\ خلاص من حبكم يازين عزّلنا + فوق سن 18 هيييه ياللي تطلّ وعيونك تلمع ترى ماعندنا مشاهد خليعة وحركات غير مؤدبة .. ياحليلها بنت خالي كبر قريح ولين سألناها عن شي مب زين تقول : لا فيه حركات غير مؤدبة .. خخخخخخ تعجبني براءتها للي عاجبهم عنوان الموضوع .. نسمع بالتشويق نفيدكم علما بأننا نلغي مسؤوليتنا عن أي شي يصير بعد قراءة الرواية .. يعني شي منّي منّاك .. مالنا دخل ! لـ نبحر معاً أزملائي وزميلاتي في عالم الرومنسية .. بدون زحمة الله يعافيكم عند البوابة .. لا تصاقعون ببعض عيب هذا و انتم توّكم ماقريتوا .. واخزياهـ بس ياحقين القناص قصة رومنسية دارت في زمن غدّار .. \ يقولون الحب هو ازين شي بالحياة وو اللي ما يحب مايعيش ومع ذلك الحب صعب وماينلقى مع ان الحب عندنا صاير على قفى من يشيل .. الظاهر بعد مدة بنلقاهـ ينباع بـ أكياس في سوق الحراج .. وكل ما كان الحب أكبر كل ماكان أغلى .. ابهـ تراهـ حُب مب لعبة ! أقول أحبك ..والله إني من الشوق ألقا طيوفك في جميع المفارق هذا حالي انا المسيكينة المغلوب على أمري .. اللي اشوف خشة حمود بكل محل وين مارحت ووين ماجيت .. الله عاد من كثر الروحات اللي مقطّعتني .. أبعد المسافات محل أم محيق تبيع أغراض نسائية .. حتى بـ خشة سعيدان اشوف حمود .. هو عشان مافيهـ فرق بينهم كلهم شهب لهب عشان كذا تتراءى لي صورة المحبوب .. وظنّي لو اني لاقيتن احسن من حمود كان تركتهـ بس عاد مالقينا .. الجود من الموجود ..(خشة واحد يغمز وودّهـ يقول الشكوى لله) حمود يالرباعين (خشة فؤاد وهو في البادية) يصير ولد خالتي منيرة .. شاب يتمتع بالرجولة والشهامة .. أشهم واحد في حارتنا أبضاي وزكرت .. وعاد لين صرت موجودة يسوي أكوس شيئات بالحياة هو صدز مب مزيون .. وصدز يروّع البزارين دايم بـ خشته وو دايم ثوبهـ لونهـ اسود .. ماعمري شفت عليهـ ثوب لونهـ طبيعي تعرفون يعني عوامل التعرية وكذا بس اهم شي الاخلاق .. لاتعذربون .. وهـ بس ياحمود ! ع الاقل يذود عنّي قدام سعيدان .. الله يعظم أجري على التكفيخ والتصفيق اللي يجيني من ورى هالكمخة .. " آآآآآآخ .. ياخي اشتهي لو مرة وحدة تناديني مثل الناس لازم يعني تحدث اصابات .. شفني الله يعظم اجري جبهتي كلها صعارير منك .. وراي زواج ومستقبل ترى هيييه " " زواج ؟! انا مـدري حمود ليه حاطّن العين عليتس .. والله لو انتس نجوى فؤادي " معليش يااخوان لاتنسون إننا نتكلم مع طبقة من الناس اصحاب العصر الحجري .. فلو مرت عليكم اسماء مغبرة عادي .. يعني تسنه يقول أليسا مثلاً " وش تجي نجوى فؤادي عندي ؟! نجواك ذي أطيّحها بـ نظرة .. وخر بس انت ووجهك الاشهب " دايم سعيدان يشككني بجمالي وفتنتي .. رحت اركض لأميمتي .. " يمه يمه ..!" " بسم