الشاعِـر : سعيـد بن مانـع ( قحطاني الواديين )
تايهٍ وسط الشوارع وجد من مثلي سواتـــه=قصتي مثل الخيال .. ويمكن اقرب للخرافه الله واكبر يازمانٍ فات واتعبني فواتــــه=ياحسافه ياخساره .. ياخساره ياحسافه مابقى لي غير حزنه مابقى إلاّ ذكرياته=آآه ياقل الفؤاد .. وآآه ياكثر إنتزافـــه أعترف بنّي خسرة الغالي اللي ياغلاته=واعترف بنّي أحبه .. وان قلبي مايعافه واعترف بنّي هملته .. آآخ ياقلبي وقساته=واعترف بنّ (كبريائي) ذنب(ن) وتم إقترافه آآخ ياقلبٍ تعذب ماتهنّي في حياتــــــه=وآآخ .. يانهر العنا ياكم تربّعت بضفافه ياعيون الخلق صدّي بالنظر يكفي شماتـــه=ماني اول عاشقٍ يشكي .. ويدلي بإعترافه هو صحيح إن كبرياء الرجل من اسمى صفاته=بس والله كل شي يزيد عن حده ؟.. ((قرافه)) لوزمنّا مثل .. فلم ..آعيد وانظر مجرياته؟؟؟=كان باعيده .. واقدم عذر قلبي وانكسافه وكان اخلّي كبريائي .. وأعترف له في حلااته=وكان أقول .. إني احبه حب ..ماعاشه وشافه بس كل شيٍ تهدّم .. واختفى اللي .. ياغلاته=واكتفى حزني وأصبح (شئ لا يقبل إضافه) وهذا أنا نادم .. بعد ما فات واتعبني فواااته=ياحسافه ياخساره ... ياخساره ياحسافــه وصرت مثل التايه اللي ماعرف وش هي سواته=((شفتو اني عشت قصه .. يمكن اقرب للخرافه ؟؟)) |
الشاعِـر : سعيـد بن مانـع ( قحطاني الواديين )
( حبيبتي ) حبيبتـي مـن نـوع نــادر وبـاهــي=شعري؟..حروفي؟.. كيف اوصف غلاها؟ ان جيـت اوصّـف قلـت ربـي إلهــي=ابـدا واخلّــص مـاوصـل منتـهاهـا فـي حسنهـا والله مـحـدن يضـاهـي=وان وقّـفـت ؟؟..غصبن عليهـم وراهــا هيّـه اسـاس الحسـن هيّـه ولاهـــي=احتـار والله ويــــش اسـمّـي حـلاهـا مـن عينهـا ياقل حاالي وآآآآآآهـــي=نظـره خـجولـه تسحـــرك فـي مداهـا اضيع بيـن الحـرف وبيـن الشفاهـي=مدري؟؟ انـاظـر فمـهـا او حكـاهــــا والشعر سايـح فـوق الاكتـاف زاهـي=وان فـلّـتـه؟ اذكـر واسـمـي عـلاهــا لاقالـت اسمـي جانـي مثـل الدواهـي=وامــووت والـلـه لوتـكـرر نـداهـااااا فـي قربـهـا والله ابـاهـي وابـاهـي=ياسعـد مـن مثلـي توصّــــل قـداهـاااا في الوصف ضاع الشعر منـي وتاهـي=كل القصـايـد مادريـنـا إشــــبـلاهـا يالله تحفظـهـا ولاتـشـوف داهـــي=والله يخـلّــيـهـا لـشـاعـر هـواهــا |
الشاعِـر : سعيـد بن مانـع ( قحطاني الواديين )
( مخبول نصراوي ) مبروك مبروك ياليثٍ رقا العالي=ولاهي غريبه أبد منك ياليثاوي من كل قلبي ابارك لك وانا هلالي=أخوان مابه أبد تشكيك من غاوي من بعد مبروك قلته بأول أقوالي=بفتح قضيه على مخبول نصراوي وصلت رسالة تهزّي صوب جوالي=ويقول ليلك غدا ياهوه مأساوي وقامت بنات الفكر تشعل لي اشعالي=وتقول رده وهو خايب ومتهاوي وأبديت كم من سؤالٍ له على بالي=ثم قلت جاوب بدون أسلوب متلاوي ياوين شخصيتك يامشجع الالي=ماتطرد إلا سرابٍ يضمي الراوي فإن كان تفرح بفوز الليث ياغالي؟=فدربك ودرب الضياع اليوم متساوي عشر اسنواتٍ ولا فيها تهلاّلي=وعشر اسنواتٍ ولاعينتوا امداوي وعشر اسنواتٍ وانتم يابري حالي=حاله مابين التداوي وكوّيت الكاوي حب من طرف واحدٍ لابد ينزالي=وانتم طرف حب..والنادي طرف خاوي أمـا أنا ؟ فبطلاق إنه هنـيّا لي=أشجع اللي رضا جمهوره الهاوي متبادلينٍ بـحب وقول وأفعالي=والذيب لامن عوا جاوب له العاوي ستة بطولات حزنا الموسم الحالي=وانجومكم طافيه وحن نجمنا ضاوي ياهلال مجدك علا من أول وتالي=يامحترف للبطوله مانته بهاوي واصل وحنّا معك ياطيّب الفالي=كبوّة فرس ماتعيق بنيّة النـاوي ولا لا يهمك ضحوك الخبل ياهلالي=اهلال عااالي ماعاقه هرجة الغاوي وأما أنت يامرسل رساله لجوالي ؟=ماني أبشره مدامك شخص نصراوي |
الشاعِـر : سعيـد بن مانـع ( قحطاني الواديين )
( ياراعي الصده ) إليا متى صـــــدتك ياراعي الصــده؟؟=واليا متى زلتك ياهووووه أبقـــبلها ؟؟ قــصّرت مدك \\ وانا لك مجزل المده=مديت بحبال وصلي وانت مهمــلها شـــفت الذي خط عالمويه بخط يده؟=او مثل من يقبص الحيده ويطبـلها ؟؟ ذولا مثل من يـبـيـّن حبه ووده=إلواحدٍ جاهلٍ ماهو بكــــفو إلها لا تحسب إني لا قلت (أحبك بشده)=يعني أبضعف .. وفـعلاتك أجامــلها أبووك انا ند مايزرا على نــــده=وأشــل حمل المراجل وآتحـــملها وحنا هل السيف الاملح حن هل الرده=وحنا ملافي الرجاجيل وزواملها فإن كان وضعك كذا بيطوّل المده=خذها من اقصر طريق ولاتــطولها يالعنبوو حب باير لعنبو جده=وإن كان فرقاك ستره جاك مسـدلها روّح عسى روحتك (روحه بلا رده)=وش حاجتي بناس ماتكرم منازلها الشي لازاد عن حده قلب ضده=وزلتك ماعادني برضى ولا أقبلهاا فإن كان تبغى صدودٍ فأبشر بصده=وإن كان تبغى لعانه ؟؟ فأبشر إزهلها |
الشاعِـر : سعيـد بن مانـع ( قحطاني الواديين )
( زعيمٍ بالمملكه وفي آسيـا .. اهداء مقناص الشعر . وقحطاني الواديين قولوا لسودان الوجيه الي تعرض للهلال=هذا زعيم الأندية في المملكة وفي آسـيه ويل الذي عاند زعيم الأندية بأيا مجـال=يبشر معه بدروس في فن ّ الملاعب قاسيه هذا زعيمن ماتناساه الحقايق والخيـال=وانته بعد يامعانده مانته ابد بناســـــيه أما الحصين اللي تلوّى من ورانا بالذيال=إفـ بشروه انّا قطعنا اذيول مثله خاســيه ما فيه مثله بالنوادي منبع أبطال ورجال=موج البحر هذا الهلال مقطّع الأنفاســيه مثل الجبال الراسيه ثابت نعم مثل الجبال=يوم الفرق متحركة هو الجبال الراســيه يعني تباها مختصر؟ كب الحكي وكب الجدال=واسمع كلامي وخل اذانك للحكي متراسيه كلمة زعامه واضحه بالحيل ياإبن الحلال=والمايله لاشفتها؟ ماقلت ذي متواســــيه ..!! ماندّعي حنّا الكمال للخالق الله الكمــال=لكنّنا ما نبتعد لا دقت الأجراسيـــه هذا الهلال الي يزلزل من صمد وقت النزال=درج البطولة بالذهب و الأولويه كاســيه فإن كان تبغى دايمن لك بالبطولات إتصال؟=شجع زعيم الأنديه و لا ترى مآســــيه وختامها ياللي على بالك تعرضّت الهلاال=أمرح تراه اللي زعم بالمملكه وإبـ آسيه |
