الجزء التاسع..
كانت جالسة تناظر التلفزيون بـ جسد.. تفكيرها كله راح لـ السالفة الي صارت لها..
تبي تعرف شلون خالد عرف بـ الموضوع.. وطلال وش علاقته فيه.. صوت التلفون قطع تفكيرها.. بس يد ذكرى كانت أقرب له...!
ذكرى: آآلو
طلال: هلا ريوم
ذكرى بـ دهشة وتناظر ريم: من معي؟!
طلال: طلال يالغلا ماعرفتيني..!
ذكرى: من تبي بيته..
طلال: مو هذا بيت راشد الـ....!
ذكرى: وأنت وش عرفك بـ ريم؟!
طلال: أنتي مو ريومه؟!
ذكرى: وقح وقليل أدب وماتربيت...
قفلت السماعة بـ وجه.. ونظراتها كلها وجهتها لـ ريم الي عورها قلبها وحست إنه طلال..وعدلت جلستها..
ذكرى: من طلال..
ريم:... هاه
ذكرى بـ عصبية: رييييييييييييم قلت لك من طلال..
ريم وهي ترتجف بـ مكانها..: هذا هذا صديق نواف ..ّ
ذكرى: بعد نواف مين..؟!
ريم: حبيب دلال..
ذكرى: البلا كله في دلال.. ريم وش السالفه بـ الضبط..
ريم: ذكرى الله يخليك.. والله أقولك كل شئ بس لا تقولين لـ عبدالرحمن.. ذكرى والله يذبحني..
ذكرى بعد مارحمتها خصوصاً إن ريم كانت تبكي: طيب تكلمي وبـ حاول ألم الموضوع..
اعترفت ريم لـ ذكرى عن كل شئ بـ السالفه.. من بدايتها لـ حد مكالمة خالد..
ذكرى: يعني خالد ولد عمتي عارف
ريم: أنا انصدمت وصدقيني وعدته ما أرجع وأدق عليه..
ذكرى: وليش رجع يدق هذا؟!
ريم: مدري يمكن انقهر من خالد..
ذكرى: ليش ياريم.. ليش كل هذا تسوينه؟!
ريم بـ خوف: دلال هي الي غرتني.. قالت لي بيحبك ويدللك..
ذكرى: قصرنا معك؟!
ريم: أنتي لا.. بس أمي وأبوي وينهم؟! علميني وينهم..!
ذكرى: وعشان ربي كاتب لك الحظ هذا تعاقبين نفسك؟!
ريم: ذكرى صدقيني ما بغيت الشئ هذا بس دلال جبرتني..
ذكرى: من اليوم ورايح هـ الدلال تقطعين علاقتك فيها.. والسنة خلاص مابقى شئ عليها وتخلص.. السنة الجاية راح ننقلك لـ ثانوية ثانية.. وحطيها في بالك.. ثانوية فيها دلال ماراح تدخلينها..
كانت ريم تسمع كلام ذكرى وهي تبكي.. ماكانت متوقعة تنحط بـ الموقف هذا..!
صعبة لما تكون البنت بعيدة كل البعد عن أهلها.. تكون بـ عالم غريب تعيش فيها لـ حالها.. تقاوم هـ الزمن من غير لا أحد يوقف معها.. ريم أخطت.. وأمها وأبوها أخطوا.. وحتى ذكرى.. المرة الموضوع كان بسيط وصار بيد ذكرى الي حنت على أختها.. ولا حبت تظلمها أكثر..لكن لو انعادت مرة ثانية الله أعلم وش بيصير؟!
\
أما طلال فـ حس إنه ما أبرد حرته.. وعرف خالد وش علاقته بـ ريم..
نواف: طلال الي ماأخذ عقلك..
طلال: تعال فاتك تو اتصلت في ريم..
نواف: اتصلت عليك
طلال: لا.. اتصلت ورد أختها الكبيرة
نواف بـ خوف: وبعدين؟!
طلال: قلت أهلين ريومه؟!
نواف: وبكل وقاحه تقولها..!
طلال: أنا طلال... لازم تعرف قدري ما تفضل خالد علي..
نواف: أنت شسويت بـ البنت..؟!
طلال: قرصة أذن أعلمها من تكون ومن أكون..!
نواف: ماتوقعت حقير إلى الدرجة هذي,,
طلال: خالد هو الي ابتدى معي..
نواف: ويمكن خالد حب يستر عليها يمكن من أقاربه..
طلال: حتى لو أخته.. ما أسمح له يأخذ شئ من ممتلكاتي..
نواف: أنت إنسان عندك عقل.. وش بتستفيد لا فضحت البنت..
