*
*
بسم الله الرحمن الرحيم ..
السلام عليكم ورحمه الله وبركاته ..
مساء \ صباح.. الخير على الحلوين والوعين..
مبروك الكاس ياكل ابو الهلالييـن..
وكل جنادريه .. وكل عام .. وكل هذا وذاك وإنتم بخير وصحه وعوافي ..
\\
شسمهـ هذا الشي.. قدر الله علي وجانا واحدن مصرقع وقطع سلك من اسلاك الخطوط الجويـّه..
وخربـ نص تلفونات حارتنا"الكئيبه" ,وكان بأثرها دمار نفسي قاتل حد الثماله.
<-- ودك بعض الناس مايقرون واجد
فجلسنا ندق عليهم ياناس تعالو يرحم امكم تعالو..شوفولنا صرفه مع تلفونا..
مغمى عليه شهر محد عالجه ..ياناس يرحم امكم العالم تدق علينا مانرد.. 
ويردون علينا الاتصالات بالأجوبه التاليه:
"طيب طيب.. كم رقم الجوال عشان نتصل عليكم؟"
"طيب كم رقم البيت؟"
" طيب وش نوع العطل ؟"
طيب طيب طيب..
وتعال ياترييش ومحد جانا ولا شفنا احد.
ياأيتها الاتصالات الحبيبه ابث اليك سلامي وأملي ان (تعقلون) وتغدون سنعين هبلتوبنا.
\\\
المهم..نبدا بالموضوع..( صورهـ خشه تعبت وهي تقرا المقدمه تحسبه الموضوع)
.,.,.,.
البوابه..( يعني المدخل) \
سقى الله يوم أنا طفله .. أنام ولاأحد قدي
ولا أحاتي هموم اليوم .. ولا أحاتي أمل بكرهـ
* - * - *
البوابه مرتن ثانيه (المـخرج) \
(صوره جيب يدخل المقاضي جوا البيت همن يطلعه مرتن ثانيه عند الباب)
<- يالبااه يابوي
ايهـ والله سقى الله ذيك الايامـ .. نلعب , نضحك , نصيح , نتطاق ..
في الاخير نسوي (صحيب) ونرجع حبايب مـافي زعـل ولا حزازهـ ولا إنتقام ..!
ودايما الأعصاب هاديـه ورايقه ..رغم االصجـهـ واللجـهـ ..!
مانخاف من بكرهـ ولا من مستقبل , نعيش اليومـ بيومـهـ ..!
نعيش اللحضـهـ بـ اللحضـهـ ..
مافيـه هموم ولا غموم ..ولا قهـر ولا قـلق,!
والنوم بليـا أرق ,!
..\..
لاهواجس ..لا سجـّـه.. ولا إضطراب ..
والتصرف..(مايـُعاب)..!
في الطفولـهـ ياكثر ماتكلمنا وحكينا..
نردد (الا ليت الزمن يرجع)..والزمن ماهو في يدينا !!
ورآحت ايامـ الطفولـه ..,
وتمشيبنا الايام ونسمعهـا (مراهق),!
إن غلطنا.. رددوهـا..!
وإن ضحكنا .. كرروهـا ..!
وإن شكينا قالو ايضا ..(إنت مراهق )!
يعنبوهم وش يقولو..؟
حيرونا وأتعبونـا ..
وجنونـا بالمعآني ,!
ومافهمنا أي شي ..
لين ماربي رزقنا وإفتهمنا كل شي ,!
بس طبعا ً..بعد ماصرنا كبار
وعقب ماإجتزنا العوائق ,!
عندي بس ..كمن سؤال ..
للأهل والمجتمع..
هالمراهق مايحس ؟
ولا هو شيـ(ن) غريب..ماتعيرونـهـ إهتمام ..؟
معظمـ الخوفـ يـتصوبـ .. نحو مجموعـهـ أنامـ
ييتسمون بـ(مراهق)!
وش نقول..,؟
مافي يدنا أي حيلـهـ ..
رآحت أيامـ الطفولهـ ..ولحقتها ألف ليلهـ ..!
وأنسرق من عمرنا ..عده سنين ..!
