السلام عليكم ورحمة الله وبركاته
شلونكم أعضاء منتدى لقناص .. عساكم طيبين ... راح أدخل بالموضوع بسرعة ... اليوم بكتب موضوع
عن يوم من أيامي الدراسية ......
يبدأ اليوم الساعة 6:00 الصبح ...
الخدامة : يالله قومي باس مدرسة الهين يجي . ( لغة الخدم مثل مانتو عارفين )
بنت العدواني : الله ياخذج انتي والمدرسة .. طلعي وبعد 5دقايق راح أقوم .
تمر 5 .. 10 .. 15 دقيقة والأخت ليلحين نايمة . خخخخخ
الخدامة : يالله قومي باس يجي بعدين روح ... منو يودي انتي المدرسة بابا وماما نوم ..
بنت العدواني : استغفر الله .. كاني قايمة ..
طبعا كالعادة قايمة والنفسية بالخشم .. تغسل وجهها .. يبا الحمدلله تعدلت النفسية شوي
تلبس دلاغها اللي كل يوم شكل ولون غير وجوتيها عزكم الله ...
تلبس قميصها الأبيض ومريولها الرمادي ... أكيد طالبة ثانوية شتبي تلبس يعني
المهم عقب ماألبس حجابي أحط شوية مرطب ومسكرة وكحل .. رايحه لعرس مو مدرسة
بيييييييييييييييييييبييييييييييييييب يالله الباص جه خل ألحق لا يروح عني
أركب الباص .. وأسولف وأضحك مع البنات .. لاوصلنا لخط البحر .. بس تعالو وشوفو
أسراب السيارات ورانا .. اللي يشوفنا يقول موكب سمو الأمير ...
نوصل المدرسة .. أسلم على رفيجاتي ... ترررررررن
أفف بدا الطابور القثيث .. تفتيش أظافر وكرنيهات حشى قاعدين بسجن واحنا ماندري
ماان تقول الأبلة انصراف للساعة الأولى .. الا وماتشوفون ولا طالبة بالساحة وينهم قاعدين
يتمشون بالمدرسة قبل الساعة الأولى .. وأكيد آنا من هالطالبات ...
الساعة الأولى ( الأحياء )
أحياء وما أدراك ماالأحياء ... جهاز عصبي ومناعي وتنفسي والخ من الأجهزة
لدرجة أني في هالساعة أحس ان أجهزتي تعطلت من كثر الهذرة ..
ترررررررررررررررررررن
حطي رجلج يابنت
يوووووووو علي رياضيات ... مالي خلق للساعة والأبلة المليقة ... أطلع كتبي .. وفي طريقي
للساعة أصادف رفيجاتي وروح سوالف ..... يالله يالله بسره لا تزفني الأبلة
الساعة الثانية ( رياضيات )
يالله عاد تفرغي حق نظرية واحد واثنين .. + _ * / .. وسالب وموجب ......
وعليكم الحسبة عاد ..... هههههههههه
تررررررررررررررررررن
الحمدلله مابغت تخلص الساعة .. امبي بسرعة خل أطلع كتبي الانجليزي عشان المس ماتزفني
بروحها ماتحب التأخير .........
الساعة الثالثة ( انجليزي )
طبعا آنا والدرج واحد ... والأبلة تهذر على راسي .. مع أني أحب هالساعة ؟؟؟؟
بس مالي خلق صايرة ..........
ترررررررررررررررررررررررن
هيااااااااااااااا خلصت الساعة وجت الفرصة ... يافرحتي أبي أريح شوي من الدراسة
أروح للكفتيريا ؟!؟! شهالزحمه ياربي شسوي الحين بروحي ماأحب الزحمة ..
المهم أتقلقص بين البنات عشان أشتريلي بيبسي وشبس
تررررررررررررررررررررررررن
لااااااااااااااااااااأ ليش تخلص الفرصة ... أقول خل نقعد وبعدين نروح للساعة كلها اقتصاد
الساعة الرابعة ( اقتصاد منزلي )
عاد الأبلة طالبه منا خام عشان نخيط مدري شعبالها وين قاعدين بmission fashion وآنا مادري
وبهالساعة بالذات نبسط تحت الطاولة وناكل حب ونسولف آنا ورفيجاتي ... ولا قربت الأبلة عندنا
طلعنا خامنا وسوينا عمرنا نخيط واحنا مودينها للخياط عشان يخيطها ..
تررررررررررررررررررن
هيااااااااا علي بدنية يافرحتي ... جايبه معاي تي شيرت على صورة ياسر أبتشيحط على البنات
الساعة الخامسة والأخيرة ( بدنية )
لبست ملابسي وسويت شعري .. طلعت مت غرفة التبديل الأبلة منصدمة .. مين ده يابنت
توم كروز ولا براد بيت ...... لا أبلة هذا ياسر القحطاني .. أحسن لاعب يلعب كرة قدم ..
ترررررررررررررررررررررن
وأخييييييييييييرا راح أرد البيت .. أركب الباص ونفس الايقاع لاوصلنا لخط البحر يصير
مثل مايصير الصبح ...... وعقب ما أرد للبيت الا راسي مصدع أدور الفراش عشان أناااااام وأرتاح
هذي المواقف تصير معاي يوميا بالمدرسة ... عاد لاتحرموني من ردودكم .. ورايكم في يومي الدراسي
06-05-2006, 07:45 PM
*> يوم من أيام الطالبة الكويتية <*
العرض الشجري
