|||’. , ’.‘
بسم الله الرحمن الرحيم
|||’. , ’.‘
|||’. , ’.‘
مرحـــبا ~
مع بدايه الاجازه ...!
وبعيد عن الادب واللغه العربيــه الفصحى وبكل عفويــه جيت اسولف معاكم بلهجتي المكسره !
عن احنا عن مشاعرنا وعن ايش ممكن نكون في حياااتنا ~
واذا ممكن تتغيير او نغير اشيااء فينا ~
يوم الخميس /
جدتي / ليــه ما صرتي تجي لي ؟!
المــلاك / اختبارات و... و........................... فقـــــدتيني ؟!
جدتـــي / ايــــــــه والله ~
يا لبى قلبك جدتـــي ~ ربـــي يخليك لـــي يا رب !
سرحت مع نفسي شوي ! وقلت في خاطري ايش السر !
جدتي وانا !!!
سواليفنا كانت شي غير كل شي ... شوي في الماضي ... شوي في الحاضر !
شوي تقرى على وجهي علامة استفااهم وترجم لي كلمات اهل نجــد اللي اعشقها واموووت فيها ... وافهم المضمون وارد عليها باللي افهمه !
احبها واحب حرصها وعنادي ~
احب المؤامرات مع الخدامه لما تغصبني على الاكل ~
يا فرحت امي هذاك الوقت على قولتها ما ينفع لك الا هي (بيخلوني قد الفــيله ) !
احب اذا جت تسالني شتسوين ! وانا جالسه اسوي شي شــرير !
احب اقهويها على طريقتي ما يهمني يسار والا يمين ! <---مدري متى بتصير حرمه !
واحبها اذا قالت لي اقدعي ! يا لبى قلب القدوع ومسميه ~
احبها اذا سالتني عن مسلسلات القناة الاولى ...
احب اقنعها بتخصصي كل مرة مع انها ما تقتنع والى اليوم مو عاجبها و تحب قسم الانجلش ... <-- مين قدكم ؟!
احبها اذا قلت لها تصبحين على خير ... وردت على غير الناس وقالت / وانت على مثله واخير ~
وتزيد حيرتي ... انا ايش عطيتها و اقول في خاطــري هي عطتني اكثر ~
وهي اللي تقول لي فقدتني !~
يا بعدهم يا جدتي يا عساي ما افقدك من شر !
|||’. , ’.‘
|||’. , ’.‘
في السياااره وفي الطريق كالعاده ~ اذا ما كنت نايمه !
طبعا الكل يعرف زحمة الرياض !
وعند بــابتي العزيز ~ ما في غير الملاك المتسبب الرئيسي في زحمة الرياض !
طبعا حضرتها ما تطلع بدري ~ و.... و..... >>> يهديها ربي الملاك الشريره الله يسامحها بس لو عرفت الرياض انها سبب الزحمه قضت عليها !
وطبعا علشان ما يعصب علي يعصب على الناس ! >>> مو دايما ...
والناس نايمه في الصباح والكل مكشر وما له خلق وطفشان وماله نفس المكان اللي رايح له و ابوي الله يطول بعمره معصب جنبي ~
طبعا معصب وما بيده الا الكلام ! ويا ربي الصبرمن عندك ~
وفجأه تجي لي نوبه ضحك !
ولا عاد اقدر امسك نفسي ~
واجلس اضحك اضحك اضحك ~
وبعدها ابوي يضحك معي مع انه معصب وقبل شوي مكشر !
يضحك مشاركه وجدانه يا لبى قلبه !
ويســـالني انت ليه تضحكيــــن ؟!
وطبعا ما في شي يضحكني وقتها غيره وكلامه وهو معصب !
وعبد العزيز القحطاني في الراديو !
بعدها نبدى نحلل قضية الزحمة وكيف نحلها ! وطبعا نتطرق لمواضيع غير قابله للنشر !
هذا اذا ما تضاربنا وسكـــتني !
طبعا ما في احد يرفع الضغط وينرفز في الدنيــا غيري ! بابتي تدري ولي الشرف !
ويخطر على بالي لو كل واحد ابتسم ايش راح يصير ! >>> ما اعرف ليه جا لي احسااس ان هذاك اليوم راح تمطر !
صحيح اني انسانه غالبا عندها المود الصبااحي ضارب و شي ما ينطاق !
