سلامون عليكون سديقيني ..

والله يا أنا من زمان عن المواضيع الي تضحك.. <سلامات جحا آفندي ..

سح أنتم تحبونن وعادي أقعد أسولف عليكم < وش تحس فيه
وخروا بس بسولف

/ سواليف تحت العشرين/

< كيفي هونت أخليه حكايات

مب موضوع ولا قصه ما أدري وش هو بس إني بسردهـ لكم همن عاد أنتم قرروا وش يصير آخر شئ..!!



السستر: مبروك جالتس بنت..!
أهلي فرحوا مرهـ .. وجلسوا يباركوا لـ آمي ماشاء الله ..
الله يخليها لتس ويجعلها من حملة كتابه ومن ذا الحتسي سمعته أمي يوم جابتن لـ هذي الدنيا ..
< تحلفون اني معهم وآوحي وشهم يقولون ..!

في بدايتي بزر بدأ يكبر يوم عن يوم .. < برا..





افتح يا سمسم أبوابكـ نحن الآطفال..


/ مرحلة الروضه وبداية النوجاسه /

بدايات نجومة كانت من هنا...طبعاً كنت مثل أي بزره سعودية ملحطه بقوة..
شعري شوشه آطلع للشارع من غير نعال .. لين آكلت عسكريمة والا شربت ببسي عادي ما آغسل
.. كل أبو دايم كمي وصخ ليش ما آدري < برا يا وصخه..

ونظراً لـ لأن أمي مب ربة بيت .. وعنده دوام دخلتني الروضه ..
وآهـ يا الروضه..

كانو الصبح اذا جينا يدخلونا غرفة الطعام نشرب حليب همن نروح للحوش ونصف الطابور همن أول شئ نقول آذكار الصباح .. وبعدين نخربها بـ سارعي همن نقعد نناقز كننا نسوي رياضه..

مع اننا قاضين جلد وعظم بس نسوي رياضه دايم .. ايه بس ..!

بـ المرحلة ذي كان عندي سديقين واجد وكنت على كيفي آطلع وآغير الفصل وما أحد يقولي شئ عشان المدرسات سديقات أمي..!!

و أعز سديق لي محمد .. كان دايم معي وسديقي مرهـ < زين عشان تسذا خاقتن عندهـ..

خطمه:
محمد وين أنت هـ المره ..!
ماهي مثل وين أنت دايم ..؟!

< برا

ولأن هـ المرحلة من كثر ما آنا ألعب وأطيح على راسي ذاكرتي ضعيفه فيها يمكن الي أتذكرهـ ومستحيل انساه.. اني كنت أحب الهلال
واذكر البس شرايط ابيض وازرق حب وولاء لـ هذا النادي العريق..

مرحلة الروضه كانت داجه ومب مثيرة لـ درجة الفله .. يعني أوالله بزران < لا ياشيخه..!!



/ مرحلة أول آلف يآكلون علف .. آول باء يقولون مباء/

صدز قبل أبدأ أنتم مثلنا منول تقول تسذا لين صفر الجرس وطلع كل الفصل برا ..!

طبعاً لأنن طفلة غير عن كول البزورهـ ما كنت أخاف ولا أصيح أبد..
حتى اذا رجعت لـ البيت أقول لأمي بزران بس يصيحون ..
وأمي تقول: وأنتي ما تصيحين..!
أقول: لاااااااا مب بزر أنا < قسم تسني اتخيل الموقف

مرحلة الابتدائي ما أقدر أسميها غير مرحلة الضياع الداج..
ومستحيل أنساها لأن بـ جسمي آثار كلها تذكرني بها..

ست جروح مخيوطه.. مع حرق في ركبتي..
من غير فلقة مرجيحه كلها آثار لـ جرائمي بـ الإبتدائي..

مجمل حياتي فيها ../

كان بيتنا فندق الفلان للشق المفروشه مع توفر مطعم أم فلان للغداء والعشاء فقط..
يعني اني اقوم الصبح البس واروح للمدرسة بخبث وفي راسي مليون فكره زاحفه

شطحات بزران ..