وإن كتب ربـي مـدد ..
وفـ عمرنـا زدنا عــدد..
آتمنى كل ليلهـ تنتهي بضحك و سـعـد !
^
^
^
يمديكم على الهذيآن اللي فوق .. الصراحهـ طلعت مني ومابغيت احرجها 
مع ان مالها شغل في الشسمهـ بس عيت الا تبي تطلع ..!
عموما مدري وش أحس فيه يوم كتبتها.. حسيت اني مضطهدهـ أيام المراهقه الله يخلف
على ام امـن جابتني ( يعني جدتي ).
.,
الزبدهـ إننا نمشي بها الدنيا بكم مرحـله
لكن اليومـ بتكلمـ عن مرحلهـ الــ(20)..ومافوق,!
.,
*
مرحله الـ(عشرينات) مرحله انتقاليهـ بكل مافيهـا ..
مرحلـه تنزع كـل أبو ( الطفوله والمراهقهـ)اللي عندك وتحطك في خشه الواقع..
وتقول خلاص يابابا .. ألحين أنت ماينقالك (بزر ولا ورع ) ولا ينقالك (يمر بمرحله مراهقه)..
منتاب سامع الا ( هذا كبرك وتسويـ\ـن تسذا )..؟
مرحله تقريبا يبدى فيها ربط حزام آمان ..على التصرفات وأي تهور منكـ\ـي بـيتسجلك مخالفه..
ليست نقديه فتدفعها .. وليست توقيف فتنتهي ساعاتها .. إنما تضل ( ذكرى).. داخل دمجتك ودمجه ( شاهد العيان)!
<- وش السالفه انتي..؟
المهم ان كل (عشريني ومافوق )بيـحاول تدريجا ً ترك (التمرهق),!
وأحيانا من غير ماتتركها.. هي تروح, وقبل لاتروح اكتب على القلب ولاعهـ ( لحد يدقق ),!
واحيانا تجيك هفات تخربها ولو كنت على مرئى من الجميع كما افعل انا احيانا..
.,
وفي سياق الموضوع..<-- وش عندها راعيه السياق
هالمرحله تحس فيها إنك شيـيّ وحركه ويعنني ..وعلبالي.. وكذا يعني!
وإلا اذا احد قال كم عمرك ؟ وقلت وإنت رافع خشمك وإصبع رجلك الكبير : عشريـن
مع اني بكل الاعمآر حسيت اني شي وخاصه الـ (15) ,قلتهاوأنا كلي شموخ
مدري وش كنت احس فيه ذيك الفتره؟.
نرجع لـ(محور)حديثنا <-- محور ولا دفاع هاهاهاي (صورهـ زبيريه منطلدزهـ)
المهم أني بفقد قولـه (طعش) لين سألني احد عن عمري
قلق قسم بالله أبي أقول (طعش)..الا مير مايمدي يحطونها (عشرين طعش )؟
<- كلي تراب
.,\
(الفوارق بين الجنسين في العشرين بنظري )
بعد هالمرحله ..يصير الشاب يفكر في(المستقبل )واجد..
يفكر ينهي الدراسه..يتوظف(لحد يقول يجيب الله مطر تكفى )..
اللي رزقه ربي بيتزوج وبيستقر .. وبيبدا حياهـ ثانيه والله يعينهـ!
وإن مارزقهـ ربي .. الله يعينه بعد <-- إخلصي بس
\,
((البنت))
ماتفرق كثير من ناحيـهـ التفكير بالمستقبل \الوظيفه ..!
وأيضا لحد يقول يجيب الله مطر ..هذاني قلتها .. وشوله تقولونهاا ثانيه ياربيـه منكم !<<--
البنت عاد مشكلتها غير ..
وهي كل مارآحت سنه من عمرها في العشرينات..ولابعد جاهـا النصيب
بتتشائم وبتقول :أهلا ً أهلا ً يـاللي إسمك الـ(عنوسهـ)..
وهذا الحاصل بـ(المجتمع) ماجبت شي من مخي..
وأنا طبعا ًضدها بقوهـ..وضد هالنظرهـ الخايسه للبنت <- اعصابك لاينقطع فيس عردز
من جد شي يمصع القلب ويتـلـّـه <-( تأثير شاعر المليون)..