بس لو فكرنا شوي انا وانتم ايش ممكن يتغير ؟!
|||’. , ’.‘
|||’. , ’.‘
يوم من الايام كنا بالطريق ~ ووقفنا عند الاشاره ~
كان جنب السياره على اليمين سيارة فيها بنوته كيوووت ربي يحفظها ( يابانيه او صينيه ) تطل علي من الشباك ~
رايحه للمدرسه مع اخوها وابوها ~
ما انتبهت لها ~
طالعها ابوي وجلس يضحك عليها !
قال لي شوفي على اليمين فيه وحده تطالعك !
ضحكت !
قال لي اكشفي وجهك خليها تشوفك هي مستغربه السواد اللي انت فيه ! (يقصد العباايه )
ضحكت وكشفت لها وجهي واشرت لها بيدي ( باااي ) انبسطت وصارت تقول لي باااي و تنادي اخوها يطالع معها ~ (اخوها طايره عيونه الظاهر مستغرب )
وكل اللي اذكره في هذاك اليوم اني حبيتها وصارت سالفتي اللي سولفت فيها على كل احد و سبب من اسبااب سعادتي ~
ولما نفكر فيها اشياء بسيطه ولا تخطر على البال ! غيرت علينا مودنــا !
دوروا حواليكم اكيد بنلاقي اللي يبسطنا ؟!
|||’. , ’.‘
|||’. , ’.‘
كلنا عندنا اشياء نحبها اللي يحب يرسم ... يكتب ...يقرا ... يصمم ... يخترع ... ~
وانا من الاشياء اللي احبها واحس لها جوهــا ~ الزراعـــه !
احب ازرع ... شي بسيط بس يسلي ... مع انه ما عمره عاش لي نبته ...
مرة زرعت بذور قرع في كوبي ! ويوم اسقي وعشره انسى ~
بس يا كبر فرحتي لما طلع برعم صغنون من الكوب ... وبدت تكبر قدام عيوني ...
وسميتها " lucky" لانها فعلا محظوظه اللي عاشت وانا ما اهتميت فيها كويس !
واكتشفت ان مامتي الله يخليها لي ... تكفلت في الموضوع وانها حطت لي بذور في الكوب غير حقتي اللي اظن انها ماتت وانا مو عارفه ... وانها كانت تسقيها عني !
فليش احنا ما نزرع بذور للناس اللي نحبهم~ ونخليهم يحبونا اكثر ~
ازرعــوا ~ ما بيضركم شي ... طبعا هذا غير الاجر !
كم اعطينا وكم اخذنــا ؟!
بعدوا الطفش عنكم شوي ... بعدها نقدر نتفاهم مع نفسنا اكثر ... !
|||’. , ’.‘
جيبوا ورقه وقلم خربشوا عليها ... حطوا افكاركم ~
لا تخافون احد يقرى بعدكم ايش كتبتوا ... او يطالع رسماتكم الغريبه !
اخترعوا رموزكم الخاصه ! والا اكتبوا بخط ما احد يعرف يترجم طلاسمه غيركم ! >>>حركاتي ...
احيانا احس ان احنا عندنا خوف من الورق الابيض ! ما ااعرف ليه ~
اكتبوا ارسموا ولو ما في شي في بالكم ... اكتبوا بالمايل... بالوان ... بحبر ما يهم غيروا طريقتكم ~
حتى لما نرسم ارسموا بعدوا المساحه عنكم حتى لو ما كنت تعرفون عادي ~ بدل الورقه عشره ~
شخبطوا وعدلوا عليها حاولوا تتعاملون وتتعلمون من اخطائكم ~
اذكر كنت مرة في الـ class وطلبت مننا المس كل احد ياخذ ورقه من الورق الملون ويسوي فيها ورده !
وبمااني اعشق الاورقاامي (فن طي الورق ) حبيت الفكره بس وقتها اختر ورقه باللون الاحلى في نظري !
وما كان لي نفس ابغى اخلص واطلع وبس !
وطويت الورق واعطيتها ...
ثبتناها في المزهريه اللي تجمع كل الوردات ~
بس لما جلست اتفرج لقيت وحده لفتت نظري بغض النظر عن جمالها ...