طلال: مو مهم الإستفاده المهم أقهرها مثل ماقهرتني...!
نواف: البنت ماسوت لك شئ.. خالد هو الي طلب الرقم... اذا بتنتقم انتقم من خالد..
طلال: ههههههههه ومن قالك ماراح انتقم.. بكرى بروح شخصياً لـ خالد وبقوله ان ريم تحبني وتبيني.. وراح تكلمني
نواف: خسارة العمر الي صادقتك فيه.. قهر أنت تسمى صديق..
كان طلال يناظره بغرور.. مايدري ليش يسوي كل هذا.. بس بـ داخله مقهور من خالد.. وليش يأخذ ريم منه..!
طلع نواف وهو يحس الدنيا كلها فوق راسه.. خايف على البنت الي ما سوت فيهم شئ.. وعلى خالد الي عمرهـ ما شاف منه الغلط..
قرر يتصل فيه وينبه حتى يأخذ حذرهـ من طلال ونيته..
خالد: هلا هلا بـ الشيخ نواف..
نواف: هلابك أكثر
خالد: شفيه صوتك؟!
نواف متردد ولا يدري وش يقول له: والله ماني عارف شقول لك.. بس بسألك.. ريم وش علاقتك فيها؟!
خالد بـ خوف: شفيها ريم.. تكلم؟!
نواف: انت علمني وبصارحك بكل شئ
خالد: الصراحة ريم بنت خالي..!
انصدم نواف من الي سمعه.. كان حاس انه يعرفها بس ماتوقع انها قريبة منه الى الدرجة هذي..
خالد: نواف شفيه ترى ضيقت صدري
نواف: الحقيقة طلال طلع نذل واتصل في بيت خالك وفضح البنت عندهم..
خالد: الحقير مواعدني ينساها وينسى موضوعها..
نواف: أنا منصدم أكثر منك.. المشكلة يهدد إنه بيضرك ويضرها..
خالد: مايخسى إلى هو.. والله ما أخليه الخسيس ..!
نواف: خالد هد أعصابك وحاول تمسك أعصابك حتى نساعد البنت مالها ذنب..
خالد: والله ما أخليه .. والله لا أربيه
نواف: الله يخليك خالد عشان سمعت البنت حاول تماسك أعصابك..
خالد: أوكي أوكي.. الحين بخليك وأرجوك أي جديد علمني عنه..
نواف: مايكون خاطرك إلا طيب.. وتكفى لا تسوي شئ تندم عليه
خالد: إن شاء الله ماقصرت نواف..
نواف: ولو خالد أنت مثل أخوي..
قفل خالد الجوال والنار مولعه في قلبه.. مقهور من حركة طلال.. تمنى إنه قريب يتوطى في بطنه.. كان خوفه على ريم.. مقدر وضعهم ومقدر ظروفهم الي يمرون فيها..!
\
في بيت أبو ياسر..
أم ياسر: شخبار خالتك أمس يوم رحتي لها
لمى خافت لا تكون عرفت بشئ: الحمد لله طيبة
أم ياسر: كان عندهم أحد
لمى: هاه لا مافيه غيري أنا وخلود وصديقتها
أم ياسر: من صديقتها؟!
لمى: بنت جيرانهم
أم ياسر: ايه..
لمى: يمه وش صار على ياسر أخوي ترى له يومين ماجى للبيت
أم ياسر: والله قلت له بتجي بسكات حياك الله.. بتجي تسوي نفسك رجال علي لا أشوف وجهك..
لمى: يمه حرام ياسر أكيد خايف علينا.
أم ياسر: أنا أدرى بـ مصلحتكم..
سكتت لمى.. لأنها تعرف أمها وتعرف كيف تفكيرها.. وإنها إذا قالت كلمة لازم تمشي حتى لو على قص رقبتها..
\
بـ الشركة كان ياسر يراجع مع سلطان بعض الأوراق..
ياسر: وقضيتي عمي؟
سلطان: باقي خمس سنوات سنوات.. يا تتنازلون أو يتم القصاص..
ياسر: يعين ربك
سلطان: وأنت ماعندك طاري تراضي أمك؟
ياسر: أمي مو عادتني رجل
سلطان: أمك أكبر منك وأفهم منك.. هي تعرف عيالها..
ياسر: مدلعتهم بـ زيادة
ياسر: من حياة عمي عبدالله الله يرحمه وأنتم متعودين على النظام هذا..
ياسر: ياسلطان المشكلة مشكلة إنك كل واحد عايش لحاله.. مو داريه عن غنده ومشكلتها.. ولا لمى ومراهقتها.. ومعاذ كل يوم والثاني طالع لي بـ شغله.. وفراس ضايع بيننا...
