بسم الله الرحمن الرحيم
السلام عليكم ورحمة الله وبركاته
اعتذر عن غيبتي عن المواضيع الساخنة والجادة لكن رجعت بهذا الموضوع اللي لي اسبوع وانا اعده وان شاء الله يعجبكم
قيادة المرأة للسيارة بين مؤيد ومعارض..!! بين متحرر ومحافظ..!!
قيادة المرأة بين التطور والتحضر..!! وبين المحافظة على العادات والتقاليد..!!
طبعا في هذه السنة الكل لاحظ من خلال شبكة الانترنت وغيرها ظهرت مطالبات بقيادة المرأة للسيارة وظهرت ايضا بطبيعة الحال الآراء النقيضة والمعارضة لقيادة المرأة للسيارة..!!
لكن قبل الموافقة والتأييد او الرفض والمعارضة لابد من ذكر الاسباب والنقاط يعني مو معقولة موافقة او معارضة دون سبب يعني الدعوة مو مزاجية..!!
طبعا لايخفى عليكم مملكتنا المصونة الدولة الوحيدة في العالم التي لاتقود المرأة فيها السيارة على الاقل علنا بغض النظر عن الهجر واللي في البر..!!
قبل مانقول نبي نصير مثل امريكا او بريطانيا او فرنسا الكل يعرف البعد الشاسع من حيث الديانة والعادات والتقاليد وحتى المجتمع عندنا غير مجتمعهم..!!
يعني نبدأ بدول الجوار مثل الكويت والامارات او اي دولة من الخليج على سبيل المثال وراح اتكلم عن الامارات على سبيل المثال
راح اقارن بعض القوانين الموجودة عندهم والغير موجودة عندنا:
الله يعزكم ويكرمكم عندنا في المملكة وعلى الارصفة خاصة اللي عند البقالات ومكان تجمع العمالة لايوجد شبر نظيف خالي من القذارات وخاصة (اعزكم الله) البصق اللي يشوه الشوارع والارصفة ومحد لاقي حل لهالمشكلة..!!
في الامارات غرامة على اللي يبصق على الشارع واظن ان الغرامة من 200 الى 500 درهم يعني راتب العامل في المملكة العربية السعودية يعني هذا وجهي ان لقيتوا واحد من هالعمالة يدمر شوارعنا نصك عليهم صكة :D
وايضا واحد يسوق سيارته ماشي في الشارع امن وامان يالله من فضلك ولا تدري الا (طرنق طراخ) وش ذا( هذا اللي جنب السواق) يرد السواق ابد عادي دايم تصير مغير قوطي ببسي صقع بالمراية..!!
في الامارات غرامة مالية وعلى ما اظن سجن على اللي يرمي المخلفات على الشوارع لكن متى يتحقق هالشيئ؟ ياليل مطولك..!!
نرجع لمحور حديثنا :D
على سبيل المثال حرمة ماشية على طريق التخصصي وقفت للاشارة مستحيل مايكون جنبها شباب الا راح نشوفهم مبسطين عند الاشارات.!!
طبعا راح نشوف الترقيم بانواعه المختلفة من رمي الرقم ولصقه على زجاج السيارات بكرتون والبنات هاتك ياكتابة الرقم وهذا الشيئ ماقلته الا لاني مثل ماعودتكم ما اتكلم عن شيئ الا وانا على دراية فيه ومشاهده..!!
اذا كان السواق معه بنات وراء وشفت الكراتين المكتوبة عليها ارقام وشلون لو الحريم ساقوا؟ طبعا معروفة ولا تقولون راح نطنشهم لان الكلام ببلاش الا من رحم ربّي لان كل هذا ببساطة يحدث دون وجود رقابة ذاتية من الشاب قبل الشابة..!!
ومو معقولة نشوف الهيئة مسنترة عند كل اشارة اعجاز صراحة هالشيئ ومستحيل..!!
البنت: انا طالعة..
الام: وين؟
البنت: اذاكر مع صديقتي..
الام: في حفظ الله..
زعيم هلالي: اي هين تروحين تذاكرين :D واللبيب بالاشارة يفهمُ ;) الا من رحم ربّي ايضا يعني لانعم على جميع البنات او على جميع الشباب لان اصابع اليد مهيب سواء
لايخفى على الجميع الاهوال اللي تصير في الاسواق والمجمعات التجارية من العليا مول للفيصلية للمملكة من معاكس مع تواجد الهيئة لكن مثل ماقلت سابقا اهم شيئ الرقابة الذاتية اذا انعدمت فعلى الدنيا السلام..!!
طيب مثال آخر امرأة راكبة سيارة تخيلوا معي كيف لابسة
عباة على الراس وفضفاضة يعني واسعة و لاتشم روائح عطر ولا كيلو كحل على العيون ولا مياعة في الكلام او المشي بس.....
