المطاوعه وتحجر المفاهيم ...الى متى؟؟


بسم الله الرحمن الرحيم
هذا موضوع حبيت افتحه عن فئه من الناس متشددين بالدين يلقبون بالمطاوعه

انا ماراح اتكلم عنهم بشكل عام لانه بالعكس فيه الكثير والكثير منهم تاج على عيوننا وروسنا جميعا ولا احد يتجراء اصلا يقول حرف واحد على حماة الدين الله يديم عزهم.
يعني اوكي حنا عارفين قدرهم وحامدين ربنا كثير على النعمه اللي معطينا اياها لان كثير من المجتمعات تتمنى نص اللي عند السعوديه من المطاوعه
وعارفين وش اثرهم على المجتمع ووش حنا لولاهم

بس المشكله فيه قله منهم لاحشا مو كلهم فيهم عادات وطابيع ماادري وش تبي
فيجيك واحد متحجر يشوف العالم كله غلط وهو الصراط المستقيم شكاك في كل شي..و كل شي عنده حرام وغلط واللي هو يسويه بس صح

والامثله كثـــــــــــــــير عد واغلط
واكثر الفئه في بعض رجال الهيئه >>لاحظ اني قلت بعض او قله شديده

يعني انا متعقده من هم من يوم انا بسنه اولى ابتدائي اذكرواحد من عيال جيراننا مطوع <عضو في الهيئه>> مره سمعت صوت صياح وصراخ يخووف من بعيد على فكره هالجيران بيننا وبينهم شارع واروح اقول لامي قالت اييه ياماما عادي هذي مشاكل بكل البيوت المشكله استمر الصوت فتره طويله امي خافت عليهم اتصلت على امهم تدرون وش صارت المشكله والله العظيم انها بس لقى عند اخته سماعات اغاني!!!
سماعات اغاني اللي ابوي كان يجيبه لنا من البقاله اذا طلبناه..<<انا ماجاء ببالي الا سؤال واحد يعني ابوي كافر!!
اخته المسكينه جلدها لييين قالت العيد باكر...
اوكي الاغاني حرام وكويس انك لقيت مشكله تخص الدين عشان تثبت عمق الصلاح والحب المخلص للاسلام وتثبت انك سويت انجاز للدفاع عن الاسلام والمسلمين وو.......>>ترى كل هالافكار تتراود عقلية ذاك الشخص اذا لقى مشكله دينيه

هاوش عاقب بس موعشرين ساعه وبالضرب المبرح.. فيه الف والف طريقه من دون ماتفضح صوت اختك عند العالم...

يعني هالاخت تابت اقسم بالله انقلبت عناد وكرهت واستغفر الله الدين واهله

سالفه ثانيه حصلت لي شخصيا يوم كنت بثاني ماادري باولى متوسط كنا رايحيين لسوبر ماركت انا وامي واختي بالليل
امي واختي تركوني عند المجلات وهم عند المواد الغذائيه والمركز كان فاضي نسبيا
شوي ويدخل واحد مستعجل لابس ثوب و شماغ ومعاه ورقه طلبات ويشري اغراض واحد ورا الثاني شوي ويدخل واحد ثاني< من الفئه اللي سبق ذكرها

وبهدوء ونظرات ثاقبه لا وكان لابس نظاره اقوى للنظر للبحث عن المشاكل قصدي المفاسد

ويطالع بي ويطالع بالولد ::: طبعا جته الف فكره وفكره اهلي بعيدين وشاب وفتاه الوقت متأخر واكبر مصيبه انا عند المجلات >>ياعمري انا ادور صور ياسر
والولد معاه ورقه ويسلااام كل هالمبررات اللي فوق تشفع له يستعرض هواياته بســـــــــــوء الظن

وبدا الرجال يحرقني بنظراته اللي تخوف انا بزر وخوافه عشان كذا قلت ويــــــــــن امــــــي وافر عند امي واصير معه بلا ابوسعيد بلا كلام فاضي

