حابه اتكلم عن موضوع اكيد حسينا فيه او مر علينا كلنا ، واللي اهو استخدام اللغة الانجليزية بدل العربية
انا اول شي مو ضد استخدام اللغة الانجليزية ، او دراسة المقررات باللغة الانجليزية ، بل بالعكس اؤيد هالشي
لكن في بعض الشغلات تشوفها تنصدم منها ، مثلا اعطيكم هالمثال : بكورس صيفي سجلت بماده بالكلية ، عند دكتور كويتي ( عرفته من اسمه)المهم اول يوم ماحضرت ، ثاني يوم هم غبت ، ثالث يوم تأخرت ( مبين شاده حيلي بدراستي ) فقلت خل اروح حق الدكتور اعتذر منه
فسألت عن مكتبه ودلونياه البنات
طقيت الباب : طق طق طق رد : Hello رديت : السلام عليكم رد : come on in
وانا مستغربه اقول شكلي مضيعه المكتب ، دشيت ولا الدكتور ، ويحاجيني انجليزي ، رديت عليه بالعربي رد علي : if you will talk to me in arabic i will not answer you
زين ليش ؟!؟ انا عربيه وانت هم عربي ، ليش هالتعقيد واحنا مو بمحاضرة ، امنا بالله التدريس بالانجليزي لكن حتى بالتواصل مع الطلبة برا المحاضرة
هذا شي ، والشي الثاني
بعض الناس تكلمهم بالعربي يرد عليك بالانجليزي ، يعني انا الفلته اللي مااعرف عربي بس انجليزي
في بعض الكلمات اللي دشت علينا قمنا نستخدمها بدون تفكير مثل : يس ، نو ، هاي ، باي ، واي ، سوري ( عادي هذول تعودنا عليهم)لكن تلقا واحد اذا انبطت جبده او استعجب يقولك اووووووو ماي قاااااااااااااد Oh My God
شكو؟!؟ ليش ؟!؟ شايفني امريكيه ولا انجليزيه انا عربيه حالي من حالك
ليش هالاستخدام للغه الانجليزية بدال العربية هل هو احساسنا بان لغتنا متخلفة ويحسسنا استخدام اللغة الانجليزية بالتطور و الرقي ؟!؟ واذا كان هذا احساسنا ، فم اين تولد هذا الاحساس ؟!؟
ارجو التعليق
التعديل الأخير تم بواسطة كلكجيه ; 20-03-2009 الساعة 11:02 PM