الله الرحمن الرحيم .. اعنبوتس ماتفرقين عن اخوتس ابد .. شكلا وخُلقاً اركدي خلني احس اني جايبتن بنيه .. ياربي لاتعاقبني انا من يوم ماولدت بتس وانا اشوف بتس مارية ولد .. تعالي خليني اتأكد " " هيييه يمه .. بكمّل الـ 18 وتقولين ذا الحتسي ؟! واخزياهـ بس إلا اقول يمهـ .. وش رايتس فيني هل تشوفين اني مزيونة ؟! ورجاءاً لو سمحتي لا تشبّهيني بـ نجوى فؤادي حرام يكفي سعيدان ظلمها وقال انها تشبهني .. أدري اني مالي شبيهـ بالكون بس عاد مـدري متى تدرين يا يمه انتس جبتي ملاك " ملاك ولاّ حصة < مصالة .. " مااقول إلا الله لا يبارك فيتس ياام حنفي .. جيتينا هاك الزمان وتوثّمتي في حريم الحارة بالأحمر ولاّ كان حنا سالمين من ذا العاهة " " وش احمره يمّه ؟! " " هاتس روحي انشري الغسيل على الحبل خليني اذكر منتس كود نفعتن وحدة " قمت شايلتن معي همومي وسطل الغسيل .. سطحنا يااعزائي القرّاء والقرّاءات مقابلن له سطح بيت حمود .. وكان مرتع لقائنا احياناً .. رفعت ثوبي وبانت الكراعين .. ايهـ يعني نانسي احسن منا في وشوّ ؟! يالله من فضلك كراعين وعندنا وإن تسان على اللون الله يخلي لنا وارد اندنيسيا ماخلوا شي .. " حمود وراهـ سافهني منذو مبطي ؟! صار لي يومين مير مانب اشوفهـ يسيّر ولا يويدز مع الباب مثل عوايدهـ .. منوّل أول مايقابلني مع طرف الباب خشمهـ .. والحين لااشوف لا خشم ولاشي .. وانا في قمة سرحاني في حبيب الألب إذا بي اسمع صوت .. " ياحلاّء (حلاق) إعمل لي غرّة .. فرّح لي ألبي شي مرة .. تـ يرقص ابن الجيران .. اللي عيونو لا برّا " أي تحريف لسنا مسؤولين عنهـ .. لاينطّ لي واحد ويقول غلط .. عادي سلّكوا لي تراني متحمسة .. قعدت حول ساعة منب مستوعبة الصوت .. وبيني وبينكم ارتاعت اذني من حلاوة الصوت .. تخبرون انا مانب متعودة على اصوات مثل كذا .. عندي سعيدان الله يخليه لعين ترجيهـ صوتهـ كنهـ صوت جمس منشقّ الشكمان حقه .. حتى اكون دقيقة في الوصف اخترق اذني الصوت العذب وقعدت كذا بكل حنان يدي على خدّي .. ولاّ انا ألمح حمود في سطحهم متحمس .. وحاطّن يدهـ على خدهـ مثل حركتي .. ياقليبي يقلّدني الايدين عند بعضها > عادي تراها ماتعرف تحتسي مثلنا لازم تشطح شطحات .. بس هيييه .. رفعت راسي شوي زيادة اطالع سطوح الحارة .. ولاّ انا اشوف ذيك الشقرا اللي تتلّ القلب تلّ .. بعذرهـ حمودوهـ فاقّن خشّته .. ياقلبييييييهـ ! من متى صار بـ حارتنا ذا الشقر ؟! معقولهـ سواها ابو محمد وتزوج بنت المصرية ؟! حتى لو تزوجها .. متى يمدي يجيبون ذي ؟! كبري هذي مايمدي .. لا عادي حنا بعصر السرعه يتزوج الواحد بالليل ومن اليوم الثاني بزرها على يدها ترضّعهـ .. ماكذبوا المسلسلات .. وبعد اسبوع إلى هو طيّار ولاّ عسكري .. مايلعب بعد .. وظايفهم زينة بس بومحمد خشمهـ منفرش ياربي لك الحمد .. لو يسوي تحسين نسل من هنا إلى بكرة مايمديهـ .. إن حسّن اكثر شي تجي خشوم عيالهـ تسنّ ودك تطلّعها بمنقاش .. منقاش لغير الناطقين بلهجتنا : مثل الحديدة اللي لها طرفين بارزين تطلّعون كلبو شي تبونهـ داخل .. مب تجي بكرة ناتفن خشوم عيال حارتكم الصغار .. ترى الصغار خشومهم تجي داخله شوي بس بعدين تنبت .. على طاري الخشوم تذكرت يوم كنا بالمتوسط كنا نتكلم عن شعر زينب العسكري وإنهـ زراعه .. وعن عمليات التجميل وكذا ومع الحماس الزايد والمنقطع النظير قامت وحدة من البنات وجهها مولّع من الحماس قالت : تعرفون نوال الزغبي ؟ خشمها زراعة .. خخخخخخخخخخخخ تبي تقول مسوية عملية تجميل في خشمها .. المهم إن حمود سعابيلهـ تقوطرن مع هالشقرا ذي .. ياويلي .. وانا اقول وراهـ سافهني منذو مدة ! منهي بنتهـ ذا المزيونة ؟! هيّن ياحموووود .. انا اورّيك قمت ورفّعت الثوب وبانت السيقان .. ونشرت الغسيل وانا أغني مـدري هو جت هزّة ارضية او انا بس احس كذا ؟! حسيت فيه شي اهتزّ من تحتي .. " أسمر سحرني جمالو جمالو .. ياجعل روحي فدى لو فدى لو " استنزلت عاد مع الاغنية مدري منهو ذا الجني المهبول اللي اطربهـ صوتي .. انا يقال ابي أغري حمودوهـ شوي .. ومير إلا ألتفت يمّ سطحهم إلى هو هاجّ .. مااشوف إلا غبرتهـ يا الله .. ماتتخيلون كيف شعور السحبة أليم ! حمود .. هذا وانا احبك وميّتّن فيك ..؟! طيب والرسايل اللي بيننا .. والقوابات (الجوابات) ؟! الله عاد وذا الرسايل ..! هي كلها ورقتن وحدة .. الظاهر ماكلتها بقرة قبل مايجيبها لي لا وقاطّها في سطحنا .. الله لا يورّيكم ماقريتها إلا بـ مجهر ! أكتب لكي بالمقلوب علامة الحب في القلوب .. اكتب لكي بالاحمر علامة الحب الأكبر .. مايخاشرني في غلاتس إلا حب الزعيم .. الزبدة إن حمودوهـ ناشبن في حب ذا الشقرا ! نزلت لأميمتي طيراااااان .. يــــمــــــــــــهـ ! " و صمّهـ ! " " يمهـ شفت لتس وحدتن شقرا تنشر ملابسهم تقطع القلب من زينها .. يمهـ حمود فاقّن خشته عندها وش اسوي ؟! " " يوووهـ ذكرتيني اليوم حريم الحارة بـ يروحون يزورونهم " " منهم ذولي ؟! " " مـدرس سوري جايّ يدرّس فيذا هو وأهلهـ " " مـدرس بعد ؟! تسني أشوف حمودوهـ يتمسّس قدّامهـ ويقعد االأول من عقب ذا الشقرا " " وش تهذرين انتي ؟! " " لا ابد يمهـ ولا شي .. تراني بروح عند سويرهـ بـ أتكّي عندها شوي " " رياح بلا رياح .. وشو لهـ ؟! .. البنت تنثبر في بيت اهلها " " هذا وانا طالعتن انشر غسيلكم بعد ؟! شوي بس مانب متأخرة " رحت ركض وألقط عباتي طيران لبيت سويرة .. رفيقة دربي وعزوتي .. صدز انها احيانا تجيب لي حلول مهيب لمّ درب أبد .. بس تظلّ من