لمشاهدة الفصل الثاني
اضــغــط هــنــا
---------------------------------------------------
سلام علاااكم
شباب وصبايا
سحالي وتماسيح
كيفكم شباب
أخباركم
حيبت أنبهكم لكم شغله
أولها : بعض الناس قالوا ليه روايتك عبارة عن وقائع يومية وتقولها بالعاميه
أنا أجاوبكم
هذا اسلوب جديد أحاول اسويه بالرواية وهو اني أسوي الروايه على أساس انها مثل ( السواليف ) الشبابية
والعامية على أساس الضحك لا أكثر
عشان في بعض الكلمات بالعامية مالها ترجمه بالفصحى
وإذا تبوها بالفصحى أنا نا عندي مانع....
فقلت أحطها بالعاميه أحسن وإلا؟؟
ثاني شغله : أمس جاتني رسالة خاااصة من عضوه ما تتوقعون مين ؟؟
الرسالة كانت بعنوان
>> كفوا والله <<
تقول أختنا بالله انها معجبة كثيير بالموضوع وإنها ما توقعت مني اني انشر مثل هالكلام
وانها دخلت على الموضوع صدفة وعجبها وياليت أكملها حتى ولو الأعضاء ما عجبهم الموضوع ارسل لها الموضوع على الخاص
وأخر الرسالة كانت كاتبة
أختك:
" منى "
أنا الصراحة ماصدقت انها منى نفسها اللي بالرواية لكن رديت عليها
<< ابشر أختي ما يصير خاطرك إلا طيب >>
على العموم
الفصل هذا بيكون دسم شوي
يعني احفظوها على الجهاز ووقت ما تخلصوا من النت اقروها
وزي العادة
جبت حبيتين < بايسون > بدال < الريد بوول > كنوع من التغيير وقعدت أكمل باقي الرواية
بسم الله
ثري
تو
ون
لاتس قوو Let's Go
======================
عنوان الفصل الثالث
>> بداية العام الدراسي (التوجيهي) <<
نجي لقصتي أنا ومنى
وين كنا فيه؟؟
ايه تذكرت.. عند ذاك اللي نادى حبيبتي
المهم
نعيد المشهد شوي
كنا نمشي أنا ومنى
وفجأة سمعنا صوت واحد ينادي بصوت عالي ويقووول
؟؟؟؟؟: منى...
المهم أنا التفت وراي وشوفت واحد جايني مسرع
المهم جاء ومسك يد منى وأنا فكيتها وقلت له
رهيف: خير ياأبو وش عندك
؟؟؟؟؟: وانت شكو؟؟ آني أبغى منى؟؟ << باين انو لهجته خليجية بس من أي الدول؟؟ الله أعلم >>
رهيف: منى مين يالحبيب .. منى مين... أصلاً مين انت؟؟
طبعاً تجمعوا العالم حولنا وتدخلت منى وتقول
منى: منصور انت وش جابك هني << تتكلم خليجي >>
منصور: منى حبيبتي أنا أنا أبيج.. أبيج لي لحالي مو لحد غيري أرجوج أفهميني بس
منى: أقول منصوروه اترك عنك هالسوالف وقولي انت ليه ما تترك عنك شغلت ملاحقتي وين ما رحت وين ما جيت؟؟ ياخي زهقت والله طلعت روحي.
منصور: الصراحة أنا من يوم رفضتيني ذاك اليوم وأنا أفكر فيج صورتج دايم ببالي ما تغيب
منى: منصور أنا مارفضتك بمزاجي؟؟ أنا رفضتك عشان......
وفجأة يدخلوا علينا الأمن ويمسكوني ويمسكوا اللي يقاله منصور << أنا مالي ذنب طيب!!! >>
وتدخل منى وتقول للرجال اللي ماسكني
منى: اتركوا هذا..
