الموناليزا رسمها واحد تجلس قباله=تبتسم له ويتفنن يرسم اللي يعجبه
وش يخلينا نصدق رسمته دامه لحاله=غير يوم انه هرب اجل وش اللي هربه
ابدع الرسام لكن ماعطى الصوره خياله=جابها نسخه من الكربون والله عاقبه
صارت الصوره تلفت من يمينه لي شماله=كنها تسأل وتبحث عن بقايا الموهبه
شفتي ليه اللي يحبك يرسمك وبكل حاله=وان عجز عن بعض وصفك يستخير ويكتبه
يعني هذا في كتيب وهذا في مقاله=لين سوا من بعض ماجننه بك مكتبه
يرسمك وانتي حزينه تبكي الريشه بداله=يرسمك وانتي حنونه ينحني لك كوكبه
يرسمك لامن ضحكتي نبع يهبل زلاله=كل من جرب يشوفه لا ارادي يشربه
وان عجز يرسم غلاك اللي من الدنيا بقى له=قام يطلب ربه يعينه ويمنح له هبه
خاطره ولا قصيده ترسمك وانتي في باله=شي يليق بغلاك وقلبه اللي عذبه
وراح يكتب عن غلاك بكل ماربي عطى له=كيف وصل للجنون وكيف ربي جنبه
والجواب اللي يدور رغم كل هذا سؤاله=كثر ماجنن سؤاله عنه كل الاجوبه
ان سألتي كيف مثلي يرسمك وانتي قباله=ياترى لامن جلستي وش بقى للموهبه
الجواب ابدع ولكن ماعطى الصوره خياله=جابها نسخه من الكربون والله عاقبه
لاحصل له شوفتك ولا تهيالك وصاله=صار من غير ابتسامه يرسم اللي يعجبه

قال: ابتدأ جرحك على يد مغليك=والعاقل اللي ماله احيان واحيان
انسى يطيب الجرح والجارح يجيك=واذكر يغيب الجارح وجرحك يبان
كل القصص مرت وهزت محاكيك=وأخير من زود الحكي صم الآذان
كل ماتضيق النفس ناظر حواليك=واصنع من العالم لعالمك عنوان
(خذ من تراب الأرض ماشالت يديك=واعصر يديك وشف كم طاح خوان)
جرب تشوف الصدق بعيون شاريك=واكسر بعزه ذل واصنام الاحزان
وان كنت انا همك وهمك معنيك=قضيتي بالحب حرية اوطان
ماني مطولها ولو فيك مافيك=مايرتكي للي على الخافق لسان
قلبي قبل ماتملكه ذي من ذيك=واموت لو ماني على ذيك شفقان
اعلنت قبل يجيك به من يعزيك=(ماحب اكون انسان عايش على انسان)

سين : عكس الناس تمشي واتجاهك بانحدار=اشرح الاسباب فصل خلنا نفهمك زين؟
جيم :حظي للإسف والضعف عند الاختيار=قصةٍ مقدر افصلها معاك بكلمتين
كنت احسب البعد (لذه) قلت اقرر هالقرار=واعرضت لي لعبة حروف الزمن بالعاشقين
لو تحط الذال قبل اللام تعرف ويش صار=تعرف ان البعد ذل ويسرق العمر الثمين
,
سين : وش حدك على هالعشق وانت بهالديار=قلنا عن من تحب وصوره في جملتين؟
جيم : طبعا حدني للعشق عشقي للخضار=للربيع وللورود وللبنات الفاهمين
كيف لاجوك الثلاثة وانت آيل للدمار=في هنوفٍ مايشابهها من الخلق اربعين
تشبه ان حاولت اشبه واعتذر الف اعتذار=القمر لاصار يمشي كل خطوه خطوتين
,
سين : طيب طالما انك منكوي بألفين نار=ليه ماترفق بعمرك وتدارك هالسنين؟
جيم : لاتفهم جوابي ضعف ولاانكسار=الغلا شيٍ يجي من عند رب العالمين
حبها لو ينوصف لي في حواري قندهار=والله اني غير اروح ولا اشكي الا حاجتين
اما حجزٍ ينلغي او ينلغي كل المطار=ولا ماتشمل لغتهم لايسار ولا يمين
,
سين : يعني لو فرضنا صاب هالحب انهيار=وش يسوي واحدٍ مثلك بلياها حزين؟
جيم : غيَر هالسؤال وخلنا نبقى كبار=خل هالتحقيق يمشي وانت محشوم ورزين
طالما انك تدري براسي مهو ناقص عوار=وش تبي في هالسؤال اللي يزيده حبتين
وش يسوي اي عاشق حبه من يديه طار=ماني مجاوب ولا ابغى اقول غير الله يعين
,
سين : طيب قلنا وش فيك وانفض هالغبار=اعترف واللي تبينا فيه حنا حاضرين؟
جيم : هذي حكمة الله يختبرني اختبار=علي انجح فيه واسلم واتنقى الحسنيين
صبر من عيت تجي دنياه مع نفس المسار=مايضيع اليا بغى الله يجعل الدنيا تزين
واحدٍ ابسط فعوله يولج الليل بنهار=ما لعبده خيرةٍ فيما يبيه ولا يدين
,
سين : طيب هل تضيف اي شي لكن باختصار=قبل لانقفل ملفك وانت رافض لاتلين؟
جيم : سجل اعترافي قبل لاتنهي الحوار=نقطتين وسجل الارقام قبل النقطتين
اولا: كل شي على الله واعتبر هذا شعار=تندرج تحته قلوبٍ تنقلب بين اصبعين
وثانيا: احبها ولا اشوف الحب عار=طالما اني ماسمعت ان الحبايب كافرين

