الجزء العاشر..
حصاد الموسم.. وشقاء الطلاب.. اليوم طلع محصول الموسم كامل..
عبدالرحمن: ذكرى ريوم ..
ذكرى: هاه بشر نجحت؟
عبدالرحمن: ايه الحمد لله .. ويالله بسرعه تجهزوا بنطلع نتمشى ونروح للمنتزة بـ مناسبة النجاح..
ريوم: ليت عمرك كله نجاح..
عبدالرحمن: ايه عشان الطلعة مو لله..
ريم: وأنت عاد ماشاء الله كل يوم تطلعنا.. أذكرك فيها السنة الجاية..
ذكرى: بس أنتي وياه لا تتخانقون وتضيع علينا الطلعة..
عبدالرحمن: بدخل أتروش أطلع ما الاقكم عند الباب ترى مافيه..
ذكرى: بتلاقينا عند باب السيارة..!
\
في بيت أبو ياسر..
معاذ: ياربيه مدري نتايج الثانوي متى بتطلع..
لمى: ترى متوقفين على نتيجتك.. أمي تقول مافي سفر إلا لما يجيب معاذ مجموع حلو
فراس: ياسر اليوم أسمعه يقول لـ أمي نجح..
معاذ: هذا المفروض اسمه دافور كل سنة ينجح..
أم ياسر: اذكر ربك بس لا يجي أخوك شئ
معاذ: يمه سمعتيني..
أم ياسر: ايه سمعتك من صغر صوتك..
معاذ: أنتي الي اذكري ربك لا يجيني شئ..
الكل: هههههههههههههههههه
فراس: يمه صح إذا نجح معاذ بـ نسافر.. ترى رحيتنا طلعت هنا ..
أم ياسر: ياسر يقول بيسفرنا ولا ندري..
لمى: طيب لو سافرنا خالتي بتسافر معنا؟
معاذ: خالتي كنها مرة أبوي الثانية وين مانروح لازقه فينا..
أم ياسر: خالتك هذي استحي على وجهك..
لمى: حرام عليك.. ترى هم مثلنا ماعندهم أبو..
فراس الي بان بـ ملامحه الحزن: طيب الحين بنسافر وإلا لا..!
أم ياسر: بنسافر خلاص وأم صالح بتروح معنا بعد..
طلعت أم ياسر ..
معاذ: أوالله البلشة.. نشبة فينا عيال خالتي..
لمى: أنت وش قاهرك بـ الموضوع..
معاذ: خلوده هذي ما أبيها.. ماأحبها..
فراس: يا النصاب ماتحبها وأنا شايفك ذاك اليوم تقز فيها..
انحرج معاذ من أخوهـ: يمكن كنت أتأمل شلون ذيك البنت قايلة..؟!
لمى بنظرات تذبح: أممم علي يا النصاب.. أصلا باين عليك إنك فرحان عشان خوخه بتروح معنا..
معاذ: انطمي أنتي وياهـ.. أنا أفرح بـ الغثيثه خلودوه...
راح وخلاهم ...
فراس: تدرين بقولك سر
لمى: قول..
فراس: بس أمانة لا تعلمين أحد
لمى: لا قول ما بعلم أي أحد
فراس: معاذ يحب خلود..
لمى: قل والله شلون عرفت..؟!
فراس: يوم كنت أروح معه للإستراحة كان فيه غرفة هو الي مسويها كان كاتب حرف k وش كبرها بـ الجدار..
لمى: وأنت من قالك يمكن مو خلود؟!
فراس: إلا خلود.. من عندنا غيرها.. بعدين ليش دايم يجلس لين جت عندنا..
لمى: خلاص أنت توك بزر وتسولف بـ ذي الآمور..
فراس: هين أوريك أنا بزر.. الحين أعلمك سر كبير وأنتي تقولين بزر..
لمى: روح زين.. ايه بزر وأكبر بزر..
طلع فراس وهو مقهور منها كثير.. طلع لـ عند غندهـ حتى يشوف أخبارها.. راح يدورها لقاها جالسة بـ الحوش.. قرب عندها من غير لا تنتبه.. وحس إنها تتكلم.. سكت وجلس بـ مكان قريب منها .. وشاف إنها تحاول تتكلم.. صح كان أغلب كلامها صعب لكنها تحاول..
حست غندهـ إن فراس يتسمع وسكتت..بعد ما انتبه فراس قرب عندها..
فراس: ليش سكتي والله كنتي تتكلمين
غندهـ:.....
فراس: عندي لك خبر حلو..
بنظرات فرح تبيه يكمل..
فراس: بنسافر العطلة هذي.. وبنطلع من الرياض وآخيرا..