السكيورتي: وليش نتركه لازم نوديه للمخفر وهو يتصرف معاه أكييد اعتدى عليكي هو واللي معاه
منى: طيب وإذا قلت لك فكه الحين قدامي
السكيورتي: هههه وإذا رفضت وش بيصير يعني؟؟
منى: طيب أنا أوريك وش بيصير
وطلعت من شنطتها البطاقة البيضاء << اللي تكلمنا عنها ببداية دخلتنا للمنتزه >> وورتها للسكيورتي وفجأة
السكيورتي: آسفين عمتي ما قصدنا والله ما قلتيلي مين اللي اعتدى عليكي
أنا أتكلم في نفسي << عمتي؟؟؟؟؟ غريب موضوع هالمنى كل شي يصير تطلع هالبطاقة وبعدها تتغير معاملة أي واحد توريه هالبطاقة , بس لو أعرف وشي؟؟ >>
منى(بكل استهزاء): خذوا هالتيس الأجرب اللي اسمه منصور وودوه لأقرب مخفر ولا أبي اشوف رقعت وجهه بالمرة مفهوم
السكيورتي: حاضر عمتي ولا يهمك بنكتبه تعهد بعدم التعرض...ابشري ومايصير خاطرك إلا طيب
أنا يوم تركوني الرجال تفاجأت الصراحة ووقفت زي < الدلخ > وأناظر بـ(منى) , طبعا رجال الأمن ما قصروا صرفوا العالم من حولنا ,شافتني (منى) أناظر فيها وكني < أهبل > مسكت يدي وسحبتني وقالت
منى(ومالها خلق): أقول رهيفوه مالنا قعده هنا تعال نطلع
رهيف(لا شعورياً): ابشري عمتي ولا يهمك نطلع ليش لأ؟؟
منى(ضاحكة): الله يقطع شيطانك رهيفوه تعرف كيف تونسني ههههه
المهم وطلعنا كم المنتزة وركبنا السيارة ورجعنا الرياض
وحنا بالطريق حطت (منى) راسها على كتفي وقالت
منى(بنبرة حزينه): الله يرحمك يا أبوي ... ماكان لازم تتركني كذا
رديت عليها
رهيف: آمين يا رب ... بس ليه ما قلتيلي عنه انو مات؟؟
منى(تبكي): رهــيــف أنا مابي أشعلك معاي والله ... أنا ابوي وامي ماتوا بحادث سيارة لما كان عمري 7 سنوات ,انحرمت من حنانهم 10 سنوات ... مين يصدق ... 10 سنوات ... محد حط ايده على راسي وباسني قبل النوم , ولأحد مسح دموعي إذا طحت وانجرحت وقالي < سلامات بسم الله عليكي > , ولا أحد فكر يهنيني بنجاحي لنجحت من سنه لسنه. وقعدت تبكي وتصيح
أنا لا شعوريناً حطيت يدي على راسها وقلت لها
رهيف(بطرف عيني): حظك لقيتي أبوكي الثاني
منى: والله !!!
وأنا امسح دموعها من عيونها وقلت لها < والله >
وأنا في الطريق وأمسح دموعها لف علينا واحد وانتبهت منى وقالت
منى: رهيف شوف اللي قدامنا
أنا ناظرت بسرعه ووخرت عنه وطلعنا من الطريق ووقفنا السيارة , وناظرنا أنا ومنى ببعض
فبتسمت وظحكت , وأنا شوفتها ضحكت , هم بعد ظحكت معاها
المهم
وصلنا لبيتها وكانت الساعة حول الـ10 بالليل
رهيف: أنا عارف انو اليوم سببت لك مشاكل بس وش أسوي؟؟ انشاء الله بعوضك
منى: أفا عليك رهوف .. هذا كلام ... أنا ماسويت شيء ... ترى بزعل منك والله
رهيف: لاحبيبتي خلاص ولا يهمك .... تصبحي على خير
منى: وانت من أهله.
