الحمد لله على كل حال ..
وقدر الله وماشاء فعل ..
لا أجيد المقدمات ..|
زينة الرجل التواضع ..وآفة الرجل الغرور=كم رجالٍ عالية قدر وهبطها كِبرها
والجهل ظلمه لعقل اللي جهل .. والعلم نور=وأكبر الاشيا بعين أهل العقل يا صغرها
ولا يطول المجد بيده كود رجالٍ صبور=والهقاوي فيه لو جار الزمن يا كبرها
والرجوله كلمةٍ ماهي فقط تعني ذكور !=كلمةٍ تحمل معاني ما جهلنا قدرها
والوله وسط المحاجر .. والمحبه فالصدور=كل منهم يدفع الثاني ويشد بأزرها
والغرام أحلى شعورٍ .. والفراق أصعب شعور=والوفا بين الحبايب هو متانة جسرها
والظروف ان كانها قالت لهم : لا للعبور=ماتثبط عزمهم .. لو طوّلت في عسرها
ياشبيه الريح .. لا تجزع ولا منك قصور=ماجريت الا على مشها السفن وش عذرها .!
من تخاذل لا يهمك .. من يعاديك إمعثور=والشخوص اللي تدنّت ؟ بُصرها في عمرها
منك نتعلم دروس الصبر بأجل الأمور=والصعايب لا قوّت وشلون نقوا كسرها
وكيف يقدر كل منا يكتب الفرح بسطور=من قلم همّته .. والإصرار سايل حبرها
وكيف وسط الزحمه يسجل له الواحد حظور=يضرب الخطوه بدربه ما تشّكا وعرها
وكيف نلغي من قواميس الهوى .. (حب الظهور) =نجعل الأسماء رنّانه ويطرب ذكرها
وكيف في صعب المسايل نتخذ بالفكر شور=وعشر راعين الصلابه ما تنقص عشرها
رايتك بيضا .. ومثلك مايحيد ولا يبور=لا تطيح الرايه الزرقا ... تدبّر أمرها
لا تضيق .. ودام شبرك طال عن كل الشبور=ماتضيق الا على ناسٍ قصيرٍ شبرها
كلنا نشكي من الإحباط فينا والكسور=وأنت وحدك بعد ربي قادرٍ في جبرها
مانبي الا شوفتك يا الحر يا الشهم الجسور=والعزيمه عند مثلك طول الله عمرها
سعيد بن مانع