لم نجد من يكون بجمالها وروعتها الا ياسر

فـ |20| مآورآء القنآص مجرد يآسر |20|



كونو معنا

اذا كنا بنتكلم عن شخصية ياسر .. فنقدر نصنفه من الشخصيات الجريئة والاجتماعية ..--> ياحظه
يعني لاتستبعد اذا رحت للسينما مثلا .. وقعد جنبك ياسر ..ان يطقها سواليف معك ..
لما تشوف علاقاته مع اللاعبين . بالذات الاجانب .. يتضح لك هالشيء ..
الابرز من ذلك كله ..
مجرد انه جاء للهلال عام 2004 تقريباً .. وفرض نفسه غصب على كبار الهلال : سامي والدعيع ونواف والشلهوب
وفجأة لقيناه واحد من أعز اصدقاءهم .. ويضحك مع هذا .. ويذب على ذا .. ويخنق ذاك ..
كلها امور تبين لك طبيعة ياسر البثرة اللي تفرض نفسها باي مجتمع تدخل فيه
واللي ساعده على هالشيء .. طبيعته المرحة .. وعشقه للذب والتعليق والاستقعاد -->
ولا ننكر ان فيه شوية لقافة .. يعني لما يشوف اي اثنين يسولفون يقط نفسه معهم .. عادي الوضع ايزي بالنسبة له خخخ
واحيانا تطلع منه حركات عفوية بدون مايحس .. احد ينسى يدينه اللي كانت تلعب ببشت الامير سلمان هههههههههه

ما يمكن اننا نخرج ياسر من ضمن دائرة الشخصيات اللي تميل للانفعال السريع والعصبية .. وقد يكون ياسر بدرجة أقل ..
لكن زي ماقلت .. مايمكن نخرجه من هالدائرة خخخ

ياسر يملك لسان لبق ..وذكاء اجتماعي ..وثقافة (فوق مستوى مجتمع اللاعبين) وهذا اللي ساعده كثير في علاقاته ..سواء مع اللعيبة في النادي او مع الاعلام ..
اكاد اجزم ان ياسر لما كان بالقادسية ..
ما كان طموحه انه يكون لاعب .. كان تفكيره انه يبغى يمارس هالهواية .. مجرد تسليه .. ثم لا جاء الجد يتوظف حاله حال اي مواطن سعودي
لذلك ..
ياسر نظرته لكرة القدم .. مو نظرة واحد يبغى ملايين وبس ..
هي نظرة واحد حب هالهواية وعشقها .. وعشق اساطيرها ..

ولو تلاحظون تصرفات ياسر في الملعب .. تذكركم بتصرفات اللعيبة العالميين ..
من ناحية طريقة مناقره مع الحكم .. او اعتذاره للمدرب على خطأ .. او تعامله مع الجمهور اذا هجد



ياسر .. اعتبره شخص قيادي ..
ولا زلت على رأيي انه الأنسب لقيادة الهلال بعد الدعيع ..
لما تشوف واحد يفرض نفسه بسرعة ..
بثر باي مكان يتواجد فيه ..
محبوب بين زملاءه ..
مثقف ..
قوي الشخصية ..
حماسي ..
استفزازي في الوقت المناسب ..
يعرف كيف يتحكم بأعصابه ..
يعرف كيف يحتوي الجو ويلطفه في النادي ..
كل هذي صفات لشخصية قيادية أشوفها بـ ياسر ..



ياسر من بداية مشواره في طريق النجومية .. وهو ذكي اعلامياً ..
قدر يكسب كل الاتجاهات والافكار ..
فنلقاه متواجد في الزيارات الخيرية .. والاعمال الانسانية .. والدعايات الدينية ..
الى جانب مشاركته مع الفعاليات العالمية .. من رياضة و صحة و فن و ( حلاقة )
كل هالاشياء .. ماسمحت لأي احد انه يلقى ممسك على ياسر ...
واتصاله بالدكتور الشيخ سلمان العودة لأخذ فتواه عن دعاية جيليت أقرب مثال ..
لكن ..
نسمع كثير من الجمهور الهلالي يقول ان ياسر تخونه العبارة احياناً بحقنا مثل ( اللي بالمدرج يتفرج ) وغيرها ..
انا حاولت احلل تصرفات ياسر مع الجمهور الهلالي بالرغم من ذكاءه الاعلامي ..

