صح لسانك

والله يعطيك العافيه

وانا لله انا اليه راجعون

اخوي نايف السعود

الله يرحم الشيخ بندر ويغفر له
ويسكنه فسيح جناته ..!!
ومالنا إلا الدعاء له أن يتغمده الله بواسع رحمته

لكن الطامة أخوي نايف
ان تجير هذه القصيدة باسمك
وتذكر بأن الحزن تملكك
وتذكر ايضا ان مشاعرك أتت بهذه الأبيات

- الموقف لا يحتمل الكذب ومشاعرنا حزينه
- إذا لم تحترم حرمة الشهر الفضيل فـ خف من الخالق جل جلاله
- سرقتك للقصيدهـ ليش فيها احترام لوالد الشلهوب ولا لوالد كاتب القصيدهـ الأصلي - رحمهم الله -
- ماشاء الله عليك عندك موهبة في تقليب الأبيات وتقديم وتأخير بعضها

القصيدة للشاعر ( فيصل بن حمد العجمي ) كتبها رثاء في والده رحمه الله
وأنت جيرتها باسمك وهذا لعب بالمشاعر في هذا الموقف ..!!

( سيتم رفع اسمك للإدارة )


:: هنا القصيدهـ الأصلية ::

جرح العيد

يوم قالوا عاد عيدك قلت وجه العيد ماله
وش بلى وجهه عبوس وطلعته بالحيل شينه ؟؟

ما يعـيّد غير قـــلب ٍ من عـنا دنياه داله
وإلا أنا عيدي لك الله بالمواجع فات حينه

يوم قالوا عاد عيدك قلت ما عندي جماله
وين عيدي يا جماعه دام أبوي العيد وينه

وين من لا عاد عيدي قلت جعل العيد فاله
وين من دنياي تمطر بالفرح قدام عينه

والله أن العيد دونه واهج ٍ زاد اشتعاله
واهج ٍ تطبخ به عروقي وخلاها وهينه

كل ما أذكر يوم أجي يمه وأنا بالحيل والــه
احتضن صدره .. واقبّل جبهته وانشق يدينه

كان ذاك العيد والدنيا على شوفه سهاله
وكانت الأيــام في لقـياه والـدنيا حسينه

آآآه ..... يا رمح ٍ بقلبي شق صدري وارتكاله
آه يا حد السيوف اللي على عروقي سنينه

من يلوم اللي فقد شوفه ومنطوقه وحاله
من يلوم اللي انقطع قلبه وراسه مع يمينه

ما على شوفي حسافه بعد ما اقفت رحاله
وما على عمري حسايف بعد ما وقفت سنينه

غاب عني .. من على الطولات ما يوجد مثاله
واندفن بالأرض والتربة غدت بيني وبينه

غاب عني .. ضلع شامخ كنت جالس في ظلاله
في نهار ٍ ما ضوى في خير .. في ليله غبينه

لو يحس الموت في حـر المفارق وانفصاله
كان قدّر كل حي وكب مضنون لضنينه

أختلج في حسرتي وأكتم خفوقي وانفعاله
وانتحب من لوعتي والقلب ما يقوى حنينه

واختنق في دمعتي والياس به غل ونكاله
كني اللي صار بأطرافه كسور وغرغرينه

آه ليت الموت يرضى يوم .. وجاء ياخذ بداله
كان قلت اختار بين الناس وأولهم جنينه

كان قلت .. وكان قلت .. وقدرة الله لا محاله
ما تصيب إلا حبيب وما تغيب إلا دهينه

والقدر .. محتوم بأيامه .. ومحتوم بـ ليالـه
وكل عمر ٍ تحت ربي بالبشر ماله ضمينه

يا يــبه .. حزني عليك أكبر من الكون وجباله
لوعتي بك يا غناتي داخل ضلوعي دفينه

فجعتي بك يا ملاذي ما بها عندي بساله
فجعة ٍ هزت زحازيح العرب ما هي هوينه

كل من جاه الخبر صد وكنين الدمع غالـه
حلم .. وإلا علم .. ما هم علم موته محتوينه

يا يــبه .. يوم أتهجى كل وجه ٍ وانذهاله
قلت يا كف القدر هو ليه عنهم تاخذينه ؟؟

ليه أخذتي من يمينه طيبها ما به ضحاله
شمس طيبه بالمكارم .. للخلايق مستبينه

الرجاله .. والشكاله .. والجماله ..... والعداله
عادته وعزه ومجاله .. وانشد اللي عارفينه