سلطان: بـ حنانك بتلم كل شئ؟
ياسر: أنا أفكر اترك الجامعه لين ربي يحلها
سلطان: لا انتبه.. هذا مستقبلك..
ياسر: أي مستقبل وكل البيت بـ رقبتي
سلطان: لا تعطي نفسك أكبر من طاقتها..
ياسر: آآآآه ياسلطان.. أنا الاقيها من أهلي وإلا من الشركة والدراسة وإلامن....
سلطان: من ايش تكلم فضفض عن الي بقلبك.. والله اللي راح تقولة مايطلع من جدران هـ المكتب..
ياسر: أحبها ياسلطان.. ماكله قلبي كله.. أدري إن راحتي معها هي وبس.. أبيها تكون جنبي.. كل يوم أتخيلها حولي.. جنبي.. تضمني تريح هـ القلب من همومه..
سلطان: أوووخص يالدب تحب من وراي..
ياسر: وليت القدر خلانا نحب مثل بقية الناس..
سلطان: من سعيدة الحظ الي ياسر عبدالله يحبها..
ياسر: بنت عمي
سلطان بـ دهشة: بنت عمك راشد
يهز راسه ياسر: بنت الي قتل أبوي..
سلطان: وماتفكر تخطبها؟!
ياسر: هههههههههههههه شلون أخطبها وحنا بيننا وبينهم ثار.. تبي أمي تتبرأ مني..
سلطان: دام إنك صعب توصل لها انساها وخل البنت تعيش حياتها..
ياسر: آآآه شلون أنسى الي عشت عمري كله معها.. شلون أنسى..؟!
كان ياسر يتكلم لـ سلطان عن الي بـ قلبه وسلطان مصدوم.. ياسر الي ظن إن قلبه قاسي ومايحس طلع فيه كل الحب..
ياسر كانت شخصيته من بعد وفاة أبوهـ مرة قاسية.. الي يشوفه ما يصدق إن له قلب ويحس.. تقاسيم وجه الغامة وقامته الطويلة.. وجسمه الجبر خلت الكل يحس انه بلا مشاعر..!
\
كانت دلال بـ غرفتها تكلم نواف..
دلال: حبيبي شفيك؟
نواف: اتركي ريم ولا تتصلين فيها سامعه
دلال: طيب علمني
نواف ماحب يقول شئ لـ دلال خايف لا تضرريم: مو شغلك قلت لك لا تتكلمين مع ريم وبس فاهمة
دلال: خلاص إن شاء.. أصلا مابقى شئ على نهاية السنة وأكيد بتنشغل بـ الإختبارت..
نواف: أوكيه الحين بـ خليك..
دلال: انتبه لـ نفسك..
نواف: باي
دلال: باي
/
كانت دلال خايفة لا تكون ريم سوت مشكلة وتتوهق دلال معها.. عشان كذا قررت تتجنبها بـ المدرسة لحد ماربي يحلها وتنتهي السنه..
\
الإختبارات قربت..
وذكرى حاولت تهدي الوضع مع ريم وتلم الموضوع لحد مايعدي على خير..
أما ريم فـ كان الخوف بـ قلبها لا يعيدها طلال مع عبدالرحمن مثل ماسواها مع ذكرى..
كان جو البيت جو اختبارات.. خصوصاً إن ذكرى بسنه ثاني ثانوي.. وريم بـ أول ثانوي..
وعبدالرحمن بـ الجامعه..
\
وفي بيت أبو ياسر
ياسر كان مع عبدالرحمن لكن بـ جامعه ثانية ..وكانت لمى بـ الثانوي مع خلود وبـ أول ثانوي.. أما معاذ كان بـ ثالث ثانوي.. وفراس بـ ثاني متوسط..
\
وفي بيت أم صالح..
سعود بـ ثالث جامعه.. وخلود مع لمى..!
\
أما بيت أبو خالد..
خالد بـ عمر سعود وبـ ثالث جامعه..
\
سنتين مرت من انذبح أبو ياسر.. وأبو عبدالرحمن يعاني مرارة غلطته بـ السجن..
أيام الإختبارات أكيد بتكون كلها ضغط ومثابرة وتحصيل لكل طالب على تعبه طول السنه..
أسبوعين تمر على الجميع طويلة.. وبعدها يرتاح من مرارة التعب وهم الدراسة..
\
راح تمر بـ حياتهم تغيرات كثيرة.. وراح يكون فيه خفايا ..
انتهى الجزء التاسع.. بنهاية موسم كامل.. بـ الجزء العاشر راح نبتدئ معكم بـ مرحلة جديدة من أعمارهم..!
\