../ كان سديقيني بـ المدرسة بنات أصبر عمري فيهم لين الطلعه
بس لين جت الطلعة أسحب عليهم سحبة بنت تسلب

لأن عندي سديقن عندهم سياكل وبراجون وفلة حجاج
وأهم شئ سيارات

البنات ماعندهم الا الدجة مواعين وعرايس وللإسف ما كانن يغرنن

../ كنت رياضيه من الطراز الخرطي أهم شئ اشجع الهلال وآجمع صور الااعبين من فشار تسالي تذكرونها
على أيام التيماوي ويوسف قبل يعتزل وسامي يوم شاربه توهـ خاط

ايه ايه ذيك الأيام كنت بـ الإبتدائي < بسم الله عليتس من تحاتسين

خطمة../
يمه آبيحلاوهـ

موقف مستحيل أقعد أنساهـ

لأني كنت زاحفه بقوة .. وشطانية بقوة .. كنت محط انتباهـ إدارتنا الموقرهـ..
وكانوا يتركون الحصص بحثاً عن حلول لي

وآخر شئ توصلوا له انهم يجيبون لي دكتوره
هي يوم شافتني قالت سذا >

لأنها انصدمت بـ جمالي < أقول تلايطي بس
طبعا كانت تسولف معي تبي تشوف وش الحل معي..؟
وأنا كنت كل كلمة تقوله آردهـ بعشر.. لين ملت وراحت للمديرة وقالت لا أبوكم لا أبو طالتن عندكم

../ ولأني في هذي السنون آي السنوات
ما ألبس عباة كان يجوز اني أطلع..كان لي سيكل مثل آي ولد
عندي براجون وسيارات وكل شئ.. ولي باع طويل من القصص والمواقف الزاحفه
أختصرها لكمـ اني ما كنت أحمل أي جينات أنثويه..



/ يمه آحب.. والله آحب /

< تسذب ترا

مرحلة المراهقة وإن كنت أسميها أشين مرحلة في حياتي

لأنه منعتن من الشارع.. ومن ولد جيراننا

المتوسط أكرهتس
ولأنن كنت أعيش مرحلة يأسه حزينة كيئبة نظراً لتحولات في حياتي كنت منطويه

بين أوراقي وكتاباتي.. المرحلة هذي هذي كنت طايحة في الشعر وأكتب واجد الله يصلحن
وطبعاً شعر للهلال بس
أذكر كل بعد مباراة يفوز فيها الهلال يفتشون فصلنا لأنهم خابرين ان بوه وحده لازم تكتب قصيده
المشكله كل مرة يأخذون الشعر منن.. وبكل مرة أكتب ولا أيأس احبنن اصرار بقوة

والموقف الي يقطع قلبي وسبب لي صدمة وعقبه بحياتي..
كان عندي دفتر فيه ميتين صفحه
الصفحه الوحده تحتوي على أكثر من خمس صور للهلال

سنتين من عمري اسويه.. كنت اطلع لغرفتي واقعد اقص من ذا الجرايد والمجلات أو أطبعها من النت .. مافيه عناوين الا فيه .. يعني شغل سنتين مب لعب بزران ..!!
من كماختي ودباشتي وحظي الي مثل خشتي أخذته معي للمطرسه ..!!
< بدا يمغصه قلبه بقوة
وطبعاً لأني اتمتع بـ حظ مثل ما قلت لكم غبي مرهـ.. صار فيه تفتيش والدفتر كبير مره وين أوزه
غبيته بـ المكتبه وكنت أدعي ما يشوفونه

لكنهم شافوهـ.. آهـ بس شقى عمري تعب السنتين الي راحت
طبعاً عرفوا انه لي الزعيمه الي هي أنا ومابوش غيري ولأن من شكله باين انه أنا ..
آخذوهـ وعيوني طايرهـ.. السالفه وصلت لـ أهلي وبغيت أنطرد من المتوسط
بس رحموني عشان ما بقى الا كم اسبوع وأطس للثانوي..
ليتهم مارحوموني ولا شققوا دفتري

تخيلوا شالوا دفتري وقدام عيوني قطعوه
جدعوه بالزباله وأنتم بـ كرامه
قسمن كل ما أتذكر ينعصر قلبي

شحطة حزينه
جايبين هـ القساوة منين..!!

