهي وذيك الاستاذه شديده اشدد شي .. وما احبها ابد وتقول انتي انتي تتغشين .. ماهقيتها منتس .. المهم الاختبار ذاك عادته لي خمس مرات وفي الاخير جبت العشره مابغيت .. أقتباس * س / حصل لك هالموقف ؟ او حصل لغيرك ؟ اذكر لنا ياخي صديقتي مره في قاعة الامتحان جالسه وخايفه مره من الاختبار المهم تجي اللي وراها تسأل .. كان عليهم ادب .. وتسأل سؤال في الحديث واختبصت المعلومات عندها .. قالت لها وش تبين انتي مير صديقتي تموت ضحك قالت اليوم علينا فقه .. ماصدقت وتسأل كل البنات و القاعه كلها ضحك .. عاد مدري وش صار لها أقتباس* في جوّ الاختبارات .. وش هي اكثر ماده كنت تكره تذاكرهـا .. تاريخ ياقلب العنــا .. تاريخ وش ذنبي انا .. ومكتـــبه .. أقتباس* سؤال موجه لكل الطرفين بس خصوصاً للشباب / اي معجنات تروح بعد الاختبار .. وللبنات / هل كنتي ترسلين السواق ؟ ولا ترجعين البيت علطول اي معجنات اي بصل .. اروح اخم اقرب مخده أقتباس* مادة كنت تعشقها لما تذاكرهـا .. حديث + فقــه .. أقتباس* مساحـه مفتوحـه لشخصك الكريم موضوعك طويل تعبت وانا ارد ابد بس كنت بقول ان المدرسه حلوه ولو فيها تعب راح تشتاق لها .. وللمــدرسات والهبال والرجــه والله يوفقكم ياحقين ثالث وتجيبون نسبــه حلوهـ .. ويعدي الاختبارات على خيــر .. . . بالتوفيق زيــاد ../

03-02-2008, 04:01 AM	#13
T.UPDATE قناص مميــز	رد: [ ~ .. الا يادنيا " الاختبارات " متى تقضين .. ~ ] .. مساءكم وصباحكم اختبارات صباح النور عندمـا تشاهد طالباً .. يحاتسي نفسهُ ، فأعلم ياصاحبي بأنه عايش جو " الاختبارات " !! أعلم يارفيق دربي .. بأن مادة الرياضيات هي اسوء ماده عرفها تاريخ الدوله العربيه السعوديه ياعيني عليك خطير تصدق عاد حتى دكتورتنا بتاعة الريض تقوووول ليه انتم عندكم ان الرياضيات شبح ذا >>حاقه هايفه<<عاد البنات يردن استاذه احنا من يوم كنا صغار نسميه شيخ القبيله هههه خصوصاً لما يكون المدرس " مصري " !! وايضاً خصوصاً لما تكون الرياضيات بالحصه الاولى !! .. عندما يارفيقي تكون توك قايم من النوم .. مال اهل امك داعي بالحياه ويجيك الاستاذ .. افتح كتابك منك ليه .. الصفحه تمنيه واربعين * الرياضيات ، أكرهتس !! ههههه الله يرجك رجا مبرحا تكره لا هد اعصابك لسا ماشفت شي تجييك الجامعه وتوريك وتقوووول يالبى قلبك يالرياضيات اعزك اموووت فيك ولا بعد ترفع معدلك<<كل ذا لاحظ<<بس ماني مخوفتك لان البرمجه طيرت عقلي>> ( أتحداك ) .. تلقى نفر يذاكر رياضيات ، وهو مبتسم !! لا وبعد الرياضيات لها جو خاص الا انا استمتع فيه كله قوانين وشوية تفكير وطبق يتكون من : - 1- اهم ماده " الشاهي " 2- الماده المقابله لها .. " الفصفص " 3- قلم ازرق ابو ريال 4- اوراق منثره في كل زاويه 5- جوال مرمي على جنب 6- شعرك شوشه من كثر ماتحكه 7- آله حاسبه 8- قلم عريض مدري وش اسمه حق التخطيط 8 ادوات اساسيه .. لمذاكرة الرياضيات .. * الرياضيات .. تباً لتس !! ههههههههههه الفصفص ذا مسوي لي ازمه <<فصفص باجه نقظة ضعفي << عز الله مادرست <-- قم قم ذاكر الم يحن الوقت للمطالبه بالتساهل ياحقارير تجيبون اختبارات الواحد يشيب راسه ولا يعرف يحلها وتقولون لازم تنجحون ! باك .. خلصت دموعي ياحرام مابقيت شي لفرحة النجاح * س / موقف حصل في الغش وشفته ، اذكره لنا .. مره بحياتي وبعد وعقبها تبت يجيني تأنيب ضمير موصاحي كنت بمستوى اول وكان عندي 101عرب تحسين امتحان عارفه الاجابه بس شاكه سمعتها لقطتها والاستاذ عرف عموما انه فيه غش بس مو مرتاحه اقسم قسم اتصلت على استاذي الفاضل <<مساعد الغفيلي >> وصارحته وشكرني وبعد اضاف لي كم درجه على صراحتي .........الخ * س / حصل لك هالموقف ؟ او حصل لغيرك ؟ اذكر لنا ياخي لا ياخوي فيه فقرات كثيره .. لكن الوقت وعندي اختبار بعد .. مايسمحون لي بس نقول " اسئله عامه " .. للنقاش الله يعينك ويوفقك * في جوّ الاختبارات .. وش هي اكثر ماده كنت تكره تذاكرهـا .. بالمدرسه ادب تاريخ مكتبه * وللبنات / هل كنتي ترسلين السواق ؟ ولا ترجعين البيت علطول لا ماعندي سواق وارجع البيت عالطول واتقهوى واقرب خداديه من الدوخ مافيني حيل اروح لغرفتي * مادة كنت تعشقها لما تذاكرهـا .. يووووووووووه ذا سؤال شي احب مادة النحو والانقليزي اعتبرها مواد ممتعه جدا زي اي مباراة الهلال فيها فايز وخصوصا علة النصر * مساحـه مفتوحـه لشخصك الكريم مشكووووور ياخوي على الموضوع الحلو والله يوفقك وتجيب النسبه الحلوه وانا وكل قناصه وقناص نجيب المعدل اللي يبيِض الوجه * قفله / الا يادنيا الاختبارات متى تقضين والا ليت الليالي كلها ربوعي صح لسانك على القفله الحلوه .. [/quote]

03-02-2008, 04:07 AM	#14
TAMeeM . . : زعيم القناصين : . .	رد: [ ~ .. الا يادنيا " الاختبارات " متى تقضين .. ~ ] زياد تعرفني ماحب الردود الطويله .. كل الي اقوله .. شد حيلك يا بعدي .. هانت .. راح الكثير وبقى القليل .. ولا يشغلك النت ياخوي .. تراها اختبارات نهائية .. اضغط على نفسك بهالـ 3 ايام .. منــتب ميت .. الله يوفقك .. وان جبت اقل من 98 بفقع وجهك .. ( على الطاير ) أقتباس* في جوّ الاختبارات .. وش هي اكثر ماده كنت تكره تذاكرهـا .. الكيمياء أقتباس* سؤال موجه لكل الطرفين بس خصوصاً للشباب / اي معجنات تروح بعد الاختبار .. الشلال ههههههههههه أقتباس* مادة كنت تعشقها لما تذاكرهـا .. النصوص .. لاني مجنون حفظ - - سلام التوقيع: سبحان الله وبحمده ، سبحان الله العظيم التعديل الأخير تم بواسطة TAMeeM ; 03-02-2008 الساعة 04:10 AM

03-02-2008, 05:15 AM	#15