ذنب الدروب ان الدروب مسيّسه و مقيده=ونفوسنا تبقى على نهج الدروب مقيدات
مما ترك نفسي على درب الهنوف مسيده=ام العيون الواسعه ومضيقه خلق البنات
ليت الذي حط الغلا عبدٍ يطاوع سيده=حرر عبيدٍ ضايعه من جور حكم السيدات
القلب لو هو من حصى زود البعاد يبيده=يامن يفهمها قبل لاتهلك بذنب الحصاة
قولوا لها : بيت الرضا يشره على من شيده=ابطت عليه الغايبه واهدى النوافذ للشتات
راح العمر والمنتظر ماحاز منه مريده=والمشكله موت القلوب من القلوب الغافلات
قولوا لها : لاتعتجل والحال ماهي جيده=تترك مراحل ضحكتي فرصة رجوعي للحياة
حالي مثل حال الظما في ظاميٍ يبست يده=لو يشرب الما كثر مابه من ظما ولى ومات
لا ترجع الا والعيون الغايرات معيده=وشموعنا فوق الدروب اللي طويت معلقات
بسج عن حرب البعاد وحرب منهو ييده=واتسبت بنظراتها مبطي وانا اسمع بالسبات؟!

من عرفتك والخطاوي من جنون اليا جنون=والبلا لامن فقدتك , من يرد خطاي لي؟!
فرع من تقبيلة الماء , حب باللي يشربون=شرهة المقفي على اللي كيدوه عداي لي
وانكساري لو يردك عاقب الله الظنون=ماشكيت من الكسور الا فراق اعضاي لي
ماتضر اللي تكسّر طلبة اللي يجبرون=لا مشى لك مثل حظه حافي متمايلي
في نهار يجمع الغالين ويشتت ظعون=والعرب لو يعرفونك سمعوك دعاي لي
بعد ماارفع كفي المبلي بحرفك والمتون=وابتهل للي جميعك دون وجهه زايلي
واطلبه ساعة يقر بك تلفات العيون=واطلبه ساعة يجنبك هم جاي لي
من عرفتك والمشاريه من هذي ودون=والبلاوي ماتجي دون حجم عايلي
لا دريتي ياآخر العشق واول من يكون=عن خطاي اللي بكبره صغّره شرواي لي
استري ضول الخطاوي , خلي الكربه تهون=وابشري باللي تبينه واتركي معناي لي
لاني اول من عطى بنت لين اضحت تمون=ولا انتي آخر من خذت قلب , شاعر وايلي