وفتحت الباب ونزلت
نرجع للهيئة اللي ماسكين أخوياي << شلتي تذكروهم وإلا؟؟ >>
المهم ودوهم مكتب الهيئة وكتبوهم تعهد وقالولهم لا تعيديونها مرة ثانية ومن هالكلام
وبعد ما طلعوا من الهيئة كلموني عليان وقالي
عليان: رهيف .... وينك يا خوي .... كل هذا شغل؟؟
رهيف: هلا والله حبيبي لا والله الحين جايكم انتم وينكم الحين؟؟؟
عليان: بمكتب الهيئة..
رهيف: مكتب الهيئة؟!؟!؟!؟... وينه؟؟ وليش رحتوا هناك؟؟؟
عليان: بعدين أقولك ليش رحنا هناك بس المهم تعال خذنا
رهيف: طيب طيب.. عطني الوصف أنا ما أعرف شي؟؟
عطاني الوصف وادعس البنزين على البيت طوااالي
وصلت البيت ووقفت السيارة في الكراج ورحت ورى البيت وأخذت الكامري << حقت عليان >> ورحت لهم
المهم يوم وصلت لهم ونزلت من السيارة وعطيت عليان المفاتيح وقلت له
رهيف(قمة الأدب): آسف على اللي صار والله ماكان قصدي
الشلة: ههههههههههههههههههه ياحلوك يارهيف ههههههههههههههههههه اركب اركب بس ولا يكثر.
ركبنا السيارة ,الشباب كلهم ساكتين ويناظرون فيني وانا مسوي ما أشوفهم
المهم رجعنا الكل لبيوتهم , ومابقى إلا انا.
ففاتحني عليان بموضوع وقال
عليان: رهيف تعرف انو لك معزه بقلبي أكثر من باقي الشلة وبغيت أفاتحك بسالفة
رهيف: الله يسلمك حبيبي والله وانا أكثر بس وشو الموضوع خوفتني والله
عليان: أ....نـا...أنا...بقولك بسرعة رهيف أنا احسدك.
أنا كان جايتني صعقة كهربائية وخلتني ساكت ما قلت ولا شي
عليان: والله أشوفك يا رهيف محبوب عند باقي الشلة بعكسنا , اللي كل واحد منا ما يطيق الثاني بعد اللي صار ياقرادت الحظ بس.
عطيته بكس على كتفه وقلت له
رهيف: الله يلعن شيطانك أنا قلت يمكن صار فيك شي خوفتني والله ....لا تزعل بس الحين كل هذا عشان هالشي؟؟؟
عليان رد البكس وقال
عليان: ياخي أمزح معك .... كيف أحسد خويي بس؟؟
أنا الصراحة ما صدقت كلامه وقفني عند باب بيتي وقال
عليان: الله يعين بعد بكرة الدراسة والقلق
رهيف: الله يعين حبيبي ... تصبح على خير
عليان: تصبح على خير.
أنا دخت البيت و< دايركت > على الفراش , حطيت راسي على المخدة وعطيتها نومه.
أبوي استغرب!! وشكله قال في نفسه < شكله الولد رجع عشان يلحق على صلاة الفجر بكرة , الله يحفظه بس >
استغفر الله ... والله حتى ماكانت على بالي ... استغفر الله بس.
المهم جا يوم الدراسة < بداية العام > اللي مانمت ليلته وأنا افكر بالمدرسة وافكر كمان بـ(منى) وش قاعدة تسوي الحين , هي نايمه وإلا صاحيه , تعبانه وإلا كويسة.
مرني عليان الصبح وهو مبسوط وكان معه ليل جي ومهندوه << شلة المدرسة >> ورحنا المدرسة.
في المدرسة وزعونا على الفصول , كنت أنا مع (مهندوه) و(ليل جي) بنفس الفصل, و(عليان) كان بفصل ثاني للأسف. ,أنا كان بيني وبين عليان تحدي على اللي يجيب جوال للمدرسة من أول يوم ومحد يدري عنه.
