لك الله يا قصيد أحضر وزلزل خافقي بالنص=و أبيك تـفصل المـعنى وترمـي بالـحشـا نصـه
أنا مليت من همي عقب ماكـنت بـه مختـص=ودرس الحب طنشته وأحـاول أنهـي الحصـه
لأني لو نظرت بعين جرحي لو نويـت أبـص=لقيت الحزن أستاذي ودمـع العيـن مغتصـه
خلقت بعزتي ماأرضى إهانه جاتني مـن لـص=يحاول يسرق الخاتـم ويخفـي بالخفـا فصـه
وإذا زاد الغلا فينـي أحـاول دوم ماينقـص=وشريط الغدر لوجاني حلفت اليـوم لأقصـه
ورزقـي كاتبـه ربـي ولـقمـه بـالحـرام تـغــص=وأنا ماني ضعيف العزم لأجل العيش والغصـه
ولا أدخل في سوالف مالنا فيها صلاح وخص=لإني مارضيت يقال عني مـد خلـن عـصــه
أضم النفس وأحفظها وأضـم بقوتـي وأرص=وأحاول في يديني لاتهـاوت تحكـم الرصـه
وهذي قصتي أن جيت تقراهـا أمانـه بـص=تعلم من حكاية شفـت فيهـا عالمـي نصـه
مؤلف حارب الكذبه ومونتاج الحكايه لـص=يلقب دوم (بالنوفي) وحـاول تفهـم القصـه

يا بحر شفني وحيـد وجالـس لحالـي=تركت هالكون كلـة وجيـت محتاجـك
جيتك أبرتـاح مـن حزنـي وغربالـي=وأنثرهموم ٍ بصـدري داخـل أمواجـك
أنـا أدري أنـك مـلاذ كثيـر أمثالـي=و السالي اللي ترى من حسبته ماجـك
جيتك أبي لي وطـن مليـت ترحالـي=خذني معك حسب قانونـك ومنهاجـك
من سود الأيام ماجيتـك وأنـا خالـي=مليت هذا السواد أوقـد لـي سراجـك
يابحـر لا تستهيـن بـ/ هـم يبرالـي=لو يسكنك يابحر عقـد لـك حجاجـك
هموم وأحزان وجـروح وغثـا بالـي=حدتنـي أبـوح لو ما قصـدي إزعاجـك
الضيقة اللي بوسط الصدر مـن غالـي=يا بحر عشها..وشف وشحال أمواجك
أن كان ما قلت..يا ويلي بـرا حالـي=ومن بعدها لي تجي..وتقول محتاجك

لو سمحت الله يخليـك أعتـبرني حلم نايـم=حلم مثل أحلام خلق الله وعجل في رحيله
نفـترق في عز أحـسـن مانخلـيها هزايـم=وأحتـفـظ في عزتي وكبريائي والفضـيله
كنت ضايع في خداعك كنت معك إنسان هايم=كنت أسـوق الرجل يمك والمسافات الطويله
وماحشمت اللي تهاملك مـثل وبل الغمـايم=وصـارت دموعـي مثل همال ديمٍ تستخيله
كنت أضحي لأجل عشرتنا والأيام القدايـم=كنـت أصون الحب عن درب المذله والرذيله
قلت باكر تصحى روحك وتترك دروب الظلايم=وقلبك يحاول يراضي قلـبي بأية وسـيـله
وأثر مابه طب قلبك من عرفتك وأنت ضـايم=والـعوج مهما تعدله يكبر ونفـسه عليـله
وإلا أنا ماوطي الهامه لأجل حب العمـايـم=ماضرت نفسي على غير الولي تزبن دخيـله
والله أني صرت عنك أبعد من نجوم النعايـم=وبأنسحابك عز نفسك دون حقران وفشيلـه
وعزتي هي تاج رأسي ولاني لغدرتك لايـم=ماألوم اللي يحب الغدر في صبـحه وليـلـه
وأعرف أنه مات ذكرك قبل لاأسوي تمايـم=وذكري يشمخ فوق عالي والفرس يصهل صهيله

من يصدق يوم ميلاد جرحي كل عيد ..!=من يصدق في ضحى العيد ميلاد الجـراح ..!
خمسة أعوام ٍ مضت لي وأنا عايش بقيد=ما أتحرر من هواجيس فكري للصباح
لو شكيت اللي بقلبي يذوب إله الحديد=وأن كتمت السر سري من النظرات باح
أتصّبر و أدعـي الله و غيـره مـا يـفـيـد=وألبس برود المشاعر على روحي وشاح
يوم كل ٍ في ضحى العيد بـأحبابه سعيد=جيت أهني ريف قلبي و قالوا عنك راح
راح ما هـنـأ صديقه و لا و ادع وحـيـد=غاب وقبل يغيب عني و لا يوم أستراح
ذكريـاتي مـعه بالـبال لا زالـت تعـيـد=خالده ذكراه لو هو عن الأنظار شـاح
راح ماهو هاجرن لي و لا سـافـر بعيـد=أنتهى يومه مع الناس و أشرق له صباح
أبـتـدأ عـمـره بـجـنات خـلــدٍ ماتـبـيـد=عند رب العرش عله بوسع ٍ وإنشراح
جعله بفردوس ربي و يا جعله يـزيد=منزله حيثه من الناس محبوب و مباح
يـا رفيفي مانـسـيتـك و لو ألـبس جديد=كم جديدٍ لبسـتـه ولا داوا جــْـراح .!

