بسم الله الرحمن الرحيم عضو أبدع و تميز بحصرياته في قسم صور و فيديو القناص .. شخص وهب نفسه ليكون ملك لنادي الهلال .. ولكي يكون جنبا ً الى جنب لكل خطوات الكابتن ياسر داخل الهلال شخص أمد القسم بكثير من الصور الخاصه و الحصريه للكاسر سوا ءاً داخل النادي أو خارجه .. جعل لنفسه مكانه في قلوب محبي القناص و أعضاء منتداه .. عضو حصل على عدة ألقاب و منها .. عدسة المنتدى .. مصور المنتدى .. فوتوغرافي المنتدى .. بكل الحب و التقدير يسعدنا و يشرفنا أن نستقبل ضيفنا المصور الرائع / نايف السهلي في هذا اللقاء المميز : * هلا و غلا أخوي نايف و نرحب فيك بقسم الصور و الفيديو في البدايه نبيك تعرفنا على بطاقتك الشخصيه .. ؟ -الأسم / نايف بن محمد بن سعود السهلي -العمر /23 سنه .. -الوظيفه /خريج ثانويه عامه و الوظيفه على الأبواب إن شاء الله .. -الهوايه / كرة القدم - الأنترنت * طيب يا الغالي نبيك تعلمنا وشلون كانت بدايتك مع الكاميرا .. ؟ و كيف كانت ؟ و وش هي اول صوره لقطتها .. ؟ - والله يالغالي كانت أول صوري بكاميرا الجوال و كانت بسيطه جداً .. و أخبر أنها برمضان العام الماضي .. و الواحد لازم تواجهه عقوبات ببدايته .. * نايف .. وش هو سر تواجدك الدائم داخل النادي مع العلم أنه كلنا نحب الهلال .. بس ما سنترنا مثلك كل أبو دايم .. وش تعليقك .. ؟ - أنا أشوف نفسي أكبر متعصب هلالي .. وحبي لياسر القحطاني و إختياره لناديي المفضل هو اللي ( زاد الطين بله ) .. يعني صرت هلالي ياسر متعصب .. * ماشاء الله عليك .. كيف تقدر تقسم وقتك بين النت و بين النادي و بين أمورك الخاصه .. ؟ - والله يالغالي وقتي أولاً كله لنادي الهلال لأن أوقاته محدوده .. و ثانيا أموري الخاصه أقدر أخلصها بعدين .. و إذا خلصت من النادي و من أموري الخاصه تفضيت للنت .. * نايف .. ما تنحرج لا منك جيت تصور اللاعبين و بالخصوص ياسر .. ؟ و بعدين وش أطرف موقف واجهك مع اللاعبين في النادي ..؟ - والله أكون معك صريح .. مرات أنحرج من اللاعبين .. لأنهم يشفوني دايم مسنتر عند ياسر .. و مرات أنحرج من الجمهور نفسه .. أطرف موقف ما أنساه هو أني مره رحت للنادي أبي أصور ياسر .. و حاولت أدخل أرض الملعب و منعوني .. و تسللت من عند مدخل اللاعبين و ما كنت أدري أن " مرجان " - حارس النادي .. ورا الباب اللي بدخل منه .. المهم يوم فتحت الباب إلا و ذيك الضربه بالعقال بظهري و أحط رجلي و أنا أصرخ من الألم .. بس كله يهون لعيون أبو سعيد .. * في أحد اللقاءات اللي تسويها إدارة الموقع مع ياسر أشاد ياسر بعدسة نايف السهلي .. وش شعورك و كيف كان ردة فعلك .. ؟ - فخر لنايف السهلي .. إن الإشادة تجي من لاعب بحجم الكابتن ياسر القحطاني .. و إشادته أعتبرها وسام على صدري و داعم لي أني أبذل و أقدم كل ما أملك لهالموقع .. * نايف بصراحه .. من هو الشخص اللي تحب تأخذه معك النادي ..؟ و من هو أقرب شخص لك في المنتدى .. ؟ - والله لا جيت أروح النادي .. يروح معي بعض أقاربي واللي وده يروح معي حياه الله .. أما في المنتدى .. فالأعضاء ( شاطر وعاشق الكاسر ) و ( عاشق الكاسر ) هم أقرب الناس لي لأنهم عيال عمي .. * نايف .. نبيك تتكلم عن هالأشخــاص بصراحه : Yasser 20 أبو سلطان هو اللي دلني على الموقع و هو اللي شجعني حتى وصلت إلى ما وصلت له .. جهوده بالموقع واضحه و أفضاله على الجميع .. الله لا يحرمنا منه .. BBP الهرش الكاتب الكبير اللي يعجز القلم عن وصف أسلوبه الرائع في كتابته للمواضيع .. و خصوصاً اللي عن ياسـر .. حتى ردوده على المواضيع دائماً تشجع صاحب الموضوع لبذل المزيد من العطاء و يا ليت لو يكشف عن سر الهرش .. أبو طلال صاحب الفديو كليبات الرائعه عن ياسر و اللي تستحق المشاهده .. أسلوبه في إختيار المقاطع خياليه .. و يكفي كلمة الهرش عن أبو طلال بأنه العلامة الفارقه بالمنتدى .. عسانا ما ننحرم منه .. BBP روبن هود صاحب العقل المفكر اللي يعالج مشاكل المنتدى سواءاً من عضو أو من ضيف .. هو اللي يهتم بكل صغيره و كبيره .. جهوده بالموقع واضحه .. و الله يجزاه كل خير على اللي قاعد يسويه بالموقع .. اللي يحمل أسم محبوبنا ياسـر .. ( وصلتنا الحين مداخله من مراقبنا الاستاذ / الهـرش ) تفضل يالهرش .. * هلا نايف .. نبي نعرف وش سالفتك مع yasser 20 بالملعب في أحد مباريات ياسر مع الهلال .. ؟ - هلابك يالهرش .. والله أبد كنا في مباره الهلال والحزم .. العام الماضي اللي أنتهت 2 / 2 و كنت أنا و أبو سلطان حاضرين المباراة .. و كان سامي أساسي و ياسر بالأحتياط .. قلت أنا : إنشالله أن أبو سعيد بيدخل الشوط الثاني .. قال أبو سلطان : لا مهوب داخل .. جيت أنا و عصبت و خنقته من رقبته .. قلت : ياخوي أنا جاي هنا أنا و أنت نشجع ياسر .. مهوب تجي ضدي .. !! و زعلت أنا و قمت من عنده و خليت بيني و بينه 6 كراسي .. و المشكله ألكسندر جعله ( السكني ) ما لعب ياسر .. لكن لو أني لاقي ألكسندر حطيت حرتي فيه و توطيت في بطنه من القهر .. و أبو سلطان عزيز و غالي و يدري أن عندي كل شيء و لا ياسر .. * نايف .. أعرف أنك تحب ياسر حباً جما .. و أنك ما ترضى أحد يتكلم فيه بشيء .. بس السؤال .. لو أنتقل ياسر لأوروبا بتحبه مثل حبك لياسر بالهلال ؟ - ياسر حبه ما يروح من القلب .. حتى لو أنتقل من الهلال .. و بعدين هو ما راح يطلع من الهلال .. إلأ الأوروبا .. و أنت تدري بهالشيء و غير الهلال هو ما يبي .. ( وصلتنا يا نايف مداخله من مشرفة قسم الصور هلاليه فور أيفر ) تفضلي يا هلاليه .. *هلا والله نايف .. أنت شخـص مبـدع و تستاهل ألف وسـام على جهودك .. لكن بينك و بين نفسك .. هل تشعر أننا بالقسم أعطيناك حقك .. أو مقصرين معك ..؟ - هلا هلاليه .. لا بالعكس مو مقصرين أبد .. و أنا أخدم الموقع بالصور و المقاطع الحصريه .. و ما أرجي من وراها شيء .. حنا هنا لياسر و لخدمة موقعه فقط لا غير .. * ما هي أمنيتك اللي تتمنى أنها تتحقق في أقرب وقت .. ؟ - إحتراف ياسر القحطاني خارجياً .. نرجع لأسئلتنا .. * نايف .. وش اللي أستفده من تواجدك بهالمنتدى .. ؟ - تعرفت على أعضاء و تشرفت بمعرفتهم و صداقتهم وأكتسبت علاقات و معارف أفتخر فيها .. * كلمة آخيـرة تحب توجهها للمنتدى و أعضاءها .. ؟ -أحب أشكر كل المنتدى من مراقبين و مشرفين و أعضاء .. و أوعدهم إن شاء الله أني راح أخلص لهالمنتدى بكل ما أقدر .. و أبي أذكرهم أننا كلنا هنا لخدمة ياسر في هالموقع الرائع .. و الشكر بالذات لكم يا قسم الصوت و الفيديو .. BBP كان معنا المصور الرائع / نايف السهلي .. في لقاء سريع و خفيف .. نتمنى له التوفيق في حياته العلميه و العمليه .. و نظراً لجهوده و عطاءه المستمر بالقسم .. نتقدم له بهالوسام اللي ما يكفي عن شكرنا و تقديرنا له .. تقبلوا تحيات مشرفين و مشرفات قسم الصور و الفيديو .. كان معكم من : إعداد الحوار / بندر تنسيق الحوار/ الهرش