المهم دق الجرس , كان يوم تعارف كالعادة , جانا أول حصة مدرس مصري بنمرة واستمارة< يعني ما ينطق خليجي بالمرة > وكان يدرس رياضيات , فكان يسال الطلاب كم سؤال << من أول يوم هالمصري >>
المصري(بلهجته): السلام عليكم
الطلاب(باستثنائي أنا وشلتي): وعليكم السلام ورحمة الله وبركاته << أنا شلتي مسوين كبار يقالنا هع هع >>
المصري: أنا اسمي الأستاز (خيري) ,وبدرسكو انشاء الله مادة الريازيات ,المادة دي سهله قداً قداً قداً ,بس يلزمها شويت تركيز ومزاكره أوكيه
الطلاب(وأنا معاهم باستهزاء): أوكيه.
المهم خلصت اول حصتين وجا وقت الفسحة , وطلعنا أنا وشلتي ولقينا علي عند أحسن مكان عنده بالمدرسة <المقصف> , وأنا قاعد أكل ساندويشة (كاكو) بالجبنة طبعاً ويهز جوالي !!!
أنا تفاجات وشافوني العيال وقالوا
الشلة: عسى ما شر وش فيك؟؟
رهيف: والله لازم أروح الحمام ضروري , برب وراجع أوكي
الشلة : أوكي.
أنا ما صدقت لقيت الحمامات ودخلت وطلعت جوالي وإلا هي ... هي ....منى!!!!!
أنا تفاجأت قلت يمكن صار بالبنت شي
ان صار لها شي أنا أكييد ماراح أقدر أكمل اليوم المدرسة ,بستأذن وأطلع.
المهم رفعت السماعة وقلت
رهيف: ألووووو
منى: هااااي رهيف... أخبارك؟؟ لا تكلم ولا ترسل من أمس وش عندك؟؟ وإلا زعلان علينا؟؟
رهيف: يا هبلة خوفتيني ... قلت يمكن صار فيكي شي ... إلا صحيح ليش ماخذه جوالك للمدرسة؟؟ وهو كبير كيف خبيتيه؟؟
منى(باستهزاء): اسأل نفسك السؤال هذا يا أستاذ؟؟ على العموم أنا شريت امس جوال (سيمنز) الصغير وربطه بطوقي من تحت وحطيته على شعري وبس... What About You??؟؟
رهيف: الله يخلي السبته << السبته = قطعتين مستقيمتين توضعان على الكتب لتربطهما بقوه >> ,جبت جراب للجوال وله علاق من ورى ,ربطت السبته تحت ركبتي وعلقت عليها الجوال , وش رايك؟؟
منى: والله منت هوين يا رهوف .. المهم بس حبيت أتطمن عليك حبيبي لا أكثر ...
رهيف: الله يسلمك حبيبتي ما تقصير والله ... يلا اشوفك في الويكيند أوكي
منى: يوووه طويل مررة وش رايك اليوم؟؟
رهيف: ووش أسوي بالوالد اللي بالبيت؟؟
منى: أها... أجل خلاص بستحمل وأمري لله ... إلا ما قلتلي وش تاكل بالفسحة؟؟
رهيف: ساندوش (كاكو) الجبن وانت؟؟
منى: هههههههههههههه يا مسكين أنا أكل الحين (بيتزا) داري؟؟؟
رهيف: اها ... بالعافية عليكي ... ويلا طولت عليكي ... إلا ما قلتي لي من وين تكلميني؟؟
منى: من الحمامات وانت؟؟
رهيف: Like You
منى: هههههههههه طيب بس حبيت اسمع صوتك عشان يرجع لي حماسي للدرس أوكيشين , يلا ما أطول عليك تشااااااااااااااااااااااااااااااو
رهيف: تشااااااااااااااااااااااااااو.
قفلت الخط ورجعت لشلتي وخلص اليوم بدون أحدث إلا انهم سلمونا الغثى ((الكتب)) وقالوا بكرى بيبدأ الكرف.
في يوم من الأيام رحنا المدرسة كالعادة مع كامري (عليان).