النهاية ان دفتري الله يخلف عليه.. وانا وقعت مخالفتين وحده للدفتر ووحده لأني قعدت اهوش الوكيله: /
والصدمه الثانيه .. اني بـ آخر يوم جيت للبيت وأنا طاقتني الصيحه عشان بـ ترك ذا المتوسطه المخيسه.. < لتس قلب بعد تصحين عشانهم..

لقيت أمي شايلتن كل شئ من جرايد دفاتر كتب كل شئ وجادعته .. عشان تسذا هـ المرحلة أسميها مرحلة حزن دفين..

المتوسطه أكرهتس موت قسمن

بس شئ واحد يميزه

تدرون وشي

إني حبيت فيها ذا المملوح

7

7

7

7



خالد بس أنت أحبك



/ان كنتي تحبيني مرهـ فـ آنا أحبتس آلفين مرهـ /

هنا البداية .. هنا الحياة الصدزية لي

الثانويه.. تفجرت فيها كل أبو المواهب..!!
وفيها نقله نوعيه كبيرهـ بـ حياتي.. رغم مشاكلها ورغم الحزن بس كان لها طعم خاص..!!

بديت من الصفر على مايقولون من أول شئ عاهدت نفسي اني أحاول أغير من نفسي
مواقفها كثير بقوة..

وش أقول وآخلي

أقول لكمـ سالفة مجلس بن حمدان الي هو مسمى ربعتنا والي سماها مطيرتنا..
وإلا عصير الربيع وسندوتشت الفلافل< انطقوها سذا
وإلا الهلي ما تملي والرديف خلي
وإلا الشاص آخ يا الشاص..!!
وإلا الكندر

اتركوا عنكم الثانوي لـ حالها

شطحة رومانصيه مره
ألا ليت الزمن يرجع

والله لو بقول لكم فضايحنا يمكن ما أخلص ولا عقب باتسر
بس الصدز فله بقوة مرة مرة

قلوبنا على بعض وفزعات وكل يوم لنا سالفه
داجين بس على سنع < قد سمعتوا دجه سنعه

ما آبي أقول شئ
غير ..

لو أخذني الزمن عنتس ثانويتنا كل مامريت وشفتس يزود فيني الشوق

< بيشكون فيها



سنتين بعد الثانوي أعيشها بـ دجه فاضيه
يمكن كسبت شئ حلو فيها وإني نميت موهبه عندي

شطحة غير../

على ذاك الطريق اللي يسمونه غرام أحباب..
وطت رجلي على دربه ولا أدري وش نوا فيني

عشت بـ النت
وعرفت ناس حبيتهم واجد

وعلى قولة حامد ../

من يوم جيت أعجبتهم وأعجبوني
واعجابهم فيني مهب أية اعجاب
باسلوبي بشرحي بطرحي بلوني
لوقلت عن نفسي بشر صرت كذاب
لوقلت دمي من ذهب صدقوني
لوبيدوهم كان زرعوادربي أعشاب
لوبيكيفهم يتشبهون اشبهوني
من كثر ماصاروامن طبوعي قراب

< ياهي بتنجلد جلد بقوة



مزعة قوية

أدري بعد ذا الخرط الي فوق كله ودكم تسطروني
وتسني أحس إن أحد يقول فارتزي وأنتي وموضوعتس لا أبوا من خلاتس تدخلين النت

بس كنت أشوف التآريخ واكتشفت شئ

ان الي فوق كله صار في عشرين سنه من عمري
الله أعلم أنا بعيش عشرين سنه أو لا

11/ 8 كان يوم ميلادي

وبس باقي يومين وأترك العشرين وأدخل في الواحد وعشرين

أيام ضحكت.. وأيام بكيت .. أيام حبيت ناس .. وناس كرهت نفسي منهم..
كل منا في حياته وقفة.. وكل منا له ذكريات مستحيل ينساها..!!

