أدعي الله يوردك يا الغاليـه كوثـر نبيّـه=ويغفر ذنوبك ويكتب لك من النار السلامه
ياوجودي وجْد طفْلن ماتت أمّه فـي يديّـه=قبل ماتفطر خذوها مانقض موته صيامـه
صاح يا ( يمّه ) وتاب عن الحروف الأبجديّه=وأبتدا الليل الطويل يغطّي الكون بظلامـه
كلّ مايصبح تشرّق به عصـور الجاهليّـه=وكلّ مايمسي تـولاّه الكوابيـس فمنامـه
مالقا غير التراب إيعايده عيـد الضحيّـه=جالسن بين النصايب يحتري يوم القيامـه
لو شكى حزنه على الأموات تحت المهمهيّه=كود تهتزّ المقابر والجثث تجمـع عظامـه
ولو شكى همّه على روس الجبال الحايليّه=كان ضلعان الرعيله هاجرت لاقصى تهامه
ولو شكى حبّه على مجنون ليلى العامريّه=كود ينسى قصّته ويتوب عن ماضي غرامه
أدعي الله يوردك يا الغاليـه كوثـر نبيّـه=ويغفر ذنوبك ويكتب لك من النار السلامه