الكرم والجود عنده طيب جوده للرجاله
والوفــا عادات كف ٍ بالوعد دايم أمينه

الشجاعه .. والبتاعه .. رمز وأفعاله دلاله
والثناء والجود دايم .. ملازمه كنه قرينه

بالعطا مدت يمينه ... ما درت عنها شماله
يشهد الله بالعطايا ما ذخر حاجه ثمينه

يوم كل ٍ بالخزينه قام يرصد راس ماله
شفت مثله ما يطالع وش جمع وسط الخزينه

والله أنـه كم تــمنى تصبح الدنيا حلالــه
لأجل لامنه عطاها بالكرم تعطيه دينه

والله انه لا تكـــلم تاقف .. الريح لمقاله
كلمته تشبه صفاته كلها دايم رزينه

كنه الماء لا شربته .. ما تبي تشرب بداله
كنك اللي كان جيته .. جيت لحصون ٍ حصينه

والله أنه ضلع شامخ لأرتـــكـى للحمل شاله
كـــفه البيضاء وفــــاها للـــوفاء دايم رهينه

بالجمايل كل فعله ينــحسب طيب وجماله
والبياض اللي بوجهه نور من صافي كنينه

من طهوره يطهر الماء .. وان شرب يشرب زلاله
ما لقيت أطهر من أرضه غير مكة والمدينه

والله أن المجلس اللي من دخل للبيت جاله
فاقد ٍ صوته .. وجدرانه على موته حزينه

والله أن البيت موحش .. والزمن بـان اختلاله
ظلمته .. من بعد راع البيت توحش ساكنينه


كل فنجال ٍ سألني ؟؟ والحطب ينشد دلاله
والمراكي تنشد الجلاس راس الطيب وينه ؟؟

والله أن المسجد اللي عوّده كثرة وصاله
يحتريه .. ولابس ٍ له منبره بالدين زينه

والتراب اللي على دربه فقد ماطى نعاله
عارف ٍ ماطاه .. والتربه تحت رجله فطينه

من ينسي ؟؟ سبحته .. سجادته .. لـبسة عقاله
من يرحمهن وهن ما يسمعن صوته ورنينه

وادعــنه يوم راح .. وقــــالن الدنيا عجاله
وأحرقـــني دموع ٍ في ضمايرهن دفــينه

جيت أواسيهن وأقول .. الوقت والعمر وزواله
وأثرني عبد المعين اللي يبي له من يعينه

من يعزي كل حاجه باقيـــه تذكر خياله
ما هقيت احد ينسي هن وينسى والدينه

يا يــبه ... واللي خلق آدم وخلا له سلاله
أن حالي بعد موتك موجعه .. والحال طينه

يا يــبه ... والعيد بعدك جرح ما يقوى احتماله
بس أصارع بالمحاني صرخة ٍ تصرخ سجينه

كل شي ٍ عقب شوفك معتليه الحزن هاله
وكل جرح ٍ في خفوقي لو سكت تسمع ونينه

يا الله المعبود يا رحمــــن يا رب الجلاله
يا ألــــــه .. كل أبونا ساجدين وطالبينه

يا عظيم الشان .. يا رب ٍ تنزه في كماله
كل أبونــــا نرتجيه ونبتغيه ونستعينه


يا رحيم ٍ .. باعث ٍ محمد لتبليغ الرساله
مرسله بالحق والقرآن وآيـــات ٍ مبينه

فارج لأيوب من بلواه .. وأرسلت الشفا له
يا منجي من مشى مع نوح وأرسيت السفينه

يا الله أنك ترحم اللي مات ... وتكرم نزاله
وأرزقه بالجــنه اللي تحضنه وتسر عينه

يا الله أنك تجعل الرحمه من جنانك ظلاله
و زد خفوقه مع نبيك والصحابه طمانينه

وصـبّــر .. اللي ما تحمل غيبته والهم ناله
وأجعل حباله على تقواك والعروى متينه

قلتها بالعيد .. يوم العيد ما جاوب سؤاله
كلمة ٍ تبكي على اللي راح ما شال الظغينه

والله أن الشعر لو يرثيه .. ما ياقف قباله
ما يوفي كل شعري .. حاجة ٍ من ربع دينه

يوم قالوا عاد عيدك قلت وجه العيد ماله
شايف أن العيد شين وفرحته بالحيل شينه

والله أن العــيد ما هو عــيد للي ضــاق بالــه
لوعة الفرقى من أغلى الناس بضلوعي مكينه

والله أن العيد اخبره في ثرى أبوي لحاله
مات من عشرين ليله برمضان وحان حينه ..