لاطحت
ياليتني لاطحت لاطحت لاطحـت
...................مااطيح عنـد اللـي تمنـى مطيحـي
اللي بوجهة عـن فـؤاده تصفحـت
...................لـو كـان لـي فـي غايتــه مايبيـحـي
جاملت واغضيت وتسامحت واصلحت
..................وقلت الحقيقة والعزاء اني صريحـي
مايـوم والله خنـت والا تمصلحـت
..................حتى عـن اعدايـة بذمـي شحيحـي
وان مر طاري طيحتي بالنظر شحت
..................موتـي ولاشوفـي لقـلبـي جـريحـي
بيدين من حلمة وأمل عمـره البحـت
..................يصيـر حلمة علـم واصبـح ذبيحـي
وانا الله اعلم كم دمحـت وتسامحـت
..................وصديـت كنـي دالــة ٍ مستريحـي
يايعربي خذها صريحة اليّـا رحـت
..................اقـولهـا ولسـان شعــري فصيحـي
ليتك عن مطاول سهر ليلك امرحـت
....................وكسرت عن جفن السهـر لايطيحـي
عاد.. أنت توحيني ياليتـك تريحـت
....................يوم أنت لانـدي ولانـت بنطيحـي؟
* عاقل الزيد .
ضيقة صدر
يمر يوم وكل يوم يمر أحس أني حزين ..
أمسي على ضيقة صدر وأصبح على ضيقة صدر ..
قالوا الفرج عقب الصبر قلت الصبر همٍ دفين ..
قالوا الوفي طبعه وفي قلت الزمن كله غدر ..
قالوا الصدف قلت الصدف ماعشمت طول السنين ..
قالوا القدر قلت القدر من اللي يردك يا قدر ..
قالوا الامل قلت الامل مثل السراب اللي يبين ..
قلت للعهد وانا على المطلاع وسط المنحدر ..
قالوا تشوفه قلت اشوفه في حلوم النايمين ..
اصحى على شوفه وانا خدران واصحى واخدر ..
قالوا وش اللي تذكره اذا تناولك الحنين ..
قلت التنهاته اذا طروه الدمع يحدر ..
قالوا يخونك قلت انا ياكرهني للخاينين ..
لو خاني ضاع الوفا في الناس الا ماندر ..
قالوا نسيته قلت واللي لحن المسلم جبين ..
ماانساه كود الناس تنسى الليل ومطلاع البدر ..
قالوا كم اللي راح من عمره شقى قلت سنتين ..
عامين وانا اغرب الخطوات والقلب يحدر ..
قالوا الكدر ويش الكدر قلت الكدر مثل السجين ..
ان عاش في سجنه كدر واذا طلع عاش الكدر ..
قالوا سواتك وش يسوي قلت بين الحالتين ..
اما توفى من غبن والا قضى عمره هدر ..
* حمدان المري .
رسوب الأغبياء
أن كنت أنا أخطي شي طبيعي لان أنا مانـي نبـي
محدن عصمه الله من الاخطـاء .. كـون الانبيـا
فعلا أنا أخطي بس ضـوّي ماتشـب الا أحطبـي
أطمح ولولا الليل .. محدن شـاف فايـدة الضيـا
أمشي ولو أموت وأنا أمشـي .. ولاكـن ماحبـي
ولا أعشق الصوره . ولا الكربون . ولا أعشق غيا
كل ماتعثّر ؟ قلت في نفسـي وأنـا أمـس شنبـي
ياكـم علـى الدنيـا فقيـر .. ويحسدونـه أثريـا
أبغا أتوحّد وأنت أخذ مزهبـك وأتـرك مزهبـي
كنّا أخويا ومن بعـد مازلّليـت ؟ ماحـن بخويـا
أبعصم رجيلـي عـن دروب السخافـه ياصبـي
لانّي حياوي والدروب السود .. مافيهـا .. حيـا
تعـال وادعنـي وداع الارض للـحـر الابــي
أنا بعللّـي .. وأن دعيتـك ؟ فالعفـو .. للأنقيـا
ماني منادي بسمك . اللّـي .. ماتسمـوااه أجنبـي
فن قلتلك .. يا ؟ .. أعرف أنّي حاشمك لاقلت ..يا
يـا؟؟.. والله وبـالله وبعـد الله وبـي وبسبـبـي
صارت شياطين الحروف المستهيمـه ..؟ . أتقيـا
فن شفتني متعب هجوسي في رسم راس الضبـي؟
ماهو علاشان أكسب أعجابات .. ريمان .. وهيـا
لالا . أنـا مخلـوق مبـدع . مايحـب ومايبـي
ألاّ يقول ؟ أن الاذكيا؟ سبّـة . رسـوب الاغبيـا
من الذكاء؟ أنّـك تسـويّ نفسـك أحيانـن غبـي
بس الغباء؟ أنّك تذيكالـك .. علـى نـاس أذكيـا
* سعد علوش .