أوفى الوفيّات .. الله عاد من كثير الصديقات .. خخخخخخ سويرة وتخبّ ! " من عند الباب ؟! " " سويرهـ انا .. افتحي ! " " من انتي ؟! " " كوندليزا رايس .. الله من زين السؤال عاد من بـ يزوركم غيري انا وام حنفي " " حصيصة .. هلا والله وغلا " وتمطخني سويره ذيك المطخة اللي حسيت إني من بعدها مانب في وعيي .. ماودّكم ببعض الشوق ! " سويرهـ إلا على طاري ام حنفي وشو الأحمر ؟! " " وش أحمرهـ ؟! " وأعلّمها بالسالفه وتطقّها ضحك .. " وش دراتس انتي ذي علوم حريم " " بلاتس ماتدرين .. ياحرقة القلب ! حمودوهـ ذا الاشهب الألهب حاطّن عينهـ على وحدتن شقرا تقول أميمتي إنها بنت المدرس السوري اللي توّهـ جايّ " " حمود ؟! هههههههههه الله عاد اللي بتعطيهـ وجهـ ! تاركتن هالحمران العطران عشان تحب حمود ؟! حمود عاد ! " " ايه وش فيه حمود انتي ووجهتس .. سيد الرجال بسم الله عليه ! سويرة أسعفيني ماابيه يطير ثمّن تطير العلوم صدز .. من بـ يعرس عليّ بعدين ؟! " " في ذي صدقتي انتي بالذات لازم تضمنين مستقبلتس وتلزقين في واحد مايدري وين ربي حاطّهـ فيه لضمان السلامة يعني .. هو انتي تحبينه عادي نتقبل لايقين على بعض .. الخشوم الكبار للخشوم الكبار لكن هي مايصلح ! لكن تدرين .. عندي لتس اللي يطيّرتس عند حمود ويخلّيتس فوووووق " " تكفين ياسويّر وشو عطيني بسرعه " بعد دقائق .. "انهبلتي انتي ؟! انا اسوي تسذا ؟! والله لو تدري اميمتي ان تذبحني " " وانتي كل شي امتس لازم تدري بهـ ؟! خلاص سوي كل شي بسكات ! " شرحت لي سويرة الخطة وانا قلبي يرقع .. " وترى هذا هو اللي بيرجّع حمود .. غير تسذا مافيه انتي ماتساعدين وانا اختس بعذرهـ لا طالع في الشقرا " رجعت لبيتنا وانا امسّح دميعاتي وألعن في سرّي المدرس السوري وبنيته وزوجته وأهلهـ كلهم .. منوّل وش حليلهـ حمود راضي فيني .. وش فيها زود عني ؟! ان جينا للحق فيها كل الزود .. جسم وشكل وجمال وهـ بس ! يوم جا بالليل وجت حزّة قعدة حمود بالسطح بديت أنفّذ الخطة .. لبست فستان أحمر < طراهـ احمر الوالدة خخخخخخخ .. وكحلت عيوني ومطّيت الكحل كود يبان شوي وسع .. ولبست برقع سويرهـ اللي عطتني إياهـ .. طبعا مايحتاج اقول لكم الحكمة الجليلة من لبس البرقع .. عشان ماينشغل بشوفة الوجهـ ثمّن يوقف قلبهـ من الروعة ومايمدي ننفذ الخطة .. توكلت على الله وطلعت سطحنا .. طبعا من أهم الاشياء ان الفستان كان ضيّق تاكّني يا الله اتنفس .. شقى ! تذكرت كلام سويرة يوم تقول دوري بالسطح .. وسوّي نفستس إنتس طحتي إذا ماانتبهـ وقولي : آهـ .. عشان يبان انتس طايحة قمت أدور بالسطح تقل مهبولة .. صدز الرجال مايملى عينهم إلا التراب ! نزّلت الملابس ونشرتهم من جديد 10 مرات .. وسويت حركات سويرة كلهن