السلام عليكم ورحمة الله وبركاته
هذا الموضوع عندي من زمان بس مالقيت الوقت المناسب .....
آه ياحبي للكشتات .. وياحبي للثمامه ..
أكتب لكم موضوعي وانا توني راجعه من الثمامه وناااسه ياناس وناااسه
يوم شفت الشباب مبسوطين وفالينها تمنيت إني ولد وإلا مابي أعترض
على خلقة ربي بس أبي أسوق .. تخيلوا . تخيلوا عاد يخلونا نسوق ..
تدرون وش أول شي أسويه ؟؟؟
بشتري جيب ربع وأحط جنوط ===> مادري وشهي بس أسمع اخوي دايم يقولها
إلا على فكره وشهي الجنوط ؟ هي هي نوع من أنواع المسجلات و إلا
دي جي بس غير شكل ..
آه .. ياليته صدق كان الويكيند يطلع له طعم آخر .. طبعا يوم الإربعاء
نقتصره على الأسواق والمطاعم عاد أسواق الرياض مايحتاج سعة صدر
وهيصه يالله من فضلك وإذا طلعنا من السوق نسير على التحليه والممشى
عاد لازم نهضم وإلا إذا صار فيه مباراه للهلال .. باتغدى في الملعب
عشان أشوف ياسر من قريب .. وسامي ونواف .. وذاك المملوح .. ذكروني
بإسمه .. إيه بس عرفته ياسر الياس ..
وبشوف رئيس الهلال فديت خشته أبو سلطان الله يخليه ..
بس بسألكم سؤال ؟؟ عادي أدخل الملعب بترمس قهوه ..
إيه أتوقع عادي .. وش فيها أصلا أنا ما أروق إلا إذا شربت قهوه ..
بس المشكله قهوه بدون حلى ماينفع .. إيه بس لقيتها ..
الحلى على منيره هي سنعه وحلاها يهبل ..
والقهوه على أروى .. قهوتها زينه كلها هيل وزعفران ..
والشاهي على أم شنب <<< هذي خويتنا عربجيه الله لا يبلانا
ماتعرف تسوي ألا شاهي ..
والمعجنات على سوير .. والله لو تذوقون فطاير الدجاج اللي تسويها
تكلون أصابعكم بالغلط ..
وأم عزوز عليها بيتزا آآآآآآآآآآه … بس لا تجيب بزرانها تخليهم عند رجلها
والفصفص والمكسرات نشتريها من باجه على طريقنا .. وأنا علي الزوليه
يالله لك الحمد انحلت.. توازعنا الشغل وأنهينا الموضوع ..
ألا على فكره يسمحون لنا نبسط تحت بالثيل قبل المباراه ؟؟!
إيه عادي مايخالف .. أصلا نبي نشيل اللي عقبنا ..
يالله عاد وبالمره نجيب بضاعة عمتي حصه ..
والله ياعندها جلاليب تهبل .. وسراويل العجز ماعنها صده ..
وبسوي تخفيضات 50% للهلالين <<< وش رايكم ..
عاد كني أتخيلهم أذا بدت المباراة والله ياعليهم عقول .. ناس ماتفهم
بالكوره ليه تحضر مباراة ؟؟!
مثلا سوير .. تدربي دمجتها ماتدري وين ربي حاطها به .. أجل هذاك
اليوم تنشدني .. الكورنر .. هو ضربة الزاويه ؟؟
رفعت يدي فوق وقلت يالله لك الحمد إني أتابع القناة الرياضيه
وإلا كان دجيت مثلها .. وإلا من متى صار الكورنر هو ضربة زاويه
وإلا عاد أم شنب .. الله يرحم حالها ياعيني عينها .. كانت تطالع مباراه
ومعصبه تقول وش ذا المدرب اللي مايفهم أجل يلعب إبن جدته وحاط التيماوي
إحتياط ؟؟ <<< ( جدته = جلدته )
قلت لها الله يخلف على هالخشه .. هالحين أنت ماتقرين جرايد .. التيماوي
مصاب .. والاكان هالمدرب مالعب ابن جدته ..
وأم عزوز الله بصلح ذريتها .. من تبدا المباراة لين تخلص وهي لاهيه
بورعانها ..
اجل قد مره سألتني من الدلاخه تقول كم النتيجه قلت لها (صفر . صفر )
قالت ماشاءلله لنا وإلا لهم ؟؟!
وإلا عاد أروى ومنيره يعني هم أرحم من غيرهم يفهمون ..
من تبدا المباراه لين تخلص وهم بس يسولفون عن الجامعه وإلإختبارات
من زود الشطاره الله يرحم الحال ..
منيره.. مسيكينه .. ياحرام ماعمرها شافت لاعب بحياتها إلا الخثران
وأزعجتنا كل ماحطو الكاميرا عليه قالت .. قسم بالله والله العظيم
ما أكذب هذا اللي شفته ..
وأروى .. الفاهمه ماغير ماسكه التيلفون وتدق على نادي الهلال وتسأل عن
النتيجه.. وهي فاتحه التلفزيون .. (تتميلح ) ويرد عليها المصري أبو نفس شينه
ويهزأها ..
أما أنا .. مايحتاج ثقافه رياضيه مليون بالميه .. والدليل إني عضوه معاكم ..
وأقرا جريدة الرياض يوميا .. وأعرف (زين الدين زيدان) يلعب وين …
وهذي كلها أحداث يوم ألإربعاء ..
يالله عاد يالربع طولنا عليكم وإنشاءلله بكتب لكم بعد أسبوع ..
أحداث يوم الخميس .. في طعس التحدي ….
أحتروووووووووووووني
عاد لاتفشلوني تعبت وأناأكتب ردوا علي …
15-02-2006, 07:38 AM
طعس التحدي ....
العرض الشجري
