أهلاً نـووي..
شوفي يابعـدي:

فيـه فرق وفرق شاسع جداً بين الحريـه وبين قلـه الأدب والديـن وهذا
اللي ينادون فيـه غيرنا وخلينا نسميها [ الأنفساخ الأخلاقي ]..
طبيعي أي ناجح محارب ويمكن نجاح المجتمع السعودي من الأف
السنين هو عفـه وسمـو نسـائه عن مثل هالتحرر اللأخلاقي,,
لذلك من الطبيعي جداً أن تقـوم الحرب على نقطـه قوته وتماسكه من قبل
فاقدي هذا المبدأ الديني والأخلاقي لكن الشرهه على قولتنا تقـع على
هالفتيات اللي تسمع [ بحريـه ] فقط دون أن تدرك المعنى,,

حـريتـي مثلاً:
ـ أعطي رأيي بقوه وجرأه دون خوف من منطق أو
مجتمع أو رأي آخـر..
ـ المشاركه في بناء مجتمعي بأفكاري وأقتراحاتي
وطرحي ونقدي..
ـ حريه تخصصي وشهادتي ومجال دراستي وشغلي
وهواياتي وممارستها بالشكل اللي أرتاح فيـه..
ـ حريـه إختياري لشريك حياتي هالنقطـه اللي يمكن يفتقدها
أغلب وأجل المجتمعات اللي بعض الفتيات يطالبونا بمثل
مالديهم من حريـه,,

ماأنكر أني أنا أنسـانه جداً مطالبه بحقوقي لكن مستحيل مثل ماقلتي
يكون حقي أني أجلس في مطعم قدام الشباب كاشفـه وأكل..
يعني ولو ماكانت حركـه غيردينيـه بتكون قلـه حياء لأن حلاه البنت
في حياها وذوقهـا..
اذا أنتي تطالبين بالحريه كيف تبغين تعيشين وتأكلين قدام اللي
يسوى واللي مايسوى بالمطعم أو بغيره,,
ماأنكر أني بعض الأحيان [ أضطـر ] أني أجلس مثلاً بكفيهات أو مطاعم
بالمجمعات مشتركه لكن عمرها ماكانت مصدر حريـه لي أو مبعث فخر
أو حسيت أني [ برستيج حريـه ]..
معليـه هالنوعيـه من البنات لايدركون وش معنى الحريـه أصلاً ولايمكن
يفقهون أغلب حقوق المرآه في مجتمعنـا ,,

أبسط مثـال../
أنا أطالب بقياده المرآه للسياره كحق من حقوقها طالما أنها متحجبـه
متستره ومحافظه على أخلاقها ودينها لأنها تحتاج هالشيء في مشاويرها
وشغلها ودراستها حالها حال الشاب,,
ويمكن يكون آآمن لها من ركوبها من سواقيـن أجانب من مختلف الجنسيات
المسلمه والغير مسلمه والمنحطه والغير منحطـه,,
لكن ماأطالب أني مثلاً أخلط الجامعات بنـات / عيال أو أكشف المطاعم عوائل /
وشباب أو أخلع الحجاب وهنا يكمن موضع ( الحريـه )..

حريتي مقيـده بشيئين لاثالث لهمـا أن تكون حريتي في حدود:
دينـي / أخلاقــي
ومتى ماتوفر هالشرطين مهما وقف المجتمع في وجهي أو حاول تغيير مبدأ
نظرتي لن أوافقـه الرأي لأن إيماني بمعتقداتي في حريتي مقيد بأهم شيئين
عندي وعند كل مسلم غيور وطالما توفر الدين والأخلاق لاأظن في الامر خطوره
أو قلـه أدب وأنفساخ ,,

أممممممممم يمكن وماهم يمكن إلا من واقع تجربه أعيشها كثير ممّن حولي
يرفضون مبدأ حريتي بأسم [ عادات وتقاليـد ] لاأصل لها لافي الدين ولافي
الخلق وأني متمرده على المجتمع..
مع أني بالعكس أفخر ببعض العادات والتقاليد اللي ما [ تحرمني ] من
حقوقي واللي [ ترفـع ] رأسي برضـو لكن للأسف البعض ربط جـّم الأشياء
بأسم [ العادات والتقاليـد ]..
وأبسط مثال بقولـه لك :
كنت أتحدث مع واحد من قرايبي في مسأله حريـه خروجي لصديقاتي ومناسباتهم
فهو منزعج جداً من حريتي بهالشكل وظل طول جلوسي يردد [ البنت مالها الا
بيتها ]..
ماحبيت أدخل معاه في نقاش لأني ماحب الضرب في الجلد الميت لكن قلت لعل
وعسى أخرج بشيء سألتـه وش الحرام أني أجيب مثلاً دعوه زميلـه لي..؟!
طالما أني ماتجاوزت حدود الدين ولاالأخلاق ولاطلعت أزورها في الفجر وتالي
الليل وملتزمـه بديني وذوقي وأخلاقي وبرضى والديني وش المشكلـه.؟؟!
قالي عادات وتقاليـد قلت له : ماتهمني اللي حطها يمشي عليها طالما أنها
ميب عاجبتني ولاتناسب مبدأي في الحياه قالي منزعج جداً:
خلاص أطلعي بالشارع بدون لاعبايه ولاغطـاء,,
قلت له لامستحيل جداً الموت علي أهون.. رد وهو يضحك وش معنى ماتبين
تطلعين بدون عبايه وأنتي تقولين ماتهمني العادات والتقاليد,,
قلت العبايه والحجاب [ أمر دينـي ] ومسأله ( دينيـه ) مهيب مسأله عاده
أو تقليد قال لا بس الشعب السعودي متعود عليها سواء دين وإلا مهيب دين
قلت له بالحرف الواحد ( لو ماهي ديـن وأمر من ربي كان ماألتزمت فيه
سواء رضى الشعب وإلا مارضى )..
سكت وقال الله يعينك على نفسك قلت وياك..
المشكله هنا أن مثل هالأنسان المفترض يكون أنسان أوعى وأعقل ويفرق
بين الواجب والجائز والمسموح به والمكروه ,,
لأنه ببساطه أنسان جامعي ومتوظف بأداره حكوميه ويقرأويطلع ويسافر
لكن ظل في باله أن العاده أقوى من الدين وهذا اللي نهانا عنه المصطفى
صلى الله عليـه وسلـم..
وهذا هو ديدن أغلب الشعب لدينا في مفهوم الحريـه يابت..

البعض يفهمها على أنها من يكسـر حدود الإدب / الأخلاق / الديـن
وهذا فهم خاطىء ومرفوض عقلياً قبل أجتماعياً..
والبعض يفهمها على أنها لزوم الكبت والتمسك بكل العادات والتقاليد
مهما كانت خاطئه أو متماشيه مع الدين أو لا ..
وللأسف أغلبيـه هالشكل الله يهديهم حولوا [ العباده الى عـاده ]..

:


نـووي:
السموحـه يابت..
يمكـن مو يمكـن إلا أكيد طولت عليك في هذري وكلامي لكن
موضوع حساس جداً وتعجبني مثل هالمواضيع الي تطرح واقع
مفهوم بشكل خاطىء من طرف يبحث عن الأنفتاح وطرف يغلق باب
الحقوق المشروعـه ..
شكراً وياليت ماتكون حريتي هنا أيضاَ متمردهـ..