وزدت من عندي .. أثرهن سهلات مايبي لهن شي ! ابد .. هه و هه وإلى حنا خالصين .. هه : كلمة مشفّرة ومع ذلك .. ياهالشقرا ماكلتن الجوّ صدز ! تبون الصراحة تعبت .. في رواية تحطمت نفسيتي انا المسكينة الناعمة الرقيقة وانا قاعدة بـ حزن .. وناشرتن رجليني وطالعتن الركب والفضايح كلها .. ماانتبهت إلا والصوت اللي يقول : والله من الشهابة يا حصيصوهـ ! حمووووووووووووووود ! ضفيت قشي ولعنت سارة وطوايف سارة اللي خلتني اسوي هالشي .. وقررت قرار مابعدهـ .. " يمهـ .. انا بسافر مع خالي عليان هماهـ بيروح ذيك الديار يدرس ؟! " " يا الله لا تخسف بنا ! وش يودّيتس في ذاك ؟! وبدون أهلتس بعد ؟! " " بروح اسمكر عمري .. كل الناس سلكوا إلا انا .. كود لا رجعت يعرس عليّ الملك عبدالله ولاّ حدى هالمقرقشين خلنا نحس بالنعمة اللي يحسّون بها .. اعنبوكم حتى الرزّ ماقمنا نشوفهـ إلا بالسنة حسنة .. في العزايم الكبار (صورة مع التحية لوزارة التجارة ) خلوني أروح أضبط عمري تبيني اعرس انتي ولاّ لا < طراهـ ان اهم شي العرس " " اجل تبين تقعدين علة في تسبدي ؟! " " خلاص .. خليني اروح هما الجمعية بتجيتس ذا الشهر هاتيها واعتبريها دين ولين جيتس واعرست ان شاءالله على ذاك المقرقش رديت لتس الضعف " شاء الله ورحت مع خالي بعد طقاق وهواش وصل للحكومة كلهـ عشان ذا السفرة .. وتسلفت اميمتي زيادة على فلوس الجمعية دريهمات عشان تساعدني في سفرتي .. سفرة تحديد المصير ! يااكون أو لا أكون ! يوم جا موعد الدكتور .. " دكتور .. انا انسانة يئست من الحياة .. ابي اصير غير .. تعرف نجوى فؤادي ؟ ابي مثلها " احس ان ذا الدكتور يدربي راسهـ مايدري وش اقول .. " سوف هادا خسم سوي كدا .. أأشّر يعني خله واقف .. هادا سأر سوي نائم مررررة شعري ابيه ناعم .. ووو انتا سوف فيه كتير مشكل " فيه كلام مشفّر عشان الرقابة ماله داعي .. ياربي ياهالدكتور الاطخم ساكت .. بعد صمت طويل غلبني فيه النعاس " بدّي اعملّك اشياء يا حصة بتخليك حلوي كتير كتير " واااااااي قلبي .. لبناني ! " سوّ اللي تبي يابعدي .. اقطع وانطل عادي ترى فداك كلبو شي " " شو حلوين حكياتك .. بكرة بدنا نبلّش خليكي مستعدّي " جا يوم الحسم .. والله ياهم قطعوا ورموا من اجزاء جسمي المسكين .. يوم قمت من النوم وإلى جنبي كيس بلدية كبير .. مكتوب عليه : مخلفات نووية ممنوع الاقتراب .. واشوف طرف خشمي من فوق .. لاابوكم خشمي مخلفات نووية ؟! منعوني اشوف مرايتن تظهر محاسني ومفاتني < مازلت مصرّة .. احس بألم .. الظاهر الدكتور نفخ لي نفيخات صغار .. " يسعد لي هالصباح .. شو هالحلو ؟! مبيّن كتير حلوي .. " " والله ان جينا للحق ياخشّتك تتلّ القلب تلّ " " هلّأ بدنا نفرجيك النيو لوك مستعدّي ؟! " حطوا