إنسان غايـب
غابت سماء زرقا .. وشمس .. وهبايب
ولا بقى لي غير .. ليل وبعض هَـمّ . !
يسألنـي العالـم عـن إنسـان غايـب
وعجزت من حزنـي عليـه .. آتكلـم !
إن كـان باقـي لـي دعـاء وطلايـب
فالله .. يعيـد شفاهـي اللـي تِبسّـم ..
مريت بـدروب ٍ قديمـة .. عجايـب ؟
حتى المكـان اللـي تركتـه .. تألّـم !
بيـت ٍ قديـم وبـاب مبلـي وذايــب
وجدار .. مـن خـوف الملامـة تهـدّم
وماضـي وعشـق وذكريـات وحبايـب
وكلمات .. مكتوبة على غصـن أبكَـم !
بس التـراب اللـي وفـا .. للخرايـب
وغطا شوارعها .. لأجل يحجـب الغَـم
كن داخلي طفل ٍ لـه إحسـاس شايـب
وإتركتـه الدنيـا .. إلـيـن إيتعـلّـم
وكن الشجر .. رجل ٍ يعـرف السبايـب
ومات .. وترك كل الحيـاة .. إتنـدّم !!
دام العشق خايب .. والإحساس خايـب
و ش لي .. أمر بصوب بيته وأسلم ؟!
ذكرنـي ( ترابـه ) بإنسـان غـايـب
وعجزت .. من حزني عليـه آتكلـم !!
* عبدالله البكـر .
مهـزلـه
تدرين يا حلوه متى العاشق يحس بمهزله؟
لا جاه شيٍ مثل شي قام يحداني حدي
ما اقسى من دموع اليتيم الا ذكر ضحكة هله
ولا يهد من الفراق الا الفراق السرمدي
يا الورده اللي في شرايين الحشا متغلغله
يا روحي اللي لو تبرت مني اختل جسدي
كونت لك عالم غرام ما دخله البلبله
الا هديرٍ ينتهي بين الظلوع ويبتدي
حتى اقرب اصحابي من اللوعه سهيت وقلتله
يا الاجودي كف العذل ما في العواذيل اجودي
انا اللي استاهل عناقيد العنب ي مدللّه
ليتك دريتي كيف عيني تذكرك في مرقدي
يدنا من الغيم ان تغطرس واطول من السنبله
يا اقرب كثير من الحكي وابعد شوي من الجدي
ان جيت رحتي مقفيه وان رحت جيتي مقبله !
كم مت واليا قلتي احبك تجدد مولدي
دنياي انا لو تجتمع لذاتها في مكحله
والله مشهر لاي عينين غير عينك مرودي
يا ذابحتني كل شي الا الجفا متحمله
يا كبر كذبت عزتي لو قلت اب ابعد وابعدي
قلبي لو اغديتيه في الصحرا بليا بوصله
ما تاخذين الا وهو لاقصى ظلوعك مهتدي
وان خاب ظني واخر المشوار جا مثل اوله
بغمض عيوني وابحلم واقهر الحظ الردي
باحلامنا حتى آخر المريخ نقدر نوصله
الله لو نطلع بساط الريح وايديك في يدي
تخيلي روضٍ من اقصاه اجمل الورد احمله
واهديه ليدين وظفاير شيخة الورد الندي
تخيلي نهرٍ بلا احجارٍ تمثنى جدوله
نبقى على جاله جلوس شوي وشوي نعدي
تخيلي بيتٍ دفاه من المواجع والوله
ضحك وسواليف وسهر ومزوح وبساط احمدي
تخيلي عشقٍ عجزت استوعبه واتخيلّه!
