معروف عن سامي أنه يملك مهارات رياضية و غير رياضية وصلته لهالمستوى العالي...و لكن...و لأن الحلو ما يكمل..فأكيد أن لسامي عيوب أو مشاكل...منها:
- سامي لاعب كبير...و الجماهير متعلقة فيه...و هذي مشكلة!
- سامي لاعب ذكي في مجتمع ( رياضي) أغلب المنتمين له يفقدون هالصفة...و هذي مشكلة!
- سامي لاعب كبر في العمر...و هذي مشكلة!
هالمشاكل اللي فوق سببت مشاكل جديدة لسامي...و ذكرت كثير من الجماهير ببعض المشاكل اللي تسبب فيها في السنوات الماضية...مثلا:
- سامي من كم سنة ما بدأ التمارين مع الفريق في وقتها ( أساسا هو في عز شبابه كان يتأخر عن بداية التمارين يومين ثلاثة)...و السبب معروف...مسافر...يبي يرتاح...من حقه كلاعب كبير خدم النادي أن الإدارة تميزه و تعطيه كم يوم يريح فيها....لكن اللي مو معقول بالنسبة للجماهير( الواعية)..هو أن سامي في النهاية لاعب...و انضباطه و هو كابتن للفريق يعطي هيبة للتمارين...و يعطي درس للاعبين اللي أصغر منه...سامي للأسف...من بعد كأس العالم 2002 ( و اللي كانت أسوأ ذكرى لسامي ) و هو مستحيل يبدأ التمارين في أوقست...و السبب معروف...إجازة في فرنسا..مع أعضاء شرف الهلال!!!
- سامي مثله مثل أي لاعب..من حقه أنه يدور عن مصلحته...و لكن الفرق أن سامي للأسف يستغفل الجمهور بأنه يحترق عشانهم و أن دموعه تخونه من كلامهم الحلو عنه...و هو عشان كذا يقول أنه يوقع للنادي بدون مقابل...لكن الواقع يقول العكس...و مادامه هو أو الإدارة ما نفوا هالشي صراحة...بنعتبر هالشي صحيح...من حقك يا سامي...لكن خلك واضح...احترم أحمد الدوخي و خميس العويران و و و و اللي قالوا أنهم يدورون مصلحتهم...و صعب أنك تحترم لاعبين يلعبون عليك عيني عينك!!
- لاحظ كثير منا أن سامي صار في السنوات الاخيرة نجم علاقات عامة...سفير النوايا الحسنة...و يحضر حفلات التكريم في بلدان ثانية...بالإضافة لـ ( تشريفه ) حفلات الدورات الرمضانية...و طبعا طبعا طبعا اللقاءات التلفزيونية مع القنوات الفضائية ( خارج السعودية طبعا!)...و هذا شي جيد...و طبيعي للاعب كبير زيه...لكن اللي مو طبيعي أنها تكون مقدمة على واجبه و شغله الأساسي اللي هو خدمة الهلال في الملعب....لأنه إذا تأخر شهر أو أكثر عن التمارين...و جاء ( الله يسلمه ) على بداية رمضان...و بعد كم يوم راح القاهرة عشان مباراة تكريمية...و قعد ثلاثة أيام...و بعدها راح للعمرة..و مدري كم يوم قعد...و بعدها راح لبيروت عشان مقابلة ساعتين بس و قعد هناك أربعة أيام...يكون في الموضوع إن!!...خصوصا أنه سواها قبل كم سنة لما راح بيروت عشان مقابلة في نيو تي في!!
- يقول سامي أنه وده يتلافى أخطاء اللاعبين اللي قبله اللي ما اختاروا الوقت المناسب للاعتزال....و اعتقد ( و الكثيرين يمكن مثلي) متأكدين أن كل الأوقات ممكن تكون حلوة لاعتزال سامي...ماشاء الله يلعب في فريق كل سنة تقريبا جايب بطولة يرفع سامي كاسها حتى لو ما سوى شي إلا أنه جاء في أخر مبارتين!...بس هو يجي و ما عليه من الباقي!!
- يحب سامي دايما أنه يستشهد بأوروبا في كل شي...في التمارين و الحماس و التنظيم و و و ...حتى أنه شبه نفسه أكثر من مرة بأنه مثل زيدان و بيكهام!!...و هذا عاد رأيه و هو حر فيه...لكن ليته يعرف أنه في أوروبا يبدأ الدوري الانجليزي مثلا في نصف أوقست و عشان كذا تبدأ تمارين الفرق الأنجليزية من أول جولاي...يعني هنري و بيكهام ( يوم كان في مانشستر) ما كانوا يتغيبون فترة طويلة عن التمارين خصوصا أن الدوري ينتهي متأخر ( نهاية مايو)...و إذا كان هو مثل بيكهام فياليت يطبق هالنقطة مثل ما يطبقها بيكهام!!....و إذا كان ( أبو عبدالله) يحب أوروبا و يقلدهم في كل شي فياليته يقلد كانافارو اللي ترك مدريد لمدة يوم و جاء لأبو ظبي عشان قرعة كاس الخليج و رجع بعدها لمدريد و لعب مع فريقه المباراة...أما غيره فيروحون عشان مقابلات ما تودي و لا تجيب و يتأخرون بعد!! ما راح أذكر ( الذيب ) عن طبيعة اللاعبين الأوروبين و صراحتهم في تعاملاتهم مع أنديتهم و جمهورهم خصوصا في مسألة العقود و الفلوس..لأنه أكيد أخبر مني بهالشي...أتمنى بس أنه يطبق هالشي قبل لا يقلدهم في البعد عن تحليل المباريات و افتتاح الاكاديميات!
- - من حق جمهور الهلال اللي ساند سامي في ظروف و أوقات صعبة للهلال أن يكون سامي واضح معهم و ملتزم...جمهور عريض وقف مع سامي بعد مشكلة البحرين في المنتخب الأولمبي...و بعد مشكلته مع بندر بن محمد اللي وقفه لأنه راح لدبي قبل مباراة مهمة للهلال...و بعد ما رفض يطلع من الملعب بتغيير من هانجيم قدام الاتفاق...و بعد تصريحه عن أدموس و الهلال في التلفزيون...سامي...الجمهور معك...خلك واضح معه!
سامي..........أنت من أبرز اللاعبين في السعودية...و الكثير يعتبرك الأبرز...و ما أحد يلومهم بصراحة....من حقنا عليك أن نقول اللي في خاطرنا ( كجمهور صادق محب ) بصوت عالي عشان نثبت لك و للناس كلها أننا في الهلال نتعامل مع بعض بطريقة مختلفة...أكيد أنك بتتقبل هالشي...لأنهم في أوروبا متقبلين!