ياسر مثل ماذكرت لكم قبل .. رجل قيادي وقوي الشخصية ..
اي واحد طبيعته كذا .. يمكن يفهم تصرفات ياسر ..
الانسان القوي والقيادي ..
مايحب يظهر ضعفه ابداً للخصم .. ( حتى لو كان من داخل يتألم ) ..
فلما تسيطر هالفكرة عليه .. يحاول انه ينفيها بأي طريقة ..
حتى لو كانت على حسابه هو او احد احبابه ..
فياسر .. لما كان يقول تصريحاته اللي فيها تعزيز لنفسه ..
ما كان في باله وفي عيونه .. الا خصمه .. وخصمه فقط ..
يعني يبغى الخصم هو اللي يسمع هالكلام ..
لكنه تناسى الجمهور الهلالي .. وردة فعله تجاهه ..
زي لو أمك تسوي لك عصير .. وأعجبك مذاقه ..
فجاك اخوك الكبير البثر القلق .. وقعد يضحك عليك وقال : مستمتع بالعصير يابابا . جاز لك ياحبيبي
انت لا ارادياً وش بتقول ؟؟
بتقول : لااااا ما جاز لي ..
طيب وامك اللي مسوية لك العصير وتسمع هالكلام .. ما ملت عينك يا مال الصلاح ..؟؟
----> عاشت جو مع المثال

فهذا اللي يصير لياسر ..
يحط في عيونه دائماً .. الخصم .. وكيف يرد عليه .. وكيف يقهره ..
لكنه ينسى ان له احباب ما يبون يسمعون هالكلام ..



اخيراً ..
سؤال :
ياسر -بالفطرة- ...
.. كشخة والا لا ؟

انا اقول ..
ما شفنا كشخة ياسر الا لما قرب عرسه واعرس ..
فدعوني اقول : وراء كل رجل عظيم .. امرأة
الله مير يخلي لك ام عزوز يا ياسر

ياسر القحطاني .. [20]

أطلق مهاجم سعودي --> لا ياشيخة

اول ما ظهر نجم ياسر .. كنت ماني مقتنعة فيه .. كنت اعتقده مجرد هالة اعلامية ثم تنطفي ..
البنات بالمدرسة كانوا مسوين زحمة .. اشوف اسمه بكل مكان .. بالطاولات بالكراسي بالجدران ..
---> حشى حارة عرابجة ذي
حتى تخيلوا --> ابسولف معكم شوي
مرة كنا مسوين صندوق اقتراحات بالمدرسة ..
ويوم اخذت الصندوق معي وفتحته عشان أقرأ الاقتراحات .. تخيلوا .. لقيت وحدة .. قايلة :
سووا برنامج مسرحي عن ياسر القحطاني ..
يابغيت امردغها هي واقتراحها وياسر حقها خخخخخخخخ
عاد انا خِلقة كنت ماني مقتنعة بـ ابو شوشه --> كنت اسميه كذا

لكن مع الايام ..
ومع مرور مباريات للهلال والمنتخب ..

وش ذا ؟؟
بكل مباراة لازم ياسر يكون له بصمة ..؟؟

من بعدها ادركت انه كان يستاهل الزوبعة اللي طلعت عليه .. لكن بنفس الوقت مايستاهل انه ينسيني نجوم الزعيم الباقين !


مهاجم ..
يلعب بكلتا القدمين .. !
مراوغ درجة اولى .. !
سريع .. !
كنترول على الكرة ولا اروع .. !
ممتاز في العرضيات .. !
ممتاز في البينيات وصناعة اللعب .. !
ممتاز في الكرات الثابتة .. !
ممتاز دفاعياً .. !

مزعات يعطيك ..
اهداف بالراس ما يقصر ..
تسحيبات طب وتخير ..

