*
*
*
هلا وغلا بالحلوين ..
منذ مبطي ماكتبت بالعام ..
احس ان لي فقـده صح

العنوان يوضح مضمون الموضوع ..
واللي مايفهم مشكلته

موضوعي وفكرته جت بعد ماكانا انا وحالي الذوق
في سفرهـ خارج السعوديه .... : <= حدكم البحرين لايكثر

كنا جالسين نتقهوى في احد الكوفيات بوسط السوق
مر من جنبنا شله بنات ومعهم ابوهم مدري اخوهـم ..!

الزبدهـ قلت لحالي وش ذا اخوهم مايستحي
كيف مخلي اخواتهم يفتشون ويلبسون هاللبس ..!
يعني وشلون ماعندهـ غيره على اهله

قال يافيصل هذا يسمونه الانفتاح
قلت الا والله هذا الانفسـاخ


..// اعتبروا اللي فوق مقدمه للموضوع //..


انا الحين بتكلم في الموضوع وادري واجد بيقولون معقـد ..
لكن وش اسوي هذي نظرية بعض الناس ومانقدر نقول لهم ..

الانفتاح الحين صار بشكل انفسـاخ ..
بتقولون لي كيف ؟

صاروا السعوديين بالذات يعتبرون الانفتاح
انه التحرر من العادات والتقاليد
وكذلك مخالفه الامور الدينيه وللاسـف .. !

مرهـ من المرات كنت اسولف انا وواحد
كان الموضوع يدور حول قيادة المراءه ( ترى مانبي ينقلب الموضوع هل تؤيد قياده المراءه او لا )

المهم في الامر اني كنت انا رافض
قال لي انت متحجر وعقليتك متخلفه

قلت له يااخي انا مابي احد من اهلي يسوق !
قال خلاص لازم تصير متفتح وهالشئ مافيها عيب ولا شئ

قلت اها بس لايكثـر .. يااخي انا اغار على اهلي انت ماتغار بكيفك


\
/
\

مرهـ كنت انا واهلي بالطيارهـ مسافرين قبل سنين كثيرات ..
كانوا قدامنا عائله وش حليلهم حسيت انهم يقربون لنا
من لبسهم للعبايات

مادريت الا وحنا قبل مانوصل الا وماعليهم ولا شئ
لاتفهموني غلط يعني اقصد ماعليهم عبايات

قلت يمه وراهم تسذاا ؟
قالت هذولي متفتحين وعادي عندهم هالشئ ..

قلت اها ياحليلهم


\
/
\

الانفتاح السعودي

مسمى دخيل على مجتمعنا ..
اجتاح ودخل بقوهـ على عقول اهالينـا ..

اصبح الكل يتسابق وللاسف لتطبيقه
من اجل ان لاينعت بالمتعقـد او قديم التفكيـر ..

صار الابو او الولد يعطي اهله او زوجتـه ..
الحريه الكامله في كل شئ في اللبس أو الخروج والدخول وحتى في الاخلاق وللاسـف ..!

يعني صار الولد الحين يغازل قدام اخواته ..
ويتفاخر قدامهم حتى بعض الاحيان يستعين بهم في المغازل

ولو تكلمه تقول ماتستحي وش تقول لأخواتك عن هالاشياء..
قال يااخي انت معقد خلاص العالم تفتحت وصار شئ عادي ..


في المقابل بنت اهلها يبشرونها بالسفر لخارج المملكه ..
تقول الله ونا1111سه بس بشرط نفتش ونطلع لحالنا ولاتحكمون فينا ..

يكون الولد وقتها غيور على اهله يقول لا خير مافيه فتشه
ولا وقسم ماتسافرون معنا ..

ترد البنت وبااعلي صوتها يااخي انت معقد متخلف
شف اخو صديقتي وحتى وهم بديرتهم يخليهم يفتشون ولا يقولهم شئ
يااخي العالم تفتحت لين متى انت عقليتك كذا


\
/
\

اعضـائنا احبائنا
اولادنا فلذات اكبادنا
ههههههههههههههههههههههههههههه

<- مسك خط

هذا هو مووضوعي قد لايكون بقد المقام
ولكن اعذروني لاني مبتعـد عن الكتابه منذ زمن طويل <= منتب عاقل ياغازي القصيبي
حتى بالجامعه صرت مااعرف اكتب



:: اسئله للنقـاش ::

س1/ ماهو مفهومك عن الانفتـاح ؟ < = احس سؤال صعب على بعضكم
س2 / هل ترى باان الانفتـاح بالفعل اجتاح بيوتنا ؟
س3 / ياترى هل كل شاب يغار على اهله يعتبر معقـد ؟
س4 / حدود الانفتـاح بالنسبه لك كشاب او كفتاة ماهي تجاه نفسك وتجاه اهلك ؟


\
/
\

الموضوع اهـداء لروبن هود والهرش والمزن BBP ..
اكيد ملاقيف وبتسألوني ليه هم بالذات ؟
بس عناد منيب معلمكم
وطبعا ماانسى اهدي الموضوع لكم وخصوصا كل من يتابع كتاباتي
<= امش يالثقه

وشذا وانا خالك

وشهالحتسي الزين اللي تجيب عندك ثقافة واطلاع وحسن تصرف


الحين مادامك طريتا الانفتاح على قولة الاخ حالي والانفساخ على قولتك ( خشة واحد طالع من الموضوع )

