* آحس انّي من زمان عن المجلس : (

اليومْ | الإربعاء
التاريخ | 2 - 5 - 1432
الوقت | من الساعه السابعه والنصف صباحآ وحتى الساعه الثانيه عشر والنصف ظهرآ
المدخل | بوابة الـ 11
المكان | مدينة الملك عبدالله الجامعيه



وش القصـه ياترى ! وش اللي صار
ومن ريري اللي صارت فجأه اسمها دُنيا ! وأنقلبت فعلآ الدُنيا بالجامعه
ومن ميسي اللي صارت فجأه قويه وتخطّت حدود الخوف
وليه اصلن مداومين في الـَ OFF وش الحاجات اللي انجابت ووش اللي حصل

وهل الكبت يولّد الإنفجار ؟! كل هذا في ساعات الصباح ومابين عاملات النظافه
مويه من يمين ومويه من يسار وتنظيف الغبار , ومين اللي يتمخطر بِ الكرسي الدوّار , وهل فعلآ ميسي قاومت الوضع وماشطحت طول الدوام !
وكيف جية نبض محمد بن فيصل لنا , والسلام منها لِ مجموعة بنات
اصابها رُهاب واستحياء : $ ! وهل كان موجود عصير الكيوي والليمون معشوق اوكسجين ونبض بنات القناص !!
هل هالمرّه انسرق بساط احمر ؟ بس أتوقع انسرق بساطين والثالث مجانآ

يالله نحكي بالتفصيل الاحداث المجنونه :D
من بداية الترم وحنّا نبي اوووف بالاسبوع واخيرآ بعد ترتيب الجدول طلع لنا يوم الاربعاء !! مانحضر الاربعاء الا ماندر في تسليم بحث او عرض او اختبار ع حسب الضغوطات !
وصديقاتي بالشعبه الثانيه طلع لهم الثلاثاء , بكذا صرنا مضغوطين ثلاث ايام ويالله نشوف بعض , فقررنا كلنا نجي الاربعاء عشان نشوف بعض
ووحده من البنات قالت دامه اخر يوم ! كلكم تلبسون تيشيرتات آنديه
قررنا نلبس بما ان عددنا تقريبآ عشرين وشوي ولاحضر الا 18
وكل وحده تجيب معها شيء , لان بنقضي هاليوم كله فلّه
وصلت الجامعه على حدود السبع والنصف , مشيت مسافه طويله عشان ابعد عن البوابه ! مابيهم ينتبهون انّي لابسه تيشيرت برشلونه
ماشاءالله التوعيه عندنا عدي وأغلطي
وجايه معي اختي تحمست تشوف هبالنا اللي تسمع فيه خخخ
شايله معي كيسه وش كبرها وصلها السواق عند الباب وانشقت وصرت رافعتها بيدي تمصعت كلها بيبسي وعصيرات وخنبقه


طلعت الدور الثاني ويوم وصلت بمشي لمكانا اللي دايم نجلس فيه والقى قدامي فريق كوره موب بنات هههههههههه ( شلتي المصونه ) والقاهم مختبصين
وشفيكم وش صاير !! قالو جايبين كوره وهم يلعبون فيها طارت من الدور الثاني للاول ونزلت صديقتي تجيبها وهي لابسه تشيرت الهلال بتاع رادوي
وعمتي مادرت انو التوعيه تحت وفجأه تدخل على غرفه بتاخذ الكوره ويقفطونها بتعهدين للكوره وللتيشيرت , قالو اكتبي اسمك والرقم الجامعي
صار اسمها من ريري لـِ دُنيا !! مصريه ماعليش
والرقم الجامعي ألفت لهم , ماشاءالله مشت معها .. قلت لوّك قايله دُنيا رادوي الشمري
يمكن يلوووق عليك !

وقالو نبي فزعتك يالبرشلونيه نجيب الكوره ! انا احسب ان الكوره وخر عن طريقها وش كبرها لوني داريه حجمها ذاك الشيء ماطمرت اجيبها :(
كنت جايبه قميص ولبسته فوق التيشيرت وسكرته عشان اخفي معالم الجريمه وصار لبسي شُبهه
نزلت وفتحت الباب عليهم عددهم فوق الخمسه وشكلهم يخوف توعييييييه => ميش تذكرين ذيك اللي تسحّب الجوالات

