السلام عليكم ورحمه الله وبركاتهـ ..
يسعد صباحكم \ مساكم , ياحلوين ..
كيف الحال ؟ انشاء الله بخير وتزقحون مع ذا العطله
على طاري العطله موب كنها طالت احس مليت ؟


شسمه ماعلينا..
حبيت اكلمكم عن موضوعين .. ماهي نقاشيهـ ولاهي فلسفيهـ
ومابينهم ترابط ابدن ابدن بس مسكت معي وقلت ادمجها في متصفح واحد ابرك
وش له الخساير ؟ < - على شحم بس

(( 1 ))

,’

من مقال المرحوم طلال الرشيد (الملتاع).. , المنشوره في زاويه فاصله بيضاء
الخاصه بكتاباتــهـ القديمهـ !!
.
.

يقول : (( لايأتي رمضان.. الا واعاهد نفسي على ان اكون في هذا الرمضان كما احب ان اكون وان اعمل كأنني اموت غدا.
وان اتعبد عباده مودَع وان انسى الدنيا وملذاتها وأن وأن..
وينقضي رمضان فأسأل نفسي السؤال الازلي المحمَل بالندم .. هل نزلت قطره واحده في صدري من ماء الله العذب الذي عاهدت نفسي
ان اجعل منه نهراً يجري في صدري,لأسقي به عطش روحي.
هل انجلت ظلمه من ظلمات كنت سأضيئها في رمضان بنور الله؟
كلما تذكرت ان الله عز وجل بلغ من الرحمه والكرم انه يثيب على النوايا الحسنه كمن فعلها , ولا يحاسب على سيئها
حتى تفعلها , كلما تذكرا ذلك ضننت ان الله يقصدني ويعلم ضعفي وقله حيلتي بين يديه. ))
.
.

الله يرحمك رحمه واسعهـ ويغمد روحك الجنه ويجمعك بمحابك يارب ,..
قبل فتره فتحت فواصل ولقيت المقاله وقلت في نفسي كلنا ياطلال نعاهد انفسنا كل رمضان
اننا نتغير.. اننا نفتح صفحه جديده , ونراجع انفسنا ونراجع اخطائنا ونعدلها ..

وهاذا شهر رمضان جا ..(( الله يبلغنياه وكل مسلم)) ,..
ونفس الاسطوانــهـ تتكرر ياطلال , نعاهد انفسنا وكل مره يتجدد العزم ويقوى..
وبعدين مايصير شي !!
وهـ بس ..

من جد كم رمضان راح ؟
كم ضيعنا من اوقات في رمضان ؟
وش رتبنا له ؟.. ووش عاهدنا انفسنا فيهـ ؟
وش قررنا نسوي في رمضان .. ( 9 \ 1429 )؟

وش بنترك ووش بنستغني عنــهـ في هالشهر ؟
انت وانتي .. وعدتو انفسكم رمضان اللي راح ولا طبقتو شي ..
ندمتو على اوقاتكم اللي ضاعت في فراغ ولعب رمضان اللي راح ؟..
طيب خلونا نغير ونعوض هالسنهـ ..
نترك هالمسلسلات ونخليها ( لله) , ومن ترك شيئا لله عوضه الله خيرا منهـ !
بنختم القرآن هالمرهـ.. ! , بنصلي التراويــح ! , بنستغل الاوقات في اللي يرضي الله !
وخاصه هالسنه.. معد فيه عذر المدارس والقلق .. خلونا نستغلـه
لانخربه ونخليهـ سهر ونت ونوم
وان شاء الله نرتاح وننبسط ونعيش رمضان صح.. بلذته وريحــته < -- قهوه موب رمضان
وهـ بس ..الله يبلغنيه وكل مسلم , والله يعايدنا عيد مسره قولو آمين ..


::


(( 2 ))

,’

عندي ياطويلين العمر , اختي الصغيره اذا صار معها منديل ولا قوطي فاضي
تحكها يدها ودها (تسلفطها) مع الدغيشهـ " دريشه", بس ماتقدر وانا معها ..
كان اسلفطها ورا اللي سلفطته <- تسلفطي بس
ياخي خييير .. من جد خير حاله نفسيه ولا وش السالفه , ولا هياط ولا حقد على البلديه ولا عناد في الانظمهـ
ولا هوايه.. وشو بالظبط ؟

طيب تحسون هالشي من سمات المجتمع السعودي \ الخليجي , ولاكل ساقط وله لاقط <- تسمع بالامثلهـ

