الأحد 30 / 9 / 1427 هـ مساكم الله بالخير .. للأمانة خنقتني العبرة وأنا أنسق هالموضوع مو مصدق أنه أخر يوم في رمضان وآخر لقاء مع أحبابي الاعضاء ضيفتنا لهذا اليوم المتميزة طرحاً .. المبدعة دائماً : عنود الغيد نترككم مع هذا الحوار الرائع .. 1 / في ثلاثة أسطر .. من أنتِ ..؟؟ ج/ امم عنود الغيـد ، 17 سنه ، على قدر من الجمال خخخخخ <-- طراها حقين زواج المجلات من جماهير الازرق و القناص امم مزاجيه ، عصبيه احيانا على حسب الشخص اللي اتعامل معاه اذا امون اعصب اذا ما امون اكتم .. ما احب احكم على احد من غير ما اعرفه .. احب احط اسباب لكل شي كل شي بدون استثناء .. احب النقد الموجه لي انا شخصياً .. و احب الكوكيز ما احب البيره ابد تحوم كبدي ريحتها خخخ الظاهر ابو ريان قال 3 سطور 2 / ماذا يعني لك شهر رمضان ...؟؟ شهـر الروحانيـة ، و الهدوء مع الذات شهـر التسامـح ، شهـر السهـر والتأمــل .. ! 3 / ما هو جدولك اليومي في هذا الشهر الفضيل ..؟؟ والله وانا أختك على حسب النفسية و المزاج / بس بالعاده يعني .. ارجع من المدرسة واناظر مع اخوي شريط سامي <-- يفطر عليه اممم همن اقضي يومي بين مصحف و مطبخ و تلفزيون .. إلى منه جا في الليل شوي دخلت ع النت و إن كان عندي مشوار اقضيه .. همن أنام حاله استثنائية : اذا كان عندي اختبار بكره انوي نيـّة المذاكرة .. ! 4 / هل هناك اختلاف في جدولك في رمضان وغيره ..؟؟ أكيـد .. يكفي زحمه المطبخ و حوستي فيه 5 / موقف أو حدث صار لك في رمضان وما تنسينه ..؟؟ امم ، مافيه واللـه .. انا بنتون عاقله <-- والي 6 / موقف صار لك وانت صغيرة مع الصوم ..؟؟ اذكر إني كنت افطر أذوق الفيمتو همن ارجع أصوم <-- أمي تقولي ميخالف 7 / ما هو اجمل وقت لديك في رمضان لقراءة القرآن ..؟؟ قبل الفطور بدقائق ، و قبل السحور بدقائق 8 / ما هو اجمل وقت لديك في رمضان لتصفح المنتدى ..؟؟ هذا أول رمضان يمر علي في المنتدى ما أتصفحـه يوميـاً ..! بس ما بين الساعة 8 إلى الساعة 11 يكون الجو حلو 9 / برنامج أو مسلسل تتابعينه في رمضان ..؟؟ أحب الدراما التاريخيه .. وقتي ما يسمح لي لكني اخترت " خالد بن الوليـد " و " أبناء الرشيـد الأمين والمأمون " و " باب الحارة " هذي المسلسلات اللي تستحق المشاهدة ..! ولو ان " أبناء الرشيد " لك عليـها في المصداقية بس تقضيه هـ العصـريـة 10 / وجبة تحرصين على تواجدها في السحور ..؟؟ مقدر أقول وجـبه .. لأني أتسحر على مويه بس 11 / وجبة تحرصين على تواجدها في الفطور ..؟؟ برضو مو وجبه ... الخبـز 12 / من يشدك صوته من المقرئين ..؟؟ الشريم ، العجمـي ، العفـاسي 13 / وش أكثر شيء تحرصين عليه في ليالي رمضان .. وبالذات العشر الأخيرة ..؟؟ القياام وصالح الأعمال .. الله يجعلنا من عباده الصالحين . 14 / 3 عضوات تقدمين لهم الدعوة للفطور ...؟؟ منيب عازمـة بلـو ولا حايـره : ) خل أشوف وجيه جديدة شرشر / sun / عطر الرحيل / هاهـ / عموشه / المزن / الجمال النائم / و بعـض الناس اللي عيو يعلموني بـ يوزرهم <-- ابو ريان سجلت الثلاثة عندك وإلا أزيـد ؟ 15 / 3 عضوات تقدمين لهم الدعوة للسحور ..؟؟ بلـو و حايـره الله يكفينا شرهم و والي 16 / هل يوجد هناك أمور تمارسينها في غير رمضان .. ولا تمارسينها في رمضان .. ومثل ماذا ..؟؟ الأغاني اللـه يهديني وياكم 17 / لماذا لا نأكل السمبوسة الا في رمضان ..؟؟ { خخخخـ بلاك اللي ما ياكلها حتى في رمضان } الناس وانا أختك إلا منهم جاعوا قاموا يتفننون في الاكل . وإلا فيه احد يصف السمبوسة كذا --> 18 / ولماذا 90 % من انتاج المسلسلات العربية لا يتم الا في رمضان ..؟؟ يالله لا تعاقبنـا.. عودونـا إن رمضـان مغيـر كل و ناظـر ..! وليتـها مسلسلات على سنـع !! انا ما املك الإجابة الشافية/اسأل عامر الحمود يمكن يعلمك ليـه <-- طرّاها هياطه و طاش الأصلـي 19 / ولماذا الشيخ السديس والشيخ الشريم محتكرين امامة الحرم في رمضان منذ سنوات ..؟؟ و هو فيـه أحلـى من قراءاتهم و دعواتهم و خشوعهـم .؟ 20 / ياسر القحطاني ضيف بيتكم اليوم .. وش راح تقدمين له فطور ..؟؟ امم يبليها دخله مطبخ من الظهر بسوي له ملوخية خابرته يحبها 21 / وعزمتوه على السحور ووافق .. وش راح تقدمين له سحور ..؟؟ باقي ملوخية الفطور خخخخـ اللـي يآمر به ابو سعيـد 22 / ثلاث لاعبين تتمنين انهم ضيوفك .. من راح تختارين ..؟؟ ياسر راحت عليه عزيمته خلاص امم أبي الأسطورة \ سامي الجابر الحارس العماني \ علي الحبسي ولـد خالتـي \ معـاذ BBP <-- طرّاهـا ان له مستقبل احتراف في الهلال 23 / هل سيكون للعمرة نصيب في جدولك في هذا الشهر ..؟؟ للأسـف ما حصلت لـي . 24 / ما رأيكِ في الدراسة والدوام في رمضان ..؟؟ والله ولو الود ودي كان نمت للظهر و سحبت على الأشياء ذي كلها بس مو سـيء . 25 / وهل انتِ مع ان الدوام يكون طبيعي في رمضان يعني من الساعات المبكرة ..؟؟ لا لا لا .. كذا و يااله ..! 26 / دعاء تحرصين على ذكره يوميا قبل الفطور ..؟؟ * اللـهم إني لك صـمت ، وعلى رزقـك أفطـرت ذهب الظمأ و ابتلت العروق ، ثبت الأجر إنشاء لله . \\ اللـهم انـك أعطيتنـي خيـر الناس في الدنيا دون أن أسألك .. فلا تحرمني من صحبتهم في الجنة . \\ اللـهم أدمـها نعمـه .. و احفظهـا من الزوال . * 27 / لماذا اغلب الناس لا يشترون أغراض رمضان الا في آخر يوم من شعبان ولا يشترون اغراض العيد الا في آخر يوم في رمضان ..؟؟ تخبر عروض بنده و الكارفور ما تبدى الا قبل رمضان بيوم او يومين 28 / اسئلي سؤال وأجيبي عليه ..؟؟ سـ / كيف قسم ابن منظور كتابه " لسـان العرب " ؟ جـ / قسمه إلى عده أبواب و فصول ورتب اللغـة حسب الحروف الهجائيـة .. <-- حايره هذا واجب الأدب اللي ما حليتيه 29 / اسئلي سؤال للاعضاء ..؟؟ وش آخـر مسـج جاك على جوالكـ / ـي ؟ 30 / خذي نفس عميق .. وأكتبي كلمة أخيرة ..؟؟ قد مـنّ اللـه علينا أن بلغنـا رمضـان نسأله عز وجل أن يتقبل منا صيامنا وقيامنا .. :::::: أشكرك ابو ريان ع الاستضافة و ع الفكرة الحلـوة .. وأتمنى إني ما كنت ثقيلة عليكم .. والشكر موصول لجميع اللي قايمين برمضان في المنتدى بسم الله عليكم والله لا يحرمنا منكم إنشاء لله . ضيفنا ليوم الغد هو : العيد نسأل الله يتقبل منا ومنكم صالح الاعمال .. قبل أن اودعكم .. أتقدم بالشكر الجزيل لكل ضيف شارك معنا .. والشكر الجزيل لكل مراقب ومشرف ساعدني في هذه اللقائات .. والشكر الجزيل لكل عضو تواصل معنا بردوده وقرائته لهذه اللقائات .. وشكر جزيل وخاص لـ ( المزن الهلالي ) الجندي المجهول في هذه اللقائات .. أشكركم من أعماق قلبي وترقبوا قريباً : ( ثلاثين يوم وثلاثين ضيف .. ارقام واحصائيات ومفارقات وطرائف ) الامضاء : عين ضاء