المهم كان علينا الحصه الأولى ريازيات <<على قولت المصري خيري>> وكان معاي حب < فصفص > ودخلنا الحصة وبدا المصري يقرق < يشرح > وأنا وشلتي نقشم حب < فصفص > والله كان طعمه تماااام شريناه من محل (باجه) , حب مصري نوعه (ضيافة) ,شرينا بـ5 ريال بس ,ووزعناها على زملائنا بالفصل وبكذا نكون تعرفنا عليهم بفصفص< حب > هع هع
المصري شم ريحه الفصفص وقال
خيري(بلهجته): أنا بشمش ريحت لب < فصفص بس بالمصري > , مين اللي معاه لب يطلعه ومش بعلم الإدارة ... خلينا أوكيه ... وإلا غاوين < تخريــبووووها > << قالها باستهزاء ومصخرة >>
المهم وقفت أنا بكل جرأة وقلت له
رهيف: يالمصري اسمها < تخربوها > مو < تخريـــبوووونها > << قلتها بمعايره >> وترى انا اللي جبت الحب وش بتسوي؟؟؟؟
المصري شكله < قمط العافية > وما قال إلا
خيري(قااامط): لا مافيش مشكله ولا حاقه , ازاي يكون في مشكلة , بس ممكن اطلب منك طلب زغنن خااالص؟
رهيف(بتكبر): نعم وش تبي؟؟؟
خيري(بصارخ): زف وجهك عن الإدارة خلصني.. ماعنديش ناس بيألوا < تخريــبونها > وحقات الوسخه دي
رهيف(تغيرت معالم وجهه): طيب بنروح للإدارة ونشوف أخرتها معك يا المصري
ويوم طلعت , الفصل كله يقول
الفصل: تخريبونها....تخريبونها .... تخريبونها ... مصري ... مصري ... مصري
وأنا مستانس اني سمعت هالكلام
المهم رحت للإدارة وأنا في طريقي لحقني (خيري) وهو معصب وواصله معاه
خيري: انت ياااد .. اجمد بمكانك ... يااد .. ياأيها الطالب ... ملوش داعي الوكيل ... ووو.... إلخ إلخ
وأنا مو معطيه وجه ومسوي ثقل
المهم
وصلنا للإدارة وكان خيري وراي , دخلت على الوكيل بدون ما أطق الباب حتى ,وقلت
رهيف: السلام عليكم... استاذ ممكن تشوف لي صرفه مع ذا المصري؟؟؟
الوكيل: وش فيه أخوي وش سوالك؟؟
ودخل المصري وقال
خيري: الوزع < الوضع > ما يستحمل بجد والله يا أنا يا داه الراقل < الراجل >
الوكيل: عسى ما شر يا أستاذ؟؟ وش فيه؟؟ وش مسويلك؟؟
خيري: دا عمل كتييير كتييير ... دا بيألي << يابن الأسطى >> وبيألي كلمات سعاودية معرفش معناها وبكسفني أدام الطلاب
رهيف: أنا .... أنا يالمفتري ... أنا يالمفتري اللي قلت لك هالكلام؟؟ طيب أنا أوريك
في اختراع يسمونه < النعال > ما ظن سمعت عنه يالمصري وإلا؟؟
وأضرب على المصري بالنعله الأولى<< طبعاً كل فصلي كانوا عند باب الوكيل بدون ما يدري >>
ويقوم الوكيل واللي معاه ويمسكوني وأنا الصراحة مدري وش صار فيني كأني مو أنا اللي قاعد أتحكم بنفسي
المهم المصري قال
خيري: دي أخرتها يا حضرت الوكيل ... أنا خيري محمد انضرب بدي <النعااال> معرفش اسمها ايه.