لكني حبيت هنا أحفظ شئ لـ نفسي أتذكرهـ ان ربي أعطانا عمرك وياكم



وقفه للخلود../


ياطفلة ضاعت بها الخُطى..
ياعالم زُرعت البسمة به ..!
يوم كانت السُقيا آلم السنين..!!

أيا عشرين احفظي ذكرياتي في ذاكرتك..
سطري شئ من الحرمان بين بعثرتكِ..!!

ويا عشقي .. وحبي !!

في أسطر سـ أعلنها ..
سـ أنثر عبق المشاعر..
أحببتك.. أيكفي أم آزيد..!!!
أحببتك أيكفي أم أزيد..!!
وآهـ يا عشق يلفني..!

تعبثرت مشاعري بين حب وآلم..
ووقفت بين ابتسامة وانكسار..!!

امتزجت بي المشاعر..!!
وحارت بي الذكرى..!!

أنثى تسكنني.. وفرحه تلبسني..!!
وشئ أخفيه إلا من ناظري..!!




/ صور من الحوسه /

بعض الصور لـ غرفتي وعشقي
صورتها لكمـ



هذي راسمتها وأنا بـ المتوسط



بعض دفاتري بب كلهن



هع شوي بقوة من جرايدي الي مستحيل أجدعهن



هذي رسمه على الجدار



درج كل ابو قرطاسه فيه



جهاز ما أعرف اسمه بس ان فيه راديوا وكنت استخدمه عشان الكينود اقعد اسمعه
فيه آله حاسبة وساعة تنبيه قاضي حجاره بس مازلت محتفظه فيه



هديه من اختي وعشان لونها احتفظت فيها



صفحه من الصفحات



هذا مكان كله صور للهلال بس صورت لكم وحدهـ



أحبه



شئ من الذكريات الحلوهـ



ترا للفضاوهـ دور في ذلكِ يعني أحد يشره لا والله بـ الماوس الي كنها جبهة وحده الله يستر عليها
< لا دقيهم آزين

/ قبل أقلب فيسي تدرون إني أحبكم وإنكم أحسن ناس /
< تريش لهمـ عشان يقولون الله موضوعتس فله

< برا بقوة

نسيت شئ مهم بقوة.. ترا موضوع ماصل مابوش فائدة أبدن عشان تسذا

/ خذ ماجازلك من حتسي والي ماجازلك عسى عمره ما جازلك /

*
*


نجوووووووووووومه ..

وش اخبار ياسر وذكرى<-لا زالت ماسكه خط


موضوع خطييير مبين من اوله ..

أقتباس

< تحلفون اني معهم وآوحي وشهم يقولون ..!

هل تتوقعين كثير يفهمونها ..

برجع ارد على كل مرحله باذن الله ..
لان الحين مخي فاصل شوي .. <-كله من تأثير الابتدائي حقك
فما ودي اخور ..

برب ..

سلاااام ياأحلى أعضاء قسما بالله اشتقت لكم
شوقا يكسر الصخور العصيه>>>صفقوا لي يالله
طلعت معي.....
تشكرااااات خيتو عالموضوع ولتس تؤبري تسبدي
أمواااااااااااااااااااااااه ياحبيلكم يالقصمان

ههههههههههههههههههههههههههههههههههه
على طاري الصور مره وحده من صديقاتي
ضافه كل صور ياسر اللي
بيتهم حولي 300 صوره
وحطتهم بضرف المهم ان صار فيه (((تفتيش ))))>>>>> اكره لحظه بحياتي
وش تسوي بصور وزعت علينا وكل وحده حطت
الصور بمكان قسم بالله ضحكت ضحك
يعني مدري وش يبون نسوي كلش ممنوووع

\


\



ستار أونيزهـ

.. وش هالموضوع الخالط بين الحزن .. والتأمل والضحكه الصفراء ... !