كانه على هالحال ؟ ما عزالله ابشر بسعدي
يا سيدة عشقي وانا راعيه راعي الأوله
ما هي كثيره لو تقولين انت والله سيدي
ترى الله اللي حط لك ذاك الغلا والمنزله
والا الهوى لا ورث ابوي ولا ذخرته لولدي
حبيبتي ما يقهر الرجال في مستقبله
الا الهوى اللي مرةٍ يقبل ومرات يغدي
حتى الوفا لا زاد عند حده يعوّد مهزله
يا ليتني خنتك ولا اللي كان يحداني حدي
* ناصر القحطاني .
يقول القلب
ابد والله..سـمـعت بطـــاري عيونك وجــيت اغليـــــك
يقول القلــب سلمــلي عـليـه ويطلـب وصالــــك
حبيبـي وش تقــــول بــعاشـــقٍ قصة غــرامه فيـــك
نســا الدنيا ومن فيهـا وجا ينشــــد عن احوالـــك
حــبيبـي جيــت لمـصــافـح مواعــــيد الـفــرح بيديـــك
وجيـت اعطي يمــينك حب ماتدريبـه شمالــــــك
اشوفـــك واسـمعــك قبل اعـرفك واشــتاقلك وابيـــك
واحس آمال عـمـري من عرفتـك تشبه امالــــك
انا ماعشـــت قبل اعيش بحســاسـك وقــبل اجيـــــك
حبيبـي جيتـك بقــلـبـي ولو ماجيتـلــك جالـــــك
احاسيســي كريمـــه وانت تســــتاهل كـــرم غاليـــك
ترى لوماشرقت شمسك وصل رحت اتبع ظلالك
يقــــولــــون الـــعـــــرب دارٍ بـلا مغليــــك ماتــغـــريـك
واقـــول انـك بليــا حب كـنـك عايـــش لحالـــــك
انا لاجيت اسولف عن شعــــوري قمت اسـولف فيـــك
وانا ادري رغـم كل الشوق ما مـريت في بالـــك
دريت ان الغـــــــــلا مثل القــــــدر يرضــــيك لويبكيـــك
ولاينفعـك بـعلـوم الغـــــــلا عمــــك ولاخالـــــك
ما بين الحـــلـم والواقـــــع يصيبـك حظــي ويخطيـــك
متى تصبــح نصيب اللي وقـف بـآمالـه اقبالــــك
* سعد آل سعود .
بخونك بس .. معك
بافارق فراقك وباخنق عبرتي
واجرح اضمادي واسافر لك معك
بشد للماضي واقدم ساعتي
واعاند اعنادي واقودك واتبعك
باجامل احزاني واجافي فرحتي
واعادي خلاني واحبك واخدعك
بصير انا طبعك وانتي طيبتي
وبيحزنك ضحكي..وهلي بمدمعك
بسامر دموعي واعزي ضحكتي
وبهدي انا ضلالي..ضلال ياسعك
بلبس انا ذلك.. وقيسي عزتي
وبتصيري ذنوبي وخيري بيطبعك
باحارب في ضعفي وافر في قوتي
والى رضختيلي لموتي بادفعك
ولجل اللقاء بارحل وتمضي رحلتي
والى حصل شوفك بكون مودعك
اببعد واوصلك وبسبق خطوتي
وبانثرك فيني وانسى اجمعك
بضم أنا هجرك في قربك وحدتي
وتدلك عيوني وقلبي مضيعك
واذا اضلمت دنياي بطفي شمعتي
واذا كثر زادي بجوع وبشبعك
شردتي رقادي وسمعتي نضرتي
وغمضت أنا عيوني لجل ما اسمعك
صرخت في سكوتي ولمستي صرختي
وقربتي وجهك لي لجل ما اصفعك
عند الحزن تثقل خطاكي دنيتي
وعند الفرح قالت خطاكي مسرعك
قصيدتي يكفي..غبية كذبتي
حبيبتي آسف بخونك ..بس معك
* عبدالرحمن بن مساعد .