ياتلعبين الحرف لعبة حكايه=ينام معها الحرف بأول سوالفك
ياتعزفين وينعزف فيك نايه=يامنوة اللي من غلا مايوصفك
الى متى واصعب قصيد البدايه؟=والى متى والقرب مني يخوفك؟
ماللسؤال اللي طرا منك غايه=انسيه خلي حاجته بس يعرفك
تصوري تجهلك حتى العبايه =واتصور اني وقتها كنت بخطفك
ياضاربه بالبحر عرض الوشايه =من قبل لايسرف بهبة عواطفك
القاك في موجاته الزرق تايه=في ليلة عيا القمر مايصادفك
مايرفع الرايه معك حر رايه=وانتي لك احساس عجز لا يغلفك
مااحب اجازف وانهزم بالنهايه=ولا احب ادقق في ملامحك وانصفك
ببقى واتابع معك كل الحكايه=واتابع حروفي تنام بسوالفك

بيني وبيني رويت من امس لكن ظميت=العمر ماهوب لأمس .. اليوم يبغى عمر
فكّرت وين الجديد اللي عن الفين بيت=بعيون بنت بطراة الفين بيض وسمر
للشعر حن القلم واعياه طول المبيت=ياهاجسٍ من بعيد يشوف وازرى يمر
ما قلت ابيها عبث لا مت ولاّ هفيت=الموت بالحب مر و بآخر العمر مر
لكن لك الله عن اللي ردني لانويت=ان كان مابالحنايا كود حزمة سمر
تسهر على جالها وتلومني لا سريت=اللي من الله تسلّم ثم تآمر أمر
ماهي قضية حلا ولاّ الحلا لو حكيت=ابدأ من الراس وأقضي منه شارب خمر
مابين درب العيون اللي دعاني و جيت=غفيت لو ماذكرت ان الشفايف جمر
طقّيت باب الخفوق ادري وانا مادريت=اما فتح لي غلا ولا وصلته طمر
ياللي لقيتك وانا من شح وقتي لقيت=بعضي لقابك دفا والبعض يزمر زمر
ابغاك فيني عمار اللي بوصلك رجيت=ان قاله الله ولا هديّت قبل آعمر
دلّتك ياأعذب بشر رضيت ولا أبيت=من دون فنجالها وشو له آكل تمر؟!

يامردّد الحيره على عبدٍ مردّه للتراب=ربك يهوّنها اليا شحت عليك بهونها
بسمه على كل القلوب اللي قدرها ماتهاب=سلامٍ اصفى من صفا البلوره ومكنونها
يوم اتلفّت وانتبه واصحى على صوت الغياب=ما للبشر فزعات كون الله يرد ضعونها
ماابشع من مطارد سراب الا دلاخة هالسراب=كم للسما فوقه ولا حنّت عليه مزونها
مرّت ولا مرّت كذا .. والباب دونه حل باب=صوتٍ اليا جات انكر الاصوات وقّف دونها
مثل العسل الا عسل بافواهنا كان العتاب=ومثل اللقاء بين الحبايب والعتاب عيونها
فديتها لين تكاثرها على سيد الشباب=واحبها لين الشباب يروح قبل آخونها
بنت البنوت ام البشوت اللي تطرزها عذاب=كم عاشقٍ يتلف ولا يوصل خطاه ردونها
ياليتني ماقلتها كلمه ولو انها صواب=لاعادت الكلمه ولا اللي ثار به (قولونها)
ياتيه نفسي لاجمعت الحب في ظرف وجواب=قصيدةٍ تجمع غلاي ولهفتي بمتونها
تسرح معاها والخصل ترخي لأصابعها الجناب=وانا بلاي من الخصل واصابع يلوونها
تدري بعدها وش يجيب الغايب ان عوّد وجاب=وأدري من اللي ينطرب لا قيل له مجنونها
من لهفتي كلما دعيت الله وزينت الخطاب=أمّنت بأول دعوتي مابان لي مضمونها
يارب تشفيها قبل لاينهم الشعر اكتئاب=قولونها سبّب على الابيات شك بطونها
يامردّد الحيره .. كفى مالعين قطعه من سحاب=تثقل عليها لا بغيت ولا بغيت تمونها
احبها لين اكتمل فيني من الحب النصاب=انام عند ابياتها واصحى واجر لحونها
والعاذل اللي ماشبع من شعر (ابو بندر) تراب=حقٍ على كل النفود تشبّعه .. لعيونها