بالرغم من قصر قامة ياسر .. الا ان راسه ذهبية .. ومن ينسى هدفه بالراس على اندونيسيا بكاس اسيا ؟؟
يا هو نط نطة ..
الى الحين سواقنا يذكرها


ياسر .. يمتلك قتالية من نوع عجيب على الكرة .. بل الاشد (عجب) انه احيانا يتوقع وين راح تستقر فيه الكرة ..

ياسر .. ذكي جداً في حالات كسر التسلل .. او الفاولات .. او استغلال بعض قوانين كرة القدم ( اللي ربعنا داجين فيها )

يخدمك في اي خانة تبيها .. في الصندوق .. في الجناح .. حتى في صناعة اللعب متميز ..



من الاشياء المميزة في ياسر .. واللي نادر مانلقاها بكثير من لعيبتنا ..
انه يخدمك في اكثر من تكتيك ..
التكتيك الدفاعي .. يتطلب لاعب سريع .. مراوغ .. سريع البديهة وذكي .. ممتاز بالكرات الرأسية ..ممتاز دفاعياً ..
التكتيك الهجومي .. يتطلب لاعب سريع في النقلات والبينيات .. ممتاز دفاعياً .. ممتاز في التحرك بالملعب .. وممتاز في الضغط على حامل الكرة ..
وكل هالامكانيات متوفرة بياسر ..
عمركم سمعتوا بمدرب في الهلال او المنتخب .. يقول : ياسر ما يناسب تكتيكي .. ؟!
والا يكون ياسر ممتاز مع مدرب .. ومع مدرب آخر يكون سيء .. ؟؟!

في احتفالية النادي بلقب نادي القرن ..
قال الشلهوب : انا وسامي ما كان بيننا تفاهم في الملعب .. ويوم ضبطنا العلاقة برى الملعب .. تفاهمنا داخله
---> لا يغركم هالصويصة ..تراه يقول حكم وقسمن..
من كلام الشلهوب اللي فوق .. نقدر نعرج على نقطة مهمة نادراً ما احد يذكرها ..
وهي التفاهم مابين المهاجم وصانع اللعب ..
لو نجي لياسر ..
راح نشوف ان كل لعيبة الوسط ( الكبار ) اللي مروا على ياسر .. كوّن معهم ثنائي رائع .. وقدر يفهم ويترجم طريقة لعبهم ..
الشلهوب ..
كماتشو ..
التايب ..
ويلي ..
نيفيز ..( بدرجة أقل )


ياسر مع الشلهوب ..
اقدر اقول .. ياسر هو افضل مهاجم فهم اسلوب الشلهوب وكوّن معه ثنائي .. -بعد سامي-
يعني .. بغض النظر عن الكابوس المرعب اللي يسويه ياسر يومياً بحق الشلهوب .. واستقعاده له .. وتعليقاته ..
ياخي ياياسر خل الولد يتنفس .. وبعدين معك ؟؟؟الى متى يعني ؟؟ --> كأني تفلتت
الفرق بين سامي وياسر ..
ان ياسر فهم لطريقة لعب الشلهوب ولكراته بشكل اسرع من سامي ..!
بينما سامي يترجم لك كرات الشلهوب بشكل أعنف
انا مجرد اتذكر ذبة الشلهوب لياسر في مباراتنا مع الاهلي 2008 ( المباراة اللي سجل ياسر فيها هدف التاكسي)
مجرد اتذكر هالذبة .. و كيف استقبلها ياسر .. اعرف حجم التفاهم اللي كان بينهم ..


شوفوا كيف الشلهوب مررها لياسر بحرفنة ..
وكيف استقبلها ياسر .. وفهم مسارها صح ( بالرغم من صعوبتها ) !

الحلو في هالثنائي ان كل واحد مكمل للثاني ..
الشلهوب ممتاز في العرضيات --> ياسر مبدع في الراس
الشلهوب ممتاز في البينيات --> ياسر مبدع في فهمها
الشلهوب ممتاز في الخمخمة --> ياسر جايد بالنطنطة خخخخخ



طيب لو قلنا ان ياسر هو افضل مهاجم فهم لـ كرات الشلهوب ..
من الطبيعي اننا نقول ان التايب هو افضل صانع لعب كوّن ثنائي مع ياسر ..
مب لازم اذكركم بالمسرحيات اللي كانوا يسوونها هالاثنين ..
كباري , وكعوب , , تسحيبات , تسدحات على الملعب --> التايب خخخ
المسألة مب ثنائي وبس ..
كان ياسر مع التايب يشيلون لك الفريق كله .. ولا يهون ابودعيع
التايب يختلف عن لعيبة الوسط اللي مروا على الهلال .. بكراته الصعبة والمعقدة ..
ومو اي مهاجم راح يفهمها .. وباعتقادي هذا من الاسباب اللي خلته ما يظهر بقوة لما انتقل للشباب .. لانه ما لقى زي ياسر
من وين تجيب لك مهاجم يفهم كورة مايدري الا وهي طالعة له من تحت الارض ؟
خلوا هذا كله ..
تذكرون مباراتنا مع الاتفاق 2009 .. ؟
هالاثنين سووا مهرجان موووش طبيعي ..

ألف شكر لأخوي nj00m على توفير الصورتين المتحركة

بلا مبالغة ..
لما اشوف التفاهم اللي كان بين ياسر والتايب .. اتذكر التفاهم اللي كان بين ابو يعقوب وابوعبدالله ..
---> قلت التفاهم .. والا معصي يصير احد زي ابويعقوب


استعرضت لكم الشلهوب والتايب فقط .. بحكم انهم ابرز وافضل لاعبي وسط مروا على ياسر .. وكوّنوا ثنائي معه ..
الشيء الوحيد اللي اتمناه يصير ..
ثنائية بين ياسر والفريدي... اتوقع بيصير شيء خرافي ..

حقيقة ..
الكلام عن مهارات وابداعات ياسر يطول ..
لكن ..
دائماً ..الناس اذا بغت تقارن بين لاعب واخر .. يا إما تشوف الاعلام وش يقول .. أو تطّلع على لغة الارقام ..
انا من ناحيتي ..
لاهذي ولا ذيك ...
اذا بغيت احكم على لاعب .. اشوف امكانياته .. وامكانياته فقط !
لما تسرد امامك امكانيات ياسر ومهاراته اللي يمتلكها ..
راح تؤمن .. انه -زي ماقلت في البداية - ..:

اطلق مهاجم سعودي خلال العشر سنوات الماضية .. !

وهذا بحد ذاته ..
يكفي !

لحد يرد..~

لو بنتكلم عن ياسر القحطاني .. اللاعب الهلالي .. اللي يحب الهلال ويعشقه ..
راح يطول الكلام ..
باعتقادي المقياس الحقيقي لـ حب اللاعب لـ ناديه مو تظاهره بالبكاء او الصراخ باحد الاهداف او الضحك لانه ضيع هجمة خطيرة ..
المقياس الحقيقي .. هو ايش سوى للهلال كـ شيء اضافي خرافي ..
مثال ..
الشلهوب لاعب مايختلف عليه اثنين انه يعشق الهلال ..
لكن بحياتي ماقد شفته يبكي على فوز او خسارة .. بل حتى استغرب ان شفته متفاعل مع احد الهجمات ..
فهل هالاشياء الشكلية بتخليني احكم عليه ان ماعنده روح او عشق للهلال ؟؟
لا طبعاً .. لان هذا طبع بالانسان ..هذا عصبي وهذا بارد ..!
نجي لـ قناصنا ..


ياسر يضل لاعب هلالي .. عاشق للهلال .. منذ الطفولة ..
من اول ما وقع عقده معنا .. ما سمعنا انه تخلف عن احد التمارين بلا عذر .. او تسبب باي زعزعة للنادي مثل مايسوي غيره من لاعبي الاندية الثانية ..
ما تكبر على الجمهور الهلالي بمجرد انه صار مشهور .. فنلقاه يصور مع الجميع .. ولا عمره رد احد .. اياً كان--> مع ان هالشيء احيانا يوديه بداهية .. احم
لاعب يسوي جو اخوي رائع بين لعيبة الهلال .. قولوا لي .. : وش تمارين الهلال بلا ذبات واستهبالات ياسر ؟؟
اذا سامي بكبره .. لـ بغى يوجه اللعيبة باحد المباريات يصيح لياسر مباشرة .. فتلقى ياسر على الموعد !