عيون الفحيحيل
الوقت عتمه ودمك اليوم قنديل
من طيب دمك ألف مجدٍ شعلته
من قهوة جدودك لهقوة هل الهيل
أركنت فعلك فوق أصلك وفحته
صبيت من روحك لمجدك فناجيل
ما قلت بس وكل عزٍ شربته
أركزت فعلك في قلوب الأقاويل
في رآس مجدك كل قلبٍ نحرته
قسمت عمرك في عيون التهاويل
من يلمحك هولٍ بعينك هولته
مطنوخ من طنخ النخاوي مع الخيل
مافي صعبٍ مانتخيت وكسرته
أنا أشهد إنك يا خلف تفضح الليل
وأنا أشهد إنك للستر ما فضحته
فزّزت مخلاب الوطن يومك تخيل
نصرٍ شلعت بوسط قلبه عطبته
شفت الوطن دايم يشيل الرجاجيل
لكني شفتك يا إبن الأجواد شلته
وشفت السماء عذراء تطس الهلاهيل
وشفت العلم رجال بيدك رفعته
المجد يا العالي يجيلك تساهيل
من طول أصلك كل عنوٍ قصرته
أيقنت إنك يا خلف تشبه السيل
وأيقنت صعبك لا وطيته جرحته
خلها تسيل الأرض فعل وتماثيل
خلها تذكّر دام فعلك ذكرته
الشعر ليلٍ يسكن بداخله ليل
لكنه أقمر يوم صيتك قمرته
جيتك وأنا أنبض من عيون الفحيحيل
يوم إن قلبك وسط صدري نبضته
جيتك عرفت إن الوطن بالرجاجيل
في يوم شفتك يا إبن الأجواد شلته
* سالم سيار.
ناس فوق .. وناس تحت
صعب لا منك فشلت .. وصعب لا منك لقيـت
ان من يكره نجاحك .. يـدري انـك مانجحـت
أمس ضقت .. ورحت اقلب ذكرياتي .. وانتهيت
عند صورة طفل صوته مثل صوتي لا انجرحت
وش مثل ؟ لا والله الا هـذا انـا يـوم ابتديـت
انطق حروفٍ تلعثـم فـي لسانـي لا انمدحـت
هذا انا يوم الحيـاه افنظرتـي عشريـت بيـت
ومسجدين ومدرسه من طين كم فيها اصطبحـت
هذا انا .. واصبحت اتمتم (هذا انا ) حتى بغيـت
اختنق ..بس القدر عيا على موتـي.. وطحـت
وصاح صوت الطفل فيني :انت من وين ارتميت
قلت انا المستقبل اللي فيه كم همـت وطمحـت
امس كنت ابيك تكبر .. بـس والله لـو دريـت
اني اللي عشت لجله ..مت عنـدك واسترحـت
لو دريت ان الزمـان يجـر رجلـي ماعديـت
ولو دريت ان البحـور بـلا موانـي ماسبحـت
كان دربك لي طويل .. وكل ماشفتـك هويـت
قلت لك كبـوة جـواد وماكبيـت الا وجمحـت
ليه تسمعني وتمشـي .. آه ليتـك مـا مشيـت
وآه ليتك من كثـر عثـرات الايـام انتصحـت
ضاعت أحلامي وضل الحزن فينـي واهتديـت
للطريق اللي يودينـي علـى دمعـي ورحـت
يالحزن ليتك مثـل دمعـي وتنـزل لا رقيـت
بس اعرفك لو مسحت الدمع تبقـى ماانمسحـت
كان حلمي في وجود انسـان يبكـي لا بكيـت
وصار حلمي في وجود انسان يفرح لا فرحـت
كنت اشوف الناس مثلي كل ماجعـت وظميـت
مادريت ان الاوادم ناس فـوق ونـاس تحـت
آه يا أول ذكرياتي ..خذنـي افحظنـك نسيـت
لا اسألك عن وجه ابوي اللي معه ياما سرحـت
خذني افحظنك ابغفى .. يـااه مبطـي ماغفيـت
وان لمحت دموع عيني .. سو نفسك مالمحـت
خذني افحظنك وبعثر في جرحي .. وان قضيت
هز لي كتفي وقلي : عيب تبكـي لـو سمحـت
أضحك ..وعلم زماني من انا .. ومن وين جيت
طق باب الحزن وأصرخ فـي لامنـي فتحـت
وضمني يمك .. وكمل ضحكتك لا من بكيـت
ودي اذكر كيف كانت ضحكتي .. لامن فرحت
* فهد المساعد .