مـلاك الـهـلال قنــاص فعــال	رد: [ ~ .. الا يادنيا " الاختبارات " متى تقضين .. ~ ] ღيسعد صباحك ღ ღصراحة موضوعك ع الوتر .. كأنك توصف ربع من حالتي اللي انا الحين بـ فترة استشفاء منها ..ღ ღالاختبارات ذي ما أعرف شلون جايه خير جد مالها داعي اموت وأعرف مين اللي فكر بـ هالشي يعني اللي أخترع هـ الفكرة اختبارات وما اختبارات ..ღ ღو تهون لو في مناهج مثل العالم والاودام بس مافي مناهج ومافي دكتورين ومافي جامعات وكل شي كل شي مو حلو يعني لا تدرسون وارتاحوا .. بس احنا شعب مكافح من الطبقة الاولى لازم ندرس وندرس مابيسير نكون اقل من غيرنا مو ..؟؟ღ أقتباسعندمـا تشاهد طالباً .. يحاتسي نفسهُ ، فأعلم ياصاحبي بأنه عايش جو " الاختبارات " !! ღالحالة ذي تنطبق علي مره ولو ما اكلم نفسي أفكر كثير ღ ღبس ماعندي وسط يعني أهتم واصلح حالة استنفار ولا تجيني حالة تبلد فظيعة وبـ هالحالة اقول يا ملاك لا يكلف الله نفساً الا وسعها وأقفل الكتاب وبسღ أقتباس( أتحداك ) .. تلقى نفر يذاكر رياضيات ، وهو مبتسم !! لا وبعد الرياضيات لها جو خاص ღأنا أحب الرياضيات أستمتع وأنا أدرس رياضيات وأحلا شي إختبار الرياضياتღ أقتباس2- الماده المقابله لها .. " الفصفص " ღديني ودين الفصفص .. ما أحب ابد الحمدلله ღ أقتباس5- جوال مرمي على جنب ღمو مرمي لا بيدي كل ابو دايم ما أنزله أبي اي أحد يتصل وينقذني من المذاكرة جوالي ما اعرفة إلا أيام الاختبارات ღ أقتباس8- قلم عريض مدري وش اسمه حق التخطيط ღاذا تقصد قلم التوضيح ما أحبه أحسه يعور بـ العيون مره ღ أقتباس[ عبارات منزليه ] ღالحمدلله أنا ما أسمعها يمكن بـ اليوم مره بس يقولون انتي كبيرة وتعرفين مصلحة نفسكღ ღبس اللي ما أحبه لما أرجع تسألني ماما تقول كيف الاختبار المشكلة ما أقدر أكذب اقول ان شاءالله حلو وأغير الموضوعღ أقتباسيمكن انا احياناً اقز كلمه منا ولا منا بالغلط .. لكن ماعمري فكرت احط معي شيء ღزياد عيني بـ عينك ღ.. ღايه صح مانحب الغش ღ أقتباس* س / موقف حصل في الغش وشفته ، اذكره لنا .. ღمو اني شفت أحد يغش لا أنا موقفي غير شكل .. اتخيل انه بنت جالسة وراي تقول يا قمر ياقمر << يقالها ترفع لي علشان اغششها بس .. لما قلت هلا .. قالت تكفين غششيني .. انصدمت من طلبها ماقدرت اقول لا .. قلت أخاف اغششك خطأ ماقدرت اقول حرام الغش .. قالت عادي اهم شي احل دايماً اشوفك تحلين وانا ما احل قلت يمه بسم الله علي .. ღ أقتباس[ غلط المذاكره ] ღالحمدلله ماسارت ليღ أقتباس* في جوّ الاختبارات .. وش هي اكثر ماده كنت تكره تذاكرهـا .. ღالتاريخ ما أحبه وما أحبه مره مايدخل عقليღ أقتباسوللبنات / هل كنتي ترسلين السواق ؟ ولا ترجعين البيت علطول ღوأنا راجعة البيت اقول لـ السواق يشتري لي .. بس مره انقهرت من أخواني ليش كل أبو دايم يفطرون برا وأنا بـ البيت .. اتفقت أنا وصديقتي نفطر بـ مطعم طبعاً من دون ما أحد يعرف وخلاص حطيت الفكرة بـ راسي بس هي ما كان وقتها مناسب بس وربي الفكرة بـ راسي وناوية اصلحها واللي يسير يسير احب المغامرات ღ أقتباس* مادة كنت تعشقها لما تذاكرهـا .. ღرياضيات .. انجليزي .. نحو بـ الذات الإعراب أحبه حييييل في مواد بس ذي أكثر شي ..ღ * أقتباس مساحـه مفتوحـه لشخصك الكريم ღأشكرك ع هـ الموضوع الحلو ღ ღالله يوفقك بـ إختباراتك وتجيب أحلا شي الله يوفقنا كلنا وينجحنا ومايضيع تعبنا يا حق ياكريم ღ ღيعطيك العافيةღ ミღ彡مــلاك الـهـلالܓミ التوقيع: