مساكم الله بالخير صبحكم
الله بالخير
<< خخخخ تذكرونه



يوم كنا اطفال صغار لاهموم بالحياه ولاتعب ولامشاغل
وجهال مانعرف عن شيء بالدنيا لاكيف جينا ولاوين بنروح
ولاكيف بنعيش ولاوش مشاكل بنشوف الحياه كانت فعلا
حلوه مجرد ضحك ومسايير مع امهاتنا ولعب بالشارع وحلاو



هالحين كبرنا وكبرت همومنا ومشاكلنا وحتى ابتعدنا عن
بعض صرنا كل واحد يالله يالله يفكر متى يفضي يشوف اهله
واخوانه ويجتمع معاهم الله المستعان بس
وكبرت معانا حاجاتنا هالحين من اول يومنا بزران بسيطيين
مرره مرره هالحين لا حتى بزران هالوقت مهب بس حنا تلقى
الواحد مليان جيبه جوالات وغرفته لابتوب ولابتوبه مليان صور
وفيديوهات وايميلات وكل شيء بسم الله علينا
طيب وش الفرق ؟
المجتمع تطور والحياه تطورت والعلم بعد تطور الله يرحم احوالنا
اول بس ماندري وش السالفه ماغير ندربي الدميجه وبس
طيب وش احسن ؟
هالحين والا اول ناس تقول هالحين وناس تقول اول وتختلف
الاراء كلن له رأي وكلن حر برأيه اكيد


طيب اقولكم شيء / هالحين هالمقدمه اللي فوق اكتشفت انه
مهيب لم موضوعي ابد ابد خخخخ
انا بوصل لنقطه اختلاف الثقافه المغلقه بمجتمعنا من جيل لجيل
وش الثقافه المغلقه اقولكم وش ؟
تخبرون لميس ونور ماخلوا بزرايننا الا وهم يعرفون كل شيء مره لقيت
اخوي الصغير يتابع نور قلت له وش تبي به هذي ؟ قال احبه
مزيونه خخخخ لعنبوحيه يعرف الزين من صغره من اول ماندري وش
فرق الزين من الشين ماغير نراكض بالغبره والشوارع

طيب هذي تعتبر ثقافه انا اعتبره بغض النظر عن كون اخوي مثلا
يقلدن او يقلد اخواني الكبار تدرون وش ثقافته ؟
ثقافه انجذاب الطفل للمرآه من صغره في مجتمعنا السعودي يعني
صار يدري ان هذي مره يقول عنه مزيونه يعني ماقال مهند مزيون
قال نور مزيونه مع انه شيفه مالت على ذوقه :/
هذا تعتقدون شيء سلبي والا ايجابي ؟
انا اشوفه ايجابي لانه بيزرع شيء من الحنان والمفهوم عند
الطفل ان هالكائن اللي يختلف عنه اللي هو المرآه لازم ينظر
له نظره حلوه لازم ينجذب له اكثر من غيره هذا شيء
الشيء الثاني ان من اول عيب وشق جيب عند اهلنا ان البزر
يلعب مع بزره لا وبعد ياويلك لو تلعب مع الحريم وياويلك تدخل
على مجلس الحريم وعيب ومدري وشو وهم بزران الله المستعان
بس كذا تعودنا :(
هذي نقطه ( النظره المختلفه للمرآه )
وهذي بتنمي شعور مختلف عند الاطفال لين يكبرون ويختلفون
عن تماسيح هالوقت اللي اهلهم عودوهم على القسوه والنفور
من المرآه وانه شيء مالمفروض تقترب منه رغم انه بزر :(
شعور حلو صح يطلعون رجال بناتنا بكرا رومانسيين وحنونين
وينظرون لهن نظره اعجاب من صغر
بس هذي اول نقطه من موضوع الثقافه المغلقه اصبروا باقي
نقطتين ثانيات مغلقات
عاد قبل اختم هالنقطه مرتن وحده قولوا لي وش رايكم صح
والا لا هاللي يصير ؟


