الاحد 23 / 9 / 1427 هـ مساكم الله بالخير .. ونتواصل معكم عبر هذه اللقائات الجميلة .. ضيفنا لهذا اليوم هو المراقب المحشش عاشق نانسي .. الزاحف : بن خوري مراقب الاقسام الرياضية نترككم مع هذا الحوار الرائع .. 1 / في ثلاثة أسطر .. من أنت ..؟؟ انا قصة انسان .. انا جرح .. انا سالي سالي << هذي كنت اشوفها برمضان اللي فات الله يهديك عاد يابو ريان هذا سؤال تستفتح فيه .. 2 / ماذا يعني لك شهر رمضان ...؟؟ شهر رمضان الواحد يعيش فيه روحانيه الشهر وتكثر عنده العباده والصلاة ويحاول انه يعمل خير عشان ربي يعتقه من النيران في هذا الشهر الفضيل .. والواحد المفروض انه يعمل لادراك ليله القدر .. ليفوز باجر هذه الليله لكن المشكله وين تحتري ليلة القدر او تعيش رمضان بروحانيه وانت تصحى من النوم تفطر مع روبن واخوه واذا جيت تتسحر وبتنام تلقى بوجهك ياسر 20 وان جيت تبي تقرى قران بعد صلاة الفجر .. تلقى فيصل يكلمك يقول هاه سويتوا تغطيه والا لا والا اذا جت الساعه 12 او 1 دقوا عليك بعض الناس قالوا امش نشيش فاعتقد ان الشخص بينسى الروحانيه مع هذي الاشكال ..!!! 3 / ما هو جدولك اليومي في هذا الشهر الفضيل ..؟؟ جدولي اليومي ماخذ اجازه اصحى من النوم قبل الاذان بربع ساعه واذا اذن اكلت تمره وشربت مويه وحطيت سمبوسه في جيبي وبعدها اطلع بيت روبن لان بنت عبد الله .. قالبته مطعم ما تخلي السمبوسه سمبوسه مخليته مطبق وسندوتش كباب و الشاهي ثلاجه صغيره فيها 4 كيلو سكر واجلس اتبطح عند روبن لين يجي طاش ماطاش واشوف طاش وصاحبة الامتياز .. واللي بلاني في مسلسل صاحبه الامتياز لاني كل ما جيت اشوف ابو طلال قام يتمسكن ويقطع في ثيابه يقولي : ياولد خلك من باب الحاره وخلنا نغطي صاحبه الامتياز فيها وحده بنت العوضي طخمه << كب العفش و باقي الجدول فيه مسلسلات وفيه تقضيه مشاوير او جلسة على الانترنت وعلى حسب الوضع .. 4 / هل هناك اختلاف في جدولك في رمضان وغيره ..؟؟ لا مافيه اختلاف دام اوقات الصلوات ثابته .. 5 / موقف أو حدث صار لك في رمضان وما تنساه ..؟؟ اول يوم في رمضان يوم كنت في رابع ابتدائي توني احس اني بديت افهم وش رمضان وقالوا لي ان الناس يحاولون يبتعدون عن المعاصي و يسوون أعمال خير وكان معي سيكل يومها .. وجا في بالي اشوف هل الناس يسوون معاصي او لا وحطيت السيكل عند باب البيت ولا دخلته داخل وكان باقي على الاذان ساعه .. وقلت بشوف الناس يسوون معاصي او لا كانهم سرقوه فانهم يسوون معاصي .. وان كان ماسرقوه فهم صادقين الدنيا امان والشياطين غابت دخلت البيت وانا بالحوش .. وفاتح الباب فيه بزبوز مويه .. رحت على طول اغسل وجهي ويدي ويوم سكرت المويه لقيت واحد قدامي سحب السيكل وهرب فيه وبعدين على طول فتحت البزبوز وشربت مويه وحلفت ما اصوم وحسيت ان رمضان العن من شعبان 6 / موقف صار لك وانت صغير مع الصوم ..؟؟ كنت العب كوره عقب صلاة الفجر يمكن كنت قاعد العب 3 ساعات وعطشت مرة وكان فيه براده عند الملعب اللي كنت العب فيه .. يوم شفتها بارده مره وطالع منها زي الرطوبه من برودتها واجي اقول بارش نفسي ووجهي عشان ابرد على نفسي ويوم حطيت يدي لقيت المويه بااارده .. تخلي الواحد ينتعش انتعاش موب طبيعي ويجي واحد من العيال اللي كنت العب معهم كوره ويفتح المويه ويحط يده تحتها يشوف برودتها وشوي قال .. اذا المويه مرة بارده ماتفطر ويشرب واقوم اشرب معه " حطيتها في ذمته " .. وانا قاعد اشرب ومالفيت الا وامي وراي كانت قاعده تدور علي واول ما شافتني وانا اشرب المويه خلتني .. يوم التفت عليها لقيت كف يمشي مليونين لزقني في البارده من جديد وركبتني السياره وقطعتني وانا فيها .. 7 / ما هو اجمل وقت لديك في رمضان لقراءة القرآن ..؟؟ بعد كل صلاة وبين الاذان والاقامه .. واحاول مع كل صلاة اخلص جزئين بحيث اني اقرى نص جزء بين الاذان والاقامه وبعد كل صلاة اتمم باقي الجزئين وماعندي اي طقوس لقراءه القران .. اي وقت افضى فيه اقرى 8 / ما هو اجمل وقت لديك في رمضان لتصفح المنتدى ..؟؟ اممم مافيه وقت محدد ولا فيه وقت جميل لان كل وقت اخش فيه القناص جميل بالنسبه لي 9 / برنامج أو مسلسل تتابعه في رمضان ..؟؟ طاش ماطاش مع روبن والا ماودي فيه بس ازعجنا رأفت الهجان على قناة هنبعل باب الحاره ومن تالي صرت اشوف خالد بن الوليد وصاحبة الامتياز عشان ابو طلال ومسلسل ايمن زيدان الظاهر اسمه الوزير حمدي 10 / وجبة تحرص على تواجدها في السحور ..؟؟ كبسه لحم والا دجاج 11 / وجبة تحرص على تواجدها في الفطور ..؟؟ ادينا فيمتوو / مكرونه 12 / من يشدك صوته من المقرئين ..؟؟ السديس 13 / وش أكثر شيء تحرص عليه في ليالي رمضان .. وبالذات العشر الأخيرة ..؟؟ اني اعبد ربي قد ما اقدر واكون بعيد عن المعاصي ودايم اكون في العشر الاواخر في مكه لكن السنه هذي تاخرت يومين بس ان شاء الله اليوم ماشي 14 / 3 أعضاء تقدم لهم الدعوة للفطور ...؟؟ موب على كيفك 3 .. بعزم على كيفي ابو طلال و فرحان الشمري و زعيم هلالي y-20 و ابو سعود الهلالي و بندر وقلبي هلالي و نواف الذهبي رامي السهام و امل مقتول و حالي الذوق و زعيم رسمي و مدمن بحب يوسف والنمرود والهواوي ونحبك ياهلال وابو فيصل وكل شخص يعمل في هذا الموقع بضمير 15 / 3 أعضاء تقدم لهم الدعوة للسحور ..؟؟ استنى علي معتوق يجيب لي التيس وبعدها بأعزمكم كلكم 16 / هل يوجد هناك أمور تمارسها في غير رمضان .. ولا تمارسها في رمضان .. ومثل ماذا ..؟؟ في غير رمضان كل يوم اشوف نانسي بس من جا رمضان ما صرت اشوفها والسبه هالمسلسلات خربت علينا .. 17 / لماذا لا نأكل السمبوسة الا في رمضان ..؟؟ والله بيتنا ياكلونه على مدى 365 وما تفرق معهم .. فـالسمبوسه صارت عندي ادمان على مدار السنه مو في رمضان بس 18 / ولماذا 90 % من انتاج المسلسلات العربية لا يتم الا في رمضان ..؟؟ عشان يلهوني عن نانسي 19 / ولماذا الشيخ السديس والشيخ الشريم محتكرين امامة الحرم في رمضان منذ سنوات ..؟؟ الشريم مادري لكن السديس مافيه افضل منه 20 / ياسر القحطاني ضيفك اليوم .. وش راح تقدم له فطور ..؟؟ خوضره 21 / وعزمته على السحور ووافق .. وش راح تقدم له سحور ..؟؟ بعد خوضره 22 / ثلاث لاعبين تتمنى انهم ضيوفك .. من راح تختار ..؟؟ رونالدو و ياسر القحطاني و مردونا وزيدان واذا فيه افضل منهم اتحداكم 23 / هل سيكون للعمرة نصيب في جدولك في هذا الشهر ..؟؟ اليوم ان شاء الله 24 / ما رأيك في الدراسة والدوام في رمضان ..؟؟ لعانه !! 25 / وهل انت مع ان الدوام يكون طبيعي في رمضان يعني من الساعات المبكرة ..؟؟ ايه بالعكس انا اشوف ان الدوام في رمضان من الساعات المبكره افضل من الساعات المتاخره لان مدة الدوام واحد هي هي ما يتغير يعني بدال ما انام واصحى واروح للدوام اصلي الفجر واقرى قرآن ساعه او ساعتين واداوم و انا مواصل وارجع انام فالدوام في الساعات المبكره احسن من المتاخره والرسول عليه الصلاة والسلام قال ان الله بارك لامته في بكورها 26 / دعاء تحرص على ذكره يوميا قبل الفطور ..؟؟ اللهم ارحمنا فوق الارض وتحت الارض ويوم العرض .. وبعدها اقول دعاء الافطار وافطر 27 / لماذا اغلب الناس لا يشترون أغراض رمضان الا في آخر يوم من شعبان ولا يشترون اغراض العيد الا في آخر يوم في رمضان ..؟؟ الخيل الاصيلة تلحق تالي << سباق هجن اما اغراض العيد فانا ضدك في هالكلمه لان الحريم وسواويقهم من ثاني يوم او ثالث يوم في رمضان بدو يسكرون الشوارع من زحمتهم في السوق واسال روبن عن بنت عبد الله << فضحهم 28 / اسئل سؤال وأجب عليه ..؟؟ وش رايك بحادث ياسر ؟ قحطاني وصدم بتاكسي ماتفرق بيتنازلون عن بعض 29 / اسئل سؤال للاعضاء ..؟؟ مالمقصود بالخوضره ؟ 30 / خذ نفس عميق .. وأكتب كلمة أخيرة ..؟؟ احب اشكر كل المراقبين وكل المشرفين وكل الاعضاء اللي قاعدين يبذلون جهد في سبيل انجاح هذا الموقع .. وكل شخص يحب ياسر القحطاني ويحرص على مصلحته ويحب النجاح له .. واتمنى التوفيق للجميع وادعي رب العالمين ان يعتق رقابنا من النار في هذا الشهر الكريم وهذه الايام الفضيله و العشر الاخيره من هذا الشهــر .. سبحانك اللهم وبحمدك اشهد ان لا اله الا انت استغفرك واتوب اليـك .. ضيفتنا ليوم الغد هي : (( M!ss_Cute )) مشرفة منتدى صور وفيديو القناص مقتطفات من اجاباتها : * ما ادري انا حنانه ولا لا * صوتي رج السعوديه كلها ...!! * الكل متنح ومفهي ومحد راح يفهم شي * تبي تورطنا يا ابوريان انتظرونا الامضاء : عين ضاء