(( مـقـدمـة ))
السلام .. ارحبوا كلكم .. ورجاءا كل واحد ينثبر مكانه ويقضب أرضه. لا أحد يقوم ويقول لي خشمك ! يالربع خشمي وانا حر فيه . لا أحد يقول لي يمناك نعنبو داركم ترى الكلام البايخ هذا ما أحبه. يرحم أم أمكم فكوني من هالرسميات ترااها واصله معي ,
كل واحد ينطق ورى شاشة كمبيوتره ولاب توبّه، لا أسمع نفس خلوكم مثل طلاب رابع جيم لا دخل عليهم مدرس العلوم العصبي خخخخخخخخخخخخخخخخخخخخخخخخخخخ
وجع !! ضربه !! اعنبوا بليسكم يالسعوديين ليش انتم ملاقيف كذا؟. سمعتوا طاري فلانه وفضيحه وجيتوا مدرعمين كأنكم دوريات تلاحق محشش.. يوم لف المحشش يمين لفيتوا مثل الدوريات وراه يوم خذ شارع الخدمه حاولوا يحدونه الدوريات وهو اللي يصبخ في ذيك الصبه وانكسر سن المحشش ....الخ (( بعدين اكمل لكم قصة المحشش والدوريات ))
عندي سؤال فاقع مرارتي من يوم عرفت اني أملك مرارة :
ليش يا سعودي عريبيا تحبون الفضايح؟ أعنبوا بليسكم أجل لو أني زايد في العنوان كلمة:
يوجد مقطع بلوتوث !! وش كان ؟ (( والله اللي انفقع سيرفر المنتدى ))
اوف اوف عليكم ياساتر لهالدرجة فيوز الثقل مفصول عندكم .. اركدوا اركدوا بشويييش ترى الركاده يمدحونها(( إلا ورى ماتنثبر انت وتقول سالفتك وتخلصنا؟ ))
خخخخخخخخخخخخخخخخخخخخخخخخخخخخخخخخ
----------------------------
(( مقدمة ثانيه ))
اخواني ..اخواتي هالقصه طويله نسبيا وفيها طلعات ونزلات معويه وتشعبات مرجانيه .. يعني اللي اتصاله مهوب دي إس أل يطلع منها واللي يرحم والديكم. ترى من الحين علمتكم ,, مهوب لا طلعت بكرة فواتيركم تقعدون تدعون علي كأني وزير الانترنت ( ياأخ اسمها وزراة الاتصاالات السعوديه !! ))
وأه شئ باالطول بالعرض أبي قصتي تنقرأ كامله. أو رجعوها لي وأظف وجهي انا وياها .. لاتفسدونها وتقرون نصها وترمون الباقي -----> اعنبوا بليسك خبزة ذي مو قصه !!
بالطول بالعرض كملوها .. بالطول والعرض اقروها ... وبالطول والعرض الأتي تهز الارض ( ياخوي شكلك اتحادي ))
بسم الله ونبدأ القصه
اخوكم الكاسر.. شاب يافع أطخم اللون.. خجول المنظر حياوي المخبر في حاله عايش.. ماعنده من الشيطان طاري. حياته كلها ثلاث خانات :
المسجد - الحضيره - الجامعة - مشواير حصيصة
وحيد امي وابوي ولي ثلاثة اخوان كلهم اكبر مني . ولا أحب العب معهم ولا اخالطهم واتجنبهم لأني أشك في نفسي لا جلست وياهم ..خخخخخخخخخخخخخخخخ
- الكبير راعي حمام ..
الحمام والطيور لاحسات مخه وبعنف لدرجة مايتصورها المتصورون ولايتوقعها المتوقعون ولم يترقبها المتراقبون ..تصدقون مرة جيت من الجامعة قلت له : السلام عليكم . قال وعليكم الحمام (( من جد رايح في رجلها الله يكون بعونه ))
- واللي اصغر منه عربجي ومهستر ولاهي في الطرب القديم وماغير طايح لي أغاني شعبيه وتجميع اغاني نادرة لفنانين شبعوا موت ومعطي هالدنيا بالخااامس ..