شسمه ..جت الفكره يوم قريت موضوع عن وحدهـ مسافرهـ برا ومعهم وحدهـ كبيره في السن
المهم ذا " العجيز" يالبا قلبها نطلت علبه في الارض ومسكت خط..
وشوي الا قدامها ثنتين يصارخون ولاعنين جدف اهلها وهي ماتدري وش السالفه .. ووش عندهم ذولا
فاللي كانت معها استحت وخذت اللي نطلته العجيز واعتذرت وحاكتهم وهم مازالو معصبين ..
يوم راحو استفسرت العجوز منها..
فصار الموضوع انهم قالو اذا كنتي متعوده على هالشي او ديرتك مافيها انظمه
احترمي انظمه الغير.. واهتمي بنظافه المكان اللي انتي فيه مثل ماإنا نهتم فيه..
فالعجيز كل اللي قالته بعد هالحفله اللي صارت : " بس !..هذا الموضوع .. والله انهم فاضين " !!


وش رايكم ؟.. من اللي فاضي ومن الغلطان ؟
ومعقوله هذي سمعتنا عند اللي برا .. اننا مانحترم الانظمه ؟
طيب جد جد وش الحل.. لا انظمه نفعت ولا غرامات ؟
طبعا انا اتكلم عن البعض وما اعمم !! ..
وينا عن اماطه الاذى عن الطريق؟
طيب جد ماتنقهرون لين رحتو مكان ولقيتوه وصخ واكياس وقراطيس وقواطي ببس !< - عقدتها
يقولون في حدا عواصم وحدتن من الديار , غراماتهم قويه بقوه اقوى شي
على اللي يذب علوتس \ ودخان !

وانا ماشاء الله علينا نمشي على علوك ودخاخين ! <-- بلا والله من ذا الهنود والبنغاليه
شسمه طيب والحل ؟ <-- انك ماتكتبين موضوع مره ثانيه

,’

وعموما وآخيرا \..
كتبت هذا الشي لمجرد الكتابه ولأنها ماسكه معي
فعذرا على عدم الترتيب وعدم الشسمهـ

لكم المتصفح .. العبو في مريرهـ
فمان الله
.
.

وش هالموضوع التووحفه ..
فديتك بس ..
قطآتك حلوووووووووووووووووهـ

رمضآن ..
وبكل رمضآن مثل مآقلتي تنعآد نفس الإسطوآنه ..
لكن الحمدلله إني من رمضان ماصرت أشوف الملسلات اللي تنعرض
ماشفت غير مسلسلين وبرنآمج هشام
والله بالنسبه للأعوآم اللي فآتت يعتبر إنجآز لأني كنت متآبعه وبقوووه
ورمضان السنه إن شالله بإذن الله بيكون احسن ..
شوية جهد وصبر وأنه الوآحد يحط في بآله إنه هذا الشهر شهر عبآده ..
هو شهر وآحد بس تروح أيآمه بسرررعه .. ليش ماأستغله بشي ينفعني
ونفعه يعود علي بدنياي قبل آخرتي ..

شهر وآحد من 11 شهر خلونا نستغله بالطآعآت ..
والأهم ختم القرآن اللي أعوذ بالله في هالعطله لهينا عنه بشكل كبير ..
والأهم أكيد الصلاه قبل كل شي ..

يعني الأحسن يحط الوآحد جدووول له .. والله بلقى الراحه النفسيه
بس شهر يجرب الوآحد فينا ويشووف ..

ثآني شي ..
سالفة القوآطي ..
ومعك حق تشووويه للأمآكن بشكل فضيع ..
هي تبقى مسؤلية رب الأسره .. والحل والخرآب بيده
يعني على حسب التربيه ..
هذي كل السآلفه ..
إذا كانوا الأهل مثقفين ووآعين هآنت ..

صعنطوطه ..
تسلم الأفكآر ويسلم الأسلوب الحلو والله يجعله في ميزان حسناتك

في كل مرهـ أعاهد نفسي اني ماأشوف مسلسلات ..!
بس للأسف ماأقدر .. بس خفيت عن أول ..
أذكر أول مافيه ولا مسلسل أخليه ..!
ألحين أتابع طاش ماطاش ومسابقات .. بس
الله لايعاقبنا ..,
وان شاء الله هالمرهـ أحاول أستغل الوقت بشي أنفع ..,
بجد موضوع رووعه ماودي اسكت ..,’


/


نجي لموضوعتس الثاني ..,
النظافه ..!!
معدومه بشوارعنا ..!
ليه وش السبب ماندري ..!
أشوف جيرانا بدال مايحطون كيس الزباله فيها .. يحطونها جنبها ..!!
وش السبب مدري .. والا يمكن توجعهم قلوبهم لاحطو شي بالزباله ..!
أذكر سالفه ثانيه ..,
مره كنا باطريق للجامعه ... وعطيت الخدامه كرتون حليب شوكلاته
اقولها لارجعتي البيت ذبيه .. مادريت الا تفتح الدريشه وتنطله ..!
يعني مثلاً ماعندي يد أنطله أنا ..!
واقعد اهاوشها الين قالت : توبه ..!
أخبر أنهم حطو غرامه على اللي يوصخون الشوارع بس ماشفنا فايدهـ ,,




صعنطوطه ,,
بجد موضوعين مهمه
نحتاج النقاش فيها ..
عافاك ربي ..