غ صتني العبرهـ .. غ صتني وطولت .. !!




تشبهيني كثييييير .. وربي كثير ..

اولها وداعيه العشرين ..

وثانيها صداقه العيال ..

والشيطنه .. ولعب السياكل .. حتى بوظيفه أمكـ ومحد يقدر يهاوشك ولا يهزأكـ .. ..




اللهـ يسامحكـ بكيتيني كثييير .. وفرحتيني كثيير ..

ذكرتيني .. بأيام أول .. بأيام الشيطنه البريئه .. العفويهـ .. بأيام اتمنى من كــل قلبي ترجع ..





صدقيني .. ان كتب ربي لنا عمر .. العشرين اللي راحت أفضل ..


ما اسميه تشاؤم أطلاقآ .. بس ايــام أول غير .. والطفولــهـ غير .. !





\


\







بتركـ الحزن ووبلش هياط ...





إقتباس:

أحلى سوالف





إقتباس:

افتح يا سمسم أبوابكـ نحن الآطفال..

آآآآآخ بس ..

ذكرتيني بوقت الغلقه آخر العصر .. الوقت الكئيب .. اللي باقي شوي ويذن << كارهته صدز ..


.. من تخلص اقضب الباب وياللهـ نلعب خطهـ وحريم .. !

ولا كيرم مع عيال عمي





إقتباس:

شعري شوشه آطلع للشارع من غير نعال .. لين آكلت عسكريمة والا شربت ببسي عادي ما آغسل

.. كل أبو دايم كمي وصخ ليش ما آدري < برا يا وصخه..

هههههههههههههههههههههههههههههههههههههههه

نفس الوضع .. ونروح للي عندهم نفاس ..

وناخذ ببسي ونقعد نصقع فيه ونضربه بالأرض


همن نفتحه ويطشر .. وتصير نافورهـ ..

أكشخ شي نافورهـ الشاني .. حمرا






إقتباس:

مع اننا قاضين جلد وعظم بس نسوي رياضه دايم .. ايه بس ..!

ههههههههههههههههههههههههههههههههههههههههه

ولا أكب كل اللي بمعدتي .. << الدوخه لاعبتن بها لعب ..





إقتباس:

واذكر البس شرايط ابيض وازرق حب وولاء لـ هذا النادي العريق..

احنا الزامي شرايط خضر وبيض .. << غصب حبو السعوديهـ .. !





إقتباس:

/ مرحلة أول آلف يآكلون علف .. آول باء يقولون مباء/

لا والله اول مرهـ أسمعها ..




إقتباس:

طبعاً لأنن طفلة غير عن كول البزورهـ ما كنت أخاف ولا أصيح أبد..

حتى اذا رجعت لـ البيت أقول لأمي بزران بس يصيحون ..
وأمي تقول: وأنتي ما تصيحين..!
أقول: لاااااااا مب بزر أنا < قسم تسني اتخيل الموقف

يووووهـ ياذيكـ الأيام ..




إقتباس:

ست جروح مخيوطه.. مع حرق في ركبتي..

من غير فلقة مرجيحه كلها آثار لـ جرائمي بـ الإبتدائي..

ههههههههههههههههههههههههههههههههههههههههه

انا واحد عاضني مع فخذي ... .. !!

وأصبعي اليسار .. فيه جرح مدري خياطه الموهم أثر .. وأحلى أثر

ولا يهون كسر رجلي ..

وما خفي أعظم ..





إقتباس:

البنات ماعندهم الا الدجة مواعين وعرايس وللإسف ما كانن يغرنن

لا ياخبله الحريم ونااااصهـ .. نجيب عيال ونتزوجهم ..

ونقلد المسلسل اللي ينعرض في التلفزيون وقتها ..






