..
يقولون راح ..
انت صدق رحت ؟!!
طيب ليه ومتى ..
والحين وينك ..
وهل في روحتك مرتاح ؟!!
...
ايــــــــــــــه
ذكرت ..
ذكرتك يوم تتنهد ..
تقول وخاطرك مكسور :
"ضاقت بي الدنيا يا ريما ..
ابي ارتاح يا ريما "
وقتها رديت :
"انا ريم .. مو ريما "
ابي اكسر ملل هالحزن ..
واغير "مودك" المظلم ..
تقول : "وهي بتفرق !! .. ريم او ريما..
اسامي في مهب الريح مدام ألقاب تحكرها"
واحط الملح على جروحك .. واحسب اني اداويها ..
- "يا نواف .. ترى ألقابنا زينه .. واهلنا اطيب من الطيب "
- "اطيب من الطيب لكن طبعهم به عيب ..
هذا نواف ولد فلان .. الي جدهم منصور
يدرس هندسة ويبني دور ..
كأن دراستي ما ارضت مطالبهم !!
يا ريما .. انتي بس تخيلي ..
يقول لي : اسمع يا ولد منصور
وكأن اسمي تبخر
اسم جدي في عينهم أطهر ..
اسمع يا ولد منصور
إذا بتجلس مع العالم .. غير لبسك وشكلك
لابس ثوب .. فبها شي !!
طيب شعرك .. لو جدك ، جاء وشافه
بتقوم الدنيا وما تقعد
ولد منصور يطول شعره مثل البنت !!
يا ريم انهنت ..
اجل انا .. كني بنت !! "
...
كلام كثير سمعته منك يا نواف ..
كلام كثير زلزلني وبديت اخاف ..
تقول : " فكرت .. وباستخير الله "
- "في ايش فكرت يا نواف "
- " قررت"
- " وش قررت"
- " باهاجر يا ريما ..
غدت هالدنيا ما تنطاق ..
مواجيب وحبة خشم .. وحبة راس ..
وأنا طالبك .. قل لي تم
أنت تآمر .. سَم يا عم ..
أحب المرجلة يا ريم ..
وأحب الجود وطيب الساس ..
وأنا جدي بكرم حاتم .. وابوي امواله ملك الناس
ولكني ابي دنيا .. بفكر وفلسفاتٍ غير
ابي امشي ولا يقال
يووه مشى ولد منصور .. يووه شوفوا وش لابس !!
يووه فشلنا .. يووه .. مهوب ولدنا ..
ابي الحريــة يا ريما ..
لا جابر .. ولا مجبور .."
...
وبصوتٍ تخنقه عبره : "ووين بتروح .. يا ...... يا نواف "
- "تدرين يوم سكتّي شوي قبل اسمي .. هقيتك مثلهم صرتي
قلت الحين بتقول لي : يا ولد منصور "
- " يا نواف .. انت ولد منصور .. وش فيها اذا نادوك باسم جدك ؟ "
- "يا ريم .. احب اسمي واسم جدي ..
ولكني انا نواف .. وهو منصور ..
كأن اسمي ما اعجبهم ..
ولا يقهرني الا قول اجهلهم :
هذا ولد منصور .. الي يبني دور "
- "قلتها يا نواف .. اجهلم "
- " اجهلهم او اعلمهم .. تعبت .. تعبت أنا منهم "
- " من هم ؟!! "
- " أهلنا وأهل ديرتنا ..
يا ريم صدقيني تعبت .."
- " واذا هاجرت يا نواف بترتاح ؟ "
- " مدام اني بعدي عنهم .. اكيد اني ابرتاح "
- " واهلك .. وأمك .. وانا .. حبيبتك ريما "
- " يا قلبي يا ريمو .. تدرين .. ترى (ريمتي) احلى "
- " طيب يا نوافي .. لوين بتروح "
- " بروح لدبي .. دار الحيّ
ابحيا هناك حياة غير ..
بأعيش بعالمي حرٍ .. احلق في الفضا كالطير ..
ببني دور .. لالا .. قصور ..
وببني لك قصر عاجي ..
اببنيه بسور عالي ..
لجل محد يجي ويشوف اميرتي الحلوة ..
لأنها اميرتي وحدي .. اميرتي لحالي ..
- " يا نواف .. فيك منهم !! "
- " من هم ؟ "
- " اهلنا واهل ديرتنا "
...