كل هذا احلام واماني فقط لاغير الا العجز او المحافظات اللي احييهم على اللبس المحتشم وهذي اللي ترفع الراس
طبعا راح نشوف صرعات وموضات للعبايات فوق الموضات الموجودة من الكتق للمخصر وبلاوي كثيرة منيب اعرفها ولا ودي..!! غير علب المكياج الاحتياطية في السيارة وريحة العطر اللي تصرع البعير..!!
نجي للشباب نخفف الضغط المرتفع عند البنات الحين من الهوايل اللي قرأوها وللاسف مصائب الرجال لاتقل عن مصائب النساء..!!
طبعا راح نشوف الهبال والصرقعة على الاشارات والتجمهرات ورقصني ياقدع ومن هالحركات اللي يشيب لها رأس الصغير..!!
طبعا الشباب المصرقع راح تكثر طلعاتهم وطبعا دون طرق مختصرة ومايحتاج اذكر واعدد ويمكن بعضكم راح يعدد من الهوايل اكثر مني لما شافه على الشوارع والطرق
باختصار شديد كل اللي فوق اختصره بكلمة واحدة فقط(تخلف) ..!!
نعم تخلف..!!
فالشاب لايمسك نفسه عند وجود فتاة بقربه والعكس صحيح
نعم مجتمعنا لاتصلح فيه قيادة المرأة للسيارة مع يقيني بقدوم هذا اليوم حين تقود المرأة للسيارة:(
قرأت قصة عن احد الشباب المسلم في بلاد الغرب وعلى ما اظن في امريكا كان في احدى الجامعات وكانت بجانبه فتاة من هذا البلد وكانت تلاحظ انه يغض البصر ولا يقعد يقز في البنات :D يعني الولد آدمي
هي البنت اغتاظت من تصرفاته وحركاته وعصبت وقالت له في وجهه:
يامتخلف ويا ارهابي كيف تحتقرني ولا حتى تطالعني او تكلمني؟ دينكم متخلف..!!
ابتسم الشاب وقال في كل ثقة
لو ان لديك لؤلؤة او جوهرة ثمينة هل تضعينها في كل مكان واي مكان؟
ردت: بل اضعها في صندوق او مكان امين..!!
رد قال المرأة عندنا كالجوهرة لايراها الا محارمها والعباءة كصندوق الجوهرة يحميها من التلف ورحل وعلى وجهه ابتسامة
بعد فترة وجد فتاة متحجة بجانبه لكن غض البصر كعادته طبعا لكن الفتاة استوقفته وقالت له انها بعد ماسمعت كلامه اعتنقت الاسلام وسُر هذا الشاب كثيرا وعلى ما اظن ان الشاب تزوجها ويسامحنا ان كانت اشاعة يابخت من وفق راسين بالحلال :D
ومثل ماقال الخيّـــــــــال في احد المواضيع او الردود ان من يوافق على قيادة المرأة للسيارات( رخمة ) وماكذب يوم قالها
سمعت احد الاخبار ان المرور يدرس فكرة تغريم اللي يسوق ويكلم بالجوال وياليت تتنفذ نخفف من الحوادث اللي عندنا:(
صراحة ما استبعد بكرة اذا ساقوا الحريم نشوف قانون معاقبة المرأة عند ارضاع صغيرها اثناء القيادة :D وصدقوني راح يصير هالكلام عند قيادة المرأة للسيارة..!!
وتعرفون حركات البنات من الوان السيارات الى كمالياتها واللوحات
ق م ر
هـ د ى
ن د ى
بس لحد يدقق ويقول مافي لوحة بالحرف الفلاني تراني عليمي بهالسوالف..!!
خاتمة:
جملة قد قلتها سابقا في احد المواضيع للاخت انسانة وها انا اقولها مرة اخرى وسوف اكررها ماحييت
الملكة اليزابيث ملكة بريطانيا لا اعتقد ان هناك حاليا امرأة ارفع منها من ناحية البريستيج او العراقة او التمدن:
هل شاهدتم الملكة اليزابيث تقود سيارة؟<<<< غير الشاص اللي في صمان بريطانيا :D
اذاً نساءنا ملكات لايقُدن السيارات وانما يتوفر لهن كل شيئ لماذا المعمعة؟
هذا ماجادت به يداي وماخطه قلمي بانتظار ردودكم وحاولت قدر الامكان عدم اطالة الموضوع لسهولة قرائته
الموضوع للنقاش وابداء الآراء والحوار الراقي والعقلاني
16-10-2005, 08:57 PM
بين مؤيد ومعارض..!! بين متحرر ومحافظ..!!(موضوع للنقاش)
العرض الشجري
