بسم الله الرحمن الرحيم السلام عليكم ورحمة الله وبركاته .. صباحكم ~ مسائكم / خير ، كما أنتم اليوم بيكون موضوعي بطريقه مُختلفه عن ما عهدتمُوني فيه .. يعني موضوعي اليوم صور وسوالف .. طبعاً هي في فجر من الفجرات الجميله طلعت مع خوالي برحلة لحايل ولمناطق حولها ومناطق بالطريق .. ومن بداية الرحله وانا ما غير بهالصور وصوّرت ( 200 ) صوره .. ويوم نظفتهم صاروا ( 120 ) تقريباً .. أخذت أزين ( 30 ) صوره عشان اطرحها هونْ ، مع سوالف الصور .. ~ في البدايه مرّينا دولة عيون الجواء عشان الفطور خبركم سعوديّين لازم فول ما يعترفون بشيء اسمه أجبانْ ورحنا بعدها نمشي ندوّر صخرة عنتره .. وفجأه لقيناها وضيعناها ، ورجعنا فطرنا وبعدها لقيناها طبعاً عنتره هو عنتره بن شدّاد بحد زاتو هناك بالصخره كان مربط الفرس حقّه ويقابل عبله هونيك وعنتره وعبله هم يعتبرون أحد رموز العشق بالعالم العربي ، مثل روميو وجولييت .. وعلى طاري عنتره ترى يقولون إن إسمه عنتره مع إني مصر إنه عنتر بدون هاء .. ما أطول حكي تفضلوا صور الصخره : - يا دار عبلة بالجواء تكلّمي .................. وعمي صباحاً دار عبلة وأسلمي ( عنترة بن شدّاد ) لو تلاحظون بالصوره هذي وتركزون بتلقون مكتوب : ذكريات عبد الله بن عبد العزيز الربيعان 19 / 5 / 1390 هـ وبعد بالصخره كان فيه رسمات قلوب بوسطها حروف يكتبون العشاق أول حرف من أساميهم هنا ، يُقال إنه عشان يدوم العشق تقليداً لمكان بألمانيا ترمي درهم ليدوم عشقك .. ~ وبعد ما طلعنا من عند هالمكان إنطلقنا مباشرةً لحايل .. وأول مكان رحنا له بعد الوصول السد حق الأمطار أو كما يُسمى .. ( بحيرة الخماشيه ) ، وهذي الصور : بجانب البحيره هذي كان فيه مجموعة هنود .. ويجمعون اشياء من مكان زي ما تقول مُستنقع أو زي كذا خالي كان مُصّر يعرف وش يجمعون ؟! وبالنهاية طلعوا يجمعون ضفادع وياكلونها بعد .. ~ وبعد ما رحنا من البُحيره توجهنا لمكان روعه جداً وأكثر من خيالي بحايل ، يعني الطبيعه فيه ما شاء الله .. جبال وجو روعه وهذي بعض الصور هناك : هالصوره بغيت اروح في خبر كان عشان اصوّرها .. لأني كنت واقف بمكان يزلّق وحولي مويه ، وأختل توازني وتمسكت بحجر كان ع اليسار ، لو ما كان فيه كان ما وقفت الا بنهاية الجبل والصوره هذي صورتها بالوقت الإضافي يعني وانا اصور هالصوره كان يقول خالي مشينا يكفي تصوير ~ بعدها توّجهنا لمكان روعه الطبيعه فيه .. كان فيه نافوره خياليّه ومسطحات خضراء ، وهو بالأصل كان طريق صعود جبل يطل على حايل وهذي صور المكان : هذي النافوره والمسطحات الخضراء وراها وفيه يمين ويسار بعد .. وهذي صوره لطريق الصعود للجبل طبعاً الطريق مهيأ لصعود السيارات من خلاله .. هذا الجبل من فوق تقدرون تشوفون كيف منظر حايل .. وبعد لو تركزون تحت تلقون النافوره والمسطحات الخضراء ، ولا تدققّون بالكتابات اللي تحت ، سعوديّين لازم يكتبُون .. وهذي نفس الصوره اللي فوق .. بس هذي من الجهه الثانيه هذا شي محطوط بالجبل ممكن أنه علامه أو شي زي كذا حاطينها فوق الجبل .. ~ بعد ما طلعنا من الجبل توّجهنا لكم مكان وبهالأثناء لمحت برج أو عماره ، سمّوها اللي بتسمونها المهم إنه شدتني عيون هالبُرج وصورته ويقال إن هالبرج من معالم حائل القديمه .. عاد ما تأكدت من هالمعلومه ، ممكن يفيدونا أهل حائل .. ~ بعد كذا توّجهنا لقصر برزان ، قصر مبني قُرابة عام 1808 هـ هو لإبن رشيد وكان مقر حكم آل رشيد .. على أيام الملك عبد العزيز قبل توحيد السعوديّه وهنا كان آخر شي بمنطقة حائل نفسها نزوره بس صورت بمكان حول حائل .. مطعم شعبي أعجبني شكل الباب تبعه ، مدري ليه .. وصوّرته : بعد ما طلعنا من حائل بالطريق شفت مكان مكتوب لوحه بالجنب مكتوب فوّهات بركانيّه .. وعاد صوّرته بس كان البركان بعيد ما وضح زين : البركان هذا اللي على اليسار .. ~ وهنا أهم أركان الموضوع بالنسبه للبعض .. وأنا أعتبره أفضل شي زرناه وإستفدت منه ، اللي هو ( إنشقاق الأرض ) هو كان آخر شي زرناه بوضح النهار يُقال إنه هالخسف بالأرض بلعت الأرض بيوت أول ما حدث الإنشقاق ، طبعاً هو بسبب عوامل بالقشرة الأرضيه .. وكان هالإنشقاق بقريه إسمها " طابه " .. طبعاً كان فيه مواقف طريفه .. بذكرها بعد إستعراض الصور : بتلاحظون هنا إن الأرض مندفنه مع مرور الزمن بس لو يدخل فيها واحد مُمكن إنه خلاص يدخل في الأرض ما عاد يرجع .. وكل شي بإرادة رب العالمين أولاً وأخيراً بذكر لكم موقف طريف حصل بوقت دخول سيارة خالي للمنطقه هذي ، خالتي الخبله كانت نايمه بالسياره وفجأه تصحى تلاقي قدامها أرض منشقّه .. كانت تدعي الله : يارب أنا بحلم يارب وتقول يارب إغفر لي ذنوب وتستغفر .. وكان صوتها خوف ممزوج بشويّة دموع هي كان على بالها إنه كان يوم القيامه يوم شافت خفس في الأرض .. ~ طبعاً بعد كذا غربت الشمس ، ومسكنا طريق العوده بس وقفنا للصلاة والقهوه وما مسكنا الطريق إلا بعد صلاة العشاء ~ وبكذا وصلنا وإنتهت الرحلة اللي كانت من الفجر لين بعد صلاة العشاء ، أتمنى تكون التغطيه حازت على رضاكم