يابطني عورّني يطالعوني وش آبي ! قلت وين الكوره => قوية عين :|
ترّد وحده فيهم : تقول هاه مااسمع ( طبعآ تتطنز ) قلت : الكوره الكوره
قالت لاوالله ! قلت آيه عندنا نشاط وفيه عن الكوره قالت طيب روحي جيبي ورقه رسميه من الدكتوره عشان اتأكد ! طبعآ كلن غايب يالله لقيت دكتورتنا المصريه لبى كلها
وقلت لها كل شيء قالت طيب بكتب لكم ورقه بس توعدوني ماتلعبون فيها ! قلنا اكيد
وكتبت الورقه قالت هم مين عشان احط اسمهم بالورقه قلت الامن !! وهم اصلن التوعيه
بس من الخبطه لخبطت


نزلت تحت واعطيتهم الورقه قالت خذي الكوره انا طبعآ ادورها مالقيت ع بالي شيء كبير
قالت التوعيه الثانيه لاتاخذينها ارجعي لدكتورتك خليها تعدل الامن وتكتب التوعيه لان الامن غيرنا
انا صرت وقتها القذافي وشبيت عليهم قلت : الامن وإلا التوعيه مهوب كلكم إنسان !
هي تفشلت وقامت ترقّعها لي بالاخير قلت منب رايحه للدور الثالث لو تطيرين وهاتو الكوره قلتو جيبي اذن رسمي جبت مشكلة الاسم موب اسمكم مهب مشكلتي ذي !
قالت بعطيك اياها بس لو دريت انكم لاعبين فيها بكتّب لكم تعهدات وخاصه انتي قلت طيب يصير خير


بعدين قالت حقت التوعيه صايرين البنات يلعبون تنس ! هُزلت قمت رديت قلت لا وازيدك بعد كلاسنا امس جايبين ارانب
بغت تهفننني كفففففففف قلت ايه اصلن قسمنا كل اسبوع لازم نشاط وهالاشياء والحمدالله مهوب راعي ضجه الا الكل منبسط
جابت لي الكوره يوم شفتها بغيت افقعها كبر يدي ويقولون كوره وكوره احسبها وش كبرها الله يفشلهم



اخذتها وطلعت للبنات وهاك ياتصفيق ورقص قلت موب تحديتوني ميسي ؟
وجلسنا كملنا السهره ماغير كل وحده تحط اللي جابته ع البساط وجونا جيرانا وتقهوو عندنا
وكل وحده تقول وش رايكم ابلغ على نُوشه عشان ناخذ 500 على كل شيء مُخالف جايبته
بلاك والا آيبُود وآلا تيشيرت وآلا سكينة , قالو جيبيها بنقّطع الكيك ولاحطيتها بالكيس عشان مايمسكوني يقولون ذي بتذبح وبالنهايه يهددون

واللي آطربونا بِ صوتهم واللي آستعرضو ورقصو
وخاصه شوشو مهنتها تجيب الكرّسي الدوار وتجلس عليها وتمسك خط من اول السيب لآخره
وابد اللي تبي توصل مكان مُعين تجي لها توصلها ببلاش بعد

ترا اول ماجيت سألتهم من جايب البساط لإنّي اذكر السالفه حقت البساط اللي خبركم
بعضكم آكيد عارفين السالفه بلاش افشّل عمري واقولها
بس بالاخير آكتشفت انهم لاطشين من ارض الله الواسعه ض1


يوم بقى خمس دقايق ونودّع بعض قالو نبي نلعب بالكوره !
مايمديهم يمسكونا وطلعوها وهاك ياتشويت
حسيت انّ البنات ينرحمن لاانفتح لهم مجال لعب , وخاصه جامعتنا اللي كلش ممنوع
وكلش يصير بالتهريب ( حشيش صار هههههههههههه

بس يوم جمممميل جدآ اسالو ميشو بس


بعض من الصور :






















الحمراء شنطتي







هذا الأذن بالسماح لبى الواسطات






شفتو كم بساط لطشوو !
بس مارحنّا إلا تاركين المكان نظيف






شكل محد داوم , قبو المواقف مافيه سيارات واجده







من صديقتي لبى قلبها






عشان تعرفون انّ الكوره صغيره جدآ
كررناها كود توضح






الهدف من الطرح بطرح عليكم اسئله !

- بعض الجامعات تاركه مساحه خاصه للعب وموفره اشياء للبنات
كتنفيس وقضاء وقت الفراغ للي ماعندها محاضره !
وبالعكس شيء قدامك ولاشيء وراك
هل تعتقدون وجود الاشياء الرياضيه مثل الكوره او التنس او حتى البلياردو شيء ماله داعي ينوجد بالجامعه ؟

- التوعيه !! بعضهم مايملكون إسلوب وبعضهم مايحلى يومهم الا يمسكون اي بنت ويحطون فيها مليون عيب ! عشان تكتب تعهد
وبعضهم يدقق على آتفه الامور ويخلق من الحبه قبه !
والكبت يولّد الإنفجار كل شيء ممنوع ممنوع إلى متى والاشياء لاتُطبق على جميع العاملين فيها !