مرة سألته من تحب اكثر أمي ولا أبوي ؟ قال اممممممم بصراحه بصراحه بشير ثم عيسى !!! (( مخه منتهي من جد ))
أحيان أقوله: طيب البس ملابس جديده رح فصل لك ثياب كشخه تراك صاير وصخ..
يرد علي: رووووووووووووووووح ألعن ابو بليس الخكارا.. وش تبي اخوياي يقولون عني ؟ نظيف لا سمح الله !!
لا والمشكله وحده من درايش سيارته عليها صورة بشير شنان والغمارة الثانيه عليها لوحة : قاااطعوهم . عرضي دونك يارسول الله !!
-واللي أصغر منهم رومانسي بس بالغلط .. طايح لي تغزل و تشبيك مع الشغاله الاندونيسيه ومسوي لي في أمها قيس زمانه . يحبها . تصدقون أحيانا أدخل المطبخ ألقاه يغسل الصحون عنها (( اعنبو خيره ياهو فاهم التشبيك بالغلط ))
- وابوي وامي حصيصة ماغير مطيحين عند الجزيرة ويتابعون الاخبار كأنهم بيحلون مشكلة الشرق الاوسط .. طيب الله لايهينكم حلوا مشكلة عيالكم هالشبهات !!
االمشكله ان ابوي يقدّر الاتجاه المعاكس وهو مايدري عنهم وش يقوولون .. بس يجوز له هواشهم ، وامي مع الوالد وماتدري وش الطبخه .. ذاك اليوم تصحيني من النوم تقول:
قم ياولدي رح للجامعة .. انجز قم ياوليدي خلك ديموقراطي !! ( أجرمت فيهم الجزيره لابارك الله فيها خخخخخخخخخخخخخخخخخخخخخخخخخخخخخخخ
طلعت بالسيارة وقعدت اهوجس بحزن .. وش هالعيشه .؟.. يلعن ام القهر .. طفش يالكاسر والله قهر .
وفي غمرة هواجيسي.. وقف فجأة بوجهي ليموزين في نص الشارع يبي يركب له واحد .. وانا اللي أكع فرامل سمعها اللي كاشت في الصمان ..عصبت والدم وصل الركب وتقدمت عند غمارة سواق الليموزين بألعن خامسه هواش ..فتحت الدريشه بأتفل في وجهه يوم دققت فيه لقيته باكستاني كبر سيارتي مرتين ..
وشنبه يدغدغ دركسون سيارته .. وعيونه حمراء تصلح هديه في عيد الحب ..
يوم شفت اوصافه كذا تذكرت سماحة الاسلام والمسلمين وقلت : وهـ سمااح خخخخخخخخ
خليته.. وقعدت ادور ولا أدري وين أطس .. لمحت مقهى انتر نت .. النت مالي به معرفه الا اللهم التصفح ،خلف وامام والباقي من جنبها ,, قلت خلني أدخل المقهى واطقطق شوي يمكن يروح همي .. دخلت وخذت لي اشتراك ساعتين وجلست .. فتحت قوقل وكتبت بحث عن شات ..
طلع لي شات أحمر ومزبرق كأنه هوندا حقت ولد جيراننا سعد وتصميمه حلو وفيه نجوم ، اسمه شات الحب الأبدي !! عاد اخوكم قروي لما شاف الشات يطلب منه اسم الدخول .. راح كاتب اسمه كامل وستر الله ماكتب رقم الهويه بعد
دخلت الشات.. لقيت فيه ناس ( ياشيخ قل قسم!! )) .. سلمت عليهم , الصراحه بعضهم طلع ذوق ورد علي السلام, وبعضهم ابن سته وستين كلب سحب علي ولا كأن فيه واحد اسمه الكاسر قال السلام .. أعنبوا بليس لو اني بنت شرط ان ياخذوني باالاحضان ويسألوني عن الصحه والوالده والجيران ..بس بيني وبينكم فرحت اني لقيت على الاقل احد يرد علي سلامي لأني بالعاده في بيتنا أصلاَ مانعرف نسلم ولا نسأل عن بعض ..