الشاعِـر : سعيـد بن مانـع ( قحطاني الواديين )
( يازين ) يازين شوقي ماتخيّله تخييل=شوق البدو للنوّه اللي تمطّر تكفى دخيلك لاتزيد الغرابيل=قلبي بغيباتك تراه امتفطّر ياورد ياللي بالندى جافيٍ حيل=محتاجك اتندّي عليّ وتقطّر من رحت عني مابه إلابهاذيل=ياليه تجرح قلب ؟؟وإتهدّ خطّر؟؟؟ الحب ماهو لعب أو قالٍ وقيل=ولاهو هجر من خلّ في خلّ ينطّر الحب تبقى وافيٍ به ولاتميل=والحب بالإخلاص يبقى معطّر عوّد علي واقبل بفرحي مواويل=ولا لا تحسسني بإني لك آطّر ولاجاك عاذل ؟ زوّد بحرقته كيل=وقلّه حبيبي غيرك افهم واشطّر وانا حلفت اني ماأبدلك تبديل=واوعدك في شيئين بالبال تخطر االحب لجلك دوم يبقى ولا يحيل=والشعر لجلك دوم يبقى مسطّر |
الشاعِـر : سعيـد بن مانـع ( قحطاني الواديين )
( ياقو وجهك ) ياقوّّ وجهك يوم تطلبني آجيك=انت إتحسبني بأنلدغ منك مرّات؟ لاتحسب إني برجع اليوم وارضيك=من عافني حزّه بعوفه لحزات نفسي عزيزه وانت تعرف ويدريك=اغض عيني عن خطا إلا خطا الذات ماعاد لي قلبٍ ولا شوق يطريك=حتى ولوطرّيت بهجي بالابيات محيت زولك من حياتي وابمحيك=ماعاد لك ذكرى بليـّا مسبّات ودي تذوق المرّ من كاسه أسقيك=ياجعل عينك ماتشوف المسرّات ياللأسف مابان حبي بعينيك=بعت المعزّه واشتريت المهونات رح للذي اغراك علّه يهنيك=أما تجي يمي؟ترا حبك أنشات جعل الهموم الغازيه زين تغزيك=وجعلك مثل ماغرت بي تشوف غارات الدمع ثم الحزن والغم يطويك=وتعيش عيشة من تمنى المنيّّات خلك تشوف من الفعايل بلاويـك=ثم أتعرف خطاك وتعيش حسرات لاتعتذر لي وتنتخي في خطاويك=قلبي رحوم ٍلكن ان له كرامات ابغاك تعرف ياقديمي وابوصيك=عندي كرامه فوق كل المقامات ياقوّّ وجهك يوم تطلبني آجيك=انسى حبيبي ماأنلدغ منك مرات |
الشاعِـر : سعيـد بن مانـع ( قحطاني الواديين )
( منتخبنا طاب فالك طاب حظك يالعنيد . . حن معك قلباً و قالب بالكلام و باليدين ) قال لو تسمح يا بو مانع نبي تكتب قصيد=في الصقور الخضر و حنا شاكرين مقدرين قلت أفا عليك ما هي هقوتي بك يالسنيد=كيف تطلبني و أنا مثلك سعودي ياذهين؟ كل من يقدر يساهم ساهم بما هو يجيد=ودامني شاعر بساهم بالفريد وبالثمين واجبي إتجاه من يستاهل الحرف الفريد=ماني امقصّر عسى الله يلعن المُقصرين منتخبنا طاب فالك طاب حظك يالعنيد=حن معك قلباً وقالب بالكلام وباليدين وين ماسقت الخطاوي فلا تفكرنا نحيد=تقبِل؟ إنقبّل .. وتدبر حن معاك مدبرين ويارجال المنتخب نفخر بكم والله شهيد=وصلوا وحنا معاكم يالصقور الكاسرين ماراح ميّت وانظروا قدام بالشوف البعيد=و انتوا رِجالٍ قدها واقدود مانتوا عاجزين حن معاكم بالمحافل نرفع بصوت النشيد=( سارعي للمجد والعليا ) وعاشوا الحاكمين مشجعين وعاشقين وعشقنا عشقٍ تليد=و البيارق خضر و حنا للبيارق رافعين الأمل كل يوم فيكم من مزيدٍ لا مزيد=بالعيون متابعين \\ و بالقلوب مأملين افواصلوا وحنا معاكم يالنشاما مانحيد=و موفقين موفقين .. موفقين موفقين همسة في إذن ياسر .. لاتحرم الجوعان يالقناص وأقصد بو سعيد=ويشهد الله خابرينك ماتجيب إلا السمين |
الشاعِـر : سعيـد بن مانـع ( قحطاني الواديين )
( وفر اقوالك ) طلبت اني أعوّد لك؟؟..لكن للأسـف ماأعـود=تجرحّني بكم كلمه و أنـا جرحـي تجـاوز حـدّ (ولاتصدق اذا انا قلت)..مالك خاطرٍ موجود=و لاتصدق إذا أنا قلت عـدّك عندنـا ما أنعـدّ ولاتسأل عن الاسباب لأنك عارف المـردووود=ولأنك لو سألت (سعيد) بيفحم خاطرك بالرردّ سيوفك بارزه ضدي..وقلبي ماخذنـه اغمـوود=جروحي داميه منك...وشامـخ خاطـري إنهـدّ تعذّر لي عذر واهي و لالـه شاهـد و مشهـود=و تتوقع أبتقبل ؟؟ ابـي أعـرف تكلـم جـدّ ؟؟ وتضحكني بقولك لي ..أحبك حب دون حـدود=ترددهـا وحافظهـا .. و لا تعـرف لهـا مقصـدّ مع اني كنت لك وافي ..بوقت الضيق انا موجود=و لاقصرت فـي ودك و أنـت مقصـرٍ بالـود ولافي يوم زعلتك ولافي يوم جـااك اصـدود=و إما انتـه فـلا والله تجازينـي بفعـل الصـدّ تذكر يوم انا لجلك اشيـل الجاهـد المجهـود=و تذكر يوم انا اغازل عيونـك شاطـرات الحـدّ وتذكر ويش تتذكر..ترا مافيـه شـي معـدود=لو آذكّرك و آذكّر؟ .. أبتعـب ماوصلـت العـدّ لذلك أعتذر وآقول طريقي صار لـك مسـدوود=ولو تسمح تكرمنّي بغيباتـك .. أكـون اسعـدّ تعرف أنك مقصّر حيل تعرف أنك هملت عهـود=لذلـك وفـر أقوالك .. و خلـك منحشـم وأبعـدّ |
الشاعِـر : سعيـد بن مانـع ( قحطاني الواديين )
( الجهل شبه التخلف او يمكن هو بعينـــه ) هيه ياوقتٍ رماني بالمحبه وإبتلاني=وهيه ياحظٍ بخل لا يضحك شفاهي الحزينه كل ماقلت ان حظي طاع ؟ يرجع وايعصاني=ضاع عمري في رجا حظ السعد لكن وينه؟ ذا وأنا خابر خفوقي مايذل ولا يهاني=بس ذلته المحبه لعنبوها من غبينه إن نكرت إني أحب وقلت قلبي مايعاني؟=ماصملت لأن عيني تفضح القلب وكنينه إيه احب انسانةٍ قد زلزلت كوني وكياني=وإيه اقول انها بوسط اضلاعي العوجا سجينه لا أقبلت صوبي؟ فكنّي ضامي وجا من سقاني=ولا أرحلت عني؟ فكني طفل فارق والدينه بقربها كن السنين بعيني اسرع من ثواني=وبعدها ياثقل دمه .. ياكراهيته..ياشينه وإسمها منحوت في قلبي ومن بين المحاني=(شهد ياإسم ومسمى يانتاج الياسمينه) من كثر ماحبها ؟ صرت إمتباهي في جناني=لأنها سبة جنوني وأي شي منها يازينه وأدري إنها تحبني وتسوي الصعبه عشاني=أي وربي تحبني هذي ثقة قلبي ويقينه بس صادق من تمثّل والمثل جاله أواني=(تجري ارياح وهبوب بعكس مشهاة السفينه) جتني بوجهٍ شحوب وغزني قلبي وكواني=وقلت يالله عدها في خيره وستر وسكينه قالت محمد أنا مهمومه وهمي قواني=وهمي سرٍ ماجهرته بس ظني جاه حينه يامحمد يامحمد ضاع من يدك عناني=ولا بيدي حيله ولالي بهذا الأمر عِينه غصب عني حال دونك حظي القاسي ورماني=وأطلبوني من أبوي وقال جيمه قبل سينه ساقني سوق المطيه كن ماذا الشان شاني=وقال مالك غير ولد العم وغصبٍ تقبلينه ورحت لأمي اشتكي ورحت آتعزوى في خواني=ولا أنفعوني والزمن عقّد بوجهي حاجبينه قلت ولصدري ولاويلٍ تروّع : يازمااني=ماتمد إلا سمين ومدتك هذي سمينه الضحايا كل يومٍ والجهل ياقوم جاني=الجهل شبه التخلف أو أظنه هو بعينه ودام هذا الوقت قاسي والعمر بيصير فاني=بحتسب واأوكل أمري لخالق العبد ومعينه بس ببقى أحبها الين ياتي الموت داني=وإسمها يبقى بقلبي (شهد شهد الياسمينه) ويازمن من كل قلبي اقبل بجلّ امتناني=وانت ياحظٍ بخل لا يايضحك شفاهي الحزينه |