سر ياقلم واكتب كلامن اكيدي=من ضامرن مجروح والبال مكدور
وابدا بذكر اللي غنين حميدي=الواحد الرازق له الكون محصور
وازكى صلاة عد حب الحصيدي=على النبي الهاشمي خير مذكور
يابومحمد يامسندي ياعضيدي=وش حيلة اللي ضامه الوقت معسور
ابكي على صالح في يوم عيدي=وتبيدي لك الايام ماكن مقدور
اسج سجات وفكري شريدي=كن الحشى مني على نار تنور
لاطاب جرحن بان جرحن جديدي=زادتني الايام جور على جور
حتى غدت حالي سواة الوحيدي=في ديرة اجناب ومن الضيم مقهور
والا السجين اللي طواه الحديدي=كن الدقيقه عنده ايام وشهور
القيد في رجله وانا الهم قيدي=واللي بقلبه قيد لو صاح معذور
يوم اتذكر واحد اقفى بعيدي=ماهو بكيفه راح للقبر مجبور
اللي بقلبي له مكانن خليدي=حبه على قلبي كما النقش محفور
ماينتهي بالموت حبن عتيدي=حيثه تمكن تونى صغار وبزور
هو راس مالي بالبشر هو رصيدي=هومايبي غيري ةانا فيه مسحور
ماينقل الهرجه ولا هو عنيدي=ماهو بمطفوقن ولاهو بمغرور
هاضت شجوني ياملا يوم عيدي=يوم الحبايب فيه تنزار وتزور
واللي ذبحني هو قريب وبعيدي=بيني وبينه سد ماهو بمعبور
اصبر على فرقاه والله شهيدي=وانا على فرقاه في شوك وحرور
الصاحب اللي عل قبره سعيدي=عله نهار العيد بالجنه مسرور

سلام من عاشق فريق الصداره=بالمختصرعاشق زعيم البطولات
سلام يارمز الكرم و الطهاره=يا خير للمحتاج في كل الأوقات
يوصل لأبو فيصل إلى وسط داره=و يبلغه مني جزيل التحيات
و بعد التحية و السلام و وقاره=و صله اللي بخاطري عبر الأبيات
يا أمير يا نبض الهلال و شعاره=قناتنا تحتاج لك أنت بالذات
يا أمير قناة الزعيم السفاره=و أنت السفير اللي بيدك القرارات
و حنا أشتركنا لجل نأخذ أخباره=و نتابع الأزرق بكل المجالات
لكنها للغير ربح و تــجـــاره=وحنا لنا تحليل والا اعادات
للي نشوفه و بصريح العباره=قناتنا فيديو كليب و دعايات

لوأنك معي في ليله البارحة ماجاك=منام وتكدر صفوك وهاضت أشجانه
ذكرت الفراق اللي نهابه أنا وياك=مهـو فراق يوم أوسفرتن منك عجلانه
تذكرت يوم الموت لاشك به فتاك=يذوب الحشا من حر همه وحرمانه
تخيلت يومن دمع عينك على يمناك=وقلبـك توقد في حنايـاك نـيـرانه
تخيلت لوعة خافقك ياعساي أفداك=بيومن تطيح دموع عينك على شانه
صياحك علي مارده اللي وقف بحداك=ومن جاء يعزي منظرك هز وجدانه
يقول أذكر الله وأنت من لوعتك ماجاك=سوى قولت [ الله يعظم أجرك ] بفقدانه
ليالي رهيبه حرها مايروح هناك=و لايطلع من اللي فقد قلبه إيمانه
ليالي عسى يومي قبل يومك ولا أنعاك=يهز البدن طاريه و يزود أحزانه
وفـيّ ٍ إلى من قلت أببقى على ذكراك=وغبي ٍ إلى كذبت طيحتك بأحضانه
لأنك رجل مثل الرجاجيل ذا مبداك=إلي طاح نجم كل نجمن و له خانه

أسمع شعر .. تصويت .. لجنه وجمهور=سـافـرت ْ.. مع ضيقة ولا هي بضـيقة
مامـلـكم .. لكـن مـقـيد ومـجـبور=أحد ٍ يـعـاف الــورد وإلا رحـيقـة
مشــتاق في صـدري براكـين وشعور=وشـلون أجل لو قلـت كل الحـقيــقة
عفويــتي قـالت بـلا فـن ديــكـور=غــياب عن ربعك جــنون وحـريقة
ماللـغـلا عندي مـبـادئ ودسـتــور=جامح ْ ولابـه من يـجي في طـريـقة
الـمـنتـدى .. معكم يجي له من حضور=دايـم أهـوجـس فـي بـهاه وبـريقة
أكــتب شـطر .. أحس بـشوية عـثور=كـن الـقوافـي من دموعي غـريقــة
مـن غـيـبة اللي كان للـجـرح دكتور=أقـفى .. ولكـن لهـ مكانــه عمـيقة
لـيـلي نـهـار .. وشمس يومي بلا نور=الله يـاوقــت العهـود الوثـيــقـة
كـل العزيمـة داخلي قـامت تخــور=البــعد نفــسي يـاعـرب ماتطيـقة
رجـعـت .. لكن ياعسى صرت معذور=الــثانـيـة عـنكـم بميـة دقـيقـة