السلام عليكم ورحمة الله وبركاته
كيفكم حبايبي اتمنى انكم كلكم بألف خير؟!
اول شي اتمنى ان الموضوع يعجبكم
انا راح اطرح الموضوع على شكل سوالف معكم
اول شي بقولكم شرايكم بالروايات(الرومانسيه)؟
طبعا للي سبق له أنه قراها
حياه حلوه صح
واللي ما قراها؟ اقول فاته نص عمره
اما اللي مايحب القراءه فما اقدر اقول عليه شي ..
المهم انتوا أكيد كل واحد فيكم يقول وش هالموضوع!!
موضوعنا ماهو الروايات لكن الحياه اللي فيها ،،
حياه حلوه كلها سعاده انا مااقول ان كلها سعاده وفرح لكن الغالبيه
وحتى لو بدت بحرب لازم تنتهي بشي حلو ،،
بتقولون الروايات كلها خيالات مالها معنى
لكن أنا أقول ماهي خيالات هي واقع يعيشونه الكتاب من حولهم
ويترجمونه على شكل روايه ،،
تصدقون من كثر ما حبيت الروايات صرت ودي اعيش هذي الحياه
حياه حلوه كلها حب وسعاده،،
اكيد الحين تقولون في عقلكم وشفيها هذي تبي تعيش حياة الأوربيين والأجانب
وأنا أرد وأقول أي أبي أعيشها
بتقولون طيب ليه؟؟؟؟؟؟؟؟
أنا أقولكم ليه؟
لما تكون عايش بعالم كله صدق حب تفاهم سعاده أكيد الكل راح يحب هالعيشه صح
وأنا الحين راح أقولكم على نقاط مهمه وفروق مابين عيشة
العرب وعيشة الغرب
طبعا هذي الأشياء المفروض تكون عندنا وحنا أصلها لكن ما أدري وين أختفت هاذي الأشياء
نبتدي بالفروق/
*العلاقه بين أفراد الأسره عندهم وعندنا
_نبتدي بالعلاقه بين الزوجين
عندهم قمة الأحترام
والحب والصدق
وحفظ حقوق الزوجه
ومراعاتها من جميع النواحي
مساعدتها في كل شي
حتى فالبيت..
اما عندنا عكس هذا لازم الرجال يكون شخصيه الزوجه مستحيل تقوله لا
هو دائما على حق وهي دائما خطأ
اما الحب عاد هذا ضايع بالمره
المسكينه تجلس طول عمرها تراعي هالزوج حتى من كثر حبها له مافي على لسانها الى سم وآمر وتحت أمرك ومع كذا يجي ويتزوج عليها وحده ثانيه جزاءً لها
اما عن مساعدة الزوجه بالبيت فمستحيل لأنه رجال واذا ساعدت أكيد راح تهتز هالرجوله وكيف اسيطر عليها بعد كذا..
والا اذا جاتك الزوجه مغروره وخلت هالزوج خاتم بصباعها سو كذا سوى لاتسوي كذا ماسوى
والا أهلك قالوا كذا وصار انا مااقدر أقول الى الله يعينه على بلواه..
وطبعاً هذا ماينطبق على الكل لكن الأغلبيه
وأكيد في أزواج عايشين بسعاده وحب ..
_نجي لعلاقة الأولاد بأبوهم وأمهم
وعاد هاذي اللي نعاني منها كثير عندنا
عندهم حنيه حب
الأب والأم يسمعون لعيالهم
تحس ان علاقة الأولاد مع أهلهم وكأنهم أصدقاء مش أبوا وأم
اما عندنا علاقة الأب والأم بعيالهم كلها سيطره
انا ابوك لازم يكون في حواجز وعوازل لما تبي تقول لأبوك أو أمك شي يبيلك كم يوم لين تقولهم الشي اللي تبيه.
مستحيل مستحيل يكون الأب صديق لولده والأم صديقه لبنتها
وأكثر شي ماهو حلو عندنا الحوار حنا ماعندنا لغة الحوار بين الأولاد مع الأب والأم
وإذا في موضوع قلته مثلاً لأبوك ورفض مستحيل تناقشه وإذا جيت تناقشه راح يقولك الموضوع أنتهى ولو حاولت تناقشه راح يقولك انت تعديت حدودك او طولت لسانك علي..