رسامنا .. لوحتك مليانه جفاف=حبيبتي ورده تمل من الوقوف
تعال ابيّن لك وجوه الإختلاف=وبريشتك صوّر تناهيد الكفوف
يامهديتني للبحر .. مابه ضفاف=غرقت بك وانتي لك عيون تشوف
مدي يدك والحب شعبه من عفاف=كل مامشطنا شعرها غارت كتوف
لاتذكّريني كيف أجي عندك واخاف=وأصورك بنت تغازلها الوصوف
وأعلمك وشلون أصيغ الاعتراف=إليا ارتويتيني وانا حدي رشوف
دربّت حرفي كيف يسجني جزاف=في مكتب تعرفك به حتى الرفوف
في صفحتي .. ماللقصيد آخر مطاف=كل اربعاء وانتي سجينة هالحروف
رسامنا .. كم مبدع عدل وأضاف=بالليل ياحلو انتقامي للطيوف
لاشفتها عندي وكن الليل طاف=شيل القمر لو صار باللوحة كسوف

لاتسأليني معك وش جبت=اُستُهلِكلت قافية آتي
مابعد احبك وانا ماغبت=إلا ضياع ابتساماتي
النبت مايطلع مكان النبت=وانتي نبتي على ذاتي
والدمع مايترك إلا كبت=استنفذه في كتاباتي
ياأم العيون الكلام الثبت=لاتعتعوا فيك نظراتي
يقضي غيابك وانا ماتبت=عن وصفها بأجمل ابياتي
بعيش مخطي واموت ان صبت=واشتاق لك رغم ادعاءاتي
وأكتب على نازف جروحي طبت=واشري بألمها مسراتي
قررت اسامح كثر مااذنبت=وامارس اجمل هواياتي
من كثر ماأحب يوم السبت..!!=اهديت لك أرابعاءاتي

عليك ومنك مكثور العطايا=ياربي لا تمر الناس بيته
وداعة قلب بعروق وحنايا=في وادٍ غير ذي زرعٍ رميته
ابي لا طقّته شمس الخطايا=ظلالٍ بأصدق اعمالي شريته
من الرحمه تهيّئ له مطايا=ضرير ان كانه ابطى ماهديته
بعد فرقا شريكي بالخلايا=هذآك اللي عن انفاسي كميته
سوايا غيبته عني سوايا=تذكرني وانا افنى مانسيته
عزيز النفس مجبول النوايا=طبيب القلب لو ماذاع صيته
اجي له شايل همومي سرايا=واروّح كل مامني .. فديته
ابو عنقٍ يقسمّني شظايا=على سفحٍ من اللهفه رقيته
ضحكته لين بكيّت البقايا=ولا ادري من ضحك .. ساعة بكيته
اشوفه كل ماشفت الهدايا=على حطة مواثيقٍ عطيته
له الله كل ماطيفه تهايا=يهّد الصبح جفني ماسليته
اسّج بضاحية شيخ السجايا=واقول اللي لو افطن ماحكيته
رحل , ماكن بالدنيا صبايا=وانا لا اثبت شي .. ولانفيته
اقول , الله يجنبه المنايا=رسولٍ ياصله كلما .. طريته
يبلغ صاحبي عذب التحايا=كثر ماهمت فيه , ولا لقيته

سعيد بن مانع جميل الشعر بالمسلمين=وإن توّه الشعر وجميله في بحر جمايله
شيٍ يحدد منهم اللي في عطاهم مسرفين=وشيٍ عن عيون العرب والله ماني قايله
كم من عظيمٍ ينذكر والناس ماهم مجمعين=لو كثرت العدلات به دوّر عن اللي مايله
وانا رفيقي لانصى الكرسي على علم ويقين=وقّف معاه المجتمع في مختلف قبايله
والمجتمع ماينصف إلا المجتمع به حاجتين=فعلٍ يخلّد صاحبه وإسمٍ يشرّف شايله
وانا الذي يفتيك في منهم رجال الواديين=لا قصرت يدين الدواهي عن يدين الطايله
صغيرهم يفطم على (لايمسي الداخل حزين)=وكبيرهم شوق الهنوف اللي توحّى حايله
سعيد ياسم الوجيه اللي تورّى ماتبين=ينبيك عن شوف الربيع من الحيا دلايله
عليك يوم الاربعاء وانا علي بهاليمين=يفداك منهو لازهمته صبح نام القايله
الوايلي موته من الله خالقه لليوم لين=إنه من الله خالقه مناطقه فعايله
روّح يابو مانع مراح العز والعود الثمين=البيرق اللي مانشدت البعد يوم تخايله
يرعاك ياحرٍ شهر بالحق ذو العرش المتين=الحكم له والفضل له والشكر له والراي له

