* * * ادري اني كثير وغثيث والله ادري بس الي شفته اليوم بالسوق خلاني اسطر ابداعاتي >> لا يكثر اليوم جتن امي قالت يا وليدي نبي نروح السوق عقب العشاء قلت طيب ان شاء الله صليت العشاء وانا داخل البيت والقى اهلي لابسين عباياتهم مستعدين يعني ما فيه مفر قالت امي يالله بنركب السياره قلت يالله احترون شوي بجيكم ركبت السياره وقالوا اهلي يبون خريص بلازا المهم وديتهم السوق انا بالعاده احطهم واروح اليوم قلت خلني ادخل يا رجال نتفرج على هالعالم دخلت السوق واقعد ادور واناظر هالعالم متحمسين للعيد انا والله ما دريت عنه اذكر الي اتحمس له عيد الرمضان الي اعرفه ان هالعيد حق دمان ومصارين .. والله يا السوق زحمه تقول يوزعون بلاش شيبان وعجز وشباب وبنات وبزارين سعوديين واجانب الي تبي كل اطياف المجتمع موجودين .. ! الي لفت نظري اليوم هالحريم والله يا حريمنا افصخن مره وحده عبايات مفتوحه والسيقان طالعه والعيون الحالهن مكياج كامل والوحده يالله تمشي يعني هي رزه وقسم شي يجيب المرض ما هقيت بناتنا اخربن لها الدرجه المشكله ما تلقى بينهن الرشيقه كل وحده شايلتن كرشته قدامه .. ! انا قعدت ادور واناظر من هالاشكال لين تعبت قلت خل اريح شوي من التعب شفت كراسي وطاولات واطير واقعد .. ! قلت خل اطلع جوالي اسوي بحث نشوف نكات العالم سويت بحث وتشوف الاسامي [ كلي حلا .. المزيونه .. بنظره اطيح عشره .. .. الخ .. ] والتفت يمين ويسار والله ما اشوف الا تكر والمنتشري طاقين البراقع والله ما حولي الا عبدات وين الحلا .. المهم انا ما مدان اقعد الا والي يحط ايده على كتفي يقوال هي وش الي مقعدك هنا عوائل قلت طيب وين اقعد كل شي عوائل قال بتقوم ولا انادي الهيئه انا سمعت طاري الهيئه وافز من مكاني قلت صح هذا مكان عوائل .. قمت وكملت دوران وتشوف هالشباب الي مرسم وطاق الكوبرا ويالله يمشي ولو تنفضه ما تطلع منه ريال ... وعيونهم متفقعات من مناظر الحريم >> اقعد يالي ما تناظر المهم وانا امشي والقى كراسي قاعدين عليها شباب واطير واقعد وتمر ذيك الطخما الي والله ما شفت مثل عيونه ومثل رشاقته واقعد اناظره وعيوني تمشي معه لين ابعدت وانا منهبل من هالقوام ما شاء الله عليه .. والتفت جمبي والقى ذاك الطعر الي يناظرن وميت من الضحك جت امه تنغزه وتأشرله بأيده وش بك تضحك انا عرفت انه اطرم قعد يأشر لأمه علي ويغز على عيونه وعلى الحرمه يعني شوفي هذا وشلون يناظر الحرمه .. انا وجهي صار احمر برتقالي اصفر من الفشيله واقوم اهج واكمل دوران .. شوي وتوقفن عجوز معه بناته قالت يا وليدي وين مصلى الحريم عاد انا منب احب الشرافه ابد قلت يا خاله وش تصلين الحين الساعه عشر قالت وش نسوي لهينا بالسوق .. ! والله الي شفته اليوم يشيب الراس بس مالي خلق اكتب تعبت بس بقولكم شي صار لي اليوم العصر تقريبا جتني اضافه بالماسنجر من وحده فلسطينيه تقول انه اخذت ايميلي من موقع الزعيم قالت لي حابه اتعرف عليك قلت انا هلا والله قالت وش اسمك جيت بقوله خالد قلت يا رجال قله انس خل نشوف وش تقول قالت الله اسمك حلو كتير قلت انا وينه وين الحلا قالت بالعكس اسم انس منتشر كتير بفلسطين قلت بقلبي هذا بلا ابوك يا عقاب قالت ممكن اطلب منك طلب قلت آمري قالت انت تروح مباريات الهلال قلت ايه قالت تكفى وصل سلامي لـ ياسر وقله اني احبه كتير وربي انا بذيك اللحظه مت من الضحك تحسب الملعب حاره ادخل واسولف مع اللاعبين قلت له طيب ان شاء الله واصكه حظر وديليت الي بغيت اوصله من هالسالفه ان ياسر ما شاء الله عليه محبوب حتى بفلسطين .. وشـوكرا >> ولا شكرا عشان ما يزعل زيـآد