//


على طاري العطله موب كنها طالت احس مليت ؟

أحلفي

مو كنك معطله من زمان ,, ولا أقول أستر عليك أحسن !!




رمضان ..

أببدأ بدعاء من صميم قلبي ,,

أن الله يبلغنا رمضان ويجعلنا ممن فاز بالأجر والغفران



عـــدنا < متأثره بالمسلسلات وهي مابدت

شوفي وأنا أختك مسأله نبي نغير نفسنا في رمضان

بنظل نقولها طول ماأحنا حيين

لأنها نابعه من الإيمان اللي داخلنا والأحساس بالتقصير

لكن وش فايده نقول بنتغير وحنا في النهار نوم والليل مسلسلات

لابد أننا نغير كل شي يأثر على العباده

يعني لازم في معادله ( نزيد حسنات وفي نفس الوقت نقلل من السيئات )

مو نصلي ونقراء قران ومن بعد الفطور لين أخر الليل مسلسلات – فوازير – موسيقى ,,!!



..



عندي ياطويلين العمر , اختي الصغيره اذا صار معها منديل ولا قوطي فاضي
تحكهايدها ودها (تسلفطها) مع الدغيشهـ " دريشه" , بس ماتقدروانا معها ..
كان اسلفطها ورا اللي سلفطته <- تسلفطي بس

نفس اللي عندي << تقصد اخوها البثر

ورا ما تسلفطينهم مره وحده

والمشكله بعد .. لاوصلنا للبيت في شارعنا يرمي القوطي قدام بابنا ....!!



طيب تحسون هالشي من سمات المجتمع
السعودي \ الخليجي , ولاكل ساقط وله لاقط<- تسمعبالامثلهـ

لا هو من سمات بني أدم .. !!

بس في بشر ضابطتهم الأنظمه ..

وفي أنظمه مدلعه ربعها << ماتقصد أحد



’,


صعنطوطه ..

يلعن أبليسك لاعاد تغيبين عن المجلس مرتن ثانيه

<< --- قبل رمضان يجي خخخخخ

ياأختي مواضيعك جونان وتحفه

لاعدمنا تواجدك يالغلا

يامرحبا بكل ابو اللي ردو ..
وكل ابو اللي ماردو ..
وتسلم يمنا اللي حط الدبوس عالموضوع ..
وهـ بس

,’

عــسل \..

ياتووحفـه انتي ..
نورتي الصفـحهـ ..


لاحضت ان كل ابونا نوعد انفسنا كل رمضان نكون غير ..
يلا ان شاء الله هالسنه غير بقوه

تقولين العام ماشفت الا مسلسلين وبرنامج هشام
ان شاء الله هالسنه تسوين تخفيض اكثر .. وتسحبين على كلش


::

شهر وآحد من 11 شهر خلونا نستغله بالطآعآت ..

::

عاد لاتصيرين مثل الهنود مدري منهم يتعبدون في رمضان ويوم الجمعه
والباقي يفلونها

::

هي تبقى مسؤلية رب الأسره .. والحل والخرآب بيده
يعني على حسب التربيه ..
هذي كل السآلفه ..
إذا كانوا الأهل مثقفين ووآعين هآنت ..

::

بوب كلها سالفه تربيه ولا سالفهـ ثقافه ..
احيانا يكونون الاهل مثقفين وواعين بس الاصدقاء والاشياء الثانيه تخربهم


ونورتي ياخيتي ياعسل ياقشطه يامربى
<- نواشف


,’


سحــابــــه \..

اهلن وسهلن نورتي ياخيتي ..


ان شاء الله هالسنه كل ابونا غير , نبعد عن ذا المسلسلات شوي
ودنا رمضان يكون راحه من التلفزيونات والمسلسلات

::

أشوف جيرانا بدال مايحطون كيس الزباله فيها .. يحطونها جنبها ..!!
وش السبب مدري .. والا يمكن توجعهم قلوبهم لاحطو شي بالزباله ..!