غيرَ آبه , وقت يرجع بي ورى=وان سكت أسكت كأني , غيرَ آبه
لايكون بفكر جرحي .. لا درى=ما أتحمّل بعد هالعشره غيـابه
والبخت لاشافني نمت وسرى=سمّح الله دربه بليـلٍ سرابـه
لو صبر يمكن من انفاسي قرى=ليه أغمّض من كثر ماصرت أهابه
وآخر اللي بآخر أوقاتي طرى=يعلم الله , ماني بناقص كــآبه
مايلام اللي خذا طبعي ذرى=جاهلٍ محسوب من جهله صوابه
كلّفه ربي عيــونٍ ماتـرى=ثقلها في رآسه ابلغ من عتـابه
من كثر بريال زينه ماشرى=يحسب إن قلوب خلق الله نهابه
ذنبه إنه لاضرت نفسه ضرى=وذنبي إني ناسيٍ حضرة جنابه
لاخذا جرحك تحسب إنه برى=وإن خذيت شوي ذكّرك إلتهابه
في زمن شال الثريا والثرى=والهموم الناس والفرقـا سحابه
هاك .. ياوقتي جميع اللي جرى=وإنتبه !! لاتصدق إني غيرَ آبه

مايوافي رغبتك ياقلب وافه=نامت احلامك على شاطيّها
شرق من عمرٍ يسمّونه مسافه=غرب من زيف النفوس وغيّها
لاقها والذنب تكفير اقترافه=فزّتك لاقلت : يالله حيّها
بإحتفال الصبح في ذكرى جفافه=عام يقنع بالظما ظاميّها
قلّط اللي جتك تعقبها الحسافه=وانت واقف من ورا كرسيّها
مد يدك ليدها مهنا كلافه=يقتل الفرحه حيا طرقيّها
جنّب اللي قل ملحه من عفافه=واطرق اللي يشمخ بطاريّها
كل خطوه من خطاويها إضافه=وكل خطوه منك ماهي زيّها
شف من المجدول محشوم الكثافه=فرق فوق الناس عن واطيّها
وانت تدري وش كثر هالبعد تافه=واني افهم يوم احب أخيّها
لو يسلفك الحصيف من الحصافه=ماوصلت من الحقوق شويّها
ان وصفت الصدق تشطح للخرافه=وان سكت البنت تعرف قيّها
قل لها ياكنه جسمي ياغلافه=لايزيد الهرج في مبليّها
ماعلى المسجون من قو اعترافه=والقضيه حلها قاضيّها
كانها جارتك من باب الظرافه=خير من بعض العلوم كفيّها
وكانها حنّت لجسري و الرصافه=تنهبل مثلي وانا شاريّها
لاتخلي بالحكي شيٍ تخافه=ولاتفكر حيل في تاليّها
عيدك اللي كل ماوافاك وافه=عيد جلستها على كرسيّها

مابي اشكي يارفيقي واقتلك , وش بستفيد=ودّي اوضّح لك اهون وانصحك واروح عنك
خذ من اللي مايبي لك شي مادامك سعيد=كلمتين ترّم عظمك قبل لايفتر بدنك
صاحبتنا راسها يابس ومذهبها عنيد=وانت كلّك خير لكن , في وطن ماهو وطنك
خل قلبك من ورق شفّاف واعصابك حديد=وانتبه ترهن غلاها جاهلٍ قيمة رهنك
راضها من قبل تزعل وان رضت بالك تزيد=خلها ترضيك عمر وبهجةٍ تملى سكنك
ولااستحال رضآك عنها , لاتوّردها بعيد=عندها قلبٍ لو انك تآصله واقف دفنك
قل مثل هالبيت ولا سمّعه مثل النشيد=لااقبلت تاطا همومك ليلة يهاجر زمنك
قل لها ترحب عدد ما شق مبسمها وريد=وانفتن مليون مره كلما شيٍ فتنك
عنك , ماتبحل بوصفك لو تبي عنّه تحيد=كثر ماترخص عليها كثر مايرقى ثمنك
كلمتيني خلصت , لعلها جابت جديد=تفهم اني منه جيتك ماكن اللي مامكنك
ولا انا لو كنت ابشكي لك على هامش قصيد=ماورا اني عشت منصح لك وانا بآموت منك