وش حيث الشباب يوصل للـ(40)وهو ماأعرس .. ينقال له (عزوبي)..
والبنت لو توصل الـ( 27 - 28)..
خلاص طاح سوقها .. فاتها القطار .. فاتتها الطيارهـ ..فاتها السيكل ..!! <--
ينعن اوم ابليس التخلف ياناس؟ <<--ريلاكس تكفى
وهـ بس..وماعلينا ماعلينا ..من حتسيهم ماعلينا ..(على وزن ياحلوكم ياحلوكم )حقت ميامي
<- يامصلها ذا الانسانه
في احد الايام العاديه.. إنطلق سؤال عابر صاك الطبلون من لساني متجهها الى
اذن امي : يمه وش ابرز شي في العشرين حقتك ؟
امي : ابد ماهناش.
انا : لاعاد صدق ,
امي : اعرست
انا: خساره .. والله خساره تضييع هالمرحله في عرس..
امي :( تفكر),
وأنا صكيت الموضوع ..وفكرت في امي وفي مرحله العشرين اللي ضاعت في عرس
مع انها تقول لا ماضاعت ..عادي استانست فيها وجتني ظروف وهذي الحياه.. حلوه ومره..وكل شي كاتبه ربي.
..,\
بنت عمي تقول : يختي انتي مكبرتها .. ماحسيت فيها الا يوم تعديتها بكم يوم .. ومافيها شي مميز.
..,\
أنا \ المميز في مدخل العشرين انه جا عقب ( اعتزال الاسطوره ) بيوم
واستانست وحركه وصجه , عاد اول يوم لي في العشرين الصباح قلت لابوي قبل لايطلع للشغل
يبه تدري اليوم اول يوم لي بالعشرين
طلع ريال جديد وقال خذي قلت الله وناسه عطني قلم.. يوم عطاني كتبت عليه التاريخ
والساعه ..وسبب الريال .. وخليته يوقع .. طلع وهو يقول : الحمد الله والشكر
المهم تعبت وانا اشرح.. واعصب وأروق واصيح واضحك
كتبت هالموضوع الماصل بسبب اني دخلت العشرين..
واحس هالمرحله غير وإنتظرتها واجد .. مدري ليش..؟
مع ان اللي حولي كثير دخلوها وتعدوها ماجابولها طاري..ماعطوها وجه..ولا أهتمو..
ومخلينها زي أي مرحله..أما انا مدري ليش مهتمه في هالمرحلهـ بالذات من بد المراحل.
هل أنا بموت ولا وش بلاني الله يخلف ..
من جد حآسهـ بـشي بس مدري وشو..عرفتو وشلون ..هذا الاحساس؟.
..,\
اصـ بس ودحدرو
7
7
أسعله لكم ..}
1 - دخلت الـ 20 ولا مابعد ؟ (وإن تسان مافيه حرج اسدح العمر لاهنت)..!
2- إن كانك جربتها ودخلتها وتعديتها ..تحس حياتك تحولت من بعدها ولا عادي ؟
3- وش احلى الاعمار في نظرك "غير الطفوله" .. وليـه ؟
\\
أخر شي.. اللي عندهـ (كلمه),(مناقشه),(موقف)بخصوص البربره اللي فوق
يتفضل عالسبورهـ يشرح لنا وش في خـآطرهـ .. ولايردكم الا الكيبورد .
,
*
وقبل ختام الموضوع المخيس
أحب أشكر الاخت الطخمه ( توته \ الماصله 2)
,
على سؤالها الأطخم عن شخصي المخيس..
وأحب اقولها .. ترا ماعندي ريال ولا برشا ولا مان
وطفي النور وسكري الباب وإطلعي برا 
وآسفهـ على الاقعــاز اللي سببتهـ لتس 
(وسبحانك اللهم وبحمدك ..تبارك اسمك..وتعالى جدك..ولا اله غيرك )
.
.
10-03-2008, 04:29 AM
واللهـ .. وغدينـــــا..كبار..!؟
العرض الشجري
