السلام عليكم ورحمة الله وبركاته ..!!
هذي قصيده الفيه وبيني وبينكم مانزلتها الا بعد ماتعرضت لتهديدات وصلت حد القتل 
وخصوصا
من جرح يشكي 
واول العنقود ..!!
وهذي الالفيه اضعها بين ايديكم .. وان شاء الله تنال القليل من رضاكم واستحسانكم ..!!
(( علما بأن القصه الغزليه اللي بالقصيده .. خيآآل وليست واقع 
..!!))
قبل انسى اشكر .. الغالي ( جرح يشكي ) على ملاحظاته وتهديدي بالقتل ..!!
والغالي ( اول العنقود ) على تنسيق القصيده ..!!
اترككم مع القصيده والتي اسميتها .. جرح الألفيه العنقوديه
الالف الفٍ ابتدي به حروفي // لاجيت أولفها بطبع مآلوفي
ناسٍ تسمعّـها وناسٍ تشوفي // مربوعة القيفان والبيت موزون
.
.
والباء بعد مااخذت بالفكر سجه // متضايق وكن بداخل الصدر عجه
تزعـزع اضلوعي وقلبي ترجه // منها غديت البارحه شبه مجنون
.
.
والتاء تفاعل معها جسمي وقشعر // احيان احس بروحي واحيان مااشعر
واقع حقيقي ماهو ضحك وتغشمر // واقع واهل مكه بشعابها يَعَرفُون
.
.
والثاء ثمن كل ماسبق هالقصيده // اكتب جزل والهزل لاجاء ابيده
آطـا على راسه وانحــر وريـده // وانتم لكم الحكم ياللي تشوفون
.
.
والجيم جـنـّب يافــتى حاجتيني // قطع الصلاة يالله لاتبتليني
والثانيه احذر عقوق الوالديني // يالله عساني من اللي بأهلهم يبرون
.
.
والحاء حذاري يافتى ثم حذاري // بأفعالك خل الناس دايم تماري
وخلك لربعك مثل نجم الغداري // لاحلت الظلماء على النجم يسرون
.
.
والخاء خوي الجنب حذرك تخونه // ارخص حياتك لاجل خاطر عيونه
لادرهمت اعدائه وقف من دونه // ومايبيع صاحبه الا رديً وملعون
.
والدال درب النذل لا لا تسيره // وبأبسط امورك لاتجي تستشيره
مافاد نفسه كيف بيفيد غيره ؟ // خله ولو هو يملك اموال قارون
.
.
والذال ذمك للرجل في الظهر عيب // ان كان ذكرته اذكره بس بالطيب
هذي سلوم اللي يعرف المواجيب // اللي بمثله ربعه دوم يتباهون
.
.
والراء ركبنا مركب النصح والحين // نبا نحول للغزل وادعج العين
يازين والله الغزل في المــزايـــين // هم راحه للقلب لاصرت محزون
.
.
والزاء زهمني خلـي ولـبّـيـت // وقفت انا قباله وفي الخد لدّيــت
من نورها قامت علي تعكس الليت // مفتون انا في الريم ياناس مفتون
.
.
والسين سلّم ثم لي مد يدّه // وحطيتها ع القلب ثم قلت هدّه
اخاف اطيح قبل آخذ من الوقت مدّه // واموت وانا من سبايبك مغبون
.
.
والشين شاف ان حالتي في تردّي // قام ووضع يده على طرف خدّي
وهمس .. فديتك يابعد جد جدّي // وياجعل يافداك كل منهم على الكون
.
.
والصاد صحت صيحه تصحصح صحاها // فزوا لها اهل المملكه وكل قُراها
وسمعوها اهل بغداد واللي وراها // ياجعل يومي قبل يومك يامزيون
.
.
والضاء ضبطنا جوّنا وصار مضبوط // واصبحت مبسوطٍ وهو بعد مبسوط
مربوط في قلبي وانا فيه مربوط // لا يا بعد كل من يجون ويروحون
.
.
والطاء طرالي من الثنايا امزمز // احيان اقول واحيان بالعين اغمز
ولمحت بسمه من شفاياه ترمّز // بسمه خجل من خلفها در مكنون
.
.
والظاء ظروف الوقت جارت علينا // الفجر قرّب وتوّنا ماسرينا
يالله ياروحي يالله غدينا // من قبل ملاقيف البشر لايقومون
.
.
والعين عيونها اقبلت مثل الامطار // ودموعها صارت على الخد مدرار
محتار انا في موقفي صرت محتار // تخنقني العبرات ويضيق بي الكون
.
.
والغين غمضت بعيوني شويه // وونيت ونه زادت القلب كيه
ثم قلت لها عهد عليك وعليه // مايوم انساكم ولا انتم تناسون
.
.
والفاء فلا مثلك سكن في فؤادي // وانتِ منى قلبي وغاية مرادي
غلاك دايم يرتفع بـ ازديادي // حتى تعدا كل ابو اللي يحبون
.
.
والقاف قالت : والله اني تجننت // وعلى صدى صوتك ابشرك ادمنت
محدن سواك بداخل القلب : ايه انت // والا ترا غيرك من الناس يبطون
.
.
والكاف كـم وكـم وكـم كـم كـم // كم مرةً لاجيت اقولـها اتلعـثم
حبك دوا روحي وع الجرح بلسم // يوم اكثر العشاق من الحب يشكون
.
واللام لا لا ياحبيبي ولا لا // محال غيرك في المحبه مُـحـالا
ولو مت حبك باقي لايزالا // حيً معي يازين بالقبر مدفون
.
.
والميم ماشفت بحياتي حلاياك // يكفي عيونك والخدود وثناياك
ياسعد منهو يقضي العمر وياك // ويبقيك عن كل المخاليق مصيون
.
.
والنون نار الفرقا بصدري توقدّ // كني بري حُكم عليه بالمؤبدّ
والا كمـــا عود طريحٍ مرقّــد // يشوف موته وعياله عنّه مايدرون
.
.
والهاء هذي تحيه وسلامي // لكلّ من يقرا حروف الكلامي
اميه واثنا عشر شطر بالتمامي // محسوبة بالرقم ياللي تعدون
.
.
والواو ورد وازكى صلاة و تحايا // على نبي الله خـير البرايـا
اعداد همــال المــزون العطايا // واعداد مالحجاج بمكه يلبون
.
.
والياء ياليت حروفي تلامس رضاكم // ياللي بجسمي محتويني غلاكم
وتصير مثل القمــر في سماكــم // والكل بابيات القصيده يشيدون
.
14-07-2008, 01:02 AM
ما بـيـن الحكــمـة و الغـــــزل .. ][ ألـفـيـة ][ ..!!
رد: ما بـيـن الحكــمـة و الغـــــزل .. ][ ألـفـيـة ][ ..!!
العرض العادي