عـــاد هو جا دوره خافت اها اكيد في شي مادري على كبر نظارته ماشاف طولي والا نظراتي البريئه والا قوطي البيبسي اللي معي بالله هالبزر وجه مغازل
والا عاد الولد المسكين والله لو احلف انه حتى ماانتبه لي مسكين ماشي سيـــدا..ولا كان شكله فاضي ماغير خشيشته بهالمعلبات يابعد حيي

ويوم جا اخوي اشوى ان اخوي يعرفن والا كان رحت فيها
جاء الاخ السابق ذكره وفتح محاضرهـ طويله عريضه لويسمعه السديس>> السوكرره
خلها خطبه ليوم الجمعه
بدا ب(اتقو الله....) وانتهى ب(اختك تجدع اوراق على هالولد وهالولد معطيها رقمه) وطبعا ماقصر حط بهارات تشبه اللي تجي مع الاندومي لين قال بس على السالفه,,,
اخوي طير عيونه عاد عسى ميب النوري اللي تغازل هز راسه وقال ايه مشكور ومشى الزبون
الولد شكله محترم عشان كذا مارضى بهالكلااام وقعد يهاوش انا جاي اخذ اغراض لاهلي وماادري ايش:: ووصله للشرطه انتهت انه الضابط قال فتشوه ان كان معه اوراق او ارقام ومالقو شي وكل واحد صلح سيارته وانتهت السالفه.

والمواقف كثييرررررر يصعب حصره سواء لي او لغيري.
حتى المشاهير ماسلمو اذكر ياسر قال مره بمقابله انه راح للسوق الراشد الصباح بيشري غرض وجو الهيئه وقالو له اطلع لان صار فيه تجمع شوي واصر انه مايطلع الا اخذ اغراضه

نشر بجريدة الجزيره قبل فتره وصف لهؤولا برسم تخطيطي للمخ عندهم عن طريق وضع ثلاث ارباعه ظن سيء وربع بسيط ظن حسن

والمشكله انه اكثرهم اساس الفساد استغفر الله يعني لااهلهم مرتاحين ولا زوجاتهم فيه مثل عند الرجال يقول لاتاخذ السياره ولا المره عقب مطوع عاد ماادري وش السبب..
واحد من القرابه من هالنوع اخذ كل ذهب زوجته وباعه وبفلوسه تزوج عليها
وواحد عندنا معروف بالقصيم انتشر له مقطع بلوتوث اكيد نصكم شايفينه مصورته زوجته وهو يخونها مع الشغاله ونشرت المقطع وكتبت شوفو مطوعكم
وواحد ثاني اعرفه شخصيا يمنع بنته ام 4 سنين تروح تلعب مع بنت اخوه وجاره بنفس الوقت لاحظو معي.. بس بحجة ان عندهم عيال عاد الله واكبر ياهالعيال واحد بثاني ابتدائي وواحد باولى وواحد اصغر من البنت نفسه
بالله وش تسمونه هذا؟ اذا شوي عليه متخلف ومعقد روحه وبنته
انا مو ضد التطوع بالعكس فيه مطاوعه ودك تاكلهم وماودك يسكتون من جمال اسلوبهم واحبهم كثيرر مثل امام مسجدنا الله يطول بعمره يذكرني بالشيخ العريفي بس فيه ناس منهم مااقول الا الله يهديهم
وعندي نقاط احب اقولهل لهم
1-ليش الواحد منكم اذا شاف خطا ماينصح بهدوء ولطف ولين مو كاانه مايصدق على الله يلقى شي يهاوش عليه يمكن انت مسوي اعظم من اللي بتهاوش عليه ياجماعه والله نص الشباب منحرفين بسبتكم يشوفونكم وجه الدين فيعافون الدين واهله وتجيهم مفاهيم ان الدين كله كذا معقد
الله سبحانه وتعالى وش يقول( ولو كنت فضا غليظ القلب لاانفضوا من حولك)
2-اذا شفت خطاء عالجه بتدرج مثل ماالله سبحانه يوم امر بتحريم الخمر اول شي قال (لاتقربوها وانتم سكرى) يقصد الصلاه بعدين قال (يسئلونك عن الخمر قل فيهما اثم كبير)بعدين قال بما معنا الايه ماحفظتها زين ان الخمر والميسركبائر فاجتنبوها ان كنتم مؤمنين
3-الظن السيء (ياايها الذين امنو اجتنبوا كثيرا من الظن ان بعض الظن اثم) قبل ماتحس ان الولد داخل المجمع عشان يغازل قل داخله عشان يشري اغراض ضروريه
4-اذا صرت دين وماشاءالله لاتعمل بقول ياناس شوفوني الله غني عنك اذا بتماري
5- واهم شي ترى الدين يسر والله غفور رحيم يعني ماله داعي هالتشدد والنظره القاصره للمجتمع والتشدد اللي يمكن يؤدي للغلو والارهاب ومااشبه ذلك والعياذ بالله

