*
بسم الله الرحمن الرحمن
*
*
أعضائنا الكرام أهلا و مرحبا بكم
من جديد في الفقره المتجــدده
(( لقـاء مــع ضـــيف ))
في هذا اللقاء إستضفنا اسم له وجوده
اسم تألق في منتديات ياسر القحطاني
شخص كرس جهده لخدمة الموقــع
فرحبو معي بـ الرائع وصاحب الروح المرحه ومراقب عام شبكة النمر وإداري بموقع القناص
((فيصل))
*
*
بطاقتك الشخصيه ؟
الاسم / فيصل
العمر / 23
طالب بجامعه الملك سعود - قسم علم النفس
الحالة الاجتماعيه / خاطب او بمعنى اخر متملك
وش تبي بعد زود
(ابيك تعزمني اذا اعرستا ذيك السنه )
الموقع بشكل عام ماذا يعني لك ؟
والله الموقع بكبره بيتي الثالث < لاتسألني وش الثاني
واعتبره جزء من حياتي في الانترنت بشكل عام
من خلاله تعرفت على ناس افتخر فيهم مثلك وشرواك < ابوك يالهيط
ويكفي من خلال الموقع اننا نرد الجميل للقناص الذي يقدمه لنا
من خلال المستطيل الاخضر مع الهلال او المنتخب ..
( ياكثر بيوتك )
نلاحظ عليك التواجد في كل الاقسام , ولكن لكل شخص قسم محبب , ماهو قسمك المفضل ؟
والله شف ياحبيبي اكثر قسم احبه هو المجلس وبعده الفني
اكيد مستغرب تقول وين راح قسم الجمهور الهلالي
بقولك وش اسوي مال من الهلال
الجوال ودايم رسايل منهم والتلفزيون دايم قبال قناه الزعيم وكل ابودايم بالنادي
فعشان كذا في الاتنرنت احب ابتعد عن الهلال < حسيت اني مندس
الا ع فكره ترى قسمك مااحبه < صفقني ان نزلت المقابله
نزلت هي بس بتفاهم معك بعدين
فيصل انت مراقب عام شبكة النمر ودنا نعرف وش بداياتك في عالم الانترنت وهل كانت من موقع النمر ؟
والله شف بداياتي كانت قبل 6 سنوات .. كنت اناظر ابوي وهو يدخل الانترنت ولا ادري وش الطبخه
وبعدين صار عندي جهاز وصرت ادخل قوقل واتنح
وبعدها صرت ادخل موقع الزعيم وكنت اتفرج ولا اعرف كيف اشارك
وبعد مرور الوقت سجلت وشاركت وطلع خبر بجريده الجزيره ان موقع الثنيان بيفتتح قريب
قمت وقمزت وسجلت
ومن عقبها صرت اشارك اكثر واحد في العالم
حتى اتذكرهم يقولون لي شكلك انت واهلك متقاطين باليوزر
بكل وقت تلقاني اتواجد وارد < وهـ بس ياحبي لي
التوأمه بين النمر والقناص كيف تمت ؟ وماهو سببها ؟
التوأمه سلمك الله الهدف منها هو ايصال كل مايخص الهلال والمنتخب الوطني لأكبر شريحه في عالم الانترنت
وقد كانت الفكره بسيطه بيني وبين النمر الهلالي ايام ماكان مشرف منتدى الهلاليين بالاقلاع
وبعد فتره فتح منتدى القناص وكلمنا بن خوري ووافق ع الفكـرة ..
بعدها بشهر جى بن خوري وياسر20 وروبن هود للرياض
واجتمعت انا والبرنس 1111 من النمر بهم في احد قهاوي الكوفي بالرياض
وقد تم الاتفـاق على كل شئ ..
ووضع السياسه والترتيبات لأنطلاق هذه التوأمه ..
والحمدلله التوأمه نجحت بشكل مذهل وكتبت عنها العديد من الصحف
واثنت على نجاحها ..
وبعد سنه من التوأمه انفصل منتدى الاقلاع عنا لانهم يريدون كذا
ومازالت التوأمه مستمره بين النمر والقناص الى اخر قطره
( اختلفنا من يحب الثاني اكثر واتفقنا انك اكثر وانا اكثـر .. تركب عليها يافيصل والا ..!! )
فيصل والمعجبين ؟ هل عانيت او اصبحت بمثابه ضريبه الشهره ؟ ولاتكون غطيت على ياسر في موقعه ؟
هههههههههههههههههههه منيب عاقل انا والمعجبين
يقالك الحين شكلي كاكا ع غفله
ولا قلمي مثل نجيب محفوظ
ولا قصايدي مثل نزار قباني
انا ماانكر فيه معجبين وكثير اللي اعترفوا بالشئ هذا ..