الشاعِـر : سعيـد بن مانـع ( قحطاني الواديين )
( يافهد ) يافهد الله وكيلك حيلي من هدٍ في هد=ولي ثلاث ايام وعيني ماتريح بالهجوع شفت شيٍ جعل عينك ماتشوفه يافهد=لجل عينك ماتشيب ولجل قلبك مايلوع شف خويك كيف حاله من جهد يلحق جهد=والعلوم مخبصه والفكر مشتوت الجموع وانت تخبر الرفيدي صقر لامن هد؟ هد=غير ذا الحزه ماهي لحية هداد .. إلا خضوع شفت انا ذيك الغزال اللي الحلا فيها زهد=لعنبو من لامني لا صرت انا فيها طروع اثر حظي طايحٍ وأثار حظي مضطهد=وأثر عيني توها ماذاقت الشوف المتوع لا فتون ولا عفاف ولا لميس ولا شهد=جمعّت أحلى الأسامي والمعاني نوع .. نوع الفتون فتونها .. من عنق وردوف ونهد=والعفاف فعفه بحكيٍ وعفه بالطبوع والشهد من فمها يقطر .. وياحلو الشهد=ومن لمسها لمس ؟ ذاب من النعومه والميوع لعنبوها خبلت باللي حظر واللي شهد=وأحدثت ضجه وكلٍ خلّت بصدره وقوع وكل يطرد خلفها والكل حاول واجتهد=لكن إنها خيبت كل الهقاوي والرموع ضيعت مستقبل الشبّان واللي فالمهد=وأقفت بمشي كما مشيةٍ غزالٍ إمخلوع ثم قلت تكفى يالغزال ارجوك ..هد..هد..هد=لد صوبي لاعدمتك جعل حظك للطلوع لاتهد القلب واتطيح عيوني بالسهد=ياعشا قلب الهواوي لاتخلّيني أجوع إخزرتني ثم مشت والقلب غادي منلهد=والعلوم مخبصه والفكر مشتوت الجموع فيافهد عرفت ليه الحيل من هدٍ في هد؟=وليه عيني ماتنام ولا تريح بالهجوع ؟ |
الشاعِـر : سعيـد بن مانـع ( قحطاني الواديين )
( الرساله ) هيه ياقلبٍ بعد ماأقساه! حــاله ينرثى له=ووالله انه مالحقه أياة منقودٍ وشرها قلب كنه فارسٍ ماحد تــجرّا يعتدا له=لين جاته رمية الشلفا ووقع من ضررها والله إن قلب الرفيدي ماشكا في يوم حاله=غير يوم إنه لمح برقٍ تلالا من ثغررها آتعجب وأذكر الله جل سبحانه جلالـه=جمرتينٍٍ تفترق! ثم يبرق البارق بأثرها بارقٍ همّاله الشهد النقي ياما حلاله=بارقٍ لاخالته عيني ! تكاشحها وجهرها ياوجودي لاتمايل جسمها وزوّد ظلاله=وإنثنت يمي وغطا جيدها الأتلع شعررها غصن رمانه تمايل ثمرتينه بإنمياله=ياعجب ! بغصون نحّـل .. والسمانه في ثمرها والخدود اللي بها نار البدو تشعل شعاله=والعيون اللي نظرها ! ساحره للي نظررها والمشي مشا القطا خفه..تمغناج وعداله=جيبوا (المرّي) وأنا اتحداه لو قص بأثرهاا أخلفت عقلي وحوّل من رزانه لا هباله=واهني اللي ملكها ملك يده !! وأحتكرهااا وين عبدالله يعاين في رفيقه ما جرى له=من جروحٍ صايبه قلبه عجز لا يقتدررها يارساله وصلي شكواي صوبه في عجاله=وأخبره شاعر حكيم وكم مشاوير إختصرها إن تفوّه! قال حكمه.. وان سكت! ماهو مجاله=وان كتب مايكتب الا جزلةٍ يقدح شررها يارفيقي اشتكي لك وانت ملفى ذا الرساله=والمشوره بأنتظرهااا ... والنصيحه بأنتظرها |
الشاعِـر : سعيـد بن مانـع ( قحطاني الواديين )
( إرجع ) البعد يبلا لب جــسمي وقشره=الحيل مهدودٍ .. وقلبي بـ مله لو كنت جاهل بالهوى كان ماأشره=غير البلا إنك عارف الكفت كله البعد ؟ تدري في قساته وقشره=والخل تدري ماقوى بعد خله وأدري انا وابصم بعد لك بعشره=انك هملت إنسان حبك بكــله أخذ النصيحه موجزه دون نشره=من واحد مجرّب ودربه يدله لامن شراك الشخص؟ لاتبيعه إشره=إشره وسخر كل عمرك فداً له لأنه ترى نادر توّفق بعشره=ونادر تلاقي حب مثبووت حله الحب صار اليوم صيعه ودشره=مشوّهٍ معنااااه دقه وجـــله هذا شرِه تجميع وهذاك أشره=وكل أيتحدا كم حبيب وصل له لذلك .. إرجع دامني باقي اشره=لأن شرهتي ؟ ماتقال لرخيص .. لله |
الشاعِـر : سعيـد بن مانـع ( قحطاني الواديين )
( ياوافي الميعاد ) ياوافي الميعاد ليه التجافي؟=وليه القساوه يانبوع المياعه طال انتظاري انتظرتك توافي=عند المكان وعند ذيك اليراعه خليتني والقلب للصبر عافي=ساعه ورا ساعه ولاجيت ساعه ماني بقول انك جحودٍ وهافي=لكن بقول انك تخاف الإشاعه أيه التمس لك عذر والعذر كافي=لكن ترفق بي ولاتجيب طاعه قد قلت لك وادليت لك بإعترافي=والله أحبك قلتها عن قناعه حبك كما بحرٍ بليا مرافي=والقلب مركب فل وسطه شراعه وتدري ولا يخفيك بالحب خافي=بإني احبك حب ياطول باعه حبٍ من ايام الطفوله غدا في=إلين انا عديت سن الصياعه بالمختصر؟ من دون ثابت ونافي؟=حبك زرعته وسط قلبي زراعه زرع وجذوره قاطبات وجلافي=يعني ؟ إبن حرمه قدر فإقتلاعه لولاك انا ماصرت شاعر خرافي=ولاحدن قرا شعري وحب استماعه الهام شعري انت ترتيب قافي=والشعر لك خادم بسمعن وطااعه اصدح بترحيبه لياجيت لافي=وارثي حياتي لانويت القطاعه وامدح جدودك مسمنين العجافي=وافخر بطاريهم ربوع الشجاعه واهجي حقيرٍ ظنني عنه غافي=اللي نوى مابيننا بالخناعه اما الغزل؟ خصصت فيه احترافي=والحرف لك يخضع وغصب إنصياعه لبى عيونك مرسلات الشلافي=ونظراتك اللي بيّنت بك وداعه ولبى ليالي عقبها صبح دافي=صبحٍ وليل بوقت واحد جماعه والخشم يالباه .. لبى الرهافي=والجيد يالباه ..لبى التلاعه ولبيه ياعِدٍ روا لي جفافي=ولبيه يابرقٍ جهرني شعاعه ولبيه يارمان بالحسن ضافي=والخصر يالباه .. لبى المجاعه ولبيه ياعقب المجاعه عوافي=فتنه تزيد القلب شفح وطراعه والمشي كنه داخل الشوك حافي=خطوه وخطوه وانفتن فيه قاعه اقول يالبى .؟ لشيٍ يشافي=وشيٍ بعد ماشيف ببقي قناعه لبيه كله بالحسن والوصافي=من شعر راسه لين ماطا كراعه همت وحسبته مقبلِ لي ولافي=ورحبت به قلت ارحبو .. بإندفاعه وآثارني وحدي بليا موافي=عند المكان .. وعند ذيك اليراعه |