لقيت الورده فيها شي من روحها ~ كانت كاتبه عليها وملوتنها ببساطه ~
حبيت الفكره ~ وتمنيت لو اغير وردتي وارجع اعدل على دزاينها بشي فيه مني ويشااابهني اكثر ~
احينا خوفنا وحبنا للاشياء تكون نظيفه ~ يمنعنا نستمتع ~
ونمتعها معنا ~
حتى اجهزتنا واشياءنا الخاصه عندنا الكثير نسويه ونترك فيه اثر مننا ~
(قبل كم يوم دلعت لاب توبي وزينه باستكرات أوطط وسموكات مرة كيوت وناويه ازوجه قريب من تشوكلت بينهم قصه حب )
بس ياما حرمت نفسي من المطر لا يخرب علي شعري ويبلل لي ملابس ~
وياما منعت نفسي العب بالرمل لا يوسخني ~
وكم مرة كنت اتردد في الكتابه في دفتر جديد علشان ما يخرب شكله ~
وكم مرة منعت نفسي اسبح في المسابح مع الناس علشان ( يـــاع )
وكم مرة اقول لا نروح البر والا المزرعه علشان لا يجوني الحشرات ! ولا ياكلوني الناموسات !
وكم مرة اشيل هم الشي قبل لا يصير ! وافكر في بكره قبل اليوم ! واحرم نفسي اكثر واكثر !
صحيح هذي افكار بسيطه بس صدقوني لها وقع خاص في النفس ~
فكروا وشوفوا كم مرة منعتوا نفسكم من اشياء تحبونها !
بسبب اشيااء اقل اهميه ؟!
يا كبر فرحتي لما كتبت حرف الطاء من دون قصد ~
ما كنت اعرف الحروف ولا اعرف كيف اكتبها كويس ~
وطلع معي حرف الطاء ~
رحت اركض اوريه لامي اني كتبته ومن دون ما دري وكان الخط حلو وواضح ...
وكل هذا كان بسبب شخبطه !
|||’. , ’.‘
جدتي وانا ... مره جالسين عند التلفزيون نتابع الشيخ ... نسيت اسم البرنامج ... يمكن سؤال على الهاتف !
المهم هو الشخ اللي بالقناة الاولى !
الا واحنا نطالع جابو صورة لمويه تتحرك صوره ثري دي !
المهم يا ملحها جدتي تقول هذا بحر جده !
قلت : هاه ... لا يمه مو بحر جده !
قالت : الا بحر جده ... شوفي !
قلت : لا لا يمه مو بحر جده !
بعدين فكرت شوي ...!
وقلت ليه ازعلها ... ولا يهمك بحر جده... بحر جده !
تبغين يصير بحر الرياض بعد ما في مشااكل !
وجلست اضحك على حالي ... وعلى طبعي !
يعني لازم ادقق ... خلاص كنت عديتها من الاول !
فكم مرة ...! علقت في مخكم شغله ورفضتوا تتنازلون (عناد باختصاار ) ؟
احيانا نحتااج نتنازل عن اشيااء كثير علشان تمشي الحيــاة !
يمكن ذكرت لكم مشهد بسيط لكن لما نرجع لمشااكلنا !
راح نلاقي احياانا نركب راسنا ولا ابن امه يغير راينا وتكبر المشكله اكثر !!!
صحيح الواحد يحتاج يكون عنده استقلاليه بشخصيته بس احيانا نزودها حبتين ! والا ؟!
وتجي لنا عزة نفس تساااعد شوشو ( شوشو تدليع الشيطان ) ..!
ووقتها الله على الشي البسيط راح يكون مصيبه !
اللهم اخزيك يا شوشو ! <--شوشو المذكور اعلاه
يعني عدوها ... وخلي الحياة تمشي ! مرة انت ومره هم !
|||’. , ’.‘
يعني في النهايه وبعد كل هالكلام ... حاولوا تعيشون حيااتكم ببساطه اكثر ~
بدون كلفه ! ... حاولوا تاثرون على اللي حواليكم فرحوهم ولو بكلمه ~ حسسوهم انكم موجودين !
اخلقوا لكم جوكم في البيت ! لو بالمضااربه !
اعطوا نفسكم حريه اكثر في التعبير !
دلعوا نفسكم اكثر ! روحي تسوقوا اشتروا لكم اشيااء تحبون لو ما كانت اشيااء ظاهره للناس !
المهم تعني لكم !
اذا حسيتوا بالتعب وجسمكم تعبان سووا مسااج !
ولا تنسون ترى الكــشخه ... من جد تغير لكم مزااجكم !
اطلعوا مع اصحاابكم غيروا جوا العزله !
اهتموا بنفسكم !
واعطوا اللي حواليكم من حبكم اكثر !
بينوا لهم اهتمامكم... بطريقتكم الخاصه !
بكل اختصاار استمتعوا بحيـــاتكم !
وخلوا اللي حواليكم يستمتعون فيها معكم وبوجودكم !
خططوا لاجاازتكم باسلووبكم !
وخلوا تجااربكم مليــانه بروحكم !
لكم ودي !