..
السلام عليكم


قالت لي بيلسان اكتبي عن مرحلة علاجك .. فقلت ( وش اقول وش اخلي ) :(
رحت وتغديت.. يوم فتحت الجهاز
لقيت ما بوه وورد .. دخلنا المفكرة ..
تعرفون العوائق دائما .. تواجه الكبار بس نهزمها ..,< تكتب بمفكرة ومسويه انتصار
..

نرجع سنة ..,
وبعد طلوع نتيجة ثالث ثانوي النص الاول ..,
كنت احس بكسول مو طبيعي ونوم مو طبيعي ..,
كان اي شيء يتعبني ..
كنت انسى كثير .. حتى توافه الاشياء
حتى اني بكيت يوم عجزت اتذكر اسم صديقتي ..,
كان اي شيء ندرسه ما افهمه .. ما يدخل مخي ابد وانا اللي كنت افهمها وهي طايرة ..
انحدر مستواي بالدراسة .. صرت بالحضيض .. ما ادرس الا يومين بالاسبوع
واذا حضرت .. بس اهز راشي اقول فاهمة وانا من جنبه ..,
كنت احس بداخلي ان فيني شيء بس مو قادرة اترجمه ..
وكان هالشعور يقتلني ..
تخرجنا من ثالث ثانوي ..
بنسبة 89%
والله ابداً ما تمثل طموحي وقدراتي ..,
وقابلت النسبة بأقصى درجات البرود ..
ما ادري وش كنت افكر فيه .. بس ما كان لي خلق احس ولا اتكلم ..,
مرت العطلة الطويلة وانا على هالمنوال ..,
والكل لاحظ التغير فيني .. نحفي .. سكوتي .. كنت ذابلة بمعنى الكلمة ..,


في رمضان ..
كنت اذا نمت احس اني اختنق ..
اي شيء اكله ما يعجبني لان الذوق ميح..
كان فيه ثقل دايم بالمعدة < اشربي داناو

باخر رمضان ..
ظهر انتفاخ بالرقبة عند عظمة الترقوة وفوق شوي ..
اقول لاهلي شوفوا يقولون .. ايه يطيب !

بعد عيد الفطر..,
اخذني اخوي للمستوصف..
وكان عمي مدير له .. واول ما لمس رقبتي ..
قال : ليش توك تجين ؟
انا هنا .. خفت
سووا تحاليل .. قالوا .. كريات الدم البيضاء مرتفعة عندكم والحمراء منخفضة
لازم نحولك للمستشفى ..

رحنا للمستشفى
اللي هو التخرصي قصدي التخصصي اللي هو حق فهد اللي ببريدة .. ايه هذاك الخايس
دخلنا عند الدكتور ..
وكشف المنطقة .. ودخل ابرة طويلة ما ادري وش تبي برقبتي
بس ما توجع .., < يارا

قال الطبيب .. اللي فيك ورم مبتديء ..,
وعلاجه ممكن بإذن ..
اكذب اذا قلت ما خفت ..
بس لان اخوي معي ما ودي اصيح ..
يوم رحنا للبيت .. الا كلن داري
وكلن يصيح :(
وهالشيء زادني قوة ..
لان دمعتي ابوي وامي كانت غالية ..
كنت اضحك وافرفش بس علشان اسعدهم ..
..
سووا عملية واخذوا شوي من الورم
وكان تخدير موضعي ..
والدكتور يحفر بجسمي كنت احس ببرودة الدم وهي ينزل على كتفي
وطول هالوقت : وانا اصبر نفسي .. واحتسب

بدينا اول جلسات العلاج بالكيماوي ..
راحت معي امي اول جلسة وبعدين عييت عليه تروح
لاني بروحي بكون اقوى ..
كنت اكتفي بوجود اخوي
اخذ الكيماوي كل اسبوعين .. بعد ما اخذه اقعد ثلاث ايام ما ادري وين الدنيا بوه
هذا غير الاعراض والتعب اللي يسببه
مع ثاني جلسه بدأ شعري يتساقط..
حلفت ما يجدعه الكيماوي .. قمت وقصيته انا ..
وربي ارتحت..,
..
خلصنا نص الجلسات
قالوا بنسوي لك اشعة بس تعالي صايمة ..
رحت صايمة .. وسويت اشعة ..
وعطوني 6 ابر الوحده كبر خشم ابو طلال ..