الشاعِـر : سعيـد بن مانـع ( قحطاني الواديين )
( الحلـم ) ياعـيـن يالـلـي سكبتـــي صـافــي الـدمـعـه=الفاتـنـه جــات .. مــن قــدش ومــن قـــدي إنـســي مـــدام الـحـظـوظ الـيــوم مرتـفـعـه=مــات الـلـذي فــات .. لـــدي للـحـيـا لـــدي إنسي منيـره .. وحصـه .. وانتسـي رِفعـه=هـــذي تـغـطـي عـلــى الــثــلاث وتــعــدي فـتـنـه وآيـــه .. تـخـيّـب هــقــوه ورمــعــه=مـالا نهايـه .. لـو أوصـف ويــش بـاابـدي الـشـعــر ؟.. مـاكـنــه إلا لـيـلــة الـجـمـعــه=والسبـت .. صبحـه بوجـهٍ مـشـرق مـنـدي والعيـن عـيـن النـعـاس الـلـي تـبـا الهجـعـه=والـخـشـم سـيــفٍ مـهـنـد بـــارع الــحــدي والــخــد لـبـيــه كــنــه مـنـصـفـع صـفـعــه=والـفــم جـمــره وهــــب الــنــود مـشـتــدي اليـا اضحـكـت ؟ سنـهـا يجـهـرك باللمـعـه=بـــارق وعـقـبـه عـذوبــة مـــزن مـتـنــدي وسنـونـهـا .. يـذهـلــك ترتـيـبـهـا جـمـعــه=(صفـة رجــالٍ لـفـوا فــي زامــل امـهـدّي) والجـيـد لامــن نظـرتـه ؟ جـاتـنـي خـلـعـه=لا يجـرحـه عقـدهـا الألـمـاس ..يـاوجــدي و الصـــدر رمــــان ماأحلـى بـــــرزه وطـلــعــه=واليا تراكـت ؟ نسيـت اسمـي واسـم جـدي انظر خصرهـا ؟ وأقـول : احليلهـا جوّعـه=وبعد الخصر .. لا ..ماكن به رحمةٍ عندي تـمـشـي ولا كـنـهــا الا كـسـلــه ووجــعــه=تـهـمــس ولا كـنـهــا الا طــايــرٍ يــشــدي مـن راسهـا لساسهـا روعـه علـى روعــه=والأروع انـهـا لـفـت تـمـشـي لـيــا حـــدي فكـرت .. قلـت : ابشـري يانفـس بالفزعـه=يـــاذا الشـقـيـه بـحـقـق حـلـمـش الــــوردي انـتـي هـويّـه واعـرفــش بـالـحـلا طـمـعـه=لا لا تـخـافـي وقـولــي صـــادق وجــــدي قـلــت الـخـبــر يـابـنـيـه اذعــنــي سـمـعــه=انـتـي مـنـى النـفـس وانـتـي كــل مـــاودي ومـن حـام حولـش ؟ فأنـا بسـارع بردعـه=منـتـي لغـيـري وانــا لـــه الـعــن امـحــدي أقفت ... ؟؟؟؟ وكن مالها نيه على الرجعه=والرجل عجـزا ... وحيلـي صـدق منهـدي والـلـي قهـرنـي وزوّد خـاطــري لـوّعــه؟=امـــد يـــدي لـهــا ؟ ثـــم تـنـقـصـر يــــدي فجأه اختفت عـن عيونـي واختفـت سرعـه=وآثــار أمــي تـصـب الـمـاء عـلـى خـــدي |
الشاعِـر : سعيـد بن مانـع ( قحطاني الواديين )
( ويش قومك ؟؟ ) ياويش قومك .. خت موتك .. تغليت=على صحيبك وانت غالي بلـيـّا اشوف صديت النظر يوم انا جيت=من عقب مانت بشوفتي ماتريّا حاولت اجازي صدتك لكن ازريت=ان جيت احاول ؟ فز قلبي وعيّا انا اشهد إنك بعرش قلبي توليت=حكمت وضلوعي جنود الحميــّا لا أقبلت ؟ كني تايه وشاف له بيت=ولا اقفيت ؟ وجدي وجد خيل المحيّا من كثر ماأنا احبك اقول ياليت=بعض العلوم اللي بقلبي تهيـّـا يكفّي اني من عرفتك تغانيت=ولا الفتت عيني تياكٍ وتيّـــا ويكفّي انك لازهمت وتوحيت=آتي ملبي دون فكـر ومليّـا ويكفّي اني لجل عيناك عديت=شعرٍ ليبسات المعاليق ريـــّــا ويكفّي اني لجل عيناك جريت=صوتٍ يميّل كل غصنٍ طريّـا ويكفّي اني كم عشانك تعنيّت=واسامر القمرا ونجم الثريّـا تعرف طبوعي مابعد يوم منّيت=لكن لجل تعرف مكانك هنيّـا لوقلت طب هنيه ؟ لاقول طبيت=ولو قلت هيا هناك ؟ لآقول هيا بالمختصر اني لاحبيت ؟ حبيت=وحبك بقلبي مثل وشمٍ وكيّـا لكن انا طالبك طالبك لاجيت ؟=لالا تغلّى وانت غالي بليّـا |
الشاعِـر : سعيـد بن مانـع ( قحطاني الواديين )
( الفقير الكفوو ) البارحـه فالبـر .. والجـو ماأقـسـاه=باررد .. ولاتسمع سوى حـس رجفـي شبيـت ضـوي والمعامـيـل تـزهـاه=لجل احبـك الدلـه .. وبالصالـي أدفـي وحدت هواجيسي خفوقي علـى اقصـاه=وجريت صوتـي .. ثـم دونـت حرفـي وقتٍ مضى والمطلـق الكفـو ؟ ينعـاه=ولا أظـن ينفـع ذرف غيـري وذرفـي والاش ؟ يفـرح فـي مضيّـه ومقفـاه=عذره معه يومـه عـن الطيـب معفـي الفـى علينـا وقـت ياشيـن ملـفـاه=ملفـى ؟ ولكنـه عـن العـز مقـفـي روّح زمـان الذيـب وارتاحـت الشـاااه=وصار الرخـوم تبـان والكفـو مخفـي الرجـل مـن طيبـة فعولـه ومجنـااه=والاش ؟ مايسـوى علـى حـد عرفـي لكـن تغيـر كــل شــيٍ ومعـنـااه=أعشى عيـون وفوقهـا النـور مطفـي ياقووم .. يابعـض الرجاجيـل مـاأرداه=وسمّـوه شيـخ وصـار يثبـت وينفـي لاشٍ ولا يسـوى ويـوم الله اغـنـااه؟=اصبـح بعيـن النـاس سـداد مكـفـي بالمال ؟ صار الشيخ .. والمال ؟ عـلاّه=وتشيّخوا .. مدحت .. وعصمت .. ولطفي أمـا الفقيـر الكفـو مـالـه مــوالاه=ودايم مابيـن النـاس منسـي ومجفـي ويعيبـونـه بالفـقـر .. واحـــلالاه=مـن عيبـه ؟ يلقـى جـروحٍ ونزفـي ياكـم فقيـرٍ ينتهـض يــوم تنـخـاه=وياكـم غنـيٍ يسمعـك ؟ ثـم يغـفـي وياكـم غنـيٍ ماينومـسـك ملـفـااه=وياكـم فقيـر امنومسـك قبـل يلفـي |
الشاعِـر : سعيـد بن مانـع ( قحطاني الواديين )
( الله ياياسر على الفن الله ) صفر حكيم اللعب صفّـارة .. إبـدا=وعالصافره كلن خـذا خانـةٍ لـه واللعب كل ماله من أردا الـى أردا=وانشدت اعصابـي وريقـي أبلـه والشوط الأول زل من غيـر مقـدا=والشوط الآخر جا وانا آناشـد الله طاح العقـال وبعـد ماعـاد أمـدا=الحق على الغتره وطاحـت محلـه واقف ولاقدرت أجلـس ولا أهـدا=والوقت يمشي والعـرب مستخلـه الين جا القنـاص ياجعلنـي إفـدا=خشمه .. وراسه جعل راسي فداً له وكنه يقول : أنا اللي أجـدر وابـدا=ويقول : جا دوري وانا بأمتثل لـه جاب الهدف والحقه الآخـر وأهـدا=الفـوز لـلأزرق وللشعـب كلـه ورفعت أنا عقالي وبالصوت اشـدا=(الله ياياسـر علـى الـفـن الله) |