اخ فيصل انت انسان معقد متعجرف متحجر

عادي ياخي خل امك تسوق منها ترتاح من المشاوير

والدنيا كذا ياخي

8


8


ماكتب اعلاه عار عن الصحه



اباخذ الاسئله واجاوب قدر المستطاع فالوقت متاخر الان

*
*
هلوو فيصلوه

للحين تذكر .. انت . بلا والله من اللي شفته
انطبع في المخيخ الأصغر وتلقائي الى الأكبر

شف ياحبي الانفتاح آفـه وجت لنا
وفي نظر البعض يـ إنك تصير منفتح وتكون شخص راقي
او انك ضدها وتصير شخص قروي ولانتب لم الحظاره ابد

طبعا انا قلت في نظـر البعض ... ودي اسداقهم اشوف وشلون مجتمعهم

الانفتاح مجرد ماتنطقه ترتاع منه . اجل وشلون لاجاء لأب او ام .. وشلون بيطلعون عيالهم
الدعوى فري على قولتهم وفلها وربك يحلها

لكن الله لايرده من انفتاح انه كانه استاثم فينا ذاك اليوم خخخخخخ

شي اوب زين ابد يخلي العالم تنقد عليك وتقوول شف ذا زلابه :d

أقتباس

س2 / هل ترى باان الانفتـاح بالفعل اجتاح بيوتنا ؟

لا مو مره ... لسى باقي في الدنيـا خير

أقتباس

س3 / ياترى هل كل شاب يغار على اهله يعتبر معقـد ؟

لا ... الغيره على العرض كنز

أقتباس

س4 / حدود الانفتـاح بالنسبه لك كشاب او كفتاة ماهي تجاه نفسك وتجاه اهلك ؟

اي شي يتعدى المتعارف عليه او المعقول .. يعتبـر داخل في الأنفتاح


عوافي فيصلوو موضوع بطل

ماهو مفهومك عن الانفتـاح ؟
أمر دخيل على المجتمع .. ولكن نستطيع أن نجعله بشكل

أفضل وهو السعي وراء كل جديد ومفيد طالما هذ1 الجديد
لم يخرج عن نطاق الدين ثم العادات والتقاليد

س2 / هل ترى باان الانفتـاح بالفعل اجتاح بيوتنا ؟
بصراحه الى حد ما

س3 / ياترى هل كل شاب يغار على اهله يعتبر معقـد ؟

غلط x غلط x غلط ..لأني عندما ألتمس هذ1 الشي في اخواني

لايخطر في بالي غير انه خوف علي وعلى عقيدتي .

ولله الحمد أفتخر كثيرا باخواني الذين هم من هذ1 النوع الحريص

معهم بهذا الشكل أشعر بالقيمه .

حدود الانفتـاح بالنسبه لك كشاب او كفتاة ماهي تجاه نفسك وتجاه اهلك ؟
ألا يتجاوز الدين ، ثم العادات والتقاليد

هذا بالنسبة لي كفتاة ..

أخي فيصل شكرا ألف شكر على طرح مثل هذا الموضوع الذي نحن

في حاجه ماااااسة الى مناقشته .

تقبل مروري أختك : rotta

::

هلا فيـك فيصل

منور المجلس بموضوعك

/

موضوعك هذا يمكن الحين يكثر النقاش فيـه وتتعدد الآراء

دايماً نلقى فيه التأييد والمعارضه [ بشده ]

بالنسبه لي أأيد كل شي بس بحدود يعني اهم شي الواحد مايتعدى حدود الدين والأخلاق

/

نجي للأسئله

/

حييّت مليووون يا(فيصل )
من طول الغيبات جاب الغنايم
دايم تجي في وقتك ،،

بلا انفتااااااااااااااح بلا هم وش ذا الحتسي
انا ودي اعرف وشلون مايستحن ذولي اللي
يفتشن

باك

لفتوا نظر بعض اللي ردوا

ولي وقفة مع المفاهيم هذي :-

*
*
مداخله بسيطه حبي فيصل
مابي موضوعك يطلع عن محوره الاساسي

انت تكلمت عن الأنفتاح السعودي . بمفوهم الأنفساخ الاخلاقي !!!
انا لما قلت انه آفه وجت لنا .. او قلت كلمة صارت تروع . ماابني الشي على نفسي

انا بنيته على مجتمع عاش هالنظـره . واتكلم بالواقع . اللي أشـوفه
انا مابي احط نسب واقارن بين الناس . انا احكم واقيم على اللي نشوفه
في هالمجتمع .. الانفتاح صار عندنا شبه انفسـاخ . ولا شفنا تطبيق مفاهيم الاخت المزن . وكلامها صحيح

*
*
لو نجي للأنفتـاح ونشوف وش الانفتاح وأسس الأنفتاح ماراح نخلص وهو سلاح ذو حدين

للأنفتاح ضوابط
للأنفتاح مستويات

ولو جينا نسميه بـ انفتاح صحيح فهنا نقول يتحقق بكذا شي
موافقة الأصول الإسلامية.
تحقيق المصلحة والمنفعة للمسلمين.
وبكذا نقدر . نوضح وش مفاهيم الأنفتاح السليمه .. اما مثل هاللي نشوفه فهو انفتاح متخلف

وبس