يوميات رقية الدلوعة و أخوه حمد .. للقصمان فقط .. رقية .. بنت تتمتع بالأنوثة و الغنج والجمال الرباني الطبيعي دبتن بالحيل وزنه 120 ونص كيلو بس ما يمنع الدلع والرومانسية >>> باين و هي الثانية من أفراد عائلتها اللي تتكون من حمد الكبير عمروه 25 سنة .. و وزنه 40 كيلو نحيل ونحيف جداً طوله متر و 40 سم .. بس مايمنع الوسامة اللي يتمتع به اخوي حمد اللي جامعة بين جمال توم كروز و ابتسامة بشير غنيم .. و رقية اللي هي أنا عمري 22 سنة و برجي برج المركا و برج حمد الفنجال .. أخوي حمد البكر ( والبكر حبه فكر ) و أنا القعده ( والقعده حبوه رعده ) .. مع الوالد الله يطول بعمروه واسموه صالح و هو صغير السن يبلغ من العمر 50 و وزنه 77 وطوله متر و 20 سم أخوي حمد أخذ القصر من ابوي و النحف من امي .. ابوي وسيم بس كريشتوه اللي تقل حبة قهوة مشوهه المنظرشوي .. وهادي ومتواضع وطيوب وكشخه >> طالعتن من اذانوه الكشخة وأمي منيرة عسل بس انه شخصية وكلمته كلمة عمره 36 آخذه ابوي وهي صغيره طويلة طوله متر و88 >>>حارس مرمى و وزنه 49 نحيفه الله يطول بعمره .. وهذي عايلتنا الصغيرونه .. طبعاً رقية الدبة حقتهم مدلعه .. المهم ان رقية الدلوعة حبت تنزل لكم موضوع وشلون تقضي يومه بين هالعايلة واخترت يوم الخميس .. بسم الله .. الساعة 4 ووسبع دقايق فجراً رقيو الدلوعة قامت تصلي ( بما اننا هاليوم بالصيف يذن مبتسر ) .. يوم صليت و أناظر و إلى حمد ما تحركت حذيانوه (الله يعزكم) يعني ما راح يصلي و تنط شوشة رقيه وتعصب و أنا آخذ طشت و أملاه ماء وأرشقه بوجهه .. ويفز حمد .. معصب .. قال لي :لييييييييييش ترشقين ماء ؟؟ وأنا أرفع صوتي : قلت ليش ماقمت تصلي أو ابليس نيمن جنبك يالجني !! قال : إلا مصلي .. وأقاطعوه بعصبية : قلت تسذب حذيانك بمكانهن يالهلفي .. قال : لابسن كنادري السبور .. كنادر = جزمه وأنا تطير عيوني .. قلت ما عندك إلا المساجديات منين كنادر .. ويقوم حمد بكل هدوء ويطلع من دولابه كرتون كنادر جدد وملبوسات .. بس اخوي بطبعوه يحافظ على أغراضوه .. يعني وش كان موقفي بكيت بحررره رشقت الماء بوجهوه و أثره رايحن يصلي .. حمد انسان طيب باس راسي وقال لا عادي يا الرقاوي سوء تفاهم وما صار إلا خير والحمد لله .. يالله يا أعز اخت روحي نامي ..ولا تنسين قومين للفطور .. وتعود البسمة للرقية الدبه .. وتروح تنام .. يوم جت الساعة 6 و سبع دقايق و أقوم بكل نشاط وحيويه .. و أروح للمطبخ و أغسل حزمة كراث و أسوي زنجبيل >>> الناس بالحر وزنجبيل .. المهم و أحكر الزنجبيل علشان أخوي حمد ما يشرب الشاهي صلح يعني لحالوه .. و آخذ جبن مثلث و أقلي بيض وحطيت زيتون وهذي صينية الفطور .. و أروح أصحي حمد أخيي من النوم الساعة 7 إلا سبع دقايق .. ويقوم حمد الغالي بأدب واحترام >>> خايف عقب الطشت .. وأروح واقعد الصينية بالحوش .. الحوش = الفناء .. وأجيب بساط والرادو ونسمع اذاعة السعودية أنا وحمد الله يخليه مع هالفطور الرايق ..