واخيرا
لكل من يقرا:لازم تجاوب ..
وشرايك بهالفئه من الناس؟؟
اذكر لنا موقف حصل لك او لغيرك
نصيحه توجهها لهم

4- هذا الزامي مره عاد
تحب خالد عبد الرحمن؟

مشكورة على الموضوع بس

والله الدين منهم بريئ الكل قرا نسبة اللي عندهم من الهيئه شهادة الأبتدائي

وغير كذا وش كانو بزمانهم والله

العظيم انهم كانو يتسلوطون عند مدرستنا وهات ياسب وشتم

وحتى يلحقون السواق ويمر من عندهم شاب يفحط ولا كأنهم يشوفونه لدرجة مره كان بنات يزينون الفصل وكانو

ينظفون شبابيك الفصل من داخل والله اتصلو على المديره يقولون طلعو البنات هاوشتهم وقفلت الخط

وبالأسواق حدث ولا حرج نمشي محتشمين مايخلونا بحالنا وتمر وحده متبرجه ينزل راسه

ناس متشددين على الباطل شوفو طول ثوب أي واحد منهم الرسول قال حد الكعب شوف كيف يفضحون العالم

والأسلام أمر بأستر مو يشوهون الأسلام بهالطريقه

مشالله عليك باريس قلم مميز ونموذجي تقلبي مروري

يا ما اشارك باراء واحط وجهات نظر بكل موضوع ارد عليه الا ذا
(لاتعليق)زي ما يقولون حدث ولا حرج منا لين بكره ما يمك احد تقبلي مروري

ابو نجوى السهلي شكرا للمرور
اما حكاية المطوع اللي عندكـ ماله حل
بس ليش ماجاوبت باقي الاسئله

ابو نجوى السهلي شكرا للمرور
اما حكاية المطوع اللي عندكـ ماله حل
بس ليش ماجاوبت باقي الاسئله

فجر ... شكرا للمرور وسالفة المدارس هذي موضع لحاله
سطام الحربي ....مشكور للمرور بس زي ماقلت انا بنت باريس وشكرا على كلامك الرائع بس تمنيت انك شاركت بالموضوع

[quote=هلاااااااااالي;2169953]يا ما اشارك باراء واحط وجهات نظر بكل موضوع ارد عليه الا ذا
(لاتعليق)زي ما يقولون حدث ولا حرج منا لين بكره ما يمك احد تقبلي مروري

لالا تعال هلاااالي
قل رايك وتكلم ماابي لاتعليق

سلمت أناملك
مبدعـــــــــــــــــــــــــــه كعادتك

موضوع في قمة الروعه والجمال

لا تحرمينا من مواضيعك الجميله

مرة اخرى مليووووووووووووون شـــــــــــكر

[quote=بنت باريس نجد;2169300]المطاوعه وتحجر المفاهيم ...الى متى؟؟


لكن اختي هنا عممتي بالعنوان والمطاوعة هم رجال الدين والمطوع اللي شافك مع الولد اقصد بجنب الولد خاف عليك لكن تخيلي قال انا ماعلي منها وانتي لاقدر الله ومحشومة لانك بنت ناس فرضا حاول يجرك لشيء وماكان رجل الهيئة موجود كان تتمنين ان كل السوق هيئة

مااارد

لولاهم كان شفت الدجه والهجه خلك ساكت احسلك