الشاعِـر : سعيـد بن مانـع ( قحطاني الواديين )
( بعدها ماتقوم للنصر المشفّـح قايمـه ) بين تحليق الصقور وفوق هامات الجبـال=مع براد أبها البهيـه والسمـاء الغايمـه ماني بيمّ الجنوب ولانـي بيّـم الشمـال=يم عاصمة السعوديـه هجوسـي حايمـه يم معشوق القلوب ولا سوى نادي الهلال=حامت هجوسي وقالت عنه ماني شايمـه وبين هقوات العقول وبين ذب الإحتمـال=قال الأزرق كلمته واحيا القلوب النايمـه الله اللي يعطي وياخـذ ولا فيهـا جـدال=واحمده يومه عطاني حب مانـي سايمـه حب الأزرق يصطفق فالقلب من جال بجال=ومن يحبه لعنبو من هـو بحبـه لايمـه مايوقف قِدم الأزرق كوود من صابه هبال=اشتكا منه الشبـك والعارضـه والقايمـه الغنيمه عشقنا والعشـق باقـي لا يـزال=جعلها لـك يالهلالـي كـل يـومٍ دايمـه والعمل والجهد والمنتوج لرجـال الهـلال=والفشل للنصر خله كـل سـاع يزايمـه الهلال اسم ومسمى فوق لايمكـن يُطـال=والنصر ؟ مابه نصر دايم دروجه صايمه يازعيم الأنديه بالهون لاترخـي العقـال=الجيّف لو تنضرب للصبح ماهـي قايمـه الثلاثه كافيـه وانـا كفيـلٍ فـي مقـال:=(بعدها ماتقوم للنصر المشفّـح قاااايمـه) |
الشاعِـر : سعيـد بن مانـع ( قحطاني الواديين )
( الهنوف ) الهنوف الساكنه بين الضلوع المنحنيه=والله ان تبطي وتبطي ماتناحت عن سكنها اهنفت قلبي بلا ميعاد .. لبا ذا البنيه=وارحلت عني بلا ميعاد .. ويل القلب منها خابرنها من لدود العين خفره مستحيه=وخابرنها مهرةٍ ياصعب تجويدة رسنها وخابرنها من حلاها ماأرثّت لأحدٍ بقيه=كنها بعرش الحلا متربعه تامر وتنها وخابرنها لا تـثـنّت ارسم بلوحه بهيه:=(ثمرتينٍ ناضجه من نضجها ميّل غصنها) وخابرنها تحبني .. وتشتاق لي .. وتحن ليه=وخابرنها وخابرنها والله اني خابرنها ليه خلتني معرّض للهبوب الموسميه=وليه خلتني .. بلا علم بمرابعها ووطنها اول اليا من حزنت القى من يهون عليه=وعقبها ... احزاني يتيمه مالقت من يحتظنها واوجودي وجد من نص العزا عيد الضحيه=آتوجد وأتكتم .. لكن العين اتعلنها اسنتينٍ منّها والشوق ناره مصطليه=ولا لفا مرسالها من يوم ماقفى ضعنها بس تبقى ساكنه بين الضلوع المنحنيه=لو نحت عن ناظريه .. ماتناحت عن سكنها عادتي لامن حملت لشخص حب ومقدريه؟=لوتناسا مانسيته .. عادةٍ ماأجوز عنها |
الشاعِـر : سعيـد بن مانـع ( قحطاني الواديين )
( ياهلال ) سلام تسليمةٍ رفّت بيارقها=في راس رجم الفخر والمجد منشوره بيارقٍ زاهي أبيّضها مع أزرقها=في كف شاعر بحرفه عبّر سروره ياهاجس الشعر بنت الفكره اعتقها=اتعايش أفراحنا بالصوت والصوره لا عاش شاعر بيوته مايطرقها=في من ملك قلبه المفتون وشعوره البارحه غيمةٍ لاحت بوارقها=خايلتها فالرياض وجات ممطوره نفوس متعطشه والخير غرقّها=لين اصبحت بالفرح غرقا ومغموره ياهلاااال كلمة بعالي الصوت ننطقها=وكل الجماهير مجنونه ومعذوره الضيف مالمملكه بالضبط ؟ مشرقها=جانا وقمنا بماجوبه بلا بوره ذبيحتينٍ تدسم فم ذايقها=الأوله من صبي قحطان منحوره ياسيد الأنديه ياأحلى فوارقها=ياقاهر الخصم ياامطلعه عن طوره العاشقه ماتليق الا بعاشقها=نلت البطوله وقالت : حيل مشكوره |
الشاعِـر : سعيـد بن مانـع ( قحطاني الواديين )
( الحق على من هو يحبك ويغليك .. وبعرف مدى حبك ليا منه أمداك ) عيون قلبي من عنا البعد تبكيك ""=""وعيون وجهي ماأذرفت دمع فرقاك الأوله ؟ من كثر ماأفقدك وآبيك=والثانيه ؟ خوفٍ من إعداي وإعداك سنه وست شهور أرقب ملافيك=لكن لا ذا الحين مازان ملفاك تعال واجمع ماتشتت بيديك=وإبن الهدام اللي نتاجه خطاياك تعال ياغيمي برعدك وضاويك=وأمطر على أرضٍ مابها غير الأشواك الشوق والحرّه ببعدك... وناهيك؟=عن هاجسٍ ماياتي إلا بطرياك مثل الممالك في عيون المماليك=غلاك في عيني عسى الله يرعاك على ليال البعد صارت مساريك؟=وانا مساريّه على عكس مسراك؟ ياصاحبي ماهو كذا الله يخليك=شرع المحبه لا تماديت ينهاك ياللي حلا السكر نبع فيك من فيك=وياللي مضاويح البدر من محياك تقول أحبك لا بعد ميتٍ فيك؟=وإنته تجرعنّي مرارة جفياك؟ إلحق على من هو يحبك ويغليك=وبعرف مدى حبك ليامنه أمداك |
الشاعِـر : سعيـد بن مانـع ( قحطاني الواديين )
( مبروك ) ياهاجسٍ مريت بي فجريه=ياحي شوفك لعنبو من رده لعيونك الأحرف تجي متليه=كالسيّل لاهوّا ولااحدن حده البارحه كل القلوب الحيه=غنّت ومالت من غناها (جده) وش جده ؟ إلا كلها الغربيه=بل كلبوها اديارنا الممتده مبروك ثم مبروك يااهلاليه=نلتوا اللقب .. ذي عادةٍ من مده أعلامنا دايم على العليّه=والحمد لله ماهي ابمسوّده |
الشاعِـر : سعيـد بن مانـع ( قحطاني الواديين )
( القلوب المريضه ) بديت بسم الله عالم مكني=واعوذ به من الوجيه البغيضه من بعدها ياهاجسٍ ممتحني=من يوم ماحولت يم الحريضه قمت آتذكر من بسيفه طعني=طعنة قفا .. ماهو بطعن النقيضه نشدت نفسي حيل : وش جاه مني ؟=وكان السبب حسد القلوب المريضه انا اشهد ان مفارقه ماشحني=هو المشتحن .. من هو بمثلي يعيضه ؟ وفيت له وأخلصت له بس كني=اصلي السنه .. واخلي الفريضه كنت انقهر لاجا لهزله يدنّي=وش دخل معوّض بزلات عيضه؟؟ خله معا اللي ناسبوه امتهني=(( يالقينقاع أفرح بربعك قريضه )) ماجي مجالسهم وأأكد وأثني=إلا اذا جابو من الديك بيضه ؟ انا مع اهل الطيب اناسب لأني=طليق يمنى من قبيله عريضه وعزالله الوالي .. على صغر سني ؟؟=نجمي بعين الكفو يعكس وميضه أحمي مواقيفي ولا خاب ظني=مثل اسهلي يحمي حدود الرويضه شاعر ولي طرقي وذوقي وفني=لبيه ياشعري .. ببرده وقيضه خذ الخبر ياصاح مني وعني=تدري وش اكثر شي لقلبي.. يغيضه ؟ أنه يغني الواحدٍ مايغني=وانه يعاشر له قلوبٍ مريضه |