فرحت غندهـ بـ الخبر وجلست تصفق.. ومن غير شعور قالت: وااااااااااااااو
فراس: غندهـ غندهـ والله أنتي تتكلمين والله,,
نزلت راسها غندهـ وهي ما حبت تبين لـ أهلها إنها تقدر تطلع بعض الكلمات.. تحس إن الصمت صار جزء منها.. وتخاف تتكلم يضحكون عليها..
فراس ماحب يضغط عليها وسكت.. بس بـ داخله فرحان إن غندهـ كل يوم تتحسن عن اليوم الي قبله.. كان مشتاق لـ صوت أخته.. ويبي يسمعه..
\
بيت أم صالح..
خلود: يمه بسوي حفلة لي ولـ لمى ولـ ذكرى عشاننا نجحنا..
أم صالح: بكيفكم بس انتبهي أم ياسر تجي وتشوف ذكرى..
خلود: عشان كذا حاولي تأخذينها لـ أي مكان..
سعود: تصدقين تنفعين تكونيني سياسية..
خلود: ابتدأ شغل الطنازة..
سعود: لا والله تخطيطاتك دايم تمشي تمام التمام..
خلود: هيه أنت اسكت ترى بكفخك..
سعود: لا آسف أخوي خالد..
خلود: سعوده..
سعود: يمه منك أمزح.. محد يمزح معك أنتي..
أم صالح: ما تكبرون أنتم.. الى الحين على هـ المخانق..
خلود: هو الي يبدأ يمه..
أم صالح: طيب متى راح تسوين الحفلة؟
خلود: يمكن بعد بكرى.. عشان خالتي بيسافرون الإسبوع الجاي..
أم صالح: ايه قالت لي وترى بنسافر معهم نغير جو..
سعود: ماشاء الله وأنا آخر من يعلم كـ العادة..
خلود: اتركك أنت دايم آخر من يعلم المشكلة فيني أنا توني أدري..
سعود: أوووهـ مصيبة... لا ما معكم حق المفروض خلود أول من يدري..
خلود: ههه بايخ..
أم صالح: اليوم قالت لي أختي وبنروح.. وبقول بعد لـ أخوك صالح كان يبي هو وحرمته المايعة يجون معنا..
سعود: أوكي إذا اتفقتوا علموني عشان أشوف جدول أعمال
خلود: أوخس أوخس يا رجل الأعمال..
سعود: وش عرفك أنتي.. أنا قريب بكون أكبر رجل أعمال بـ الشرق الأوسط..
خلود: طبعاً بـ أدوات التجميل.. خبري فيك خكري..
سعود: ايه لازم كل شباب الشعب السعودي يكون شاب وسيم..
خلود تحب ايدها: لك الحمد والشكر.. الحين وش خليتوا للبنات..
سعود: مثل ما أنتي ماخليتي شئ للرجال..ماأخذه كل صفات الرجولة عني..
حلود: توكل بس
سعود: خذ هذي ألفاظ بنت ناعمة.. أنتي إذا جيتي تتزوجين بتقولين لـ رجلك توكل..
خلود: ايه بـ قوله بعد الخلا بس..
سعود: ما أقول إلا يالله لك الحمد إني أخوك.. والله لا يبلاني بحرمة مثلك..
قامت أم صالح.. لأنها عارفه ماراح يتبون عن حركاتهم.. وراح يطولون على التعليق..
كان سعود يحب يناقر أخته.. يستمتع بـ طولة لسانها وألفاظها الغريبة الي مايدري من وين تجيبها..
\
بيت سلطان..
أبو سلطان: ترى تفشلت من أخوي كل يوم والثاني مأجل العرس..يبه ودي أفرح فيك..
سلطان : خلاص يبه الشهر الجاي الملكة والي بعده العرس.. الحمد لله وضع الشركة مستقر..
أبو سلطان: والله لو الحلال حلالك ماخفت عليه مثل كذا..
سلطان: مال أيتام يبه.. ولازم أحافظ عليه..
أبو سلطان: خلاص ترى بكلم عمك..
سلطان: أوكيه الحين أنا بروح عندنا مليون شغلة بـ الشركة وأوراق ومشاوير..
أبو سلطان: الله يرزقك على قدر نيتك..
سلطان: هه مايجيك إلا الدعوة الي من قلب .. الله يحفظك يبه.. يالله أستأذن..
أبو سلطان: الله معك..
\
في بيت أبو ياسر..
ياسر: خلاص كل شئ أوكيه بنمشي للشرقية بعدها روح كم يوم للبحرين ونرجع للشرقية.. شرايكم..؟
أم ياسر: اللي تشوفه..
معاذ: أنا أهم شئ نجحت والباقي مايهم..
ياسر: راضي علي يامعاذ؟
معاذ بـ إحراج: أنت أخوي ومستحيل أزعل عليك..