::

لا يمكن شغالتهم قصيره وماتطول تحط الكيس جوا الزبالهـ فتحطها جنبها
يختي يحطونها جنبها بس لايذبونها في مكان ثاني


::

مره كنا باطريق للجامعه ... وعطيت الخدامه كرتون حليب شوكلاته
اقولها لارجعتي البيت ذبيه .. مادريت الا تفتح الدريشه وتنطله ..!

::

ابي افهم كرتون ولا علبه صغيرهـ بس فالتها يالبا قلبها
واشوا انك علمتيها ان دهـ مش صح

::

أخبر أنهم حطو غرامه على اللي يوصخون الشوارع بس ماشفنا فايدهـ ,,

::

يحطون قرار بس مايطبقونهـ زي برا
يعني يقولونه كتخويف بس ماهنا رقابه على الافعال
والله يعين ..


,’

تسلم يمناك سحابهـ
ونورتي

,’


كليو باترا \..

نحتريك

,’
,’



ابو ملاكـ \..

شرفتني ونورت الصفحه ياخوي

::

أحس أني كل ما يقبل رمضان
أقول بترك وبترك وبسوى وبسوى وبالأخير
تحس ما تقدر تسوى هـ الشئ , رمضـان اللي طاف
عزمت أختمـ القـرآن , وللأسف وصلت أكثر من النص
بس بسبب ظروف ما لحقت ..

::

لا مافي شي اسمه ماتقدر تسوي هالشي
المسأله عزيمه وانت قدها

ومسأله ختم القرآن , بسبب اننا نلتهي بشي غيرهـ
نتناساه اما لو نعزم نترك هالاشياء الغير .. راح نختمهـ ويمكن اكثر من مرهـ
اهم شي لانقول مانقدر ..
وان حصلت الظروف نقول قدر الله وماشاء فعل

::


مرهـ في لنـدFن واحـد من الربع راح لولد عمه هنـاك
وولد عمه دكتور وما شاء الله فلتـه , وهـ الولـد يأكل [ حب ]
ويقط وراهـ لما يقول جا هالشرطي ويصارخ ويسحب من ورا ظهره
هـ الدفتر يقول مدري وش يبي لما نادى ولد عمه وقال تفاهمـ مع مخابيلك ..
وطلع هالشئ عليه مخالفه فوريه .. < لنا الE1ه بس في ديرتنـا ..

::

احس ذا الشرطي لو يجي السعوديه بينتحر من سالفه ذا الحب
بس ليتهم يطبقونها عندنا ...تخيل يمشي ويكتب مخالفات ..
في الاخير يصكون وشيقر والباجهـ والرفاعي والخ من حقين الحب
والله يعين ..

,’

تسلم يمناك ابو ملوكهـ
فمان الله

,’

.
.

فــهـد السهلي \..

هلابك ونورت ياخوي ..

::

والسبب .. ؟
أنـــ أغلب القنوات أستغلت مبدء رمضان مبدء تنافس على المسلسلات
وخلت الواحد ينشغل عن الاهم وهي قراءهـ القرانــ ... ألخ

::

اذا عرف السبب بطل العجب
وانت تقول ان سببها المسلسلات , طيب ليه تخلي هالشي يسيطر عليك حاول تسيطر على نفسك
موب هي اللي تسيطر عليك وتلهيك عن اللي انت ودك تسويه في رمضان
وان شاء الله هالرمضان تستغله .. وتكون غير عن اللي راح
وكلنا معك

::


إلا أني مره شفت الي يطبقون الانظمه هم الي يفتح الدريشه ويرمي بعبله البيبسي
اذا هم كذا اجل الباقي كيف تبينهم يطبقون

::

ثاني مره اقولها , هالفعل تصرف شخصي مالناش دعوه فيه ..
واصلا من قال انهم هم القدوهـ , لا ابدا انا نحافظ على ديرتنا موب نقلد

,’

وتسلم يمناك يافهد يالمبدع
نورت وشرفت

,’


وجـــدان \..

هلا وغلا ومرحبا نورتي ياخيتي ..

::

أحلفي

مو كنك معطله من زمان ,, ولا أقول أستر عليك أحسن !!

::

هاه ؟
لاعادي كلن داري اني معطله والعطاله طالعه مع خشمي
بس جد ماطفشتو .. انا طفشت من اخواني انهم معطلين معي
احسنا زحمه وكلنا معطلين

::


أببدأ بدعاء من صميم قلبي ,,

أن الله يبلغنا رمضان ويجعلنا ممن فاز بالأجر والغفران


::

آميـــن يآرب

::

عـــدنا < متأثره بالمسلسلات وهي مابدت
::

الله يعين الله يعين ..