الشاعِـر : سعيـد بن مانـع ( قحطاني الواديين )
( لاعب ومواطن صالح ) زادو عليـك الإنتقـاد الشـانـي=أمرضتهـم ياياسـر القحطـانـي هم مادروا بإن الأسد لـه ميـزه؟=ماهيب تخفـا لقاصـيٍ أو دانـي لا نام ؟ هيبه ماحـدٍ يقـرب لـه=حتى ولو هـو ابنومتـه وحدانـي وان جاع فز لصيدتـه مـا مـالا=ينقـا سمـانٍ تعجـب الأعيانـي ياياسر المبـدع عملـت الواجـب=ماهـي غريبـه منـك يابطرانـي زودٍ على لاعب .. ؟ مواطن صالح=زدت الكبـاري واحـدٍ مجـانـي خففت زحمه بالريـاض وسيـره=تسلم لنـا .. ياياسـر القحطانـي |
الشاعِـر : سعيـد بن مانـع ( قحطاني الواديين )
( اخذت موووته ) تعجز حروفي وفكـري بالرغـم أنـي=اطوع الحـرف وانسـج فكـره مدنـه لكن اذا قـال عبـر بالشعـر عنـي ؟=في وقتها كن مالـي بالشعـر شنـه لا جيت له رافـعٍ راسـي والا فإنـي؟=أتووه .. ويصير هـوّ اللـي الا فإنـه رخيـم صوتـه بهرجـه كنـه يغنـي=أخذت موته عسانـي ماأنحـرم منـه دلـوع فيـه الدلـع زايـد وجنـنـي=نعوم مـن ريشـة العصفـوره آحنـه يمشي وكنـه طـوال العـام متحنـي=كنه على روس الاصابـع مشـا كنـه والشعر سااايح على الأمتـان متدنـي=وأظن الأنفاس مـن سيحـه ؟ يهبنّـه احيان اذا غاب عني ؟ قمـت متعنـي=وأغلط واصلي الخسوف .. متابع السنه لا جا قبالي أغنـي لـه حسـب فنـي=وان غيّب آجـاذب الونـه ورا الونـه حبـه تمـكـن بخفـاقـي ومكـنّـي=ماهوب حب الغـوا والطـق والرنـه احب (مرحبه) لا صـدّح بهـا كنـي ؟=متعومـسٍ كيّفـه هيلـه معـا بنـه اي والله اني احبه مـن صغـر سنـي=ولا ذبحنـي عليـه الا صغـر سنـه والضيم لو قال لي : ماعنـك وعنـي=أو اتركه ؟ قلـت : لا ماعنـي وعنـه أقرب لروحي .. من شفاهي الى سني=وأبعد من البغض .. بعد ابليس مالجنه ظني به أعلى من (مهلهل) أبو الجنـي=وظنه بي أرسا من مهلهل ومن جنـه حتى ولو مابقا الغالي علـى ظنـي ؟=بآغض طرفي .. وانا ببقا علـى ظنـه |
الشاعِـر : سعيـد بن مانـع ( قحطاني الواديين )
( اهداء للمنتخب السعودي ) واحد .. ثنين .. وثلاثه .. وأبدأ القصه:=جاك الرجل عاشقٍ حلوه يامحلاها جاها بتسعة دنانيرٍ من الحصه=قال احتروني بقا لي شوي وألقاها هذا المهر جبت نص وباقيٍ نصه=والله يجمل مواقفنا ويحماها يامنتخبنا السعودي حلوه الحصه=عطيتهم درس في الكوره ومعناها علمت من قالوا انهم فيك مختصه=بإن التخصص شهاده صعبٍ امناها وص اللذي يحسب أنه بالعلا وصه=ان العلا ماتجي للي تمناها اللي ينافسك ؟ حظه بيده يقصه=ياويل من هو قرب لــ أسود وحماها وش زينة الخاتم اللي ناقصه فصه ؟=وش هي [البطوله] بلانا .. ويش يزهاها ؟ نجيبها لجل تكمل فتنة الرصه=رص الذهب بالخزاين زان مرآها هذا كلام السعودي وصلنا نصه=عقب المباراه جاها خير ماجاها فمان ربي الى أن تكمل القصه=ونقول مبروك ياللي جيت لرضاها |
الشاعِـر : سعيـد بن مانـع ( قحطاني الواديين )
( مشاركة كلنا غزه ) الهاجس اللي فـز وأيـاة فـزه=فزة شجيعٍ حاودتـه الضـواري مما على اذني كل يـومٍ وحـزه=أسمع طواري شينها من طواري وياخافـقٍ كـن الشبـاري تحـزه=صبرك عسى تثلم حدود الشباري ياوجد حالي كيف تنهان غـزه ؟؟=وحنا بفعل اجدود أهلنـا نمـاري نعم لنا ماضـي شريـفٍ منـزه=لكنّ حاضرنا من العـز عـاري وين الذي صوت العزاوي يهـزه=وين العروبه بين بايع وشـاري ياحر مانت بحر مـن دون عـزه=تضحك على لحيتك حتى الحبـاري ولذيب وينه والعـوا ماأستفـزه=للحين في ليل المهونات ساري ؟؟ الى متى يبطي العلـم مانـرزه ؟=والى متى واحنا لهوانـا نـداري هيـا بنـا لأخواننـا نــدز دزه=الخوف قطعهم بـتيـه الغـداري في الجو نفاثـه وفالقـاع هـزه=والدم من أخواننا نهـر جـاري هيـا بنـا راس المدمـر نجـزه=راس الكفر نركز عليه السواري نقطع نبا صهيون واللـي يـوزه=والكل منا يصيح : هذا شعـاري رمح بـيميني فالمناحـر اكـزه=وكفاني الأبيض بقبضة يسـاري اما حياةٍ تنصـر شعـوب غـزه=ولا عسانا مع مـراح الـذواري |
الشاعِـر : سعيـد بن مانـع ( قحطاني الواديين )
( جيتك ) من قيض دنياي جيت أدوّر ظلالك=وأرتاح من عقب ماأشقتني مسافاتي هالك وضامي مشاعر والبدن هالك=يايبس ريق الخفوق .. وقل حيلاتي واللي جعلني بلا تفكير أسعى لك=أني لأحسدك في صبرك بغيباتي ياقو قلبك .. أقل القول : وش حالك؟=شحيّت .. وش عاد لوني قلتلك تاتي هبتني أشواق لك .. وأرسيت في جالك=وبالفعل الأشواق تجري عكس مشهاتي لوهو بيديني أبد والله ماأعنا لك=لكن شوقي فضح قلبي بنظراتي جيتك مجمّع حكي من يوم ترحالك=وصوّخ اذانك لصوتي وإسمع الآتي:ـ ماأبدن سئمتك .. ولا ببدل إبدالك=به حي قد قال لك سئمت نبضاتي ؟ نعم أحبك .. ولا عليّ بإهمالك=وإن كان حبك غلط .. ياحلو غلطاتي هذا أنا ياحبيبي .. بآأترضا لك=من يوم قفيت .. وانا العله بذاتي قفّيت بالحالك ؟ أبدن مانت بالحالك=خاوتك فرحة خفوقي وإبتساماتي |
الشاعِـر : سعيـد بن مانـع ( قحطاني الواديين )
( تجرح واجابرك ) ياقابـر احساسي ؟ تملت مقابرك=يعني لأني مانهيتك و لا بحت ؟ للحين وانته ماتخلي مكابرك ؟=وللحين في ليلة غرورك و لا أصبحت ؟ لقّيت لكفوف المشاريه صابرك=وقفّيت لكفوفٍ تواسيك لا صحت وأغلقت عن حوض المواصل صنابرك=وأجدت في صخر الجفا روعة النحت تجرح وانا اللي بعد هذا ؟ أجابرك=آسف حبيبي يوم منك تجرحّت مظاهرك لو هي مرآية مخابرك ؟=ان كان قد قفّيت منك وريّحت ريشتك ؟ وش تسوى بليا محابرك ؟=وعيشتك ؟ وش تعني بدوني \\ إذا أفلحت ؟؟ الحل بيدك وانت تعرف معابرك=وافراقنا نتايجه خايبه بحت اروح منك ؟ كيف وانا اللي خابرك=تنوح وارجع لك برحمه اذا نحت تروح مني ؟ رح مانيب جابرك=وياكثر مابفقد خفوقي اذا رحت |
الشاعِـر : سعيـد بن مانـع ( قحطاني الواديين )