~


النقطه الثانيه ياطويلين العمر هي مبدأ ( العلاقه الزوجيه بين
الزوجين عند الاطفال )
خخخخخخخخخخخخخخخخخخخ مره وحده تقول لي ان اخوها جاء
يركض لها يقول تعالي اقولك شيء عيب مره مره قالت وشو ؟؟
تقول احسب صاير مصيبه / قال ابوي يقول لامي ياعيوني وين
العشاء ؟ ههههههههههههههههه ياعمري هو يحسبه فاحشه خخخ
المشكله الولد يالمتوسط :(
يعني مستحيييييل هالحين نشوف رجل يدلع مرته قدام عياله
عيب ومايجوز طيب وش العيب :/
هذي مرتك بالعكس انت لما تدلعه تنمي عندهم شعور المتعه بالحلال
عكس لما تزجرهم عن المغازل والمكالمات فانك هنا تنهرهم عن الاستمتاع
بالحرام وهنا تتضح لهم الصوره اكثر وترسخ عندهم
لاتقولون واضحه لا ماهي واضحه ابد هذولا مراهقين مايعتقدون ان
فيه متعه الا بالمغازل والمكالمات لانهم مايشوفون شيء ظاهري
بالحلال ابد ابد
طيب عادي وش فيها لو قلت لمرتك ياعمري ياحياتي عند عيالك ؟
والا مديت الملعقه وقلت خوذي هذي لقمه مني ياروحي ؟
والا قلت له يازين هالملبس والا يازين بيتك والا يازين هالطبخه ؟
بالعكس يتنمى عند ولدك مفهوم التواد والتراحم بين الزوجين وانهم
حلال لبعض وشيء طيب اللي يصير بينهم
اقل شيء تزرع بولدك حنان وتجذبه للحلال بحيث لايخاف احد يطيح
عليه ولاينهره عن شيء :(
هالحين لابنات ولاعيال كلنا لاشفنا سوري والا لبناني قلنا ووه بس
يالله الجنه وش هالرومانسيه والا هذولا راعين الحب وهذولا اللي
يفهمون الحريم وهذولا الرومانسيين وحتى الرجال هذولن اللي يفهمن
الرجل هذولن اللي يفتحن النفس طيب عمركم سألتوا اعماركم ليه ؟
لانهم تربوا ان امهم وابوهم يحبون بعض فيما بينهم ويظهرون العلاقه
الطيبه تربوا على سالفه ان مرتي حبيبتي وقلبي وعمري وحياتي
وكل شيء والبنت بعد على ان زوجي حبيبي وعمري وحياتي وكل
شيء بدنيتي خلاص من يوم هم بزران وهم يسمعون هالسوالف
ويشوفون هالاشياء قدام عيونهم
نمت عندهم الجانب العاطفي اكثر مننا مع اننا شعب عاطفي حيل
بس حنا شعب ( مغلق ) بمفتاح مايبي يطلع شيء ابد ابد حدك انت
ومرتك باب غرفتكم اذا عندكم بزران وباب بيتكم اذا ماانتجتوا الى هالحين
علشان كذا خلاص حنا يالبنات عيب تقولين قدام اهلك لرجلي ياعمري
وانت يالشاب عيب تقول لمرتك حبيبتي قدام اهلك وغير كذا عيب
قدام بزرانكم يصير بينكم التواد والتراحم وخلاص كذا نبي نمشي
مع ان اغلبنا يدري انه خطأ بس بيمشي عليه مايبي يصححه هو كلن
يبي الثاني يبدأ لين نخلص :(
خلصت النقطه الثانيه قبل تخلص وبما انكم مقبلين على زواج يعني
كلنا تقريبا بعمر جامعي مابقى لنا شيء الله يحيينا حياه طيبه ونصير
امهات واباء بتسوي مثل ماابوك يسوي والا بتبدأ تسلك منهج جديد
وتتعامل مع مرتك بالرحمه والتواد والحنان زي ماربي حط بينكم
وقدام عيالكم ؟