من اول ما جانا وهو عارف بروتوكولات الهلاليين ..
- اسرارنا ومشاكلنا ما تطلع برى ..
- يوسف وسامي قدّرهم على قدر حبهم للهلال وعلى ماقدموه ..
- تحمل اي شيء يصدر من الجمهور الهلالي .. لان لولا الله ثم هم .. انت ولا شيء ..!
- قدر الجمهور وحيهم بعد المبارات وقبلها ..
- اهتم بـ فريقك وبس .. ولا تلتفت لغيرك ..
- مافيه لاعب اكبر من الهلال ..
- هلالي = مهايطي خخخخخخخخ

كل هالاشياء .. لقينا ياسر يندمج معها اندماج ومن اول سنة التحق فيها مع الهلال ..



عـــــزيـــــز
انا ما قد حضرت استقبالات الجمهور لـ اللعيبة ..
ولا قد شفت ازعاج بعض المصورين في اوقات غريبة
لكن اللي اشوفه من الصور ..
ان ياسر يوصل للمطار جنتل .. .. يطلع منه صامولية هههههههه
ومع ذلك .. لاقد سمعت عنه انه اصدر كلمة او حتى بان على ملامح وجهه انه متضايق ..!
ثم نسمع من بعض الجماهير من يقول: ياحبك للفلاشات ...
يعني وش المطلوب .. ؟؟ يكرش طلبات الجمهور ؟؟!

ياسر .. عنده تقدير وحب كبير للجمهور الهلالي ..
واكبر دليل ..
اللي سواه بعد تحجير تسحيبات له خخخ ..
هو وش دراه ان الجمهور الهلالي كان منقهر منه وثاير ..؟؟
كل ما دخل للملعب .. يلقى له تحية خاصة .. يعني مازالوا يقدروني .. ويحبوني ..
لكن لما عرف الحقيقة .. شفنا وش سوى ؟؟!

ولما استفزوه جمهور الاهلي الامارتي بمباراتنا معهم قبل العام . ومن ثم سوى حركته ضد لاعبهم وانطرد ..
اول شيء قاله بتصريحه : اعتذر للجمهور الهلالي .. ولا تسألني عن السبب !


فرحته .. حماسه .. روحه .. بكاؤه .. كلها مكملات لما قبلها من شواهد .. تثبت لي انه هلالي دمه ازرق .. مو مجرد لاعب تعاقدنا معه !

انا ما انسى فرحته لما سجل المحياني اول هدف رسمي له مع الهلال بمبارتنا مع نجران ..
بذاك الوقت بالذات .. كان الجمهور الهلالي يصيح مانبي ياسر وعطونا المحياني ..
اي واحد بمكان ياسر .. بيصير يخاف يفقد شعبيته ومكانته بين الجمهور ..
وفي مثل هالوقت العصيب .. وانت تضيع هجمات قاتلة ..
المحياني يسجل هدف عالمي !
وش بتسوي ..؟؟
اللي شفناه ان ياسر اول من عانق المحياني .. قصدي تعنقط بظهره ..
ولما سجل ياسر اخيراً هدفه الخامس .. سوى حركة المسدسات .. ثم عطى الجمهور الهلالي بوسه عفوية .. على غير عادة ياسر اللي يحب الحركات الدرامية مع الجمهور خخخ
ذيك البوسة حسيتها طالعة من صماصيم قلبه ..
والاحلى فرحة اللعيبة له ..
لانهم يحبونه .. وفرحة ياسر بحد ذاتها تمثل لهم شيء كبير ..

في الوقت الحالي ..
ومع ندرة اهداف ياسر مقارنة بالسابق ..
كل هدف يسجله ياسر .. يفرح فيه فرحة .. كأنه اول مرة يسجل ..
وكل لاعب اجنبي يسجل هدف للهلال .. او يصنع كورة .. نلقى ياسر يفرح معه ويشجعه .. --> من يقول ليلو خخخ
لمجرد انه انلطع بالاحتياط شوط .. هترك بالشوط الثاني .. كأنه يقول هالاستراحة تكفيني !!