إقتباس:

../ كنت رياضيه من الطراز الخرطي أهم شئ اشجع الهلال وآجمع صور الااعبين من فشار تسالي تذكرونها

على أيام التيماوي ويوسف قبل يعتزل وسامي يوم شاربه توهـ خاط

لا انا كنت منحازه للمنتخب أكثر ..

أجمع صور حمزهـ أدريس وأبراهيم ماطر .. اللي على كرتون التايد .. تذكرينها ..





إقتباس:

خطمة../

يمه آبيحلاوهـ

لا .. وانتي الصادزهـ ابي ريال ..







إقتباس:

وأنا كنت كل كلمة تقوله آردهـ بعشر.. لين ملت وراحت للمديرة وقالت لا أبوكم لا أبو طالتن عندكم

مايحتاج طوالهـ اللسان .. غريزه مغروزن ابوها فيني ..




إقتباس:

ما ألبس عباة كان يجوز اني أطلع..كان لي سيكل مثل آي ولد

ههههههههههههههههههههههههههههههههههههه




وحشتني ... سيكلي الأزرق ..

وكنت اروح للبقاله حفيانه أجيب لأمي زبدهـ عشان تصلح حلى ..

<< تراني أهلي يظموني لفئه العيال .. أسمي راني ترى عشانه قريب من اسمي ..




إقتباس:

مرحلة المراهقة وإن كنت أسميها أشين مرحلة في حياتي

لأنه منعتن من الشارع.. ومن ولد جيراننا

اييييييييه خليها بالقلب تجرح ما بقى ..

العبايه حرمتني الكثير .. يالله الأجر والثبات ...


أولها حرمتني من عيال الجيران .. بس هم كبار يعني انا بأبتدائي وهم بالثنويه ..

<< اذا لعبت العب صح .. الكبار يباشرون علي


بس اللي بعمري بخيل لنفسه هالقعيطي << برااااااا انتي وهالتفكير



وأهم شي .. اللي يوقفون عندي بسياراتهم ويسولف معي واذا جزت لهـ ..

يباشر علي من البقاله حلاو ولا اي شي .. وهـ بس ياذيكـ الأيام ..


عقب ماتغطيت .. صرت اقعد عند الباب وأطلطل كني أسرق





إقتباس:

تخيلوا شالوا دفتري وقدام عيوني قطعوه

جدعوه بالزباله وأنتم بـ كرامه
قسمن كل ما أتذكر ينعصر قلبي

أح أح أح ..

وين قلوبهن ذولي ..



ذكرتيني بوحدهـ من خوياتي ..

نفس الشي مسويهـ بس خالد عبدالرحمن .. وخذوهـ وقدامها جابوا العيد ..

مسيكينه صاحت قدامهم .. الحب بلوى ..

<< ودي أقول حبي أحدن صح بس ما ودي أنمزع من صاحبه الموضوع


لذلك بسكت ..






إقتباس:

وإلا الهلي ما تملي والرديف خلي

آخ يالصندوق .. الله من يوم جمعني فيه انا وسهيل الأقرع

سهيل .. تذكرني .. << العالم كانت تضحك على أسمه الا انا <<





إقتباس:

وإلا الكندر

انا مدمنه حلاوهـ الأشاره وصحاري الأصفر




إقتباس:

والله لو بقول لكم فضايحنا يمكن ما أخلص ولا عقب باتسر

بس الصدز فله بقوة مرة مرة

اووووم الفلات ..

بس ودي الاحق الحين المدرسات وأقولهم حللوني .. الله من استاذه صيحتها حتى بثالث ثنوي الله يصلحني ..

الله من وحده كبيت على شعرها ببسي .. الله من وحده أنبط على مع الوشسمها ..

الله من وحده رشيتها باللي ..

ودي القاهم ويحللوني




إقتباس:

لو أخذني الزمن عنتس ثانويتنا كل مامريت وشفتس يزود فيني الشوق

آآآه بس .. مرينا باللي مريتي فيهـ ..





