المزهريه : بدر بن عبد المحسن



لا إنتي ورده.. ولا قلبي مزهريه من خزف

صدفه وحده جمَعتنا.. شوفي وشلون الصدف

التقينا بمدينه.. وفرقتنا ألف ميناء

اغفري للريح .. والموج .. والسفينه

كانت الرحله حزينه .. للأسف

كنت أحلم لما ناديتك بسافر

مع عيونك في شعاع الفجر باكر

والله أعلم إني صادق

كنت أحلم إني عاشق

لاأخاف .. ولا أضيع .. ولاأفارق

ويش أقول غير اني آسف ويش أقول

أنا خانتني العواصف والفصول

آآه .. ياتعب المسافر

في اراضي الجرح .. آآه في دمع المحاجر

مالهذا الحزن آخر.. أولهذا الجرح آخِر

ياشمسي الأخيره .. في اللحظه الأخيره

أنا .. لي كلمه أخيره

اغفري لي ابتسامتي قبل جرحي

حاولي تنسي كلامي قبل صمتي

ولو رضيتي .. يا أعز الناس أنتي

أجمل أحبابي : محمد الحويماني



البارح القلب يكتب والسهر يقرا
.......... والليل دفتر عجز يستوعب عتابي

قلت انقض الجرح واجعل سيرته مسرى
.......... مليت أروح بقصيد ما بعد جابي

حنيت لك يالغرام العذب وأنت أدرى
.......... ياأغلى وأجمل وأعز وأطهر أحبابي

يامرحبا وان لفيت وصادفك غدرا
.......... عزاي بأنك تميزني عن ألقابي

من غبت والناس كن نفوسها قشرا
.......... أشواهم أللي كسر روحي وهلاَبي

الجرح يبرى لو ان الوقت مايبرى
.......... شف وقتي اللي خذلني ويش سوى بي

ماقلت لك بجعل من السالفه مسرى
.......... لك يالقصيد الصدوق رضاي واعجابي

أكتبك سيلٍ يجي له فالورق مجرى
.......... وإذا كتبتك نبت فالطرس غيَابي

تدري .. بلاش أكتبك والناس ماتقرا
.......... يكفيني إنك مقربني من أحبابي

تغني لي خالد ماطر


ألا ياليلي الموحش علامك تنبش المخزون
.......... غرفت من الوله يوم البحر موجه مغطيني

دفعته مير عيَا بي وبه بوح وعتب وشجون
.......... يفيض الوجد في هاك الطريق اللي موديني

حبيبي..لاتغني لي وأنا في داخلي مطعون
.......... ليا من غبت عن عيني وش اللي عنك يغنيني؟

تغني لي قصيدي والقصايد كلها فـ/عيون
.......... لك الله وأنت خابرها عيونك كيف تهنيني

تسافر.. والوعد باكر متى؟ وشهو؟ يجي مضمون
.......... أخاف الجرح يشقي خافقي والشوق يدميني

تسافر.. وش بقى ؟ دفتر قصيد وخاطرٍ مغبون
.......... يعانق بالوله ذكرى .. زمانٍ بينك وبيني

أنا اللي جار بي طيفك .. مشاعر فايضه ولحون
.......... وأنا أللي حافظٍ قدرك وفا .. تامر وتنهيني

تعال وشاعرك صاحك قصيده والمعاني دون
.......... تراها كلها دون الولع واللي سطا فيني

تعال وضمني كلك .. تعال وصاحبك مفتون
.......... تراني فدوتك كلك ليا من شافتك عيني

تمَكن بي غرامك وأنت وافي والعرب يوفون
.......... أبشعل في قدومك شمعتي يافرحة سنيني

تغني لي .. وماتدري أنا ياصاحبي مطعون
.......... وش اللي عنك يا غايب يهنَيني ويغنيني ؟

قصيدة حب : بندر المحيا


ذهب كل الكلام وفضته يوم السكوت نحاس
.......... قبل ما أشوفك .. أشوفك نهر من منبع عْذوبه
أحبك من زمان البرد ..أحبك من زمان الياس
.......... كثر ما اصحى من أيام الوله وأدخل فـ غيبوبه
أنا وحدي حبيبك لو قريتك في وجيه الناس
.......... ولو وجهك ذنوبٍ مالها في سجدتي توبه
تجي مثل العزا بعد العزا في غيبة الأعراس
.......... وتروح أشبه بـدمعه فالورق بالصمت مكتوبه
معك حلمي من المَا.. والمياه تكذب الغطاس
.......... ياكثر اللي غَطْسوا في حبك الهايج وغرْقوبه
مجاريحٍ نفاهم دربهم لـ عيونك النِعَاس
.......... تعدَوا ينشدون الصبح عن رمشك وضاعوبه
يحطبون الضلوع فـ غابة أيامك بَلْيَا فاس
.......... شتاهم ضحكة شفاهك وشافوا نار مشبوبه
تخاوو بين من دوَر ذهيب ومن سرح عسَاس
.......... حيارى غرهم كاذب هدبك ووجهواصوبه
وانا البارح عيوني في عيونك مرها وسواس
.......... بنيت سنيني البيضا لها طوبه على طوبه
أردك للحديث بـ لهفة البارد بليا قياس
.......... وتسولف سالفه للي عشق ماهيب مرغوبه
قم اجلس فـ الحنايا قبل ما يغتالك القرطاس
.......... شعرت انك تبي تهرب ورى النسيان لـ دروبه
أنا محتاج لك.. ما احتاج لي لاتنشد الأنفاس
.......... عن اكبرحاجةٍ فـ أقصى نفس شاعرك محجوبه
طويله طاولتنا واستقر الما بـ قاع الكاس
.......... كأن السالفه غيمه على شفتك مسكوبه
جلست مقابلك وجهاً لـِ وجه بـ جنبي الهوجاس
.......... إذا مستقبلي وجهك ورى لأحلام مرعوبه
نسيت يدي بـ يدينك بـ صدفه كنَها الإحساس
.......... وذكرت إني نسيت أذكر يدينك كانت اعجوبه
تهيَلتك طعم هيل بـ فمي من بعد طعم عماس
.......... بـ فنجالٍ نعس من نظرتك بـ أهداب مصبوبه
سرى الليل البهيم بـ رمشك المستهتر الخنَاس
.......... وليله غير هاذي من ليالي العمر مشطوبه
إذا ما يعشق العاشق سهر شكواه بعد نعاس
........... ينام أحسن له ويمسح دموعه في طرف ثوبه
إذا ما فجَر الشاعر قصيده صدقها نبراس
.......... يبَل الدفتر ويشرب حبر كذبه ومكتوبه
وأنا أعظم من يحب إليَاهدا باله عقب ما انحاس
.......... أعيش بْـ كبريا والقلب بين يدين محبوبه
مطر هذا الوصل يوم الهجر يملا الضلوع يباس
.......... وعسى الماطر على يابس ضلوعي يرخي نصوبه
من اللي يشبهك؟ يالفاتن المستصعب الحساس
.......... ليَا حاولت أشوفك فْـ الملامح قبل هَـ النوبه
يذكرني بـ من لايشبهك من يشبهك لاداس
.......... على أعصابي سفرك ودوبه أيقظ غافلك دوبه
وأنا قلبي وطن أرضه سماك وبيته الكراس
.......... جبينك شمسه فـ صبح الوله وجروحك شعوبه
أنا قدامك اخترني حبيبك قبل كل الناس
.......... أو اني مثل عشَاق هَوو رمشك وضاعوبه