هذا اللي عندي عجزت آتذكر كل تفاصيل هاليوم
ايه صح : جوالي يوم جيت ادوره وعفسنا المكان مالقيناه
بالاخير صار بالكيس اللي كابين فيه فناجين القهوه
وديته دورة المياه وغسلته ض1
بس اشوى هالجهاز خايس حق الجامعه
اقصد خاص للتوعيه => ذبه أليمه



+ يوم ركبنا للأصنصير عشان نروح للبوابات
كل مافتح طلعت وحده متغطيه ومعها قش وحوسة
وكل مافتحنا ثانيه طلعو لنا قامت صديقتي تصارخ
بعدين يوم فتح مافيه احد دخلنا وسكرناه
وخذو شوط يغنون بالملك قبل لاينفتح
(( هذا ابونا عبدالله الايد الحنونه يحفظه ربي ويصونه
ودوم نعيش في عزه | ابو متعب رجع يالله حي ))
وطبعآ شوشو داخله الاصنصير بالكرسي المُتحرك
هههههه قايله لكم ماتستغني
يوم انفتح وقدامنا بنات يطالعون وش هالمهبل اللي يغنون بالملك
الين ودعنا بعض وسرينا




- المساحه حُره للجميع

’

الله على ميسي , جننهم بـ القصه || البطله ( ) حتى على التوعيه عاد > مو هين والله :P بصراحه .. مثل هذي الأوقات تنحسدون عليها .. وناسه وفله وكل شي مجتمع بـ ساعات || بـ تكون لـ الذكرى قيمه الله لايغير عليكم إن شاء الله , وتتكرر مثل هذي الجمعات + بخصوص أسئلة النقاش | الأول بـ أقدر اجاوب عليه الثاني بـ أعتذر بـ حكم , أن مالي معرفة عنه ابد : ) الأول | وزارة التربية , قد أعلنت قبل بـ نشاط رياضي .. فـ شي طبيعي أن يكون من الازم وجود نشاط رياضي في الجامعات بعد , وله فوائد كثيره أهمه تغير الأجواء || الدراسية والتنفيس شوي .. من وجهة نظري شي له داعي وبـ قوة بعد : $ نوفا | أستمتعت كثير بـ الساعات المجنونة , حطتينا بـ قلب الحدث وغيرتي علينا الأجواء : $ ... شكراً لك

ونااااااااااااااااااااااسه بقوه
اووووقسم بالله انكم فله
اما احنا طبعا بنات ثالث متوسط مطولين على الجامعه ههههه مشوار
المهم يوم الاربعا اتفقنا نشتري من البقاله معشوقتنا
وطول اليوم ما درسنا لن مو كل البنات جاو عدد قليل مره
المهم انا وصديقاتي قررنا نلعب بالغرشه والله ماجا في بالنا نجيب كوره
عادي الغرشه تفي بالغرض المهم طبعا مو كلهم رضو يقومون يلعبون
5 بس وانا السادسه وانقسمنا فريقين طبعا بنات فريقي مو سهلاااات لعبهم سنع
وكل ما شقينا غرشه سحبنا من البنات غراشهم مساكين ههههه
وكنت متحمسه بقوه لازم لعبتي المفضله هاذي طبعا لعبنا غرشة يد = كرة يد خخخ
وطبعا فريقي اللي فاز فديتنا والله كلنا
ونزلنا تحت في الساحه الا نشوفهم مشغلين مسجل ويرقصون عشان اليوم الوطني ومدري وشو
والله ما فهمت وشو مسوين المهم مشغلين اغنيه عن الملك ترقص
واول مره الاداريه رقصت معنا ومسوين دائره وتصفيق وحماس ووناسه << وناسه ولا روتانا خخخخ
والمديره رقصت شوي الا رن جوالها وراحت ههه
عاد ما شبعنا لما رجعنا الفصل جبنا بنت تطق طق مو صاحي مهيب سهله
وطقت ورقصنا لما انتهى الوقت وجائت ساعة الفراق والصياح اللي يشوفنا يقول ثالث ثنوي مو شايفين بعض ابد اخر سنه
وبسسسسسسسس
تسلمين على الموضوع

هلا .. أوكسجين ..