الإنهيــــار !
بعد فتره من غيابك ليه بالله اتصلتي؟
من ثلاث شهور شاللي رجّعك يعني.. وصار
ما انتي عشتي كل هالفتره.. ولا حتى سألتي
وش حصل هالحين؟ قولي.. وعلميني باختصار
ليه؟؟.. دام انك رجعتي اليوم ليه اصلاً رحلتي؟
يعني الدعوه بكيفك.. أو مزاجيّة صغار
إلاّ يمكن صار لك حاجه بعقلك.. وانهبلتي
وانقلب وضع العلاقه من علوّه.. لانحدار
ولاّ.. ما صدقتي اني أعشقك حتى ثقلتي
أو كلام الليل فعلاً.. معك يمحيه النهار
يوم قررتي بليّا سابق إنذار.. اعتزلتي
جاحدتني.. كنّ مالي دور في صُنع القرار
وادري انّك لاصملتي.. في قراراتك صملتي
ما تردّك دمعتين.. وكسر خاطر .. واعتذار
إحتملت اللي لو أنّك في مكاني ما احتملتي
ووالله لولا انّي عرفتك.. ما عرفت الإنهيار
إنكسار وضيق صدر.. ومشكله لامن زعلتي
وان رضيتي فالمصيبه.. ضيق صدر.. وانكسار
ضعت.. مدري ويش اسوّي فيك.. لكنّك وصلتي
مرحله خلّتني انسى كبريائي.. والوقار
صدقيني.. لو فعلتي في حياتي.. ما فعلتي
ما بيدّي غير احبك.. واعشقك أكثر.. واغار
يكذب اللي قال عندي.. ما طلعتي.. ولا نزلتي
واعتبارك في عيوني.. ما يجاريه..اعتبار
انتي أصلاً من وطيتي.. في مساحاتي.. وحللتي
صرت أحسّ اني مساحه من بياض ومن خضار
مثل الأسطوره واظنّك من خلال اسمي دخلتي
صفحة التاريخ لكن كنتي اسطورة دمار
مجرمة حُب.. وقتلتيني لو أنّك ما قتلتي
يكفي انّي قمت احس برغبتي في الإنتحار
كلما أذكر كلامك لي على الجوال.. قلتي:
كل واحد في طريقه.. لي مسار.. ولك مسار
أذكر أنّي كنت ساكت وقتها.. حتى قفلتي
واختنقت وما دريت الا وانا افكّ الزرار
والقط أنفاسي.. وانا أسأل ليه يا روحي فشلتي؟
كانت اول تجربه.. معقول اسأت الإختيار!!
إفترقنا.. واعتقد من بعد فرقاي.. انشغلتي
وافتكرتيني.. بعد ما جار وقتك .. واستدار
إتصلتي تسأليني: كيف حالك؟.. وانتشلتي
جثّتي من قبل اموت من القهر والإنتظار
إيه أنا في خير.. لكن ودي اعرف ويش نلتي؟
من سواتك لا ضربتي بعشرتي.. عرض الجدار
إنفصلتي.. واستقرّيتي لحالك.. وانتقلتي
طالعه وبرغبتك من دار.. واصبحتي.. بدار
بس انا في نار عشت وتهت من يومك رحلتي
حتى في لحظة كتابة هالقصيده.. عشت نار
عندما غبتي ثلاث شهور.. ما حتى سألتي
قلت: أجل آن الأوان.. ويُفترض سدْل الستار
وقبل لا أغمّض عيوني وبثواني.. إتصلتي
لجل تنعاد الحكايه.. وكنّ مابه شي صار
* محمد الشهري .
أتمنى ان اكون وفقت بالإختيــار ..
لكـــم 
01-09-2009, 08:29 PM
ديوان- الإنهيـــار !! ( مشاركـه )
رد: ديوان- الإنهيـــار !! ( مشاركـه )
..
العرض العادي