ويوم شبعنا وينسدح حمد وأنا أغير موجات الرادو وهو قاعد يغني .. طبعاً حمد صوتوه ابداع وصوت لاغبار عليه مثل صوت بلبل الخليج نبيل شعيل وكهربت صقر الخليج رابح صقر وحماس ابونايف خالد عبدالرحمن .. سبق وأن قدم على سوبر ستار بس رفضوه يقولون تسذب عمرك 12 سنة مهوب 25 سنة لأن جرم اخوي حمد صغير .. وإلا الصوت اعجبوا بوه .. المهم يوم جت الساعة 8 وسبع دقايق .. الشمس بدت تحتر وصقعت روسنا ومير نقوم وندخل بالصالة .. ويدق بيجر حمد طبعاً بيجروه الشاهين ومعروف الشاهين غني التعريف من أجود البياجر نوعيه .. التفت على حمد سألتوه : حمد من اللي دق بيجر ؟ قال وهومستحي : حبيبتي ..تبين أدق عليه .. " حمد لوه حبيبه اسمه نانسي يكلمه لوه ثلاث سنين وعلاقة حب شريفة >>> امحق شرف .. وابوي وامي دارين عن حبوه له .. جيت وأقرب لحمد : قلت ورا ما تخطبه ؟ يناظرن وعيونوه بحر من الدموع .. قال لي : يا رقية أهل نانسي تجار وناس هاي وأنا واصلن ثاني ابتدائي بدراستي وشلون يقبلونن زوج لنانسي .. أنا بكيت : قلت بس يا اخوي و الله انك بعيوني معك الدكتوراه .. يناظرن ويمسح دموعه قال : رقية حتى وظيفه مالقيت مايبون شهادة ثاني ابتدائي و إلا قدمت على الديوان ورحت للبنوك علشان وسامتي >> ذابحتوه الوسامه .. و أنا أبكي بحررره وقهر : قلت يكفي يا بعد عين الرقو .. أنا أدور لك وظيفه بأرامكو >>> اللي يشوفه هي واخوه يقول شهادته برفسور .. دق بيجر حمد مره ثانية .. حمد بحزن : أكيد تبين نانسي بأمر ضروري .. وقلت لوه : ازهم عليه شف وش تبي لا يصير به شي .. ازهم = اتصل .. راح حمد عند التليفون .. حمد بحيره وحزن : رقية التليفون ما يزهم !!.. قلت : وشلووووووون ؟؟ قال : مقطوع ابوي ما سدد الفاتوره .. وتجي رقية ترفع قميصه وتطير كالبرق وتجيب جواله .. طبعاً ابوي جايبن لي جوال لأنو موصله بدراستي لخامس وحب ابوي يرفع معنوياتي جهازي العنيد .. قلت : سم يا اخوي .. ويناظرن حمد ويبتسم .. قلت لوه : ازهم عليه وقل له دقي علي .. قال : أبشري .. ويدق على نانسي .. من أول ما قالت ألو ؟؟ قال حمد بسرعه : ازهمي على الرقم هذا ويصكه بوجهه .. وأنا أفطس عليه من الضحك .. وتدق نانسي .. وينهمر حمد وينفجر من البكاء .. ويصك الجوال بسرعه .. و أنا أهز كتفه .. قلت : حمد وش بك ؟؟ قال : نانسي !! قلت : وش به !! قال : جاه خطيب !! قلت : وافقت ؟؟ قال : لا .. بغت توافق .. ابتسمت وقلت : بغت ما وافقت !! قال : لو هي تحبن كان ما بغت .. !! ورقية عصبت : قلت كل تبن بعد البنت مهب قاعدتن لك يا قيس بن الملوح !! المهم ضاق صدر حمد شوي وبعده رجعت لوه البسمة .. يوم جت 9 وسبع دقايق وتجي أمي .. وأنا أقوم وأخم أمي مناير .. أخم = أضم .. قالت اليوم الخميس .. يوم الشرط .. وتطلع بفك "فشار " بسمتي وتعطين 2 وحمد 7 >>> تبيه يسمن وتبين أنحف .. وبعد كذا جاء ابوي المطرطع .. ونقعد سواليف وجبت لهم فطورهم مثل فطوري أنا وحمد بس بدال الزنجبيل حليب السعودية .. >>> يلعن ام الذوق يوم جت عشر إلا سبع دقايق قال ابوي يالله روحوا البسوا نبنروح نشري اغراض للبيت .. طبعاً لا جينا نشري أغراض البيت كلنا نروح .. وأروح أتكشخ .. وحمد راح يكد شعروه كان فارده عند الحلاق بس أماي كابتن عليه ماء الفجر متعرفط شعره من قدام .. المهم .. طلعنا .. أنا كديت شعري >>> من الذهانه وهي تغطى حمد لبس تيشيرت لونوه أحمر مقلم بأزرق وبنفسجي >>> والله ذوق .. طبعاً سيارتنا ددسن غماره .. أنا وحمد ركبنا بالصندوق "الصندقه ".. وابوي يسوق ومنيرة بجنبوه .. يوم وصلنا عند القصاب نبي لحمه للبيت .. وتنزل أمي يعرفونه القصابين ويرحبون به وتحركت الغيره عند ابوي ويفحط ويروح ويخليه .. المهم رحنا وخلينا أمي تختار اللحمه ..لحمة حاشي ..gulf_S_ (225): ونروح لسوق الخضره .. وأنا آقف على طرف الصندوق و اطب و أقوم أنفض الغبار عن عباتي و ينزل حمد بكل أدب .. يوم نزل حمد وأناظروه و إلاه لابسن التيشيرت وناسي يلبس بنطلون يعني جاي بالتيشيرت وسروالوه الصغير .. و أنا أهج و أبعد عنوه و يصوت لي وكان يدلعن بسوق الخضره بين هالرجال بصوت عالي رقاوي تعالي .. وأقول بقلبي :الله يلعن الساعة اللي عرفت به رقاوي الله يفشلك !! وكان كلن يناظروه جاء ابوي امسكوه قال : حمد شايفن شكلك بالمراية قبل لا تطلع ؟؟ قال : لا .. ليش !! قال ابوي : أسألك بربك ما شفت عصاقيلك اللي تقل مسواك .؟؟ ويدنق حمد ويناظر وإلى ماعليه بنظلون هو كاشخ لابسن شرابه صفراء وشرابه حمراء و كنادروه السبور الجدد .. بس الزين مايكمل .. عاد تخيلتوا حمد النحيف !! وكان التيشيرت ماسك على جسمه الرزه !! هج حمد وركب الصندوق .. بس كان حار عليه ياما وقف و ياما قعد .. وكنت أنا أناظروه من بعيد .. و أتذكر وإلاي لابستن تحت قميصي بنطلون برتقالي اسرتش برمودا >>> وشلون تجي استرتش برمودا ؟؟ و أفصخوه و أعطيه حمد وترجع لوه البسمه مرتن اخرى .. بما اني دبه .. طبعاً عقد يعني ربط عقده من قدام علشان يمسك عليه البنطلون وماينصل ؟؟ المهم مسكن حمد قال رقيه وراتس لابستن مساجدياتي .. وأناظر رجليي قلت وعمى وخزياه بس رقيه طنشت ولا همه أحد .. عباة قماشه يلمع و مساجديات ودبه .. يعني فيه أمل أحد يلتفت عليه .. بعدين رحنا مع ابوي شرينا محفر " السطل الأسود " كوسه .. ومحفر حبحر .. وقرعه وجحه وكراث >>> قصمان ما يلعبون .. بعدين رحنا لأمي وجبناه من القصاب .. وحنا راجعين الساعة 11و7 دقايق أكلتنا حرارة الشمس بالصندوق أنا و أخوي حمد