ثلاث ايام من قالوا .. " رحل نواف "
ثلاث ايام مدري كيف مرت بي ..
وكيف اني كنت اقضيها ..
اكيد انك وصلت دبي
بتتمشى وتتفرج
بتشوف اجناس .. وتشوف الوان
اكيد انك بتتعرف على وحده من بنات دبي
روضة .. او ميثاء .. او علياء
وبتنسى حبيبتك ريما
ريمتك يالزين .. اميرتك يالشيخ
اقول لك شي يا نواف ..
بنات دبي اساميهم ابد مو شي
تخيل بكره وليدك .. يسمي بنيته (روضة او ميثا او علياء)
واذا قالوا (أهلنا) ليه ؟!!
يقول : " على امي ، والثانية موزه على يدتها ام امي "
متخيــــــــــل !!
زوجتك اماراتيه ..
وخليتك تجيب عيال..
كله منك يا نواف ..
...
تخيلتك مع وحده ..
ابوها مواطن وامها من بلاد المغرب الاقصى ..
اسمها حسنا ..
تخيلتك تناديها ..
يا للا .. يا حسنا .. يا للتي حسنا .. يا اللا حسنا
مثل ما كنت تناديني
يا اميرة .. يا ريما .. يا اميرتي ريما .. يالاميرة ريم
تمسك يدها بقوة ..
وتدخل معها للمقهى ..
وتطلب لك كابتشينو ..
اعرفك زين .. تحبه حيل .. أكثر من قهوة بالهيل
وهي بتطلب طلب مثلك
فجأه ترتبك حسنا ..
ومع الربكة يطيح الكوب .. وتتوسخ عبايتها
ابوها .. ابو حسنا ..
شايبٍ اسمر .. ولابس غترة خضراء
يجي صوبها ويضرب وجهها بكفه
تخيلتك تناظر ..
تبي تعرف وش القصة
ولا تدري ..
ولكنك من الظاهر ..
تعرف انه ابوها
وانه انصدم في البنت .. وجاها الرد بالحامي ..
تخيلتك تقول لنفسك بصمت :
"انا مالي دخل فيها ، هي الي جت ، وهي الي بغت تعزمني
وبعدين انت ، يا هالشايب، وش الي عرفك بامها غير عزيمة بمقهى
انت وأمها اشرف .. هه .. لا تحاول تقنعي"
...
يا نواف ..
ثلاث ايام وانا اتخيل ..
ثلاث ايام وانا اهوجس ..
ثلاث ايام اتعبني فيها التفكير ..
والشوق ..
آآه يالشوق ..
لا حس ولا خبر ..
ثلاث ايام اسمعهم ..
نفس الكلام يعيدونه ..
كأن هذا هو الي يبونه ..
نوره : ريم دريتي .. نواف سافر ..
مها : صدق والله .. لوين سافر
نوره : مدري .. بس سافر
يقولون سافر ..
وانا اقول هاجر ..
ثلاث ايام اردد هالكلام وأنهار ..
مين بعد بيغني لي " اسافر عنك وتسافر معايا"
يا نواف .. لا تسافر ولا ترحل .. خلك هنا اجمل ..
من بعدك بيغني لي (الأماكن) .. ويعزفها على العود
ويبكيني الا من قال : "وما بقى بالعمر شي .. واحتريتك"
آآه يانواف ..
احتريتك وباحتريك ..
وبردد لحن ما اعرفه " يا حبيبي دخلك عود .. دخلك عود"
...
ومرت هالثلاث سنين ..
عفواً
هالثلاث أيام ..
وجاء خالد ..
خويك وخالي ..
كان من الفرح بيطير ..ووده يخم اي واحد
" رجع نواف يا اخيّه .. رجع نواف يا ريم"
سألته امي بكل برود : " وهو وين راح"
- " راح لعند بيت الله .. في امره بيستخير الله "
نطقت ومدري كيف قلت : " ودبي"
غمز خالد : " ومن جاب طاري دبي .. لا دبي ولا جده "
وألتفت لأمي : " ترى نواف بيزوركم بكره "
وبغمزه ثانية علّق : " ولا ادري يا ريم وش عنده "
...
تمت
24-08-2007, 08:10 AM
[ .. ياخير من سافر ويا خير من عاد .. ] (قصه)
العرض الشجري
