أخباركم قناصيين وقناصات ..
بشروا كيف أستعدادكم للأمتحانات
أهم شيء خلوكم مرتاحين .. هي خاربه خاربه 
يعني ممتحنين ممتحنين ..الله لا يعوق بشر 
أنا الحمد لله , باقي لي أسبوع وأفتك << قولوا ماشاء الله 
...
اليوم أنا موضوعي هو نفس الموضوع اللي يدار مع أهلي هذه الأيام
يقولون لي .......
بتخلصين الأمتحانات على طول لازم تفوتي على المطبخ << أقلد السواريه
تفوتي = تروحي = تقلبين وجهك
وأنا أقول والله ماأفوت ولا أروح إلا لين يكتب كتابي مع فارس أحلامي
ولا وش له أتعلم الطبخ ...؟؟؟؟!!!
ماملت عينكم الشغالتين ..<< حقتنا وحقت أختي
وبعدين ترى الأجازه كلها أسبوعين
مايمديني أتنفس بعمق إلا الترم الثاني جاي .
...
الفرق بين بنات اليوم وبنات الأمس من ناحيه الطبخ ..
بنات الأمس ..
البنت من عمر 12 تعاون أمها بالطبخ وتشعل النار
ويطبخون مو بس لعائلتهم للضيوف كلهم .
أما بنات اليوم ..
أغلبهم طاقات العشرين ولا يسون شيء 
وماصاروا يقربون من المطبخ حتى لو يعرفون الطبخ
وكل وحده حاطه في بالها أنها لو تزوجت بتتعلم
ولي تقول يااااااااااي ريحه الطبخ
ولي تقول أنا لو أشوف اللحم قبل الطبخ ماأقدر أكله
ولي تقول ما أعرف وحاطته عذر ... طيب تعلمي يامال العافيه
والأدهى والأمر اذا كانوا يدعون الحضاره بترك الطبخ .
...
قصه واقعيه ..
وحده من قريباتي " صديقتها " تزوجت
ويوم مر أسبوع فقط.. على زواجها ..
حضر زوجها للبيت وشايل معه كرتون .
هي بشكل بديهي , سألته وش جايب معك ؟!!.
قال : بطريقه أستهزائيه .." ذبيحه " ..خخخخخخ
ردت بسرعه .. يووووه أنا أقطع اللحم الحيين !!
تدرون وش سوا ؟؟؟!!!!
عطاها كف ....!!!!!
إذا هو مو متفاهم أو بيفرض شخصيته من الأيام الأولى
هاذي مشكلته .. والله يعينها على الحظ الردي اللي أخذته
بس المشكله ... في الأساس
أنه ليش جايب لحم ومستعجل على الطبخ وريحه البصل ؟؟!!!
وزوجته توها عروس !!!
ولا هو مايدري أن الزمن تغير!! والناس تغيرت !!
الحين صاروا العروسات يجلسون أكثر من شهر وهم مايطبخون 
ويسمونه شهر العسل ..
...
فاصل ونواصل..
(( الأيس كريم عبر التاريخ ))
تقول بعض المصادر التاريخيه أن أكتشاف الأيس كريم
حدث قبل ألاف السنين .. عندما نسي أحدهم
وعاء من الحليب في الخارج في أحدى الليالي البارده .
ياسلام ,,,,,,,, أشك أن طعمه حلو
]نرجع لمحور حديثنا [
علاقتك مع الطبخ والمطبخ ..
أنا بصراحه ماأشوف المطبخ إلا يوم أجي أشرب مويه ..
وحتى أغراض المطبخ بعضها مدري وين مكانها !!
أذكر أول شي سويته من تجارب الطبخ " ضبط " <<عكس الناس
يوم كنت بالمتوسطه كان عندنا عزيمه أول يوم بالعيد
دخلت المطبخ قلت خليني أساعد أختي وأسوي قهوه
وتروح قهوتي لضيوف الرجال ..المشكله أنها أول تجربه لي ..
ويوم خلصت العزيمه ...
يجي أبوي يسألنا مين سوى أول قهوه ؟؟!! وجاه الخبر .
ويستلم قهوتي لين لاعت كبدي , ماعاد صرت أضبطها
وبعدها صارت امي تسويها له .
...
الأسباب في نظري عن عزوف فتيات هذا الجيل عن الطبخ ..
الدراسه – الوظيفه – الخادمه -
النت – التلفزيون – الرفاهيه -
المطبخ نفسه مرات مايساعد
عند الأجانب هناك مطبخهم يطل على الحديقه
وفي الصباح لما يحضرون الفطور يشمون النسيم 
وحنا هنا نقابل جدار أو شارع أو جيران .
وبعض الناس لو في شباك مايواجه أحد " لابد يغلق " .
...
مساحه للصراحه ..
بيني وبينكم .. وأقولها بكل صراحه ..
البنت لو ماتطبخ وش الفرق بينها وبين الرجال !!!
إذا هي ماأتقنت مسؤليتها .. أجل مين بيتقنها ؟؟!!
وأكيد .. بتحس أنها ناقصه شيء من أنوثتها .
أنا مشكلتي مع الطبخ .. أنه مو من هواياتي أبداً
ماأحبه و أكره ..وخصوصاً يوم أنتظر النتيجه ويمكن مايظبط
وكل شوي داخله المطبخ أذوق وأضيف وأشوف
وأضبط النار .. كل هالشغلات توتر
وأصلاً الحيين ماعندي أي دافع عشان أتعلم
ولسى ماخلصت الدراسه
يعني حاطه في بالي أني لاحقه على الطبخ ..
بمعنى أخر .. بأذن الله بجي اليوم اللي أكون فيه طباخه
بس الوقت لم يحن بعد ..
وحتى موجود بالبيت عندنا كتب لجميع أنواع الطبخ ,,,
الطبخ الخليجي – الهندي – الشامي – المصري
وفي كتب عن السلطات والحلى , وعن تحضير أنواع الأس كريم
كل هالكتب كلها ماملت عيني , وماعطتني أي دافع .
وفوق هذا كله عندي مشكله "الوقت" مايساعدني ولايشجعني أبد .
دراسه وأمتحانات يدوب أرتاح ..
ومرات .... تجي في راسي " فكره " تعجبني
أقول بلا هم .. اذا توظفت رح أجيب طباخه تفكني من الطبخ
ومايمنع أني أمر أشرف عليها واساعدها مثلاً بالسلطات وزي كذا .
...
لنقاش ..
أسئله لصبايا ..
س / بكل صراحه .. هل تطبخين ..؟؟؟
* إذا كانت إجابتك بنعم ..وضحي هل أنتي مستمره فيه أم حسب مزاجك ؟
* إذا كانت إجابتك بلا .. وضحي متى سوف تتعلمين وتطبخين ؟
س / ماهي الأسباب في نظرك عن عزوف كثير من فتيات هذا الجيل عن الطبخ ؟
...
أسئله للقناصين ..
س / وش نظرتكم للبنت اللي ماتطبخ في بيت أهلها ؟
س / هل تشترط في زوجه المستقبل أن تكون ملمه بالطبخ ,
أم تؤمن بمقوله اذا قرب الزواج أكيد بتتعلم ؟؟؟
س / ماهي الأسباب في نظرك عن عزوف كثير من فتيات هذا الجيل عن الطبخ ؟
...
وفي الختام .. أتمنى أن ينال الموضوع على أعجابكم
تقبلوا خالص تحياتي ,,
الكاتبه / جاكلين 
وجدان20 سابقاً
...
23-01-2008, 09:43 PM
العرض الشجري