كتفه كان يحتاج معالجة ومع ذلك تحامل على نفسه ..
ومثل ماذكر في لقاء العربية ان احيانا كتفه يطلع في بعض المباريات .
وهذا الم فضيع فضيع .. تقدرون تبحثون في اليوتيوب وتشوفون كيف يتألم اللي تجيه هالحالة ..!
وان كانت مجازفة وخطأ كبير من ياسر .. لكن هذا يحسب له .. انه ما حاسنا بمنتصف الموسم وقال باسوي عملية !


طالبتوا .. اللعيبة يحيونكم بعد الاهداف .. وسواها ياسر ..
طالبتوا .. اللعيبة يحيونكم بعد المباراة وبين الشوطين .. وسواها ياسر ..
وطالبتوا وطالبتوا .. وياسر يسوي ويسوي .. ومع ذلك مازال فيه منا من يقول : ان ياسر ماعنده روح الهلال !
يعز علي لما أشوف هلالي يقول هالكلام .. وبنفس الوقت يقول : رادوي روح الهلال وبس !!!
كيف ميزت رادوي وانه روح الهلال .. وياسر اللي ياما تسبب في بطولات لنا..واللي ما ارتاح من اول ماجانا.. خارج من هالوصف ؟؟؟؟

يعني لازم يصيح ويصارخ ويعصب و يهوش .. عشان نتأكد ؟؟!!
من متى هذا هو مقياس الروح والحب والعشق ؟؟!!!
المقياس الحقيقي ..
ان اللاعب يعطيك كل ماطلبت منه .. ويعطيك فوق حقك ..
مايمكن انه يساومك .. او يتشرط عليك .. أو يزعزع كيانك
وكل ما شاف انه غلطان يحاول يصحح خطأه بأي ثمن ..
لانقارن ياسر بـ يوسف وسامي وغيرهم ..
هذولا كم قعدوا مع الهلال .. وكم قعد ياسر مع الهلال ..؟؟!!
بالرغم من ان ياسر احياناً يصيح و يفرح فرحة مبالغ فيها او يعصب .. و كل هالمشاهد ما تهمني .. لاني احسها حركات من ياسر يسويها عشان يثبت للجمهور الهلالي ان روحه هلالية..
ومن رأيي ياسر مو ملزوم يسويها .. لان المقياس الحقيقي للعشق متحقق في ياسر .. اما هالحركات الشكلية يخليها اضافات لما تطلع منه لا ارادياً .. !


ياسر .. هلالي هلالي هلالي ..
وروحه هلالية ..
ودمه أزرق ..
وماهو اقل عشق للهلال من سامي ويوسف والدعيع والتمياط .. وغيرهم من اللعيبة ..






لحد يرد..~

يسألوني ليـه احبه ..

طرح مميز و رائع ..
لكن هذا الطرح الجديد خرج
عن الادب العربي اللذي قد
يجعلنا مع الوقت نفقده
ويتلاشآآ و يمسح ..

ولكن يبقى اسلوب جديد
مع انه خارج عن الادب الفصيح

لا تحرمينا من ابداعاتك ..

يعطيك العافيه ..

فعلاً الكتاب بين من العنوان
ما وراء القناص مجرد ياسر ...

استميحكي عذراً ان استبدل هذه العبارة
ب(ما وراء القناص مجرد إنسان ) لايخلو من العفوية و طبعونا التي لا طالما اشتقنا اليها و احببناها مهما وصلنا الى اعلى مراتب الشهرة .............. فهي تعتبر مغروزة بشكل فطري في اعماق اعماقنا وتحتاج منا ان نظهرها مابين الوهلة و الاخرى,,,,,,,,

دمتي لن احببتي

طرح رائع وجميل
يعطيك الف عافيه حبيبتي
دمتي ودام ابداعك وتالقك
تقبلي مروري هلآليه بحت