طرح على الجرح ..
طبعاً بالنسبه لي أنا ..(في راسها هبال 24 ساعه )

بالعكس أتمنى لو فيه نشاط رياضي بالجامعه .. يكسر أوم السماجه اللي عايشينها
بس للأمانه لابغينا نسوي شي حنا يالبنات ماتعوق معنا ولله الحمد حتى لو إنه مخالف
سبحان الله لابغينا نخالف مانفكر إلا في الكوره .. مدري وش الرابط بينهم

بس حنا نلعب أيام البرد عشان نحس بالدفا ( هذا عذرنا )

أذكر سالفتي لما لعبنا كوره الترم الأول مع بنات تاريخ الله يذكرهم بالخير وكانت
وحده منهم بين الشوطين تستهتر بفريقي وأنا كنت
من زود الحماس أقرب من البنت وأقول :

أنا بفوز ...
سمعتيني وش قلت ..
أنا بفوز ..
أنا ايش ؟؟
أنا بفوز ..
انتي فاهمه
وسبحان الله على كلمتي الأخيره ( أنا بفوز ) والدكتوره طالعه تصفق بيدها : ماشاء الله يا آنسه
منار بتفوزين ان شاء الله .. إلحقوني على المكتب كلكم ابيكم
ووقعنا ذاك اليوم على تعهد .. ومن يومها إعتزلت الكوره في الجامعه


أنا أؤيد أؤيد أؤيد النشاط الرياضي بالجامعه

أقتباس

- التوعيه !! بعضهم مايملكون إسلوب وبعضهم مايحلى يومهم الا يمسكون اي بنت ويحطون فيها مليون عيب ! عشان تكتب تعهد

أقتباس

وبعضهم يدقق على آتفه الامور ويخلق من الحبه قبه !
والكبت يولّد الإنفجار كل شيء ممنوع ممنوع إلى متى والاشياء لاتُطبق على جميع العاملين فيها !

مانيب أحبهم أبد .. وأنا وهم .. مشاكل×مشاكل
لدرجه صاروا يسموني بينهم (المتمرده جت )
.. أنا كل يومين أكتب تعهد على آشياء تافهه جداً بسببهم
لا واللي يقهر إنهم يتغاضون عن البنات اللي يعرفونهم وتربطهم فيهم صداقه

مره انا شلتي المصون جايبين مخالفات وأشياء يقشعر لها الأبدان وخبيناها الصباح في مكان
الجني مايعرفه على أساس لاطلعنا نخرب أومها بالساحه الخلفيه

وانا سحبت على المحاضره بحكم إن الدكتوره ماتحبني ولا أحبها والمشاعر متبادله بيننا
وشلتي حضروا المحاضره .. وأنا رحت اشوف المكان اللي خبينا فيه البلاوي عشان أتطمن
ما أحد جاه من الفئه الضاله ( المجرم دايم يلف حول جريمته )
وجتني وحده منهم وتنافخ بعد تقول : وش قاعده تسوين هنا
قلت : ابد ما أسوي شي قاعد أتمشى لحالي وأراجع نفسي قبل فوات الأوان
(طبعاً انا كنت استخف دمي)
قالت : وجودك هنا بهالوقت لحالك مايريحني وبالذات عندك محاضره ولا حضرتيها ؟؟؟
قلت : يعني إني أهددك .. وش بتسوين يعني انتي ووجهك .. بتروحين
تبلغين الدكتوره .. أساسا هي
الليله بتصلي قيام الليل شكر لله عشاني ماحضرت

(تصدقون بسبب هالجمله الأخيره كتبت تعهد )




بس أنا لهم بالمرصاد .. قاعده أذب عليهم في الطالعه والنازله






اوكسجين .. اسلوبك رائع ياميسي
الله يعطيك الف عافيه على الطرح ..

اهلا و سهلا يا الغلا

بصراحة يوم فله و وناسة بصراحة (( ما شاء الله عليكم ))

بس ليش ( اللجنة ) اقصد التوعية (( موثر عليها لجان الاتحاد السعودي )) ههههههه

اي ليه يمنعون اللعب ؟؟

بصراحة موب صالحهم عادي بنات يبون يلعبون كورة وش فيها هذي يعني ؟؟

عادي اصلا الحين الزمن تغير بكل بصراحة

الحين المدارس اقصد البنات صار عندهم حصة رياضة في الاسبوع

من اولى ابتدائي الى ثالث ثانوي (( حصة رسمية )) و يلبسون لبس رياضة عادي

انا اعرف وحدة تقرب لي هي في اولى متوسط

تقول حنا صار عندنا حصة رياضة في الاسبوع و في المدرسة حطو لنا سلة (( كورة سلة ))
يعني ما فيها شي اذا الجامعة تسوي كذا (( جت عليها يعني ؟ الدنيا كلها مقلوبة ))

عموم ما ودي اطول في الهرج ههههههه

اهم شي الوناسة و الفلة و كل شي


بس امانة سلمي على (( ميسي )) كثير السلام خخخخخخخخخ

يعطيك العافية

يالبيه يا اوكسجسن ..
ليه ماقلتي لي اخاويك كان صرت انا ياسر هههههههههههه

هني يالكن ...