عندي مرايتن كبر ابليس .. تلقّ لقّ وخلوني ألفّ شوي شوي عشان اشوف خشتي بعد السمكرة في هذه اللحظة المؤثرة .. سُمع صوت اصطدام جسم بالأرض بعنف " آهـ ويني فيهـ ؟! راسي يعورني " " حصة ؟! انتي وئعتي من شان شفتي صورتك بالمراية " " الحين تبي تقنعني إن اللي في المراية انا ؟! يارجّال سقها بس ! " طلّع لي مراية فجأة .. وانا اللي اصرخ ياهي خشّتن مزيونة شفتها ! طبعا اتّضح بعد جهد جهيد إن هذي خشتي انا حصيصة وبكل فخر واعتزاز .. وانه الآن يمكنهم ترحيلنا إلى ديارنا بسلام .. شكرت الدكتور وعطيتهـ حقّهـ وفوقهـ خشمي الاول هدية ذكرى .. احد حاصل له ! ورجعنا للديرة .. رجعت بإحساس جديد .. ما عادني حصيصة التافهة اللي تحب حمود لأانها مالقت غيرهـ .. سوّت امي عشا كبير بمناسبة رجوعي بالسلامة .. على شرفي الله يحفظني ويرعاني وانهبلوا الحريم عليّ ولا صدّقوا انه انا .. لين كشفت لهم شامتن ماقعد احد ماورّته امي ذا الشامة يوم اني نتيفهـ .. في متسانٍ بعيد قامت كل وحدة من الحريم تتلزّق تبي تخطبني ومنهم ام حمود .. لكن هيهااات ياحمودوووهـ .. كبر راس اخوي سعيدان لأني صرت بنتن مزيونة وممكن يخطبني حدا هالمريّشين بكل سهولة .. وصرت حديث الحارة ! حتى سويّر قامت تغار مني ولاعاد تجيني وتكلمني مثل اول .. مع ان الشكل هو اللي تغير ولاّ القلب هو هو .. وذات مرة طلعت السطح < يدور الزمن والايام تمشي ولكن مازالت طلعات السطح ونشر الغسيل من العادات والتقاليد .. وإلا اللي فاقّن خشته عندي .. " حمودوهـ .. وشلونك ؟! " حمود تقوطرت سعابيلهـ .. انهبل " حصيصة .. وش ذا الزين ؟! وين كنتي مختفية عني ؟! " " الله يخلي لك هالشقرا بس ! " " بس انا مااحب غيرتس ياحصيصة وانتس عارفة ذا الشي " " تحبني ؟! خلاص من حبكم ياحمووود عزّلنا ! " مايستفاد من الخنبقة : _ الجمال هو جمال الروح .. صدق يجذبنا الجمال الخارجي واحيان ننبهر فيه وننخدع لكن المهم هو القلب .. ولاشيء غيرهـ ! _ عمليات التجميل صارت على قفى من يشيل .. والله سبحانهـ خلق الانسان واحسن خلقهـ فـ ليش اروح أغيّر الخلقة اللي ربي خلقني عليها ؟! إذا فلان من الناس مارضى فيني .. اتوقع الرضى ماراح يجي حتى بعد تغيير الشكل .. فليكن التغيير من الداخل .. فـلنرقَ بأخلاقنا .. وتعاملنا .. والأهم بـ ديننا .. ونرى كيف هو التأثير الفعّال ! _ الحب شيء ثمين جداً واللي يحبك حافظ عليهـ وتمسّك فيهـ .. حافظ على أهل القلوب النقية .. ما كلّ يوم تلاقي منهو يحبّك مع خالص الود ..
.. اللهـُمّ وفـّقنـِي لـِكُلِّ عمـلٍ صـالحٍ ترضـى بهـ عنّـي ,وقـرّبـنِـي بهـِ إليـك زُلـفى ... أسـتغفركـ ربـّي وأتـوب إليـك ..
23-10-2007, 07:49 AM
... خلاص من حبكم يا زين عزّلنا + 18
العرض الشجري