والحمدلله هالشئ مصدر اعتزاز وافتخار لي
لكن ع فكره تراهم معجبين بكتابتي ولا الشكل الله يخلف
ههههههههههههههههههههههههههههههههههههههههههههه هه
وودي اغطي ع يـاسر .. وعندي امل < براااا
بس اصبر خلني افتح موقع وبتشوف
انتشر لك مقطوع بلوتوث وانت تشرح ضفدع ؟ هل تعتبرها بمثابه جريمه ؟
والله لاجريمه ولايحزنون
هذي دراستنا وتتطلب كذا
وبعدين الضفدع كان عايش بحظيره وضايقن صدره
فقلت اريحه من هالدنيا وبلاويها وذبحته خخخخخخخخخخخخخخ
< وقسم كرهت نفسي
وصلتني معلومه انك مدمن .. انترنت / تلفزيون , ودي اعرف اثرها السلبي والايجابي عليك ؟
نسيت اني مدمن نوم وببسي
شف الانترنت كنت مدمن اول اجلس عليه بالعشر ساعات متواصله
لكن الحين خفيت بكثير ولله الحمد صار جلوسي عليه من 3 الى 6 ساعات باليوم
طبعا تكون متفرقه
اما التلفزيون فعلا لاجلست عليه مااقوم خصوصا لين كنت اناظر ام بي سي واختها ام بي سي تو
اما اثرها الايجابي .. فهو زود معرفه وثقافه ..
اما السلبي .. فهو انعزال وزياده ذنوب
اليسـا .. وش تعنى لفيصل ؟
ياراااااقل اي السؤال دا .. احنا برمضان مايجوز الكلام دا
والله شف يالحبيب اليسا مثلها مثل اي مواطنه لبنانيه تقطع الوجه من الزين
لكن انا خاق معها على كل شئ فيها ..
من جسم / صوت / دلع / شكل / بياض / غمازات
يعني هذا لين قالوا لك كامله والكامل وجه الله سبحانه وتعالى
لكن انا معجب فيها فقـط .. منيب احبها < خايف من زوجته
شفت لك اكثر من موضوع ماتمدح البنت السعوديه ليه ؟
من يقوله ياشيييخ
نسيت ذاك الموضوع اللي نزلته عشان شهد دمعه شوق يوم انها تنقر من الممرضه اريج
وكان العنوان شبابنا الاحلى وبناتنا الاجمل CC
بس صح اني اشب عليهم بين الحين والحين الاخر ..
لانهم صدق وش نسوي مايهتمون بااعمارهم ابد
اجل امس وانا اتمشى بمنتدى ما لقيت بنت كاتبه
باركوا لي سويت حمام مغربي
يعني بالله هالشئ المفروض تسويه كل شهرين
عشان تصير تلق لقيق
لكن تبقى البنت السعوديه الاجمل < مايمديك ترقعها
( مضمون الاجابه يافيصل ممكن خايف ان زوجتك تتطلع على المقابله هاه )
يقولون كثر الدق يفك اللحام ., ماتخاف تخسر معجبيـنك ؟
مافهمت وش تقصد
بس كان قصدك وانا اشب على بناتنا
والله مااخفيك ياحالي الذوق اني خسرت بعضهم ..
والبعض كان متفهم وقال وجهك نظرك وانت حر فيها ..
انا شخص أومن بوجهات النظر ومايهمني اخسر او لااخسر
انا ابدي واطرح وجهي نظري وماراح اجبر احد اني يصير مثلي ..
اللي زعل مني انا اعتذر له ولكن لازم يعرف ان وجهه نظري هذي لحالي
واللي رضى اهنيه على تفكيره وعقليته
فيصل حدثنا عن اكثر شئ يفيدك في حياتك بشكل عام ؟
والله كل شئ استفيد منه لكن اقدر اقول الاخـطاء اللي تصير لي
استفيد منها بشكل كبير واحاول اني اعدلها في المستقبل ..,,
اقولك مثال يعني اول مادخلت الجامعه كنت داج واقول ايه خذها ساعه صدر بس
وبعد المستوى الرابع حسيت اني زلابه وكلامي اول اي كلام
واجتهدت ووصلت الحين للسابع
ومااقول الا ياحسوفه السنه الكامله اللي ضاعت علي
انت طالب جامعي على وشك التخرج , والتخصص علم نفس , ويقولون ان حقين علم النفس
يتأثرون بدراستهم يعني يضرب عندهم فيوز ويصير نص لفه .. وش ردك على هالكلام ؟
طيب انت وش رايك بكلامهم
شف ياخوي انا قدامك وش حليلي ازنن بسم الله علي هههههههههههه
يااخوي والله يمكن معاهم حق بس موب كل طلاب علم النفس
او دكاتره علم النفس ..,,
يعني عندنا في الجامعه دكتور ملحوس وقسم مايدري وين ربي حاطه
من زود اللحسه ذاك اليوم يقول فيه اختبارات شهريه بس منيب مصححها
درجاتكم الفصليه بتكون على حضوركم بس
يعني الزبده اقولك فيه وفيه
بس الاغلبيه الحمدلله صاحين مثلي وشرواي
(سلام ياصاحي )
السؤال رقم 15وش يعني لك رقم هالسؤال .. لك مساحه مفتوحه للتعبير بماداخلك عن يوسف الثنيان ؟
يوسف الثنيان
لم ولن استمتع بحركه فنيـة من بعده
يجعلك تبتسم وانت حزين
يجعلك تقفز وانت جالس
يجعلك تصفق بلا شعور
لم اجن بلاعب بمثله ..