قعدت اناظرهم واتفرج .. اضحك مرة ومرة اشارك .. واخوكم بطيء في الكتابه نسبياَ لأن آخر علمه بالكيبورد كان أيام معمل الحاسب في الثانوي .. وصار الواحد لا سألني في الشات سؤال وجيت ارد عليه أقعد أكح وأعاطس كأني منشغل عن الكيبورد وانا قاعد أكتب ، عشان لايقولون عني كل هذي كتابه ياالبطيء.. (( مقطعني الذكاء بسم الله حولي ))
جاز لي الشات .. ومادريت الا و انتهى اشتراك الساعتين . . خذت ساعتين اخرى .. وقعدت أدردش وكل شوي أتعرف على الشات اكثر.. وصرت أتجرأ وأسأل وأجاوب وأدردش .. وفكيت معهم ,.
وهنا بدأت الحكايه .. (( لاااه ؟ كان صبرت شوي بعد؟ آالله أبو كشرتك ))
اقتحمت الدردشه وحده اسمها دلال ! .. حاطه صورة أليسا .. وأخوكم من النوع اللي لا شاف اليسا خلاص يفصل عنده المخ ويصير ذكرى قديمه.محسوبكم من النوع اللي لا سمع بأليسا مايرده الا طواريء التخصصي.. حايستن مريره لا شافها على طول يفقد هويته ويبدأ يخربط ولاعاد يجمع .. نقطة ضعفي في هالعالم أليسااا يا والله اني خااقن معها وبقوووة (( منتب بلحالك .. أمة عريبيا اللي ماقد اتفقت .. اتفقت عليها ))
سلمت علينا دلال.. قالت: "هااااااااي كلكم من أول نك لآخر نك مساكم ورد" (( اعنبو بليس هالبنات مادري وين يجيبن هالكلام منه !!)) .. اخوكم الكاسر شاف الاسم دلال والصورة اليسا والخط لونه زهري تلخبطت فيوزاته وخقخق وداخ وبغى يستفرغ من زود الخشوع .. صار مثل اللي لا منه بغى يروح ماعاد يقدر يجي ولا حتى ربع بياله. ارجوك لاتحاول تقنعني !!! (( قلت لكم فيوزاته تلخبطت ماصدقتوني *** َ))
كل الشات ردوا عليها السلام.. تصدقون حتى اللي طنشوني ردوا عليها !! .. الا انا طبعا مارديت لأني وقتها خاااااق وناسي اماكن الحروف..
كتبت دلال : وااو الأخ الكاسر حيييل ثقل . . شدعوى رد السلام يا الغالي !!
دلال تكلمني !! نطقت اسمي !! .. دلال موجهه كلامها نحوي .. ياليت شعري ماذا أفعل .. حظنت الهندي اللي جاي يقول تبي شاهي وشك في نفسه المسكين !!
قامت اصابعي تلولش فوق الكيبورد وماتسمع الا طقطقه اصابعي وودي ارد ماعرفت وقمت انتفض ( من جد حرماان ) .. لدرجة ان اللي جنبي في المقهى جاني وقام يقرأ علي ويتفل ويقول:
بسم الله عليك وش بك يا أخ ؟ بردان نطفي المكيف ؟ قلت: لا ابد الله يسلمك ويجبر عزااكم مافيني شي.. ناظرني وقال:
عزااي خخخخخ محشش أنت؟ قلت لا اخوي المحشش ((معذور الأخ مايدري ان دلال كلمته وداخ بسببها ))
رجعت للشااشه وقعدت أدور رد على كلامها ..