وطلع
طبعاً الوكيل ثبتني على الكرسي وقالي
الوكيل: صحيح الكلام هذا يا رهيف؟؟
رهيف: أنا مو فاضيلك الحين.. أنا ابي هالمصري .. يا أنا ياهو ... أنا ما راح اسكت عن حقي
الوكيل: اذا كلامك كذا أنا بضطر أستدعي ولي أمرك
رهيف: سو اللي تبيه بس أنا قلتها " يا أنا يا هالمصري "
المهم وقفني الوكيل طول الدوام عند الإدارة وجلد كل فصلي عشانهم كانو برى الفصل
يوم دقت الفسحة , هز جوالي مرة ثانية , الصراحة أنا ارتبكت ورحت عند الوكيل وقلت
رهيف: استاذ.. بروح دورة المياه ضروري ممكن؟؟
الوكيل: تفضل من دون ما تستأذن أصلاً
المهم أنا رحت لدورة المياه , وطلعت جوالي وإذا هي كالعادة (منى)
رديت عليها
رهيف: ألوو
منى: How do you do
رهيف: وش عندها ياللي تبربر انقليزي.... حالتي زفت والله
منى: لا والله بس قبل شوي ماخذة درس انقليش وعسى ما شر؟؟؟ وش صاير؟؟
رهيف: لا سلامتك بس تضاربت مع مدرس مصري وصخ وهذاني موقف عن الإدارة
منى: أها.. أجل اترك بهمك.. وأنا أستأذن بروح اكل بيتزا ... يمي يمي <<< مسويه تبي تقهر
رهيف: أمحق من فطور...على العموم بالعافية.
خلص الدوام ورجعت البيت ومعاي خطاب من الإدارة للوالد , أنا مدري وش اسوي
المهم تغديت وحطيت راسي ونمت , ما قمت إلا على العصر
نجي لشلتنا الماسية , كان عندهم هجوله ,دوران من شارع لشارع وأنا محبوس بالبيت على أساس المذاكره , شوفوا الفرق؟؟ , المهم راحوا لموول من هالمولات الكبيرة عشان البنات طبعا.ً
المهم دخلوا بالصدفة وماشافهم ولا واحد من الأمن , وهم ماشين ,قز (ليل جي) بنت كانت قاعدة تحك ساقها , وقعد يبحلق فيها , إلين شافته , وما قصرت البنت رمته بالكعب اللي كانت لابسه وعلمت عليه الأمن
وكرشوهم كلهم برى السوق
وهم عند الباب جتهم بنت صغيره تركض ,المهم اتجهت للـ(زعيم) مباشرة وعطته ورقة صغيره وباسته على يده وهربت , فتح الورقة , لقى فيها الآتي
" حبيبي يامن اخترتك لكي تصبح عشيقي المستقبلي هذا رقمي ******** مع التحية "
حبيبنا الـ(زعيم) ماصدق أول شي سواه ,انحاش بسيارته ونسى حتى انه ياخي أخوه (ليل جي)
المهم كلم (زعيم) على الرقم وردت عليه وحدة
زعيم: الووو
؟؟؟؟: هلا والله حبيبي أخيراً تحقق المنى وكلمتك؟؟ أنا اسمي (مزنه) 18 سنه وانت؟؟ << بااين عليها ناوية شر >>
زعيم: هـ..هاه.. 18سـ..سنه.. العمر كله انشاء الله أنا 19 سنه
مزنه: كلك زوء حبيبي بس ممكن تكلمني الليلة عشان نتعرف أكثر؟؟
وش تتوقعون كان يبي مني المصري؟؟
ووش بيصير بمصير (زعيم) مع المدعوه (مزنه)
هل تتوقعون بيتعرف عليها؟؟ وهل علاقتهم بتدووم مثلي أنا و(منى)؟؟
تابعوني بالفصل الجاي اللي بعنوان
>> أمريكا... وما أدراك ماهي أمريكا<<
============================
هاه شباب والله تعبت وأنا اكتب لكم هالفصل
وآسف على الإطاله
على العموم
مستني انتقاداتكم الحلوووة
تحياتي...
تشاوتشاو
01-09-2006, 05:05 PM
من أولى رواياتي - حــلــم مــراهــق - <<الفصل الثالث>>
رد: من أولى رواياتي - حــلــم مــراهــق - <<الفصل الثالث>>
..
العرض العادي