وحنا بالطريق..
كنت احس ببرد قوي .. كانت اطرافي زرقاء
و احس ضيق بالتنفس كنت باليسارة ورى اخوي
وكان يسمع لي صوت ..
قال: مرام ما رديت ..
مد لي يده .. وقال امسكي يدي ..
اول ما حطيت يدي على يده ...
قعدت ابكي ..طلعت كبت 3 شهور ..,


خلصنا كيماوي ..,
مرت ايامه تعب بس وناسة كانوا الاهل كلهم .. معي بكل مكان


حتى بالنت ..
وللحين ما انسى اول محادثة مع بيلسان وانا اقولها الخبر ..
وربي ارتحت يا بيلسان .. وما راح انسى لك هالمعروف ..,
..

قعدنا شهرين ورجعت انسانة طبيعية تقريباً
اللهم شعري القصير


..
سوينا اشعة ثانية بس ما صار لي شي
قالوا فيه تكتل بين الرئتين يروح بالاشعاع وهالاشعاع بالرياض
استانست لاننا بنروح للرياض ..,
ويا حلوك يالرياض..,


مستشفى الملك فيصل .. والنعم والله
لا بعملهم ولا وبتعاملهم .. راقيين
خوينا الاشعاع مو مثل الاخ كيماوي
اسهل شوي يعني بس يسبب تعب عام والم بالمعدة ..,
بس يستحمل ..
اخذته على مدار 3 اسابيع ..

خلصنا سوينا تحليل
قال سليمة مئة بالمئة وما بتس الا العافيه < دكتوري المصري اسمه (ياسر خفاجة)


..
وبكذا خلصت اجمل سنة بحياتي ..,
بتجربة افتخر فيها .. وبناس افتخر فيها
وبدموع وضحكة تستاهل ..
يمكن كلامي ما يجي ربع اللي انا حسيته ولا مريت فيه .. بس لان الوقت ضيق
ولان هذري كثير وما ودي اشغلكم ..
شكرا .. لكل اللي وقفوا معي ..
والله ولا شيء بهالدنيا يمكن يوصف الامتنان اللي بداخلي تجاهكم ..

اولهم
اخوي .. عزوتي
امي وابوي .. ترى دموعكم غالية
عهد.. مها .. أسماء.. لطيفة
عمي زيد ..
..
منتدى القناص ..
اذا دخلته .. يزول كل تعبي وهمي
بيلسان ..
وش اقول يا بيلسان .. خلي اللي بالقلب بالقلب .. بس مشكورة
ابراهيم القحطاني .. شاكرة لك يا اخوي اللي ما جابته امي ..
..

وترى ما نبي صياح
هيصوا .. واللي عنده لي عريس تراي مستعدة

..

وقبل كل ذا احمد ربي الف مرة
لاني مريت بتجربة بمثل هالتجربة ..
علشان اعرف قيمة وشلون الانسان يعيش بصحة وسلامة,,
وعلشان اعرف طعم (الحمد لله )
وشلون الدنيا رخيصة واهم شيء اعمالنا



..

اللي يبي يسألني ترى عادي .. ما انحرج انا

..
شااات

وبدون تواقيع

^

منتب سهله اجل شات وبدون تواقيع


برب

7
اقلدتس
اصلا الناس نايمة بوه الشات العصر الله يهديك

^

ياقلبي اناااااااااااااااااااا


ماشاءالله ماشاءالله عندكـ عزيمة الله لايحرمك منهاااااا

الله لا يورّيك المكروهـ ياكريم ..


والحمدلله على سلامتك حبيبتي ..

الرمس يابعدهم
اهداء لكـ



لاباس ياعمري من الباس لاباس..

ماصاب روحك يجعله بوسط روحي..

بفداك كلي من القدم لين هالراس..

وتفداك روحي من الألم والجروحي..

ليت الألم في وسط روحي بلا قياس..

وفي كل جسمي بس منك ياروحي..

ماصاب روحك صابني منك بالاحساس..

أقوى من أمراض البشر والذبوحي

..

GivenChy

الله يسلمك.. كله فضل من ربي

..

ملك روحي

بسم الله عليتس..,
الله لا يخليني

.
.


الحمــد لله على السلامـــه ..
ماشالله عليــك .. اقسم بالله ماشفت ايمآن بقضآء الله مثل كذا
..


الرمــس .. مدري شقولك .. بس الله يحفظك ويخليك لأهلك يآرب
..


الله يذهب عنك البآس وعن جميع المسلمين
..


بصرآحــه انا ولـد عمي الحين بالتخصصي .. بس هذآك يقولون مولّي
اقسم بالله حسستيني انه ليش لا .. فيه امل
..


الرمــس .. انتي كثيره وربّي
..

..

توتة
يسلم لي راسك .. الله يديم العافية على الجميع

^


ليش وش معنى (الرمس) ؟!

مقترن عندي بـكلام اهل الامارات (الرمسة) بس مـدري صح أو لأ