قالت دلال: السلام سنه ورده واجب يا الثقيل
كتبت لها : مافيش شي يالاغيه (( يبي يكتب مافيه شي يا غاليه ومسكين متلخبط ))
كعتها دلال ضحك وقالت: هههههههههههههههههههههههههههههه علامك تخربط في الحروف ..
بيني وبينكم طاح وجهي وتفشلت ، قلت على بالي أصرفها : أبد والله بس هكرز حيوان لعب في كيبوردي قبل امس .
وانفجروا ضحك اللي في الشات علي وماتت دلال ضحك وقعدت توزع الهاءات في الشاشه ..
الدبش يحسبوني خفيف دم .. وانا كنت جاد في تصريفتي !! اعنبوا شيطانكم وش عرفني بالهكر وسوالفه والله أني أول لا سمعتهم يقولون هكرز أحسبهم نوع من الشواذ اللي في أمريكا . .
قامت تسميني: راعي الهكرز .. وقمت اضحك معها بخبث واكتب :
ههههههههههههههههههههه خخخخخخخخخخ ككككككككك ررررررر (( الاخيره من جد مالها دخل ))
صرنا نسولف على خفيف..سألتها بكل ما أوتيت من شفاحه: دلال كم عمرك؟ .. قالت : كم تعطيني ؟ قلت: جوز حمام!! .. (( الله يرج اخوي الكبير واصل معي للشات ))
ضحكت علي وقالت : ياشباب وربي وربي ان الكاسر هذا مررررررررة رووعه
هي قالت روعه ولا ماقالت .. رحت انا كاتب: أكيد الأروع وجودك.. (( من وين جيت ذي يالهيس ؟ ))
قالت: يخليك ربي.. ومن هالكلام والمجاملات .. يوم شوي الا وشاشة النت تسكرت لأن الاشتراك خلص ..
صرخت مثل الطفل الذي يريد الديه قائلاَ : .. لااااا لااااا . . وجوني يركضون كل هنود المقهى منهبلين يحسبون ماسكني كهرب أو منصرع خخخخخخخخخخخخخخخخخخ
قالوا: ايس موسكل صديق . قلت بسرررررعه بالله اشتراك ساعتين .. بالله بسررررعه .. قعدوا يتحمدون ربهم ويقولون اللهم لك الحمد والشكر .. قلت ماعليه انا مجنون بس واحد منكم يجيب ساعتين يالله .(( خايف تروح دلال، اعنبو بليسه أمداه يحب؟ التيوس وهم تيوس ماحبوا بهالسرعه ))
خذت ساعتين ورجعت للشات ..قلت لهم: معليش عالتأخير لكن جاني اتصال من الوالد يسأل عني يقول ماشفناك ياغالي (( عقدة النقص !! ))خخخخخخخخخخخخخخخخخ
قالت دلال : احلى ياللي مدلعه ابوه .. قلت في نفسي: بلاك والله ماشفتي المفاتيح لا جتني تمشي مليون ثم تنشب في وسط جبهتي ..ومن هالسوالف .. والكلام .. لين جت الساعه 12 الليل .. استاذنت دلال وقالت لي:
نلتقي بكرة ترى اذبحك لو ماجيت هههههههههههه امزح معك ياكسوري قلت من قدي دلال تدلعني ..
قلت في نفسي: مسنتر على هالكرسي لين يجي بكره الله لايعوق بشر !!
رجعت بيتنا وانا اضحك ومبسوط ونسيت سالفة الطلعه من البيت .. اول ماشفت ابوي خذته وحبيت خده .. واناا أضحك ..
قعد يناظرني اخوي الكبير مستغرب .. قلت له خير وش تناظر؟ قال:ليش مبسوط؟ شكلك لاقي كنز ... وش رايك تشتري حمام !!