إقتباس:

ان الي فوق كله صار في عشرين سنه من عمري

الله أعلم أنا بعيش عشرين سنه أو لا

العمر كــلـه دلبو ..

ساروووونهـ ذكريني لاجا ميلادنا ..


ونسوي موضوع أطلق منها




إقتباس:

ياطفلة ضاعت بها الخُطى..

ياعالم زُرعت البسمة به ..!
يوم كانت السُقيا آلم السنين..!!

أيا عشرين احفظي ذكرياتي في ذاكرتك..
سطري شئ من الحرمان بين بعثرتكِ..!!

ويا عشقي .. وحبي !!

في أسطر سـ أعلنها ..
سـ أنثر عبق المشاعر..
أحببتك.. أيكفي أم آزيد..!!!
أحببتك أيكفي أم أزيد..!!
وآهـ يا عشق يلفني..!

تعبثرت مشاعري بين حب وآلم..
ووقفت بين ابتسامة وانكسار..!!

امتزجت بي المشاعر..!!
وحارت بي الذكرى..!!

أنثى تسكنني.. وفرحه تلبسني..!!
وشئ أخفيه إلا ناظري..!!

إقتباس:

ههههههههههههههههههههههههههههه


انا وربي أنا ..



وش تقولين بالدرج اللي موزيه جريده كامله عشان صورهـ وحده بس ..

تفداك جرايد الدونيا







إقتباس:

نسيت شئ مهم بقوة.. ترا موضوع ماصل مابوش فائدة أبدن عشان تسذا

/ خذ ماجازلك من حتسي والي ماجازلك عسى عمره ما جازلك /

جـــاز وقصمن عظـمن جاز ..


ما توقعت أحزن لهالدرجه مع الموضوع مرح ..

تسلمين نجومه .. يعني اذا جا عمركـ 40 .. بتنزلين موضوع ثاني ..


للمفضله بدون تردد


\

صدق من قال الطفش يطلع الابداع ولا نجومه

*
*
باك

وعليكون السلامون

أقتباس

سح أنتم تحبونن وعادي أقعد أسولف عليكم < وش تحس فيه

ايه نحبتس ..

أقتباس

افتح يا سمسم أبوابكـ نحن الآطفال..

أيام زمااان

أقتباس

/ مرحلة الروضه وبداية النوجاسه /

بدايات نجومة كانت من هنا...طبعاً كنت مثل أي بزره سعودية ملحطه بقوة..
شعري شوشه آطلع للشارع من غير نعال .. لين آكلت عسكريمة والا شربت ببسي عادي ما آغسل
.. كل أبو دايم كمي وصخ ليش ما آدري < برا يا وصخه..

ما هذا

تصدقين عكس طفولتي ومرحلة الروضه ..
سجلتني الترم الاول أمي <-بالله اجل متى يسجلون الثاني
وبعد ما داومت كم يوم عمتي كانت تحضر ماجستير مدري دكتوراه المهم تدرس في بريطانيا ..
وأخذنوني اهلي عشان اوسع صدرها يسموني ( دهان القلب ) <-وهـ يازيني
العيال ما اذكر اني اعطيهم وجه
حتى ولد عمي حسرت فيه الضعيف .. كنت مؤدبه <-
اذا جاء يلعب لعبه ام وابو وجا يتزوجني اعي عليه اقول ابوي يزعل <-يا ناس ع الثقل

أقتباس

مع اننا قاضين جلد وعظم بس نسوي رياضه دايم .. ايه بس ..!

هههههههههههههههههههههههههههههههههههههههه
أي والله انك صادقه ..
اذكر ابلا انوار ذيك يا شينها مغير مستلمتنا بهالرياضه وهي بقرة ..

أقتباس

/ مرحلة أول آلف يآكلون علف .. آول باء يقولون مباء/

<-

أقتباس

صدز قبل أبدأ أنتم مثلنا منول تقول تسذا لين صفر الجرس وطلع كل الفصل برا ..!

لا احنا نقول صفرت صفرت والمديرة فحطت ..