ركبوا حمد علشانوه نحيف قدام بينهم .. وأنا علشاني دبه خلون عند القصاب ورجع حمد يأخذن .. المهم رجعنا وتغدينا .. يوم جت 3 ونقيل كلنا .. يوم جت أربع وسبع دقايق و نقوم .. عندنا مباراة حماس التعاون " من بريده " و الخلود " من الرس " وديه منقوله بالقناة الثانية .. رقية متعصبة التعاون .. حمد متعصب الرائد .. ويتمنى هزيمة التعاون يعني يشجع الخلود .. رقيه تشجع بحماس ويجي الهدف الأول للتعاون و أنا أنط وصلت السقف من الفرحه .. ويجي الهدف الثاني .. وانتهى الشوط الأول بتقدم التعاون كان الشوط الأول حماس ولا الريال وبرشلونه .. المهم بدا الشوط الثاني .. وأنا على أعصابي ويدخل الهدف الأول للخلود ويستانس حمد و يتعادلون بعد دقيقتين .. ويضيق صدري و أقفل .. يوم هذا ويطرد لاعب من التعاون و أقعد أصيح و تطلع جنوني .. ويطرد لاعب ثاني من التعاون >>> والله مباراة .. ويتقدم الخلود ويستانس أخيي .. يوم هذا وينجنون أهل بريدة الدقيقه 88 ويجيبون التعادل التعاون ..الدقيقة 91 الوقت الضايع ويجيبون هدف الفوز التعاون مع النقص فاااااااااااااااز التعاون .. رقيه استانست وده تفحط .. و أروح أسرق مفاتيح الددسن و أعطيهن حمد قلت يالله امش نفحط و ما صدق حمد .. ونروح لمحل رياضه وتدخل المتمرده رقيه واللي يبيع سوري و سألتوه قلت عندك شال للتعاون .. و ينهبل السوري قال : اختي شو بتئصدي ؟؟ جاء الفاهم حمد قال نبي شال أو علم أو أي شي للفريق اسموه التعاون .. السوري : سأل حمد قال اش لون فريق التعاون ؟ حمد "بسرعه " : طيب والله ماعندوه خلاف تو ماانتهت المباراة فايزين ..>>> الله من الذكى .. جيت أنا قلت : لا يا حمد فهمتوه خطأ يقصد لون الفريق وشو ؟؟ ضحك السوري .. قلت : لونوه أصفر و أزرق .. ويطلع السوري شال للنصر قال بينفع هاد ؟؟ قلت : بكيفوه ينفع النصر بعض الأحيان و والله التعاون جماهيرية يقضن بسرعه شالاته .. ونآخذ شال النصر ونطلع نشجع .. ونفحط .. ولمن وقفنا عند الاشارة حمد يشغل المسجل على اغنية لحجاب .. طرقت باب الهوى .. قالوا لي من عند الباب .. قلت افتحوا أنا حجاب .. طاق .. طيق .. طوق .. >>> والله كلمات وما له دخل بالتعاون .. رقيه شايلتن شال التعاون وترقص فوق التنده وتغني التعاون مابوووه مثلووووه بالقصيم مابووووه >>> اللي يشوفونا يقول آخذن الدوري .. ويفحط حمد عند الاشارة و اطيح من التنده على الصندوق .. بس ما جان شي ونتخانق أنا وحمد ونرجع للبيت بعد المغرب .. بعد تسذا .. تقهوينا قهوة المغرب .. يوم أذن العشاء ونتعشى مطيزيزات من يديات مناير الله يخليه ويوم جت عشر وننام .. وهكذا انتهى يوم رقية الدلوعه و اخوه حمد .. ________________________________________ ___________________________________ ________________ ____ ياعيني على القصمان وخفة دمهم