بسم الله الرحمن الرحيم.. هلا و غلا بصاحبة أطيب و أصفى قلب .. أختي سمر CC أناوالله يا سمر ما أعرفك بس من كتاباتك و روحك المرحة ماشاءالله عليك ربي معطيك موهبة إنك تدخلين القلب بسرعة و هذي تجي بالفطرة و كثير من يتمناها ..عسى حياتك دوم أفراح و إنشالله ما تذوقين الأحزان بعد اليوم .. الموضوع (1) البكاء يمكن يريح مرة مرتين ثلاث بس لا تجعلين منه ( منوال ) لحياتك لأنك و بكل بساطة تصيرين إنهزامية و هذا يعكس بعدين ضعف شخصيتك و تقبلك ( للفشل ) بس ما أقولك لا تبكين بالعكس ابكي و بعد البكاء ابكي خليك تطلعين اللي بصدرك مكتوم له سنين و من ناحية يوم حنا صغار نبكي حتى لو من دلع نلفت إنتباه ( الجميع) و الكل يسعى لإرضائنا بس الحين نكتم و نكبت لين نشيب و نموت . بس خل إيمانك في الله قوي و الله ما يبتلي إلا عباده الصالحين .... (2) بالنسبة لكتم ( همومنا ) عن الآخرين فوالله ما ألومك قليل هم الأصدقاء و الناس اللي نأتمنهم على أسرارنا بس إذا عندك ( أم ) و ( أب ) أو أخوات أو أخوان صدقيني فهم اقرب الناس لك و ما يضرك يضرهم يعني مستحيل إن هم يتشمتون فيك أو يصرحون بقصصك للآخرين قد يكونوا منتقدين لبعض التصرفات و يتسرعون بالحكم أحيانا بس صدقيني مالك غنى عن أهلك ..تصدقين أنا ودي بأحد أقدر أشكي له همومي و اللي بصدري بس إنسان ما أعرفه ولا يعرفني ولا يحكم علي . و يختفي و لا عاد أشوفه على الأقل يكون شخص أقدر احكي له هالأشياء اللي شايلها و تأكل فيني كل فترة.. (3) بالعكس بالنسبة للإنسان اللي يكون مرح و مفرفش واجد و يحب ينكت أنا أعتبره قد يكون ( أتعس ) إنسان من داخل لأنه يتخذ أسلوب الضحك للهروب من الواقع و الأحزان اللي هو عايش فيها ولا يبي يحسس أحد بضعفه فتلقينه يصطنع ( الضحكات ) و يختلق جو المرح ( الزائف ) ليهرب من الواقع ...لأني أنا مرات أسويها تصدقين حتى والله اخوياي مرات يقولون لي ياخي ليتنا زيك عايش حياتك و مستانس و مطنش للدنيا و انا في داخلي أضحك أقول ليتكم تدرون وش فيني.. ولا واحد منهم يدق علي يقول لي : دنياك ياخي إشتقنا لك من زمان ما ضحكنا والله إن حنا نتذكر سوالفك انا و العيال و نقعد نضحك ياخي إذا رجعت في الإجازة تكفى خلنا نشوفك مشتاقين لك و لسوالفك .. أنا طبعا جاملته قلت إنشالله بس أقول في نفسي وش فيه الأخ يحسبني قاعد بس أشتغل أحاول أضحكه فاضي له أنا طيب أنا ليه محد يضحكني أبي اضحك أنا من زمان ما ضحكت و الإنسان الوحيد اللي كان قادر على إنه يضحكني في أصعب أوقاتي راح وش أستفيد انا الحين.. أختي الصغيرة / سمر إنتي توك في أول المشوار و إبتسمي اليوم يمكن ما تقدرين تبتسمين بكرة و تفاءلي بالخير تجديه و إنتي إنسانة حبوبة و طيبة و ماتستاهلين إلا كل خير و إنشالله ما يجيك إلا كل خير.. الله يحفظك و عسى أيامك كلها سعادة .. BBP تراني كاتب بالعامي عشان أعرفك ما تحبين الفصحى و أخاف تكرهيني إذا كتبت فيها فقلت اريحك و ما أبيك تكرهيني