أم ياسر: الله لا يفرق شملكم..
فراس: يا قلبي أنا محد يسألني زعلان جوعان فيك نوم شئ..
ياسر: اصبر لا تستعجل والله كنت بسألك..
فراس: صدق ياحظي يالله نعيد من أول..
لمى: لعب بزران هو تعيد من أول..
ياسر: كلكم ما أبيكم تشيلون بخاطركم علي.. أنا مع هـ الدراسة والشركة وربي مخي مو معي..
أم ياسر: يالله مابقى لك غير السنتين وبعدها تتزوج بنت الحلال الي تحفظك..
ياسر ابتسم لما مر بـباله طيف ذكرى: اللهم آمين.. ويرزق إخواني كلهم بعد..
معاذ: بعدين تجلسين وحيدة يمه وندور لك كسرة شايب وتأخذينه.. يرفع يدينه بحركة طفولية.. يارب يارب..
أم ياسر: لا إن شاء الله الله لا يقولة غير عبدالله مايدخل علي رجل..
الكل: الله يرحمه يارب..
معاذ: مايصلح يمه عيب الحرمة تجلس بدون رجال..
فراس: خلاص أنا أجلس عندها..
أم ياسر: كلكم ما أبيكم الله يوفقكم وتتزوجون..
غندهـ تآشر على عمرها بـ معنى حتى أنا..
أم ياسر: أنتي ربي بيعافيك وبيجيك أحسن الرجال وتتزوجين..
فراس الي يحس فيها أكثر من إخوانه: وإذا ماحصلتي عادي بجلس عندك لا تخافين..
معاذ: يا أنت قاهرني بعد .. فيك روح فدائية غير شكل..
فراس: وش تبيني أصير طويل لسان مثلك
لمى: يوووه نخلص من ياسر ومعاذ يبدأ معاذ وفراس..
ياسر: عشان تصدقوني لين قلت البلا كله بـ راس معاذ..
معاذ: ترى خلاص تعودت تجتمعون كلكم علي .. المهم تخلوني أنا الغلطان..
لمى: أحسن ينقلب السحر على الساحر
كانت العائلة مجتمعة بعد ما راضى ياسر أمه.. والنفوس تراضت على بعضها..والليلة كانت فرح ونستهم بعض من الحزن الي في قلوبهم..
\
أم عبدالرحمن وذكرى كانوا مرة مستمتعين بـ الطلعة.. خصوصا بـ المنتزة كان الجو بارد وممتع.. ريم تغيرت نفسيتها كثير لما حست بـ كبر قلب ذكرى.. وذكرى تحاول تكون أقرب لها من أول..
والله يستر عليها من طلال...!
\
خلود: ترى بكرى لازم تجين عشان الحفلة..
لمى: طيب أمي عرفت لازم تجي..
خلود: لا تخافين على قولة سعود مصرفه عمري قلت لأمي تروح معها لأي مكان..
لمى: شخباره سعود..
خلود: أوووه جبنا طاري الحبيب..
لمى: لبى قلبه بس.. لو بس يهتم كان يطلع أحلى واحد..
خلود: مغرور هـ السعود مدري طالع على مين..
لمى: احترمي نفسك لا تسبينه..
خلود: والله مدري كيف عايش.. وبعدين لو تزوجتيه أنتي دلوعه وهو مغرور وش بيكونون عيالكم.. يع مالغين..
لمى بـ قهر: خلوده امسكي لسانك تعرفيني ما أحب أحد يجيب طاريه ..
خلود: طيب آسفه .. يمه كلتيني.. وبعدين ابعدي بروح أكلم ذكروتي عشان تجهز عمرها بكرى..
لمى: طيب وحرصي على خالتي تصرف أمي..
خلود: لا توصين خوخه.. يالله باي
لمى: باي..
\
اتصلت خلود على ذكرى..
خلود: الو..
عبدالرحمن: هلا
خلود بـ حيا: ذكرى موجودة؟
عبدالرحمن: من يبيها؟
خلود: قلها خلود..
عبدالرحمن: ايه لحظه بس..
ذكرى: هلا خوخه
خلود: أنتي أخوك هذا لا عمره يرد على أحد تكفين..
ذكرى: ههههههههه ليش مو حلو صوته..
خلود: لا بس عليه صوت غبي بقوة..
ذكرى: لا ماعليك شكله جنان مرة..
خلود: أهم شئ الصوت وش دعوة بـ قابل وجه دايم أنا..
ذكرى: ماتدرين يمكن أخطط أخطبك له..
خلود: خلينا من هـ الطاري ما أحبه..
ذكرى: شتبين داقه؟
خلود: الله من زين الأسلوب.. قولي ياهلا وغلا بـ النور بـ القمر..
