فعلا الدنيا صارت بالمقلوب
أدري بتقولون وشلون ؟
يعني بعض المواقف تصير بالعكس أو بالمقلوب
<<<<< فسر الماء بعد الجهد بالماء
يعني مثلاً مثلاً
أنا كنت رايح للسوق أمس أنا ومــذر <<<<< لمن لايجيد الإنجليزيه يعني أمي :004:
المهم دخلنا ALDO <<<<<< تراه مسوي تخفيضات لايفوتكم :119:
الــــمــــهــــم
كان فيه بنت جالسه على الكرسي اللي قدام الباب
وصورتني تصوير<<<<<< يعني ماشالت عينها عني

<<<<<< وش عنده توم كروز
وصدقوني أنا الــرجــل إستحيت منها وصرت مالي وجه ألتفت عليها أو من جهتها
وهي ولا على بالها ولا من زين الأمور تضحك بعد
بس تبون الجد حسيت إني مالي داعي يعني رجال وأستحي من بنت
أحسها قويه شوي
تمنيت إن أمي مو معي
لكن الشكوى لله
وأعتقد إن البنت هي المفروض اللي تستحي ولا وش رأيكم ؟ بس من جد وش الفايده من الحركه البايخه هاذي ؟

الموقف الثاني
كنت أمشي أنا وأمي بنفس السوق وقابلتنا بنت لابسه عباتها على أحدث طراز من الموضه
وصوتها يلعلع بالجوال وهي تضحك
بس تبون الجد ضحكتها حلوه
ودخلت من بيننا ( أنا وأمي ) !!!
يعني ضاق عليك السوق يابنت اللذين وماجيتي إلا من هنا :
أنا بصراحه غاضني الموقف كثير وماقدرت أتصرف لحظتها
بس أبي أعرف وش الفايده من حركتها ؟ وليش سوت كذا ؟

الموقف الثالث
قبل فتره كنت في أحد الصرافات التابعه لأحدالبنوك
<<<<<< لاياشيخ أجل فيه صراف يتبع لخباز
طبعاً معروف إن غرفة الصرافه مساحتها صغيره
وأول مادخلت البطاقه علشان أسحب <<<<<< مسوي كاش
والله وأشوف باب غرفة الصراف ينفتح وتدخل منه إمرأه <<<<<<< أموت على اللغه العربيه ياشيخ
ويمر شريط حياتي قدامي وأتذكر أيام الدراسه وأتذكر أبوي وأمي
<<<<<< يشوفها دايم بالأفلام المصريه إذا توهق الشخص بموقف صعب وبغى يموت وودي أكتبها من زمان وأحس إن هذا مكانها
طبعاً أنا إستغربت منها
يعني ليش مأنتظرت في الخارج
ولا مامليت عينها
وغيره الكثير من الوساوس والأسئله اللي دارت براسي لحظتها
طبعاً للعلم فقط ألغيت العمليه وطلعت من غرفة الصراف بأسرع وقت
وتصدقون عاد إني أفكر كل مأشوف الصرافه المذكوره أتذكر الموقف علطول
وأقول وش الفايده من حركتها ؟ وليش سوت كذا ؟

الموقف الرابع
صارت القنوات التلفزيونيه أكثر من الهم على القلب
يعني مثلاً تروح تنام وتقوم تلقى عشر قنوات جديده
تغمض وتفتح تلقى عشر قنوات جديده
طبعاً الأغلب منها قــلــة حــيـــاء
ومره كنت جالس عند التلفزيون وأقلب بالقنوات
يعني من دبي الرياضيه إلى art الرياضيه إلى السعوديه الرياضيه
أدورلي على أي مباراة أتفرج عليها
حتى لو كانت مباراة ركبي ولا كاراتيه ولا تنس ولا أي شئ
فجأه طلعت لي قناة أول مره أشوفها
وأسمع المتصل يقول عندي سؤال ياشيخ
قلت مابدهاش ياماني أسمع الشيخ وثقف نفسك شوي بأمور دينك بدل هالكوره اللي ذابحتك
ولو عندك سؤال ياماني أتصل على الشيخ لاتستحي
طبعاً سؤال الشخص المتصل كان
ياشيخ أنا مأحب الدراسه ودايم أرسب في ماده معينه وش الحل ؟
فجاء الرد سريعاً من شيخ زمانه وقال: الحل بسيط وسهل بس نفذ اللي أقولك عليه بالحرف الواحد
1ـ جب ورقه بيضاء غير مسطره
2ـ أكتب إسم أمك عليها بأعلى الصفحه وأسم الماده أسفل الصفحه
3ـ أكتب اللي أقولك عليه ( وأعطاه بعض الكلمات غير المفهومه )
4ـ تحطها تحت راسك قبل لاتنام
عاد أنا جلست أفكر شوي وش المعنى تحت راسه بس للأسف مالقيت جواب
طبعاً مايحتاج أقولكم إن هذا الشيخ ماهو إلا ساحر ولكنه يستخدم الوسائل الحديثه لتنفيذ أموره الخبيثه
الغريب الإتصالات اللتي ترد على البرنامج من دول عربيه وخليجيه
والأغرب أنه يمارس سحره عياناً بياناً ولاعليه من السلطات والجهات الأمنيه
لكن مادامه لاقي مهبل يلعب ويكذب عليهم مانقول إلا الشكوى لله

وأقول وش الفايده من حركتهم ؟ وليش يسون كذا ؟

الموقف الخامس
طبعاً معروف لدى الشنبات إن أغلب مدارس العيال تسوي دوري بكرة القدم بين الفصول
والدوري يقام كل سنه مرتين يعني كل ترم مره وحده
طبعاً فيه مشكله صايره بين أخوي وصديقه اللي يدرس بالفصل المجاور لفصل أخوي
المشكله هي إن أخوي وفصله ولله الحمد فازوا بالدوري العام الماضي مرتين مسوين برشلونه
وفصل صديقه العام أخذ المركز السادس بالترم الأول والترم الثاني أخذ المركز الثامن
بس إنهم يكابرون شوي ويقولون لأخوي وفصله إننا أحسن منكم
وإنكم تفوزون بالغش والتحكيم و و و و و و و
ودايم يحاولون يقللون من أحقية فوز فصل أخوي بالمباريات
مع العلم إنهم دايم ينهزمون بس إنهم يكابرون ومايقولون حنا مانعرف نلعب
يعني شين وقوي عين بعد
طيب وش الفايده من حركتهم ؟ وليش يسون كذا مع أخوي وفصله ؟