بالنسبه لي طفولتي مثل طفولة أي قرد عى وجه الأرض ..
كآنت همجيه بشكل مو طبيعي ..!
أذكر كنت أحفظ الأغآني عن ظهر قلب ..ويمسكوني عيآل عمي الكبآر يقولون غنيلنآ وأجلس اغني يآنآر شبي من ضلوع حطبكي .. ومروحه بالغنآء وإذآ ضحكوآ أسسسسستحي وأقمط العآفيه عبآلي أن الأغآني غلط .. وهم يضحكون على اني بزر وأعرف الكم الهآئل من الأغآني ..
ومآفيه بنت بالعآيله مآكفختهآ ..
وحدهـ كنت مآ أسميهآ إلا الدلوعه وطآيحه فيهآ تكفيخ صبح ومسآء .. وأكفخ كل وحدهـ تمشي معهآ مأدري ليه كنت أكرههآ يمكن عشآن أمي دآيم تقول أنهآ هآديه وأحسن منتس .. وكنت أنآ وأخوي نكفخ عمي .. مع أنه أكبر مني بسنتين لكن الكثرهـ تغلب الشجآعه .. كنآ مسوين قوهـ مآهي صآحيه أنآ وأخوي وأحيآنا ً أقلب على أخوي وأخلي خلق الله يآخذون حقهم منه .. ترآ مو بس عمي الولد المتضرر الوحيد من أفعآلنآ المخزيه .. برضو وآحد من عيآل عمي كل عيد لآزم أضرب رآسه بدريشة المطبخ .. أجيبه من بيت عمآني لبيتنآ أطق رويسه بهالدريشه وأرجعه .. مأدري وش الحكمه؟! يمكن كآن بقصدي عيديه .. ووآحد ثآني كنت دآيم أنآ وأخوي نكفخ أخته .. جآنآ مرهـ فآرد عضلآته ويهآوش يبينآ نخآف خصوصا ً أنه كآن أكبر منآ .. وحنآ نمسكه وندبغه ..

وإذآ جينآ عند الألعآب فحدث ولآحرج <-هي كذآ ؟!
كل ألعآبي سيآرآت كور مسدسآت وكذآ .. ويآويل اللي يجي ألعآبي وألعآب أخوآني أمسح به الأرض ..!
وكآن فيه نآس وآجد يحبوني بس مو كثر اللي يكرهوني ..
كل اللي حبوني صرت ذكرى قديمه بالنسبه لهم وأنآ كذآلك .. مآعدآ وآحد للحين يسمي نفسه حبيب أحلآم تيمنا ً بحبيب دويله .. وصآرت معيآرتي بالبيت حبيبة فلآن .. قسمن بالله أني كرهت هالضعيف والسبه أهلي ..!
طفولتي نقطه سودآء بحيآتي .. ودي يعود الزمآن وأعيش طفولتي مثل البنت الدلوعه اللي كنت مغير أدبغهآ ..
كل مأتذكرهآ أحسني كنت أرهآبيه .. أجل سوآيآي يسويهآ مخلوق ؟!
قسمن بالله أني للحين أشوف أثآر طفولتي على جبآه خلق الله .. اللي فآلقته واللي خآمشته واللي مآدري وش مسويه فيه .. أحسني كنت متجردهـ من النعومه <- تكفين ..
أحس أن ردي لكم عليه .. لكن مثلكم يستر ويعذر <- برضو هي كذآ ؟!
عرقوب عوآفي لا عدمنآ هالطله ....

.
.



