السـلام عليـكم ورحمـة الله وبركـاتـه ..



مسـاء الخيـر ..



لكـل شخـص .. يعني بني آدم ..
لحـظة .. ماينسـاها كان ماكان

لـحظة حـلوه .. لحـظة شينـه .. لحـظة حب !
عـاد كلـن ولحظتـه

فيـه واحـد " مثـلاً " .. شاف بنت تقرب له او يعرفها
ويحبها .. وشافها بـ لحظة مستحيل ينساها

واحد ضاع عن اهله .. وصارت له حاله وقصه مالها نهايه
ومستحيل ينسى هاللحظة

واحـد شـاف واحـد يحبـه .. مثـلاً لاعـب او مطرب .. وصارت لقطـه او لحظـه
اما محرجه او مضحكـه .. ومستحيـل ينسـاهـا

كلن لـه لحـظة .. في راسـه مستحيـل تطلـع
بالموضوع هـذا .. طموحنـا نشوف لحظاتكم

ان كانـت رومانسيـة <-- ايه هيـّن ..
او كانـت مضحكـة ..
او كـانت حزينـة ..
او كـانت .. الخ

انا بأعطيكم لحـظات .. وانتم تعطوني لحـظات
الى طبعاً الي عنده لـحظة [ خـاصـة ] ..
ماله داعـي يقـولها


لـحـ[1]ـظـة .. :

مره من المراريت .. كان وقتهـا عمري 7 سنـوات تقريبـا ..
وكنا وقتهـا بالراشـد .. والاهل مجتمعين ويمشون قدامي .. وانا اطالع العالم وراهم
وبين فتره وفتره ارفع راسي اشوفهم .. بعد فترة رفعت راسي مالقيت احد قدامي
وهاتك ياصياح .. وادور امي منا ومنا .. اخوي .. ياشيخ ولد خالي
ماش مابوش احد
وادور يمكن حوالي ساعه الا ربع .. الين ماجاء واحد من هالسكرتيـه قالي وش اسمك
قلت زيـاد .. قال وش فيك تصيح ، قلت ماما ضاعت
وقام خذاني يدور فيني ، لين مالقتني خالتي .. لو شفتوني لما شفتها
هاذي لحـظه مستحيـل ومستحيـل ومستحيـل .. يوم من الأيام أنساها



لـحـ[2]ـظـة .. :

مرتن من المراريت غير الي فوق .. كان وقتها عمري حوالي 6 او 5 سنوات
وكنت رايح انا وامي والسواق للسوق .. ونزلت امي محـل .. وجلست مع السـواق
نفر على المحـل ننتظر امي تخـلص .. قمت طلعـت من الدريشـه اشوف الزحمـه
وقفل السواق الدريشـه على رقبتـي .. وابي احتـسي يطلع كلامي طلاسـم
ويفتح الدريشه وأدخل رقبتي .. بعـدها حرمـت أطلع رقبتي من الدريشـه
لكن سؤالي الوحيـد .. السواق كان قاصدها ؟ ولا انها بالغلط
وللمعلوميه بعد اسبوعين انحاش السواق



لـحـ[3]ـظـة .. :

وتعتبر من المـواقـف المحرجـه بالنسبـة لي .. طلعـت مع ولد عمي وولد عمتي للـراشد
رحنا نتعـشى .. طلعنـا برا .. تونا طالعيـن .. وزحمـة عالم
بنات وعيال وشياب .. اعوذ بالله ، كنهم دارين اني يبي يصير لي شيء
ومشوا ولد عمي وولد عمتي وتركوني ، مشيت بألحقهم .. بأقطع الشارع ولا فيه سياره جايه ومسرعه
واتروع وارجع بسرعه .. وازلق .. واتكرفس على وجهي
العالم تطالع وكاتمة الضحكه ، وولد عمي وولد عمتي بدال مايجون يساعدوني ، تسدحوا ضحك
لدرجة ان ولد عمي قالي ياليتني مصورك



خلاص عاد يكفي

تفضـلوا أنتوا ..



زيـآد .