قلت : اييه ابشر الصباح رباح اقلب وجهك عني الحين.. ورحت غرفتي وتعطرت ولبست بجامة النوم حقتي وخذت الوساده وحضنتها ونمت وانا أهوجس في دلال .(( أما بجامة نوم ذي كثر لي منها اقص يدي انك تنوم بثوبك وطقيتك ))
من بكرة أول ماقمت رحت المقهى. دخلت نفس الشات حق أمس .. لقيت دلال موجوده . وصورة اليسا واللون الزهري .. انبسطت ,, تشققت.
وقبل ما أكتب السلام عليكم ,, لقيت الشاشه امتلت بحرف الوااو .. واناظر والقى دلال كاتبه:
ولكموووووووووووووووووووووووووووووووووووووووو .
قلت لها: ارحبوووووووووووووووووووووووووووووووووو
قالت: االكاااااااااااسر كيفكووووووووووو (( تعرفون البنات انواع المياعة بس مومشكله كنت مبسوط وقتها كني سامع احلى نكته ))
وخذ ياسوالف وهات يا ضحك ومسكنا خط لين 12 الليل.. يوم كامل سواليف شات (( يانصبك نصباه )) المهم لما جت تستأذن وتطلع كتبت لي خاص وبالحرف الواحد :
الكاسر اربع سنين بالشات ماعمري ارتحت لأحد ..يخرب بيتك وش سويت فيني انت وغيرت هالقاعده ..؟ فمان الله ..
طلعت دلال واناا مذهول مهبوول وصرت كني بهلوول وبأقوم حسيت اني مشللوووووول ..
دلال تبادلني نفس الشعور .. آآآآآه صرخت في المقهى من الفرح . وتجمعوا علي الهنود زي امس وحط عندي اشتراك ساعتين ورميته بوجهه وقلت لهم دلال طلعت ثم تفرقوا وهم يتحمدون ربهم على نعمة العقل !!
استمرت علاقة الشات هذي أكثر من شهر .. كل يوم أجي المقهى وأجلس انا ودلال ضحك وكركرة وكل واحد معجب بالثاني ومخبي حبه خوفاَ من العذال .. صار المقهى هو بيتي وأجلس فيه اكثر من جلستي بالحياة الدنيا
وكل يوم انا ودلال نسوي حزب في الشات ونضحك على هذا ونعلق على ذاك وكالعاده لا جت الساعه 12 تستاذن حبيبتي دلال ثم أصرخ ثم يجون الهنود ثم يتفرقون وهم يتحمدون علي (( هالهنود الظاهر فرحانين لقوا واحد أدبش منهم )) خخخخخخخخ مرة وانا توني داخل المقهى ودلال فيه ماطلعت .. سويت لهم مقلب هالهنود وزعقت وجو يركضون عشان يتحمدون علي قلت : العب عليكم مساكين جريتكم شوفوا دلال موجوده .. لكن الغريب انهم برضو قعدوا يتحمدون علي
في أحد المساءات الشتشتوتيه دعتني الغاليه دلال الى المنتدى حقهم كي أشاهد إبداعاتها وأقيمها لأنها تقول: رأيك يهمني (( قلت لكم خاقه معي )) .. ونقزت من عالم الشات الى عالم المنتديات .. دخلت المنتدى وشفت مشااركاتها وسجلتني معهم. المليعينه واصله وفاكين معها المشرفين تصدقون فعلوني في بدقيقة . شفت كتاباتها .. الصراحه مليانه مياعة وساذجه وتحوم الكبد وأنواع ثقالة الطينه ..