أقتباس

ست جروح مخيوطه.. مع حرق في ركبتي..
من غير فلقة مرجيحه كلها آثار لـ جرائمي بـ الإبتدائي..

لحول داخله مدرسه عيال الاخت

أقتباس

../ كنت رياضيه من الطراز الخرطي أهم شئ اشجع الهلال وآجمع صور الااعبين من فشار تسالي تذكرونها
على أيام التيماوي ويوسف قبل يعتزل وسامي يوم شاربه توهـ خاط

الله من ذاك الوقت انتي باديه
لا والله انا ينطبق على المثل ما بعد العداوه الا المحبه ..
كنت اكره المباريات واخوي الله يرحمه مشجع سامي متعصب ..
من كثر ما احبه واقعد معاه علمني هالحب
الله يرحمه وموتى المسلمين اجمعين ويجمعنا بمن نحب في جنات النعيم ..

أقتباس

موقف مستحيل أقعد أنساهـ
لأني كنت زاحفه بقوة .. وشطانية بقوة .. كنت محط انتباهـ إدارتنا الموقرهـ..

ذكرتيني بموقف صدق مستحيل انساه ..
تذكرين ايام سادس خامس ابتدائي طلع في ليز دوائر تدخلينهم في بعض وتطلقينهم
زي الصحن الدوار بس صغيييير <-مالي خلق اشرح
المهم كانت المناوبة في الطلعه على ابلا دووووبه وما نحبها
وتحدوني البنات اطيرها عليها
وفعلا قبلت بالتحدي واجي واطلقها وتصقع في كتفها
وبغيت اموت من الخوف وماعرفت مين اللي طلقت وطلعت من المدرسه قبل ما ينادي اسمي
ومن بكره نادتني المديرة قلت يا ابلا اني كنت اتعلم عليها وبالغلط ضربت فيها وصدقتني لان ما عندي سوابق
<-ام البراءه

أقتباس

/ يمه آحب.. والله آحب /

المراهقه مرحلة ما بدعت فيها مره على خفيف ..
يعني صرت اتابع المباريات بقوة واحلى مباراة ما انسى فرحتها
الظاهر كنت بثالث متوسط كأس السوبر الاسيوي قمت اناقز مناقز

أقتباس

لأنه منعتن من الشارع.. ومن ولد جيراننا

أنا ما اعرف الشارع اصلا ..
أما ولد جيرانا ابرك ..

أقتباس

كان عندي دفتر فيه ميتين صفحه

هههههههههههههههههههههههههههههههههههههههه
ياثقل دمهم هم وهالتفتيش ..
انا خوافه وما احب اخالف مره جبت صوري وانا رايحه عرس
ولدعمتي ودخلتها بين كراسه الخياطة والتغليف ..<-تهريب مخدرات
بس بغيت اموت الين رجعت للبيت ..

أقتباس

/ان كنتي تحبيني مرهـ فـ آنا أحبتس آلفين مرهـ /

المرحلة الراقية ..

أقتباس

وإلا عصير الربيع وسندوتشت الفلافل< انطقوها سذا

انا كنت احب توتي فروتي
وفي الطلعه اذا فتحوا المقصف الحصه السابعه أيام الدجه ..
نشتري آيس كريم ساندوتش

<-يازين ذيك الايام

أقتباس

11/ 8 كان يوم ميلادي

ع البركه الف مبرووووووووك
كل سنة وانتي بخير يا قلبي

نجومه ..
موضوع يوسع الصدر ..
رجعتينا لايام قد مضت ..
تسلمين

هلا والله

موضوعك مرررررررررررررهـ رووووعه

واااااااااااااااهـ على الذكريات ياحليل ايام الثانوي


تقبلي ردي

أختك \ متكيه وأفصفص

هلا والله

موضوعك مرررررررررررررهـ رووووعه

واااااااااااااااهـ على الذكريات ياحليل ايام الثانوي


تقبلي ردي

أختك \ متكيه وأفصفص