~


النقطه الثالثه اصبروا توكم << ياكثري خخخخخخخ لااتسذب هذي
اخر نقطه بالسجن قصدي بالموضوع هي ثقافه ( الجنس )
ادري هالحين تبي تجيني انبراشات مادري وش تبي من الحياه بس
ترى ماقلت لاعيب ولاحرام
على زماننا لين مادخلنا المتوسط وحنا ماندري وشلون جينا للحياه
لان ببساطه ماعندنا لامنهج ولاتربيه ولاشيء سّوي يعلمنا كل شيء
بشكل محترم وبشكل نفهمه صح
بس هالحين يووووووه بس المراهقين والبزران يعرفون كل شيء :/
بس تدرون وش المشكله :/
انهم فهموه من النت والجرايد والمجلات والمسلسلات والافلام وكل
هاللي ذكرته تنقله بشكل غلط × غلط
صاروا عيالنا يدخلون شيء أباحي تخيلوا ؟
طيب ليه ؟ علشان يتعلمون شيء من دينهم :/
مافيه عيب عادي لو يتكلم الاب بأمور مثل كذا عند عياله بشكل
محترم بدل مايروح هالبزر والا المراهق يدور المواقع الاباحيه ويشوف
شيء مهيب من ديننا ولاعادتنا ولاتقاليدنا ويحفظها ويظن هذا
هو الجنس ويمشي على اللي قراه :/
شيء عادي مافيها عيب مثل مانأكل ونشرب لنا شهوات نصرفها
بالشيء الحلال والمفروض كذا نعلم عيالنا وبناتنا
يكبرون والبنت / الولد جاهلين في هالامور وبعضهم يلجأ للكتب والنت
قبل زواجه يتثقف شوي لان بيئته ماعطته اللي يكفيه لا وياخذ الكتاب
بالخفيه علشان تربيته ماتسمح له بهالشيء
كل ذي اشياء غلط الان في متزوجين مايدرون وش الحلال من الحرام
والسبب هالدائره ( المغلقه ) في مجتمعنا وفي برضو شباب مايدري
وش اللي يسويه وحلال له من اللي مالمفروض يقرب له وبرضو البنات
وكل هالشيء آثمنا يرجع على اهالينا اللي للاسف يعتقدون انهم
يبنون شيء صحيح فينا :/
طيب الان مانلوم اهلنا لانهم جاهلين بس الان حنا جامعات ونت وشهادات
عليا وتخصصات مرموقه وطلعنا للعالم والخارج وكتب وقراءات وش بنسوي
لعيالنا بكرا ؟
هل بنثقفهم من هالجانب بشكل صحيح وديني ؟
هل بنسمح نفتح هالدائره بيننا وبين ابنائنا بحدود الدين والادب ؟
هل بيجي اليوم اللي تقول لولدك / بنتك تعال / تعالي اسأليني عن اي
شيء ماأدركته مكان ماتروح موقع اباحي او تتعرفين على شاب تسآلينه ؟


~


خلص كلامي كووووله ابشركم خخخخخخخخخخخ
واخر شيء ودي اقوله ياليت ماشوف ردود تقول اني ابنشر الرذيله خخخخ
انا اقول كل شيء بحدود الدين لان الدين اباح هالشيء بمبدأ الحلال وانا
ماقلت انفتحوا على الحرام
وغير كذا اللي يبيني اجاوب على اسئلتي اقولكم من هالحين انا بربي
ابنائي على عكس ( المغلق ) وبحدود تربيتهم السويه وثقافتهم واخلاقهم
ومافيها لاعيب ولاحرام الحرام اني ارمي بأبني بالمواقع الاباحيه علشان
يلقى اجابات لاشياء فطريه تدور برآسه ..


~


ان شاء الله ماكون كثيره واشوف اجابات واقعيه
وصادقه علشان نقدر نفهم بعض
تحياتي ..