ذكرى: هههههههه أمزح معك آمري يالغلا؟!
خلود: أنا خوخه بكرى عازمتكم بـ حفلة من انتاجي الخاص..
ذكرى: يابعد قلبي وعازمتني..
خلود: لا عازمه الدحمي.. ايه أجل ليش داقة.؟!
ذكرى: ههههه قوية الدحمي من وين جايبتهاا أنتي..
خلود: مو شغلك وترى حقوق الطبع محفوظه لي..
ذكرى:طيب إن شاء..
خلود: طيب يالله أستأذنك الحين..
ذكرى: الله معك..
قفلتها من خلود..
عبدالرحمن: شكلها خبلة ذا البنت؟
ذكرى: مرة حبوبة.. ومجنونة
عبدالرحمن: من الدحمي..
ذكرى: هههههههه اسمك الجديد عاد يالله حظك طلعت لك مسمى جديد..
عبدالرحمن بـ ثقل: وش تبي؟
ذكرى: مسوية حفلة نجاح وعازمتني...
عبدالرحمن: حلو.. بس ماتخافون مرة عمي تدري عنكم..
ذكرى: والله ماسوينا شئ غلط.. وبعدين أم صالح تعرف وماعندها مانع..
عبدالرحمن: أها أوكيه..
ذكرى: مشغول بكرى..
عبدالرحمن: لا مو مرة.. خلاص الحين بتفرغ لـ دوامي.. مافي دراسة
ذكرى: الله يعطيك ألف عافية..
عبدالرحمن: يالله بروح للعيال بـ الإستراحة شوي..
ذكرى: ليش عندكم حفلة نجاح..
عبدالرحمن: ايه أجل بس أنتم..
\
كانت خلود مجهزهـ كل شئ.. وأم صالح أقنعت أختها أم ياسر يطلعون.. حتى البنات يأخذون راحتهم..
اتصلت خلود بـ سعود..
خلود: سعودي حبيبي
سعود: نعم نعم ماأسمع..
خلود: سعدوهـ
سعود: ايه الحين أنتي أختي نعم شتبين؟
خلود: كل شئ جاهز بس أحس العصير مو كافي بس جيب عصير فراولة..
سعود: طيب بس بشرط؟
خلود: آمر..
سعود: القتوهـ أبي قسمة الي مكتوب فيه اسم ذكرى..
خلود بشك: وليش هـ الإسم بـ الذات
سعود: مدري لعانه كذا
خلود: بدال ما تأخذ اسم لمى..
سعود يتذكر كلامها ذاك اليوم وحب يتأكد: اممم خلاص ما أبي.. بجيبه وغيره
خلود: بس أبد سلامتك..
كل شئ كان تمام التمام.. وذكرى جابت ريم معها حتى تقربها لهم أكثر..
خلود ولمى تفاجئو أول الوقت بس أعجبتهم بعد ما اندرجوا معها وحسوا إنها طيبة ومحبوبة مرة مرة..
خلود: ريوم بقول شئ بس لا تزعلين علي؟
ريم: لا عادي قولي ذكرى قالت إنك صريحة بس قلبك طيب..
خلود: من شفتك تماشين دلال وأنا غاسلة يدي منك
الكل: ههههههههههههههههه
ريم: الله لا يعيدها من صداقة.. بس تعرفين الظرف الي مرينا فيه كان الكل متجنبني.. ومافتح قلبه لي غير دلال..
لمى: خلاص قفلوا الموضوع مانبي ذنوب البنت.. وأهم شئ إن حنا تشرفنا بـ معرفتك عن قرب.. وأنا عن نفسي أفتخر في بنات عمي..
خلود: حتى أفتخر في بنات عم بنت خالتي..
الكل: ههههههههههههههههه
ذكرى: طيب ما تلاحظين عبدالرحمن طول..
ريم: لو معنا جوال كان اتصلنا فيه..
طلعت لمى جوالها الي عطاها ياسر لها هدية: خوذي ذكرى جوالي..
ذكرى: مافي إحراج..
لمى: لا مافي ياقلبي
ريم: وإذا طلع بـ الفاتورة..
لمى: ياسر الي بيشوفها وياسر ماراح يقول شئ..
ابتسمت ذكرى وأخذت الجوال وطلعت برا تكلم عبدالرحمن.. لأنهم كانوا مشغلين الإستريوا وإزعاج مرة..
كانت تكلم وما انتبهت للي كان قريب منها..!
\
شـ الي كان قريب لـ ذكرى؟!
وطلال هل انتهى موضوعه مع ريم؟!
وش راح يكون بـ سفرة أهل أبو ياسر وأبو صالح؟!
\
تابعوا نصرة جوارحنا..