( مختار الصحاح ) مدخل :: ياوجـودي وجـد مكـزوز الرمـاح=طـاح بيـن أعـداه كلـن يضربـه آتوّجـد مـن هـوى ذاك الصـبـاح=أهربه .. بالفكر .. يرجع ؟ .. وأهربه ليـت ماعطـر المحبـه يـوم فـاح=ماوصـل خشـم الفـؤاد ومـر بـه الحبيب اللي جعـل صـدري بـراح ؟=ضيّقه .. جعـل الفـدا والنـذر بـه أحسب انـه مائـي العـذب القـراح=مـاأدري انـه جـم بيـر مغثربـه أي نعم غزيـر حبـه بـس .. : آح=البحـر غزيـر .. لكـن تشربـه ؟؟ مايبـل الريـق .. مطعـوم المـلاح=الضما منـه .. وحتـى الغـدر بـه لـو يفـرق بالحـرام وبالمـبـاح ؟=كان فـرق مشرقـه مـن مغربـه دوّر الطربـه بالأحيـا ماأسـتـراح=وزامر الحـي الشجـي ؟ مايطربـه الجمال اللـي كسـا كتفـه وشـاح؟=ظنـي إنـه لعـب بـه وأغتـرّ بـه قـال احبـك ثـم احبـك .. ثـم راح=شرهة الآعب ؟ علـى اللـي دربـه اشتكا كلمتـه: (مختـار الصحـاح)=له معاني غيـر ..! كنـه ايعذربـه يـا فمـان الله .. يامـال الصـلاح=بأعتبـر حبـه .. مجـرد تجـربـه مخرج : |
الشاعِـر : سعيـد بن مانـع ( قحطاني الواديين )
( زودتها عليه حبتين ) مدخل .. الكفو في ذا الزمن ..؟ مثل مكسور اليدين=والوفي في ذا الزمن؟.. مثل خطّاط البحر يا إلهي يا إلهي ... آله العالمين=يامن لوجهك نفيق ونصلي في السحر اغفر ذنوبي .. وجرني عذابك يالمتين=أذكرك واستغفرك كل ماصدري زحر عفت دنياً زودتها عليّه حبتين=كل ماقلت انقضا الهم عوّد وأستحر أشهد ان بعض الخفايف ؟ تهول الناظرين=وأشهد ان بعض الحكا وقعه أثقل من (شحر) 1 في نهار الصيد .. حزة ثبوت الصاملين=بان لي صقر الحباري .. على صقر الوحر ماتوقعت الرجل بلوته مـالأقربين=لين ما أصبحت شاعر بيانه ذو سحر يصرف المعنى كما تُصرف ام القالبين=دافي الإحساس والحرف . . في بردٍ وحر شاعر غنت حروفه جبال الواديين=يبسط اللي ماأنبسط .. يفحر اللي (ماأفتحر) 2 وأنت ياللي تنطل الحكي نطل الجاهلين=أحسبك تدحر عدوي وأثرني المندحر؟ كيف أسلك سيف بيدي وأضد المعتدين؟=وأنت سيفٍ لو حصل له ركزني في النحر شنت يالأدنى .. وخيرك غدا للقاصيين=صاب خيرك للعرب .. واما انا عني جحر ما أنلدغ مؤمن من الجحر نفسه مرتين=اما انا انلدغت .. في كل يوم ولك جحر إنقتل قدرك بقلبي ولا أبغا امعزيين=انقتل لو ماقتلته ؟؟ .. فلا شك أنتحر احذف الريشه وأذا احسيت للريشه طنين؟؟=ماني اقطف من زهر .. ماني اغرف من بحر \ |
الشاعِـر : سعيـد بن مانـع ( قحطاني الواديين )
( ياياسر ابن سعيد ) عديت رجم مهلهل وخافقي حاس=إبحرّة كني على الجمره اشويه ولا هنا لي به وقوفٍ ومجلاس=عفت الجبل من بعد ماخاطري فيه نسناس ؟ وينه كن مافيه نسناس=ضاق الصدر والليل بانت مواريه ولا جدا الشاعر ليا جاه هوجاس=سوى بحوره لا تلاقت قوافيه ياياسر ابن سعيد .. لا باس لا باس=تبقى جبل .. ماهزه اللي يلاقيه مايمتحنّا الا عديمين الإحساس=اللي بلاهم ؟ وقتنا حي طاريه الوقت فيه الخير .. والشر في الناس=نستثني اللي طيباتٍ مجانيه يفداك من يعداك ياطيب الساس=ولا عليهم يابن عمي مشاريه اللي عجز لا ياصل الراس بالراس؟=ماله سوى شذب العراقيب يشفيه وانته من اللي تعبّو قبّ الأفراس=وانته من اللي ماتخيّب عزاويه وانته من اللي للتواريخ نوماس=وانته من اللي حدّهم ماحد يجيه ماهمنا قولة حسودٍ وبلاّس=أحبابك تخيّب .. بوجهه هقاويه دامه سرى فالليل من غير مقباس=ماله سوى العثره وخابت خطاويه |
الشاعِـر : سعيـد بن مانـع ( قحطاني الواديين )
( قشر الموز ) يارب تمنعني من الفقر والعوز=وإنك تخارجني من النبز والشمت بعض الكلآم يزيد فالخطّر إحزوز=وآخير من بعض الحكي ؟ نلزم الصمت وبعض العرب يفهم ويفطن من ارموز=وبعض العرب تشرح له ؟ يقول : ماإفهمت وانا علوم المرجله حزتها حوز=معروف في صمتي ولا من تكلمت ما أقبل طعامٍ جا من الناس مدزوز=كم ليلةٍ حزمّت بطني ولا نمت واليا إنشدوني قلت انا بخير وآنوز=عزيز ولرب الملا آلأمر سلمت واللي تعب ؟ يستمتع بنكهة الفوز=مثل الخوي وقفته لا من تألمت لي بيرقٍ بجبال الأمجاد مركوز=شايم عن التشكيك ما دامني شمت يجوز اناظر للمظاهر .. ولا يجوز=احكم بها ع الشخص دامي تعلمت ان مابه احدٍ قد اكل قشرة الموز=دام الحلا في ثمرته كان ما إطعمت |
الشاعِـر : سعيـد بن مانـع ( قحطاني الواديين )
( واحد من اخواته ) الا ياعالـم الأجهـار والأســرار=يـاربٍ واحـدٍ نرجـي لمرضاتـه فأنت السارّ ياربـي وأنـت الضـارّ=وأنت اللي تجيـب العبـد دعواتـه تهونّها على رجـلٍ زمانـه جـار=وتشفي علتـه .. وتفـك زنقاتـه زماني جار وانـا بـأول المشـوار=وذوقنـي المـرار بكـل كاساتـه آحل ديار وارحل من عنـا لديـار=ادور شرحـة الخاطـر وسجـاتـه والا يانفسي اللـي حظهـا عثـار=وعيا مايلـه .. يقبـل سميحاتـه على الشـده تعودنـا فـلا ننهـار=ونومن بالقـدر شحـه وعطواتـه تعلمنا مـن الدنيـا دروس اكثـار=ومن لا يستفيـد يـذوق حسراتـه فلا نستصغر الحاجات لو هي اصغار=صغيرات الزمن ؟ .. تنتج كبيراتـه نجد ونجتهـد بالعـزم والإصـرار=ولا يشُمت بنا .. ولا حن بشمّاتـه فقارى ماعرفنـا عملـة الـدولار=ولكن نعـرف ان كلـن وشيماتـه قنوعيـنٍ قبلنـا ظـل دون أثمـار=حدانا ماشكـا مـن قـل حيلاتـه فلانبكـي نـدور مــدة التـجـار=خذينـا م الجـبـل إلا طمانـاتـه ولانضحك نـدور ضحكـة التجـار=عـزازٍ نصـدق ولاحـن ببهاتـه وإذا القُبله لها دربٍ طويـل أمتـار=لنـا عفويـةٍ تقصـر مسافـاتـه ياكم دجنا بقـاع الأرض والأقطـار=وعرفنا سلم هذا الوقت وحكماتـه معك مليار ؟ يعني قـدرك بمليـار=وراعي الشاه قدره ماأعتلا شاتـه وخاوينا بوقـت العسـر والأستـار=بوقـت المستـره كـلٍ وضحكاتـه وميزنا الوفـي مالصاحـب البـوّار=فوايـد وقتنـا الأقشـر وصكاتـه خويٍ ماأنتفض فالماقـف الجبّـار=أعده بأنظري واحـد مـن اخواتـه واذا كان ابن عمي ماقبس لي نـار=وضوّح لـي بليـلٍ حلـك ظلماتـه عسى عيني تهله هلـت الأمطـار=يروّح دون ماأسأل منـه رجعاتـه فـلا ننظـر لواقعنـا بإستنـكـار=نعم هـذا الزمـان وذي مساراتـه مدام ان الغيوم اصبح بها إستمطار؟=اجل خـل العجـب يعلـن نهاياتـه |