ومع كل اللي قلته أكيد في ناس متفاهمين مع أولادهم ويسمعون لهم
راحاقولكم عن قصة واحد يقرب لي هذا الشخص متزوج جاته بعثه عشان يدرس الماجستير في بريطانيا فالبدايه راح هو بدون عياله وجلس ثلاثه شهور ورجع مره ثانيه السعوديه وخذ عياله وزوجته ورجعوا لبريطانيا المهم لما جاوا السعوديه زياره بعد سنه وكأنهم ناس مختلفين عياله ماراح اقول انهم كانو سييئين او شر لكن كان يبي لهم يتأدبون شوي لماشفتهم بعد مارجعوا قمه في الأدب الأحترام مافي أي أحد يتلفظ بألفاظ على أخوه او على أي أحد من الأطفال اللي يلعبون معهم ماعندهم الى نظام واحترام وكل علوم زينه
حتى زوجة هذا الرجال وهو صاروا غير حتى في تعاملهم مع اولادهم
ولما سألت قريبي عن سبب التغير قال انا شفت تعاملهم في بريطانيا مع اولادهم واخذت أزين ماعندهم وقالي عندهم مراعاة للطفل بشكل غير طبيعي ماهو التربيه عندنا كلها ضرب والى دلع زايد ولما يكبر الشاب والبنت عندنا يخربون ولما ترجع لسبب خرابهم يطلع التربيه الخطأ
_نجي لعلاقة الشخص مع الناس والأصدقاء والمجتمع من حوله
عندهم ألتزام صدق أمانه
وراح أقولكم على مثال للأمانه
عندهم تصدقون أنهم فيي قاعة الأختبارات في بعض الدول ماعندهم مراقبين يراقبون على الطلاب
اما عندنا حتى وفي مراقبين ومع كذاالغش ياكثره عندنا وفي كل مكان والغش ماهو مقتصر على الأختبارات
وعلى سالفة الغش راح أقولكم عن قصه عانيت منها الفصل الأول هي مره وحده لكني شفتها
هذا ياطويلين العمر في أختبار نصف الفصل حنا عندنا بالكليه أول مره يسوون هالنظام ويخلون ثالث مع أول في قاعه وحده وقسموا البنات بحيث أن يكون خط لأول واللي جنبه لثالث المهم كان الأختبار اللي علي أختبار انجليزي وأختبار اللي على أول ما أدري الشاهد فالموضوع مع زحمة البنات بالقاعه وحضي السئ خلاني أجلس بين بنات يغشون طبعا هم سنه أولى وانا بينهم سنه ثالثه المهم بدينا الاختبار وابتدت معاناتي قاموا اللي جنبي واللي قدامي يغشون من بعض وكل وحده تعلم الثانيه المشكله انهم يتكلمون بصوت طبعا والمراقبات ماعندك أحد وانا ماعرفت اكتب أي شي على الورقه حتى قمت أطالعهم باستغراب لكن ولاكأنهم يشوون شي
المهم اني ما قدرت أحل الا لما حضرتهم خلصوا غشهم وطلعوا من القاعه
المشكله واللي اعتبرها انها أكبرمصيبه انهم طالبات دراسات إسلاميه ومع كذا يغشون لكن اذا ماخافوا من ربهم اللي يشوفهم أكيد ماراح يجيبون خبر للمراقبات
ومع كذا أكيد في ناس وأصدقاء صادقين وأمينين وال ما كان
عشنا بسلام
وأكيد في أصحاب صادقين مع اصحابهم ويحبونهم ازيد حتى من نفسهم..
لكن فالأغلب كلهم أصحاب مصالح مصالح وبس
بالنهايه
اتمنى الموضوع عجبكم
واتمنى انكم تشاركوني برئيكم
وحبيت أشكر أختي (بيلسان)
اللي ساعدتني بترتيب الموضوع CC
بانتظار آرائكم