لكن مايمديكم علي لما أرد عليها: انوااااع المجاملات !! . تلقوني رااز مليون ضحكه في الرد لو تشوف ردي من بعيد عليها تحلف بالله داخل شارع تفحيط وانواع الجلنطات !!.. انواع الهاءات والكاكات والخاءات المسدوحه والوجيه التعبيريه اللي أحس أنها تسألني وانا احطها في الرد وتقول: من جدك يا ابو ؟ .. لاا وابشركم تطورت وصرت أضحك كذا: لووووووول بدال الهااءات السابقه (( طيب بشر امك ))خخخخخخخخخخخخخخخخخخخخخخخخخخخخخخخخ
لفت نظري بالمنتدى شيء.. تلقى دلال موضوعها سخيف وماصل بس الردود فوق الميه !! مو مثل منتداكم اذا كثرتو الردود وصلت 11 " احب الصراحه " وتلقى الولد يا حبة عيني تعبان في موضوعه ورهيب وصدقي بس الردود تتراوح بين: صفر إلى واحد خخخخخخخخخخخخخخ
لا والمشكله مواضيع دلال على بياختها مثبته في المنتدى وأنواع المدح والولد مسكين تلقى موضوعه محذوووف أو إذا سلم من الحذف تلقاه منطول ألعن ام بليس بعض هالمشرفين يا انهم ذابحتهم اللكاعه (( من تقصد انت بالظبط ؟ شكلك ودك تشوف يوزرك عند باب المنتدى مشيوت ببوز ؟ ))
واقتحمت انا ودلال عالم المسنجر ,, وصرت مدمن مسنجر .. وسواليف تطورت للغزل والعياز بالله (( وجه مصري منافق زالط أم الشنب ))
مرة من المراريت كتبت لي في المسنجر:
أقبل قدميك شوقاَ ليس ذلا .. اركع لك حباَ ليس كفرا.انت حبي سرا وجهرا..حياتي يالكاسر أحبك,,
اخوكم انتقل لرحمة الله مؤقتاَ وغاب عن الوعي ولما رجع له الوعي كتب لها:
بالله ياللي راكب المسروجه.. قل لي على اي المنازل ناوي؟
بالله كانك رايح الفلوجه .. سلم على بومصعب الزرقاوي..
دلال حياتي احبك !! ( ياشيخ ليتك ماعدت للوعي.ياشيخ كل تراب يالسفله لابوك لابو من علمك المغازل ))
صكتني بهالجمله:
اللي يتحداني بغلاك أقبل تحديه.. واللي يشاركني بحبك، من الوجود أفنيه.. حبيبي أغار عليك خلي أسمك ابو دلال بلاش الكاسر
رديت وقلت تخسين وترد ب لوووووووووووووووووووووول
قلت في نفسي والله ما تغلبيني في التعبير .. وانا اللي أرقعها بهالبيت:
الكاسر ياللي حلالة حلاحيل المحاليل حلاله. تحلحلين اللي ماتحلحل عقدها..
دلال بعد عمري قولي لصدام لا يحسبن ان الحرب تجهلنا .. أحبك أحبك ياعمري!(( يالربع وش اسوي هذا اللي اعرفه من الشعر ))
سألتني: تدري حبيبي وش وجه الشبه بيني وبين السمك؟ قلت: انتي دلال وانا الكاسر ؟
.. ؟ قالت: خخخخخخخ لا .. بس هي لو فارقت الماء ماتت .. وانا لو فارقتك اموت !!
قلت: إييييييييييييييييييييه وش اخبار منتداكم ؟ (( يحاول يصرف إجاباته اللي مدري وش تبي ))
مالكم بالطويله..
استمر الغزل واستمرت الاشواق واستمر المسنجر يدهر ,, حتى وقعت الواقعه وحدثت الحادثه التي قصمت ظهر البعير وجعلته يستدير حتى كاد من الصدمةِ أن يطير!!!
7
7
7
في مساءِ ِ مسنجري خااالع .. قالت دلال : وش رايك نجدد علاقتنا بشيء آخر .. قلت مثل إيش؟ قالت: ملينا من الكتابي ولاشواق المكتوبه وش رايك نغير ؟
بيني وبينكم حسيت انها بدت تراودني عن نفسي فاستعصمت ..