ياهلا والله بندى
مشاءالله وشـ هالموضوع الزين
الطفوله أحسن مرحله تمر على الانسان بخيرها وشرها


مره يوم كنت صغير كنت انا خآرج القروب لاني ولد وخوآتي البنآت قروب
المهم .. مرهـ كنت جالس العب كمبيوتر وسمعتهم يطرون ؟ انهم بيرحون (البقاله)
وعاد يقولون بكرا بنروح البقاله قبل ابوي مايجي من المدرسه الي تقول انا بجيب
ونابشتري واللي تقول لا انا نفسي في هذآ المهم حطو لهم لسته كآمله بالطلبات
وانا احسبهم يمزحون زي العاب العرآيس اللي تكلم عروستهآ كلام تحسبه صدق كنك
تسمع مسلسل كويتي
االمهم .. راحو غرفتهم ونقطعت اصوتهم عني وكملت لعب كمبيوتر .. ويوم جا من بكرآ قبل
مايجي ابوي من مدرسته ..
جآء عقب الظهر .. آثر البنآت صآملين ونآ مدري وش الطبخه ..على طول نطلت
شنطتي ولا قمت الصبح قمت آصيح على بالي مضيع شنطتي ونا موزيها
وآقرب وآحد لي آاحط التهمة فيه آنه موزيها .. كود آنهآ تضبط وآغيب
ونطلت شنطتي ورحت آلعب كمبيوتر بعد ماغبت ... والوضع هدوء .. عاد انا ماحب الهدوء
بعض الاحيان .. قمت زودت ع صوت التلفزيون ..ومآدريت الا وآبوي داخل
طالع طالع دآخل مدري وشفيه وقتها .. عاد انا مآلي دخل بآي شي جلست العب
كمبيوتر شوي دخل علي تقول شآيف عدوه موب ولده .. وخذ ضرب وتصفيق
وآنآ مآسك الكمبيوتر واليد معي حقت الكمبيوتر ومآدريت الا الكمبيوتر بكبرهـ
يضرب فيني والسلك يطقني فيه .. بس رجال مآبكيت انا .. كآن همي بوقت الطق
آني آضغط باليد على ستآرت لا تكمل اللعبه لاني يالله وصلت هالمرحله ووقتها
يطق وقوله ليش تطقني مدري وش السالفه ويطق المهم وهو يطقني ... يقول
وين خوآتك ..؟ دريت وقتها ان هالطق بسبتهم وسبه روحه البقاله . ونآ مدري
آقوله والله مدري عنهم عشان مايكمل طق .. وكنه مآيسمعني ونا
اقوله ليش تطق .. شغل عسكريه بغيت آنكب امي اقول
أسئل امي .. بس سمع البآب حق الشآرع يطق ..!!
لا .. ويطق بأدب بعد خخخخ لانهم شافو سياره ابوي يبوني افتح وقتها الظاهر
يوم فتح الباب لقى بناته متقضين من البقاله .. آكثر من مقاضي رمضآن اللي
يجيبهآ اابوي ويدخلهم .. وانا اناظر مع البآب .. ويوم شفت الطق آنحشت ..
مآتشوف الا الببسي والبآونتي والاغرآض البآقي ينطلهم ابوي نطل


_



هذي الصوره تمثل عيارتي ( بحبوحه )
الي مع الانسه صفاء

سبب العياره لاني وقت عرض الفلم اركض بالحوش
وكنت اقول بحبوحه جت بحبوحه جت عشان الكل يشفونها معي




ندى الأيام


موضوع روعه كاروعه قلمك
جميل هوا حضورك ..

:
:
باك ..
:
:
مووضوعك كويس يحكي عن الطفوله اللي ماتخلو من اللعانه والنجاسه ..
طبعا انا لي اخو علي اصغر مني بسنه يعني كل شي مع بعض انا وياه ..
اذكر صديقه للوالده دايما تجي لبيتنا ومعها بنتها على عمرنا وكنت خاق معها ..
كانت البنت مره كويسه تلعب معي ومامنها خلاف .. بس انا تفكيري سقيم ايام الابتدائي حبيتها ..
المهم صارت بعد فتره ماتجي لنا لين ماجاء المتوسط ..
وكانت امي دايما تروح مع السواق وانا معها لبيتهم وترفض اني ادخل معها ..
اذكر كل مامر من بيتهم اطلق ذيك التنهيده السريعه ااخ بس
لعب بحسبتي الحب ..
المهم قلت لازم اشوف لي حل وكذا مع البنت ..
المهم كنت توي طاق جوالي بثاني متوسط ..
وكان جوال مشترك بيني وبين اخوي قلت مالي الا احط الرقم على دريشة السواق حقهم واكتب انا احبك وكتبت اسم اخوي ..
انكب اخوي مع ابو الجيران بس انا انكبت مع اهلي لانهم يعرفون خطي المايل ..
:
:
واذكر موقف يوم اني بزر كان عندنا سواق كريه ايام المتوسط
ولايخليني انا واخوي ناخذ راحتنا يعلم ابوي عن كل شي ..
وكان ابوي يكره السواق اذا كان يدخن المهم خطرت ببالي انا واخوي فكره ..
نشتري دخان وكل مانركب معه نرمي زقاره بالسياره وكل مانزلنا للبيت الظهر نولع الدخان ونخلي ثوبنا ريحته دخان علشان ينكب السواق ..
لين ماسفره ابوي ..
:
:
ندى الايام ..
موووضوع كويس وبدعتي مره عفيه مره ..