الشاعِـر : سعيـد بن مانـع ( قحطاني الواديين )
( قد صحت ) يابارقٍ لوّحت .. لليل ضوّحت=ثوّرت فيني خامد الحب والشوق ذكرتني في بسمته عقب مالحت=ونقضت جرح وسال من ضيمه الموق وانا كتمت اللي بصدري ولا بحت=ومن كثر مابه ؟ صرت عابس ومخنوق اسهر بهاجوسي ولا مني اصبحت ؟=اهجع واشوفه جعل ماناشه العوق وأفرح .. ولامني من النوم صحصحت؟=اقول : ياليتي من النوم ماأفوق قد صحت من درب المحبين قد صحت=ماطاعني قلبي وساق القدم سوق وش زان لك ياقلب ؟ مبسوط وارتحت؟=قد علمك عقلي ولكنك مطفووق ولا أنت ياللي ماخذه عقب ماأجتحت=اضلاعي بليّا تنحنح ولا ذوق ماطحت من عيني ولو جرت ماطحت=تبقى بعيني لك مكانه ومرموق انساك ؟ كيف انساك من عقب مارحت=وانته تركت بداخلي جرح وفتوق السيل ماعمره رقا فوق من تحت=واذا رقا ؟ بأنساك ياأعز مخلوق |
الشاعِـر : سعيـد بن مانـع ( قحطاني الواديين )
( سبعين قطعه ) ياللي نويت الغدر .. ياجعلـك النـار=مقرود واللي شجعـك بعـد مقـرود تخسا ويخسـا كـل عايـب وغـدّار=سبعين قطعه رحت مع هبـة النـود مراح مـن مالـه معـزي ولا ثـار=ولا هوب بمنشودٍ ولاهـوب مفقـود هـذا جزاكـم ياقصيريـن الأشبـار=ماقدمكـم ياكـود نــارٍ وبــارود يامحمد النايف مـن الغـدره امجـار=امجار يارمـز الوفـا منبـع الجـود ياقاهر الإرهـاب يازبـن الأخطـار=يالصارم الشغموم ياشامـخ الطـود ياقامع أهل الـذل والبـور والعـار=يامضفي البسمه على وجه مضهـود يامسدد الأشوار فـي تـوه الأشـوار=سيفٍ على وجه المواقيـف مجـرود يا أمير حنا مارخصنـا غـلآ الـدار=ارواحنا وعضامنـا سـدود وحـدود حنا جنـود للوطـن سـر وإجهـار=ناقف بوجه اعداه كالشمـخ السـود الفود ماهـو فـود درهـم ودينـار=فدوى الوطن بأرواحنا .. الفود والزود |
الشاعِـر : سعيـد بن مانـع ( قحطاني الواديين )
( صلاة الجماعه ) انا وش اللي بغيبتـك مستفيـده ؟=صدري وصل م.. الهم حد الشباعه الصبح يضحك لي بضحكه جديـده=وانا الى هالحين مانمـت ساعـه اسهر واسامر كل نجمـه فريـده=وان نمت ؟ قالت ليه هذي القطاعه ياغايبه والليـل لا قويـت ايـده ؟=يدي ضعيفـه ماتقـاوي صراعـه الحـب دمٍ والمواصـل وريــده=والقلب هو اللـي يزيـد اندفاعـه غبتي وسميتـك : قريبـه بعيـده=والعين تحسد خافقـي عالقناعـه جاعت عيوني شوفتـك ياعنيـده=ماترحمين اللي بلتها المجاعـه ؟ بينـي واحزانـي علاقـه وطيـده=مثل العلاقه بين عقـرب وساعـه فراقـك الله يمحـقـه لا يعـيـده=لازاد زاد الجـرح معـه اتساعـه نسياني اكذب من كـلام الجريـده=وكتماني اعتم من عتام الإشاعـه وأشواقي اصدق من فعايل رفيـده=وأبلغ من طعون اليدين الشجاعـه شوقٍ هبا في القلب وسم الحديـده=والقلب لولا الصدر ؟ تم انتزاعـه ولاجـداي الا حـروف القصيـده=عسى تزودنـي شويـة مناعـه لك الله اصبر عالريـاح الشديـده=يالمركب اللي ضاع منه شراعـه عسى الفرج يقبل ويهنـاك عيـده=وتبات عين اللي شقا البُعد لاعـه وأقول للنجمـات فرصـه سعيـده=والمعذره دامي نويـت القطاعـه ياغايبـه والنخـل يبّـس جريـده=ولا يغـرك راسهـا وارتفـاعـه به في غيابك فايده بـس وحيـده=يمكنّهـا هـي العـزا والشفاعـه تدرين وش في غيبتك مستفيـده ؟=اني اصلي الفجر ويـا الجماعـه |
الشاعِـر : سعيـد بن مانـع ( قحطاني الواديين )
( بلا علم ولا مرسالي )
العين صارت بالدموع تلالـي=لين استوت من تحتها ماريّـه والبال مشغولٍ وزاد إشغالـي=سارح ولا كن به عرب حوليّه والحزن اعده صاحبٍ واموالي=ماقد تركني في عشي واضحيّه والضيق حاودني على موالـي=والشعر تخفيفٍ من اللي فيّـه قولوا لمن هو قاطعٍ ميصالـي=من حث خطوه ماهي ابمحسيّه فجأه بـلا علـمٍ ولا مرسالـي=شوفته صارت عندنـا ملغيّـه لو أني أعرف ديرته أشوى لي=بس المصيبه ديرتـه مخفيّـه ميسم فراقه أحتمر .. عزاّ لي=وألحقني الكيه عقـاب الكيّـه باحت خوافي الخافق المتعالـي=حاول يخلّـي ضيمتـه سريّـه بس البلا عيني تبيّـن حالـي=والضحكه اللي ماهي ابصدقيّه ياصاحبـي يالعاقـد الحلاّلـي=إفهم كلامي وإصتصغه شويّـه الحب ؟ (بنٍ) والقلوب (إدلالي)=والوصل (جمره) نارها مصليّه لاصارت الدله بجال الصالـي؟=البن فاحـت ريحتـه فوريّـه ودلتك يرقب صبهـا فنجالـي=ياحي بنّـك لا سكـب ياحيّـه عيني تخايل رجعتـك يالغالـي=تبغاك ترجع تمسـح الماريّـه |
الشاعِـر : سعيـد بن مانـع ( قحطاني الواديين )
( حنّـا سعوديين ) الحوثي اللي غر راسه عمه ؟؟؟=لا هو ولا عمه .. فلح تغريره ارسل صبيه عقب ماقد دبر=وعود صـبيه خايبٍ تدبيره ماننـتـظـر منه يزيد يدبر=نقطع رشا دلوه ونقبر بيره :: سلام يالموطن .. ويا حكامه=وسلام ياشعبه كريم السيره وسلام ياروح الشهيد الوافي=اللي أطلعت من زود حب وغيره أقسم وفرحو به هله وأخواله=واوفا وفرحت فيه كل الديره الموت دون الدين ثم الموطن ؟=تبشيرة ياحيها تبشيره وحن كلنا جنود ولا حن نذخر=جهدٍ يزيد لذا الوطن تطويره حنا سعوديين فخر وهيبه=للمجد والعليا نحث السيره مانقبل من المجلس الا صدره=ولا نطمع من الصيد ألا خيره واللي نوى بحدودنا مايفلح=عظامنا لحدودنا التسويره ناقف بوجهه صف مايتهالك=امقدمين صدورنا بلا حيره الكل منا فاليمين اكفانه=وبيساره سلاحٍ وفا تثويره حنا نحب المسك واحنا اهله=اما هدينا او نشر تعطيره لكنّ من جازا عطانا عكسه ؟=نعطيه والله كير ماهو كيره |
الساعة الآن 01:30 PM. |
Powered by vBulletin® Version 3.8.7
Copyright ©2000 - 2024, vBulletin Solutions, Inc.
SEO by vBSEO 3.6.0