::

لكن وش فايده نقول بنتغير وحنا في النهار نوم والليل مسلسلات

لابد أننا نغير كل شي يأثر على العباده

يعني لازم في معادله ( نزيد حسنات وفي نفس الوقت نقلل من السيئات )

مو نصلي ونقراء قران ومن بعد الفطور لين أخر الليل مسلسلات – فوازير – موسيقى ,,!!

::

صادقهـ وصح لسانك
كل ابونا هكا والله يرحمنا برحمته ويغفرلنا ..
لكن بالتدرج ان شاء الله وانا اختك

::


نفس اللي عندي << تقصد اخوها البثر

ورا ما تسلفطينهم مره وحده

والمشكله بعد .. لاوصلنا للبيت في شارعنا يرمي القوطي قدام بابنا ....!!


::

جيبيه اسلفطه معها لانها مطفشتني
لاعاد يرميه قدام الباب ذي موب سلفطه مع الدغيشهـ ..
ابد اسلفطهم مع السطح ,.. قوليله حافظ على نظافه حارتك ثم ديرتك

::


صعنطوطه ..

يلعن أبليسك لاعاد تغيبين عن المجلس مرتن ثانيه

::

هبشري بس لاتتعربجين علينا قوه
هالمره بغيب غيبه طويله شوي
نورتي وانستي وشرفتي وامتعتي وفرحتي قلوب المشاهدين
فمان الله

,’


متيمه الهلال \..

هلا وغلا ومرحبا ..
انا بخير جعلك دوم بخير ..
نورتي وشرفتي ..

::


بس النت انا شخصيا ً مااتركه برمضان والا غيره مدري وش هالإدمان ،

::



لاحاولي تطلقينه شوي لانه ياكل الوقت بدون ماتحسين..
العام انا واخواني تواعدنا ماندخله , والحمد لله قدرنا
مع اني اشقر عليه عالسريع واتصفح بس ولو ماقعدنا عليه كثير
حسيتنا ارتحنا شوي
وان شاء الله هالسنه تسوين اللي عاهدتي نفسك فيه وعلى قولك المسلسلات تنعاد

::

يااهـ يالزمن صرت اقول رمضان العام والله كنه رمضان تو مخلص امس
صدق سنين تمر الله يعينني وياكم ويسخرنا لعبادته يارب

::

بغيت اصيح يوم قريت هالسطر , الله يرحمك ياجدي رحمتن واسعه
من جد كنها امس على قولتك .. وهو له ثلاث سنين
<- خشت جو

::

والشي الثاني ..
ان شاء الله بيجي اليوم اللي يقولون الناس تعجبني السعوديه
نظيفه ومرتبه ونظاميه .. واللي يرمي شي علطول مخالفه

,’

وه بس نورتي ياخيتي ويعطيك العافيهـ

,’
.
.

موضوع رائع اختي


ويعطيــــــــــــــــــك العافية

موضوع رائع اختي


ويعطيــــــــــــــــــك العافية

كشوووووووور تسلمووووو على الموضوع ارووعه

:

..

رمضآن ..

رمضآن أتىآ وِ آلقلب هفآ في حب آلقآدم قد شُغِفَ ..

آللهم بلغنآ رمضآن ..

لآ توجد عزيمة قوية علىآ ترك آلمسلسلآت وِ قرأءة آلقرآن كآملآ في هذآ الشهر آلفضيل ..
لإنشغآل بعذ آلنآس بحسب حآجيآتهم .. منهم من كآن آلسوق من أولويآته وِ منهم من كآن آلتلفآز من أولويآته وِ منهم من كآن آلنت من أولويآته ... إلخ ..
وِ لكن نسآل آلله آلعلي آلقدير أن يعيننآ علىآ صيآمه وِ قيآمه أجميعين ..

:

آلنظآفه ..

تدل علىآ شخصية آلإنسآن وِ كل إنسآن يعرف نفسه وِ عندمآ يوقع آلأذىآ علىآ آلطريق فإنه يقول للنآس إنظروا إلي .. أنا إنسآن غير نضيف وِ غير محآفظ .. <---- هذآ في بلد إقامته ..
و خآرج بلده فإنه يقول أنآ و بلدي شعب غير نظيف وِ غير محآفظ ..
فلنحسٍن هذه آلصوره عن أنفسنآ وِ عن مجتمعنآ ..
وِ معروف عن آلشعب آلسعودي أنه شغب غير نظآمي في جميع آلآشيآء ..

..

صعنطوطه ..

آلشكر موصولٌ لكِ وِ لِقلمُكِ آلمميز ..
وِ لِطرحُكِ آلرآئع ..

دمتِ بود آلقلوب