فيه الفن والمتعه والمهاره وفوق هذا كله فيه جمال الروح
يعجبني تواضعه تعجبني سوالفه ..
اعيش معه اجمل لحظات حياتي اذا كنت بجانبه ..
واسعد تواجدي بالملعب اذا كان هو يلعب على المستطيل الاخضـر ..
المتعه تكمن بين قدميه
وذهبت معه بعد اعتزاله
عرض عليك مبلغ مادي كبير وقدره ...... لكن بشرط ان تترك تشجيع الهلال هل توافق ؟
المبلغ يزوجني ويشتري لي بيت وسياره ويعيشيني عشر سنين قدام
اشجع ياشيخ لو يبون حطين
لا الجد يعني تخيل يجيك 10 مليون ويقول اترك تشجيع الهلال
وقسم قسمات لأوافق يعني الحمدلله انا رضيت بالبطولات
من يوم لين الحين يمكن خذت فوق الـ 35 بطوله
نعمه يالله لك الحمد والشكر
عاد باقي عمري خلني اتهنى بالمبلغ ذا
بس بشرط مايكون النادي المشروط يكون النصر او الاتحاد
فيصل اشخاص مقربون لك وترتاح لهم غيري طبعا انا منهم ؟
اول شئ امي
وبعدين تجي انت ومدمن بحب يوسف وامير الملاعب وبن خوري والكاسر وروبن هود وياسر20
وميس رجـه والمزن الهلالي وعاشقه القناص
طبعا انا اتكلم عن داخل الانترنت
الا طبعا امي خارج الانترنت خخخخخخخخخخخخخخخ
نلاحظ احيانا ان علاقات البنات مع بعضهم دائما تكون اقوى من العيال ليه ؟
لان والله هالبنات فاضيات 24 ساعه
اما تلقاها في الماسنجر خرطي وانواع الحش
وكانها مهيب راعيه نت تلقاها ماسكه السماعه وانواع الخرطي بالتلفون
بس الولد طبعا اللي مثلي يكون مشغول اما نايم او يناظر التلفزون
< امحق شغل انت وخشتك
(شكلنا بنجيب العيد في هالنقطه ونثير الجدل )
موقف طريف او موقف ودك ان الارض انشقت وبلعتك . وحاول انك تكون صادق لاني اعرف كل صغيره وكبيره عنك ؟
هههههههههههه مدري فيه موقف مدري تذكره انت او لا
مره من المرات كنت بالجامعه المهم كان الدكتور بيشرح
على البوروجتكر < ياهو صعب اسمها
الزبده قال قم اشبكه وكان الفيش تحت السبوره
وقدام طاولة الدكتور جيت اشبكه ونفضني الكهرب
عاد انا بحركه لاشعوريه حركت يدي بسرعه البرق
الا واصبخ الدكتور على راسه ويطير شماغه
وقسم عقبها حقد علي وحملني الماده
بس العيال طول المحاظره ميتين ضحك
وانا مسوي اني مستقصدها واني قوي
:: في النهايه قل شئ للحلوين ..::
*
اول شئ اشكـرك حالي الذوق ع الاستضافه
واللي خلنتي فيها التقى بااعضاء القناص ..
ويمكن هذا ثالث لقاء يصير لي في الموقع
واتوقع الاخير
منتدى القناص يعتبر من اهم المنتديات اللي ادخلها في عالم الانترنت
وفعلا علاقتي مع مراقبيه ومشرفيه واعضائه من اقوى العلاقات
منتدى ياسر القحطاني يااعضاء هو امانه بين يديكم
وهو يسير نحو التوهج اللا متوقع اذا نظرنا الى تاريخ افتتاحه
فااتمنى المحافظه عليه وان تضعوا فيه اجمل ماتخط يديكم
فاابداعكم يتواصل ابداع ياسر في المستطيل الاخضر ..
*
*
اخيرا نشكر فيصل على هالمقابله الرائعه والاجوبه الشفويه مبتعد عن الرسميه او الدبلوماسيه
*
والمجال مفتوح لكم يا أعضاء ياحلوين . ولكم اللحم وعطوني العضم
بحيث لا تتجاوز عدد الأسئله لـ 3 وغير مكرره ولكم مني جزيل الشكر والاحترامCC