اهليييين نــدوّ
وش هـالموضوع الخقــه
نجي لــضيووفتس
انيــن
انتي كنتي كذآ نذله مبين غير تسذا
سيدووه ،
تعالي قولي لي وش يعني اوم جريوه ؟!
سمّـو
علييك طفووله
خالتس عادي يتقبلتس الحين ؟!
_

طفولتي ..مدري كيف

كل يوم مطروده من بيت جدتي
وصافه مع العيال برا عند الباب الكبير
طبعاً لاني مصفقه وحده من البنات شبه يومي هذي السالفه ..
مثل السلام عليكم الكف عندي
وجدتي كانت تكرهني .. من كثر ما اكسر بيتها
اذكر مره كنا فـ العيد .. ومزينه البيت وكله توحف ومقفله المجلس الكبير
عشان اذا جوها كبار الشخصيات
طبعاً لقافه فيني تدوريني تلاقييني اتعبث في غرفتها مدري وش ادور
ولقيت المفتاح إلا يدخل علي ولد عمتي وش تسوين .؟ اقول ابد ذا مب مفتاح المجلس الكبير ..قال إلا ، قلت جيب كورتك
نروح نفتحه طبعاً هو برئ اي شى اقوله يسوي
ضاقت علينا الوسيعه وما لقينا إلا مجلس جدتي نلعب فيه
ولعبنا كوره تخيلي وكسرنا لنا اكبر منظر فيها طاح كله قزاز ..
خاف هو ، قلت له اصص .. احنا ما سوينا شى انزين
واقفل المجلس وارجع المفتاح لنفس الدرج في غرفتها
وجات عمتي تبخر المجلس .. تلاقيه كذا
وإلى يومك ذا يحسبونه قطو اللي كاسره .. وما يدرون
-

ومرّه بعد مع ولد عمي .. كان معي في غرفة جدتي > امتع مكان عندي
لقينا حبوب الضغط ، واكل انا واعطيه حبه هو يبلع وانا ابلع
لين تجي اختي الكبيره وتصارخ وتقوم البيت .. طبعاً هلوسنا انا وياه


-


طبعاً الستر زين
وفيه اشيئا انا ما اذكرها بس يجوني الناس ..
يقولون تذكرين يوم سويتي فينا كذا
تبقى الطفوله احلى ايام العمر والله

نــدى ..
مــرّه شكراً موضوعـك رجعني لـ لآيام الخوالي
تعــي ّ كـل يوم

*
*

يـ هلا وغلا بـ ندّو ..

صراحة حلو مضمون موضوعك ، وطلع لنا خفايا كثير ..
إلا أنين النذاله فيها واضحه للحين ..



أجل طلعت عندنا بحبوحه ..
ههههههههههههههههه
ليتك من زمان فكرتي بالموضوع يـ ندى ..


أنا طفولتي برئية ولا عندي شيء ..
وماجيت هنا إلا عشانك يـ ندّو ..

إلا أنا ويني وين النذاله .. ض1

...الحمد لله كانت طفولتي سعيده جداًو لا فيها أي نذاله .. مني أو من أخواني .يعني من لندن إلى باريس إلى جنيف إلى الرياض الحبيبه ..و كانت طفوله راقيه .و أحلى طفوله .لأنها الأساس الى النجاح و التربيه .