قلبي قام يرقع.. ويروس.. وتذكرت ملحق اخوي راعي الطرب هو وربعه لاقاموا يغنون.. وافهموهااا
قلت: اوكي .. بس كيف؟ قالت: خذ هذا رقمي سوااا .. أبيك تراسلني عليه ونتبادل مسجات ألين يجي الوقت اللي أكلمك أنا .. لاتدق فقط راسلني ..
خزنت رقمها بإسم: الغلاااا .. ومسكنا خط مع المسجات يومين متواصلين ..وسحبنا على المنتديات والشات وهي أصلا تقول ملت من المنتدى وكنسلته خلاص.
بعد فتره جتني منها رساله تطلب مني فيها شحن لأن ظرفها زي ماتقول صعب ولا معها فلوس واهلها مايدرون ان معها بطاقة سوا ..
رحت على بالي كريم وصقعتها بثلاث بطاقات شحن من فئة 100 ريال.
وصرنا نتبادل المسجات وكل يومين تطلب مني شحن وتشرح لي ظروفها انها صعبه واهلها مايدرون عن جوالها وان هالمغامره بالجوال كلها عشاني ... قعدت اصيح ورحمتها وقلت ياعمري يادلال.. وصقعتها بشحن بس هالمرة 500 ريال ..
وصرت أستلم مصروفي وأشحن لها وصرت أصرف على جوالين في وقت واحد .. إليييين زهقت ومليت من الصرف..
شرحت لها في مسج أني خلاص انتهيت وأرهقت ماديا وقلت:
ليت تقدرين ظرفي بعد أنا يالغلاا ..
وقالت: لا أبد عاادي حبيبي .. وطنشتني وسحبت الى يومك وبعد اسبوع دقيت على الرقم ورد علي هندي وتهاوشت معه احسبه اخو دلال خخخخخخخخخخخخخخخخخخخ
مايزتفاد من الغصه.. آآآي:
1- بعض الجروح ان جت من اغراب عادي.. الجرح موت الجرح لا جا من احباب ( ورى ما تاكل تبن بس؟ )خخخخخخخخخخخخخخخخ
2- وش الفايده لما تمسك لك إنسان ضعيف حبووب وتسحبه على خشته وانت نصاب؟ يعني الشباب ناقصين مساكين؟ فيهم اللي كافيهم اعنبوا أصل أصلكم حسوا يا موقرمات يا اوباش داا زولم وربنا مايحبش الزولم
3- كم واحد متسحب على خشته ؟
4- ارجو من البنات لا بغوا يسحبون احد على خشته أن يرفقون عليه شوي.. يعني حطي اسمك حصه خديجه مهوب لازم اسامي عالميه كـ دلال ريهام وماريا و روز .. وتكفون بلاش صور أليسا ونانسي! يعني بالله وش فيها صورة لطيفه المجرن يعني .. أرحمونا يرحمكم من في السماء.
5- هذه القصه كتبتها على عجل وهي من تأليفي يعني لا أحد يصدق
همسه حزينه:
لما تروح حلاق هندي ويقعد يحدد لك السكسوكه.. ويقرب من عند خشتك وهو يحدد سكسوكتك ثم يقعد يتنفس في خشتك .. صح وقتها ودك تلعن خامسه؟؟
(( أقص يدي إنها همسة واحد كااااامخ له كمية حشيش وبقوووة ))
همسه أخرى :
شعب الكواسر.. من أخطأت عليه فليسامحني ..
ومن اخطأ علي فأشهد الله في هاللحظه انه بـ حل ..
وعلى الخير ألقاكم
جد جد آسف على الاطاله و الى لقاءٍ آخر وكان معكم اخوكم
ابو دلال ..
عفوا. الكاسر ..
والسلام
ختام
18-12-2006, 12:48 AM
موضوع فكاهي ولكن له أهداف للجميع (أنا ودلال والعار فضيحة لن ينساها الزمن )
رد: موضوع فكاهي ولكن له أهداف للجميع (أنا ودلال والعار فضيحة لن ينساها الزمن )
العرض العادي
