جتني وضحكتها تسابق خطاها=وعلى محيّاها تجسّد غلاها
قمرى وتفرق عن جميع الكواكب=في حجمها في وصفها في ضياها
بنتاً عليها الزين فايق ولايق=سبحان فارق وصفها عن سواها
استغفر الخلاق ماني بظالم=إن قلت ما شافت عيوني كمـاها
رهيفة إحساس ورقيقة مشاعر=صدوقةً في حبها وش حلاها
الله وهبها عن جميع العذارى=زين ويحق لها وربي تباها
مفتون انا في حبها واعذروني=جمالها من قبلها من وراها
يا حظ عيني يوم عيني تراها=ويا سعد قلبي يوم قلبي معاها
هني لنوماً ساكناً في هدبها=وهني لكحلاً ما يفارق صباها
مكياجها من ربها اللي خلقها=طبيعةً قلبي تنفس هواها
وعطرها الفواح منها وفيها=وردة ولا يذبحني إلا شذاها
والمبسم الصافي وبيض الثنايا=وجمالاً أمسى واكتمل في شفاها
وعيون سود وناعساتاً كحيله=تقول ليلاً حاطها واحتواها
عن وصفها تعجز بيوت القصايد=سبحان رباً ما حرمها عطاها
جمالها يقهر قلوب العذارى=جمال ياكم من عيوناً سباها
من حبها راحت عظامي برايا=مدري متى روحي تفارق شقاها
ما غير أنادي بسمها في منامي=من كثر ما قلبي تمنى لقاها